બ્રહ્મ પુરાણ · અધ્યાય 66

ગુડિવામણ્ડપં યાન્તં યે પશ્યન્તિ રથે સ્થિતમ્
કૃષ્ણં બલં સુભદ્રાં ચ તે યાન્તિ ભવનં હરેઃ ॥

યે પશ્યન્તિ તદા કૃષ્ણં સપ્તાહં મણ્ડપે સ્થિતમ્
હલિનં ચ સુભદ્રાં ચ વિષ્ણુલોકં વ્રજન્તિ તે ॥

કેન સા નિર્મિતા યાત્રા દક્ષિણસ્યાં જગત્પતે
યાત્રાફલં ચ કિં તત્ર પ્રાપ્યતે બ્રૂહિ માનવૈઃ ॥

કિમર્થં સરસસ્ તીરે રાજ્ઞસ્ તસ્ય જગત્પતે
પવિત્રે વિજને દેશે ગત્વા તત્ર ચ મણ્ડપે ॥

કૃષ્ણઃ સંકર્ષણશ્ ચૈવ સુભદ્રા ચ રથેન તે
સ્વસ્થાનં સંપરિત્યજ્ય સપ્તરાત્રં વસન્તિ વૈ ॥

ઇન્દ્રદ્યુમ્નેન ભો વિપ્રાઃ પુરા વૈ પ્રાર્થિતો હરિઃ
સપ્તાહં સરસસ્ તીરે મમ યાત્રા ભવત્વ્ ઇતિ ॥

ગુડિવા નામ દેવેશ ભુક્તિમુક્તિફલપ્રદા
તસ્મૈ કિલ વરં ચાસૌ દદૌ સ પુરુષોત્તમઃ ॥

સપ્તાહં સરસસ્ તીરે તવ રાજન્ ભવિષ્યતિ
ગુડિવા નામ યાત્રા મે સર્વકામફલપ્રદા ॥

યે માં તત્રાર્ચયિષ્યન્તિ શ્રદ્ધયા મણ્ડપે સ્થિતમ્
સંકર્ષણં સુભદ્રાં ચ વિધિવત્ સુસમાહિતાઃ ॥

બ્રાહ્મણાઃ ક્ષત્રિયા વૈશ્યાઃ સ્ત્રિયઃ શૂદ્રાશ્ ચ વૈ નૃપ
પુષ્પૈર્ ગન્ધૈસ્ તથા ધૂપૈર્ દીપૈર્ નૈવેદ્યકૈર્ વરૈઃ ॥

ઉપહારૈર્ બહુવિધૈઃ પ્રણિપાતૈઃ પ્રદક્ષિણૈઃ
જયશબ્દૈસ્ તથા સ્તોત્રૈર્ ગીતૈર્ વાદ્યૈર્ મનોહરૈઃ ॥

ન તેષાં દુર્લભં કિંચિત્ ફલં યસ્ય યદ્ ઈપ્સિતમ્
ભવિષ્યતિ નૃપશ્રેષ્ઠ મત્પ્રસાદાદ્ અસંશયમ્ ॥

એવમ્ ઉક્ત્વા તુ તં દેવસ્ તત્રૈવાન્તરધીયત
સ તુ રાજવરઃ શ્રીમાન્ કૃતકૃત્યો ઽભવત્ તદા ॥

તસ્માત્ સર્વપ્રયત્નેન ગુડિવાયાં દ્વિજોત્તમાઃ
સર્વકામપ્રદં દેવં પશ્યેત્ તં પુરુષોત્તમમ્ ॥

અપુત્રો લભતે પુત્રાન્ નિર્ધનો લભતે ધનમ્
રોગાચ્ ચ મુચ્યતે રોગી કન્યા પ્રાપ્નોતિ સત્પતિમ્ ॥

આયુઃ કીર્તિં યશો મેધાં બલં વિદ્યાં ધૃતિં પશૂન્
નરઃ સંતતિમ્ આપ્નોતિ રૂપયૌવનસંપદમ્ ॥

યાન્ યાન્ સમીહતે ભોગાન્ દૃષ્ટ્વા તં પુરુષોત્તમમ્
નરો વાપ્ય્ અથવા નારી તાંસ્ તાન્ પ્રાપ્નોત્ય્ અસંશયમ્ ॥

યાત્રાં કૃત્વા ગુડિવાખ્યાં વિધિવત્ સુસમાહિતઃ
આષાઢસ્ય સિતે પક્ષે નરો યોષિદ્ અથાપિ વા ॥

દૃષ્ટ્વા કૃષ્ણં ચ રામં ચ સુભદ્રાં ચ દ્વિજોત્તમાઃ
દશપઞ્ચાશ્વમેધાનાં ફલં પ્રાપ્નોતિ ચાધિકમ્ ॥

સપ્તાવરાન્ સપ્ત પરાન્ વંશાન્ ઉદ્ધૃત્ય ચાત્મનઃ
કામગેન વિમાનેન સર્વરત્નૈર્ અલંકૃતઃ ॥

ગન્ધર્વૈર્ અપ્સરોભિશ્ ચ સેવ્યમાનો યથોત્તરૈઃ
રૂપવાન્ સુભગઃ શૂરો નરો વિષ્ણુપુરં વ્રજેત્ ॥

તત્ર ભુક્ત્વા વરાન્ ભોગાન્ યાવદ્ આભૂતસંપ્લવમ્
સર્વકામસમૃદ્ધાત્મા જરામરણવર્જિતઃ ॥

પુણ્યક્ષયાદ્ ઇહાગત્ય ચતુર્વેદી દ્વિજો ભવેત્
વૈષ્ણવં યોગમ્ આસ્થાય તતો મોક્ષમ્ અવાપ્નુયાત્ ॥