Brahma Purana · Chapter 213

aho kṛṣṇasya māhātmyam adbhutaṃ cātimānuṣam
rāmasya ca muniśreṣṭha tvayoktaṃ bhuvi durlabham //

na tṛptim adhigacchāmaḥ śṛṇvanto bhagavatkathām
tasmād brūhi mahābhāga bhūyo devasya ceṣṭitam //

prādurbhāvaḥ purāṇeṣu viṣṇor amitatejasaḥ
satāṃ kathayatām eva varāha iti naḥ śrutam //

na jānīmo 'sya caritaṃ na vidhiṃ na ca vistaram
na karmaguṇasadbhāvaṃ na hetutvamanīṣitam //

kimātmako varāho 'sau kā mūrtiḥ kā ca devatā
kimācāraprabhāvo vā kiṃ vā tena tadā kṛtam //

yajñārthe samavetānāṃ miṣatāṃ ca dvijanmanām
mahāvarāhacaritaṃ sarvalokasukhāvaham //

yathā nārāyaṇo brahman vārāhaṃ rūpam āsthitaḥ
daṃṣṭrayā gāṃ samudrasthām ujjahārārimardanaḥ //

vistareṇaiva karmāṇi sarvāṇi ripughātinaḥ
śrotuṃ no vartate buddhir hareḥ kṛṣṇasya dhīmataḥ //

karmaṇām ānupūrvyā ca prādurbhāvāś ca ye vibho
yā vāsya prakṛtir brahmaṃs tāś cākhyātuṃ tvam arhasi //

praśnabhāro mahān eṣa bhavadbhiḥ samudāhṛtaḥ
yathāśaktyā tu vakṣyāmi śrūyatāṃ vaiṣṇavaṃ yaśaḥ //

viṣṇoḥ prabhāvaśravaṇe diṣṭyā vo matir utthitā
tasmād viṣṇoḥ samastā vai śṛṇudhvaṃ yāḥ pravṛttayaḥ //

sahasrāsyaṃ sahasrākṣaṃ sahasracaraṇaṃ ca yam
sahasraśirasaṃ devaṃ sahasrakaram avyayam //

sahasrajihvaṃ bhāsvantaṃ sahasramukuṭaṃ prabhum
sahasradaṃ sahasrādiṃ sahasrabhujam avyayam //

havanaṃ savanaṃ caiva hotāraṃ havyam eva ca
pātrāṇi ca pavitrāṇi vediṃ dīkṣāṃ samit sruvam //

sruksomasūryamuśalaṃ prokṣaṇīṃ dakṣiṇāyanam
adhvaryuṃ sāmagaṃ vipraṃ sadasyaṃ sadanaṃ sadaḥ //

yūpaṃ cakraṃ dhruvāṃ darvīṃ carūṃś colūkhalāni ca
prāgvaṃśaṃ yajñabhūmiṃ ca hotāraṃ ca paraṃ ca yat //

hrasvāṇy atipramāṇāni sthāvarāṇi carāṇi ca
prāyaścittāni vārghyaṃ ca sthaṇḍilāni kuśās tathā //

mantrayajñavahaṃ vahniṃ bhāgaṃ bhāgavahaṃ ca yat
agrāsinaṃ somabhujaṃ hutārciṣam udāyudham //

āhur vedavido viprā yaṃ yajñe śāśvataṃ prabhum
tasya viṣṇoḥ sureśasya śrīvatsāṅkasya dhīmataḥ //

prādurbhāvasahasrāṇi samatītāny anekaśaḥ
bhūyaś caiva bhaviṣyanti hy evam āha pitāmahaḥ //

yat pṛcchadhvaṃ mahābhāgā divyāṃ puṇyām imāṃ kathām
prādurbhāvāśritāṃ viṣṇoḥ sarvapāpaharāṃ śivām //

