બ્રહ્મ પુરાણ · અધ્યાય 48

બ્રૂહિ નો દેવદેવેશ યત્ પૃચ્છામઃ પુરાતનમ્
યથા તાઃ પ્રતિમાઃ પૂર્વમ્ ઇન્દ્રદ્યુમ્નેન નિર્મિતાઃ ॥

કેન ચૈવ પ્રકારેણ તુષ્ટસ્ તસ્મૈ સ માધવઃ
તત્ સર્વં વદ ચાસ્માકં પરં કૌતૂહલં હિ નઃ ॥

શૃણુધ્વં મુનિશાર્દૂલાઃ પુરાણં વેદસંમિતમ્
કથયામિ પુરા વૃત્તં પ્રતિમાનાં ચ સંભવમ્ ॥

પ્રવૃત્તે ચ મહાયજ્ઞે પ્રાસાદે ચૈવ નિર્મિતે
ચિન્તા તસ્ય બભૂવાથ પ્રતિમાર્થમ્ અહર્નિશમ્ ॥

ન વેદ્મિ કેન દેવેશં સર્વેશં લોકપાવનમ્
સર્ગસ્થિત્યન્તકર્તારં પશ્યામિ પુરુષોત્તમમ્ ॥

ચિન્તાવિષ્ટસ્ ત્વ્ અભૂદ્ રાજા શેતે રાત્રૌ દિવાપિ ન
ન ભુઙ્ક્તે વિવિધાન્ ભોગાન્ ન ચ સ્નાનં પ્રસાધનમ્ ॥

નૈવ વાદ્યેન ગન્ધેન ગાયનૈર્ વર્ણકૈર્ અપિ
ન ગજૈર્ મદયુક્તૈશ્ ચ ન ચાનેકૈર્ હયાન્વિતૈઃ ॥

નેન્દ્રનીલૈર્ મહાનીલૈઃ પદ્મરાગમયૈર્ ન ચ
સુવર્ણરજતાદ્યૈશ્ ચ વજ્રસ્ફટિકસંયુતૈઃ ॥

બહુરાગાર્થકામૈર્ વા ન વન્યૈર્ અન્તરિક્ષગૈઃ
બભૂવ તસ્ય નૃપતેર્ મનસસ્ તુષ્ટિવર્ધનમ્ ॥

શૈલમૃદ્દારુજાતેષુ પ્રશસ્તં કિં મહીતલે
વિષ્ણુપ્રતિમાયોગ્યં ચ સર્વલક્ષણલક્ષિતમ્ ॥

એતૈર્ એવ ત્રયાણાં તુ દયિતં સ્યાત્ સુરાર્ચિતમ્
સ્થાપિતે પ્રીતિમ્ અભ્યેતિ ઇતિ ચિન્તાપરો ઽભવત્ ॥

પઞ્ચરાત્રવિધાનેન સંપૂજ્ય પુરુષોત્તમમ્
ચિન્તાવિષ્ટો મહીપાલઃ સંસ્તોતુમ્ ઉપચક્રમે ॥