śṛṇudhvaṃ tāṃ mahābhāgās tadgatenāntarātmanā
pravakṣyāmy ānupūrvyeṇa yat pṛcchadhvaṃ mamānaghāḥ //

vāsudevasya māhātmyaṃ caritaṃ ca mahāmateḥ
hitārthaṃ suramartyānāṃ lokānāṃ prabhavāya ca //

bahuśaḥ sarvabhūtātmā prādurbhavati vīryavān
prādurbhāvāṃś ca vakṣyāmi puṇyān divyān guṇānvitān //

supto yugasahasraṃ yaḥ prādurbhavati kāryataḥ
pūrṇe yugasahasre 'tha devadevo jagatpatiḥ //

brahmā ca kapilaś caiva tryambakas tridaśās tathā
devāḥ saptarṣayaś caiva nāgāś cāpsarasas tathā //

sanatkumāraś ca mahānubhāvo manur mahātmā bhagavān prajākaraḥ
purāṇadevo 'tha purāṇi cakre pradīptavaiśvānaratulyatejāḥ

yo 'sau cārṇavamadhyastho naṣṭe sthāvarajaṅgame
naṣṭe devāsuranare pranaṣṭoragarākṣase //

yoddhukāmau durādharṣau tāv ubhau madhukaiṭabhau
hatau bhagavatā tena tayor dattvāmitaṃ varam //

purā kamalanābhasya svapataḥ sāgarāmbhasi
puṣkare tatra saṃbhūtā devāḥ sarṣigaṇās tathā //

eṣa pauṣkarako nāma prādurbhāvo mahātmanaḥ
purāṇaṃ kathyate yatra devaśrutisamāhitam //

vārāhas tu śrutimukhaḥ prādurbhāvo mahātmanaḥ
yatra viṣṇuḥ suraśreṣṭho vārāhaṃ rūpam āsthitaḥ //

vedapādo yūpadaṃṣṭraḥ kratudantaś citīmukhaḥ
agnijihvo darbharomā brahmaśīrṣo mahātapāḥ //

ahorātrekṣaṇo divyo vedāṅgaḥ śrutibhūṣaṇaḥ
ājyanāsaḥ sruvatuṇḍaḥ sāmaghoṣasvaro mahān //

satyadharmamayaḥ śrīmān kramavikramasatkṛtaḥ
prāyaścittanakho ghoraḥ paśujānur mukhākṛtiḥ //

udgatāntro homaliṅgo bījauṣadhimahāphalaḥ
vādyantarātmā mantrasphig vikṛtaḥ somaśoṇitaḥ //

vediskandho havirgandho havyakavyātivegavān
prāgvaṃśakāyo dyutimān nānādīkṣābhir anvitaḥ //

dakṣiṇāhṛdayo yogī mahāsattramayo mahān
upākarmāṣṭarucakaḥ pravargāvartabhūṣaṇaḥ //

nānācchandogatipatho guhyopaniṣadāsanaḥ
chāyāpatnīsahāyo 'sau maṇiśṛṅga ivotthitaḥ //

mahīṃ sāgaraparyantāṃ saśailavanakānanām
ekārṇavajalabhraṣṭām ekārṇavagataḥ prabhuḥ //

daṃṣṭrayā yaḥ samuddhṛtya lokānāṃ hitakāmyayā
sahasraśīrṣo lokādiś cakāra jagatīṃ punaḥ //

evaṃ yajñavarāheṇa bhūtvā bhūtahitārthinā
uddhṛtā pṛthivī devī sāgarāmbudharā purā //

vārāha eṣa kathito nārasiṃhas tato dvijāḥ
yatra bhūtvā mṛgendreṇa hiraṇyakaśipur hataḥ //

purā kṛtayuge nāma surārir baladarpitaḥ
daityānām ādipuruṣaś cakāra sumahat tapaḥ //

daśa varṣasahasrāṇi śatāni daśa pañca ca
japopavāsaniratas tasthau maunavratasthitaḥ //

tataḥ śamadamābhyāṃ ca brahmacaryeṇa caiva hi
prīto 'bhavat tatas tasya tapasā niyamena ca //

taṃ vai svayaṃbhūr bhagavān svayam āgamya bho dvijāḥ
vimānenārkavarṇena haṃsayuktena bhāsvatā //

ādityair vasubhiḥ sārdhaṃ marudbhir daivatais tathā
rudrair viśvasahāyaiś ca yakṣarākṣasakiṃnaraiḥ //

diśābhiḥ pradiśābhiś ca nadībhiḥ sāgarais tathā
nakṣatraiś ca muhūrtaiś ca khecaraiś ca mahāgrahaiḥ //

devarṣibhis tapovṛddhaiḥ siddhair vidvadbhir eva ca
rājarṣibhiḥ puṇyatamair gandharvair apsarogaṇaiḥ //

carācaraguruḥ śrīmān vṛtaḥ sarvaiḥ surais tathā
brahmā brahmavidāṃ śreṣṭho daityaṃ vacanam abravīt //

prīto 'smi tava bhaktasya tapasānena suvrata
varaṃ varaya bhadraṃ te yatheṣṭaṃ kāmam āpnuhi //

na devāsuragandharvā na yakṣoragarākṣasāḥ
ṛṣayo vātha māṃ śāpaiḥ kruddhā lokapitāmaha //

śapeyus tapasā yuktā vara eṣa vṛto mayā
na śastreṇa na vāstreṇa giriṇā pādapena vā //

na śuṣkeṇa na cārdreṇa na caivordhvaṃ na cāpy adhaḥ
pāṇiprahāreṇaikena sabhṛtyabalavāhanam //

yo māṃ nāśayituṃ śaktaḥ sa me mṛtyur bhaviṣyati
bhaveyam aham evārkaḥ somo vāyur hutāśanaḥ //

salilaṃ cāntarikṣaṃ ca ākāśaṃ caiva sarvaśaḥ
ahaṃ krodhaś ca kāmaś ca varuṇo vāsavo yamaḥ
dhanadaś ca dhanādhyakṣo yakṣaḥ kiṃpuruṣādhipaḥ //

ete divyā varās tāta mayā dattās tavādbhutāḥ
sarvān kāmān imāṃs tāta prāpsyasi tvaṃ na saṃśayaḥ //

evam uktvā tu bhagavāñ jagāmāśu pitāmahaḥ
vairājaṃ brahmasadanaṃ brahmarṣigaṇasevitam //

tato devāś ca nāgāś ca gandharvā munayas tathā
varapradānaṃ śrutvaiva pitāmaham upasthitāḥ //

vareṇānena bhagavan bādhiṣyati sa no 'suraḥ
tat prasīdāśu bhagavan vadho 'py asya vicintyatām //

bhagavan sarvabhūtānāṃ svayaṃbhūr ādikṛt prabhuḥ
sraṣṭā ca havyakavyānām avyaktaṃ prakṛtir dhruvam //

tato lokahitaṃ vākyaṃ śrutvā devaḥ prajāpatiḥ
provāca bhagavān vākyaṃ sarvadevagaṇāṃs tathā //

avaśyaṃ tridaśās tena prāptavyaṃ tapasaḥ phalam
tapaso 'nte ca bhagavān vadhaṃ viṣṇuḥ kariṣyati //

etac chrutvā surāḥ sarve vākyaṃ paṅkajajanmanaḥ
svāni sthānāni divyāni jagmus te vai mudānvitāḥ //

labdhamātre vare cāpi sarvāḥ so 'bādhata prajāḥ
hiraṇyakaśipur daityo varadānena darpitaḥ //

āśrameṣu mahābhāgān munīn vai saṃśitavratān
satyadharmaratān dāntāṃs tadā dharṣitavāṃs tathā //

tridivasthāṃs tathā devān parājitya mahābalaḥ
trailokyaṃ vaśam ānīya svarge vasati so 'suraḥ //

yadā varamadonmatto vicaran dānavo bhuvi
yajñīyān akarod daityān ayajñīyāś ca devatāḥ //

ādityā vasavaḥ sādhyā viśve ca marutas tathā
śaraṇyaṃ śaraṇaṃ viṣṇum upatasthur mahābalam //

devabrahmamayaṃ yajñaṃ brahmadevaṃ sanātanam
bhūtaṃ bhavyaṃ bhaviṣyaṃ ca prabhuṃ lokanamaskṛtam
nārāyaṇaṃ vibhuṃ devaṃ śaraṇyaṃ śaraṇaṃ gatāḥ //

trāyasva no 'dya deveśa hiraṇyakaśipor bhayāt
tvaṃ hi naḥ paramo devas tvaṃ hi naḥ paramo guruḥ //

tvaṃ hi naḥ paramo dhātā brahmādīnāṃ surottama
utphullāmalapattrākṣa śatrupakṣakṣayaṃkara
kṣayāya ditivaṃśasya śaraṇaṃ tvaṃ bhavasva naḥ //

bhayaṃ tyajadhvam amarā abhayaṃ vo dadāmy aham
tathaiva tridivaṃ devāḥ pratilapsyatha mā ciram //

eṣo 'haṃ sagaṇaṃ daityaṃ varadānena darpitam
avadhyam amarendrāṇāṃ dānavendraṃ nihanmi tam //

evam uktvā tu bhagavān visṛjya tridaśeśvarān
hiraṇyakaśipoḥ sthānam ājagāma mahābalaḥ //

narasyārdhatanuṃ kṛtvā siṃhasyārdhatanuṃ prabhuḥ
nārasiṃhena vapuṣā pāṇiṃ saṃspṛśya pāṇinā //

ghanajīmūtasaṃkāśo ghanajīmūtanisvanaḥ
ghanajīmūtadīptaujā jīmūta iva vegavān //

daityaṃ so 'tibalaṃ dṛṣṭvā dṛptaśārdūlavikramaḥ
dṛptair daityagaṇair guptaṃ hatavān ekapāṇinā //

nṛsiṃha eṣa kathito bhūyo 'yaṃ vāmanaḥ paraḥ
yatra vāmanam āsthāya rūpaṃ daityavināśanam //

baler balavato yajñe balinā viṣṇunā purā
vikramais tribhir akṣobhyāḥ kṣobhitās te mahāsurāḥ //

vipracittiḥ śivaḥ śaṅkur ayaḥśaṅkus tathaiva ca
ayaḥśirā aśvaśirā hayagrīvaś ca vīryavān //

vegavān ketumān ugraḥ sogravyagro mahāsuraḥ
puṣkaraḥ puṣkalaś caiva śāśvo 'śvapatir eva ca //

prahlādo 'śvapatiḥ kumbhaḥ saṃhrādo gamanapriyaḥ
anuhrādo harihayo vārāhaḥ saṃharo 'nujaḥ //

śarabhaḥ śalabhaś caiva kupathaḥ krodhanaḥ krathaḥ
bṛhatkīrtir mahājihvaḥ śaṅkukarṇo mahāsvanaḥ //

dīptajihvo 'rkanayano mṛgapādo mṛgapriyaḥ
vāyur gariṣṭho namuciḥ sambaro viskaro mahān //

candrahantā krodhahantā krodhavardhana eva ca
kālakaḥ kālakopaś ca vṛtraḥ krodho virocanaḥ //

gariṣṭhaś ca variṣṭhaś ca pralambanarakāv ubhau
indratāpanavātāpī ketumān baladarpitaḥ //

asilomā pulomā ca bāṣkalaḥ pramado madaḥ
svamiśraḥ kālavadanaḥ karālaḥ keśir eva ca //

ekākṣaś candramā rāhuḥ saṃhrādaḥ sambaraḥ svanaḥ
śataghnīcakrahastāś ca tathā muśalapāṇayaḥ //

aśvayantrāyudhopetā bhindipālāyudhās tathā
śūlolūkhalahastāś ca paraśvadhadharās tathā //

pāśamudgarahastāś ca tathā parighapāṇayaḥ
mahāśilāpraharaṇāḥ śūlahastāś ca dānavāḥ //

nānāpraharaṇā ghorā nānāveśā mahābalāḥ
kūrmakukkuṭavaktrāś ca śaśolūkamukhās tathā //

kharoṣṭravadanāś caiva varāhavadanās tathā
mārjāraśikhivaktrāś ca mahāvaktrās tathā pare //

nakrameṣānanāḥ śūrā gojāvimahiṣānanāḥ
godhāśallakivaktrāś ca kroṣṭuvaktrāś ca dānavāḥ //

ākhudarduravaktrāś ca ghorā vṛkamukhās tathā
bhīmā makaravaktrāś ca krauñcavaktrāś ca dānavāḥ //

aśvānanāḥ kharamukhā mayūravadanās tathā
gajendracarmavasanās tathā kṛṣṇājināmbarāḥ //

cīrasaṃvṛtagātrāś ca tathā nīlakavāsasaḥ
uṣṇīṣiṇo mukuṭinas tathā kuṇḍalino 'surāḥ //

kirīṭino lambaśikhāḥ kambugrīvāḥ suvarcasaḥ
nānāveśadharā daityā nānāmālyānulepanāḥ //

svāny āyudhāni saṃgṛhya pradīptāni ca tejasā
kramamāṇaṃ hṛṣīkeśam upāvartanta sarvaśaḥ //

pramathya sarvān daiteyān pādahastatalair vibhuḥ
rūpaṃ kṛtvā mahābhīmaṃ jahārāśu sa medinīm //

tasya vikramato bhūmiṃ candrādityau stanāntare
nabhaḥ prakramamāṇasya nābhyāṃ kila tathā sthitau //

param ākramamāṇasya jānudeśe vyavasthitau
viṣṇor amitavīryasya vadanty evaṃ dvijātayaḥ //

hṛtvā sa medinīṃ kṛtsnāṃ hatvā cāsurapuṃgavān
dadau śakrāya vasudhāṃ viṣṇur balavatāṃ varaḥ //

eṣa vo vāmano nāma prādurbhāvo mahātmanaḥ
vedavidbhir dvijair etat kathyate vaiṣṇavaṃ yaśaḥ //

bhūyo bhūtātmano viṣṇoḥ prādurbhāvo mahātmanaḥ
dattātreya iti khyātaḥ kṣamayā parayā yutaḥ //

tena naṣṭeṣu vedeṣu prakriyāsu makheṣu ca
cāturvarṇye ca saṃkīrṇe dharme śithilatāṃ gate //

ativardhati cādharme satye naṣṭe 'nṛte sthite
prajāsu śīryamāṇāsu dharme cākulatāṃ gate //

sayajñāḥ sakriyā vedāḥ pratyānītā hi tena vai
cāturvarṇyam asaṃkīrṇaṃ kṛtaṃ tena mahātmanā //

tena haihayarājasya kārtavīryasya dhīmataḥ
varadena varo datto dattātreyeṇa dhīmatā //

etad bāhudvayaṃ yat te tat te mama kṛte nṛpa
śatāni daśa bāhūnāṃ bhaviṣyanti na saṃśayaḥ //

pālayiṣyasi kṛtsnāṃ ca vasudhāṃ vasudheśvara
durnirīkṣyo 'rivṛndānāṃ yuddhasthaś ca bhaviṣyasi //

eṣa vo vaiṣṇavaḥ śrīmān prādurbhāvo 'dbhutaḥ śubhaḥ
bhūyaś ca jāmadagnyo 'yaṃ prādurbhāvo mahātmanaḥ //

yatra bāhusahasreṇa dviṣatāṃ durjayaṃ raṇe
rāmo 'rjunam anīkasthaṃ jaghāna nṛpatiṃ prabhuḥ //

rathasthaṃ pārthivaṃ rāmaḥ pātayitvārjunaṃ bhuvi
dharṣayitvārjunaṃ rāmaḥ krośamānaṃ ca meghavat //

kṛtsnaṃ bāhusahasraṃ ca ciccheda bhṛgunandanaḥ
paraśvadhena dīptena jñātibhiḥ sahitasya vai //

kīrṇā kṣatriyakoṭībhir merumandarabhūṣaṇā
triḥ saptakṛtvaḥ pṛthivī tena niḥkṣatriyā kṛtā //

kṛtvā niḥkṣatriyāṃ caināṃ bhārgavaḥ sumahāyaśāḥ
sarvapāpavināśāya vājimedhena ceṣṭavān //

yasmin yajñe mahādāne dakṣiṇāṃ bhṛgunandanaḥ
mārīcāya dadau prītaḥ kaśyapāya vasuṃdharām //

vāraṇāṃs turagāñ śubhrān rathāṃś ca rathināṃ varaḥ
hiraṇyam akṣayaṃ dhenur gajendrāṃś ca mahīpatiḥ //

dadau tasmin mahāyajñe vājimedhe mahāyaśāḥ
adyāpi ca hitārthāya lokānāṃ bhṛgunandanaḥ //

caramāṇas tapo ghoraṃ jāmadagnyaḥ punaḥ prabhuḥ
āste vai devavac chrīmān mahendre parvatottame //

eṣa viṣṇoḥ sureśasya śāśvatasyāvyayasya ca
jāmadagnya iti khyātaḥ prādurbhāvo mahātmanaḥ //

caturviṃśe yuge vāpi viśvāmitrapuraḥsaraḥ
jajñe daśarathasyātha putraḥ padmāyatekṣaṇaḥ //

kṛtvātmānaṃ mahābāhuś caturdhā prabhur īśvaraḥ
loke rāma iti khyātas tejasā bhāskaropamaḥ //

prasādanārthaṃ lokasya rakṣasāṃ nigrahāya ca
dharmasya ca vivṛddhyarthaṃ jajñe tatra mahāyaśāḥ //

tam apy āhur manuṣyendraṃ sarvabhūtahite ratam
yaḥ samāḥ sarvadharmajñaś caturdaśa vane 'vasat //

lakṣmaṇānucaro rāmaḥ sarvabhūtahite rataḥ
caturdaśa vane taptvā tapo varṣāṇi rāghavaḥ //

rūpiṇī tasya pārśvasthā sīteti prathitā jane
pūrvoditā tu yā lakṣmīr bhartāram anugacchati //

janasthāne vasan kāryaṃ tridaśānāṃ cakāra saḥ
tasyāpakāriṇaṃ krūraṃ paulastyaṃ manujarṣabhaḥ //

sītāyāḥ padam anvicchan nijaghāna mahāyaśāḥ
devāsuragaṇānāṃ ca yakṣarākṣasabhoginām //

yatrāvadhyaṃ rākṣasendraṃ rāvaṇaṃ yudhi durjayam
yuktaṃ rākṣasakoṭībhir nīlāñjanacayopamam //

trailokyadrāvaṇaṃ krūraṃ rāvaṇaṃ rākṣaseśvaram
durjayaṃ durdharaṃ dṛptaṃ śārdūlasamavikramam //

durnirīkṣyaṃ suragaṇair varadānena darpitam
jaghāna sacivaiḥ sārdhaṃ sasainyaṃ rāvaṇaṃ yudhi //

mahābhragaṇasaṃkāśaṃ mahākāyaṃ mahābalam
rāvaṇaṃ nijaghānāśu rāmo bhūtapatiḥ purā //

sugrīvasya kṛte yena vānarendro mahābalaḥ
vālī vinihataḥ saṃkhye sugrīvaś cābhiṣecitaḥ //

madhoś ca tanayo dṛpto lavaṇo nāma dānavaḥ
hato madhuvane vīro varamatto mahāsuraḥ //

yajñavighnakarau yena munīnāṃ bhāvitātmanām
mārīcaś ca subāhuś ca balena balināṃ varau //

nihatau ca nirāśau ca kṛtau tena mahātmanā
samare yuddhaśauṇḍena tathānye cāpi rākṣasāḥ //

virādhaś ca kabandhaś ca rākṣasau bhīmavikramau
jaghāna puruṣavyāghro gandharvau śāpamohitau //

hutāśanārkāṃśutaḍidguṇābhaiḥ prataptajāmbūnadacitrapuṅkhaiḥ
mahendravajrāśanitulyasārai ripūn sa rāmaḥ samare nijaghne

tasmai dattāni śastrāṇi viśvāmitreṇa dhīmatā
vadhārthaṃ devaśatrūṇāṃ durdharṣāṇāṃ surair api //

vartamāne makhe yena janakasya mahātmanaḥ
bhagnaṃ māheśvaraṃ cāpaṃ krīḍatā līlayā purā //

etāni kṛtvā karmāṇi rāmo dharmabhṛtāṃ varaḥ
daśāśvamedhāñ jārūthyān ājahāra nirargalān //

nāśrūyantāśubhā vāco nākulaṃ māruto vavau
na vittaharaṇaṃ cāsīd rāme rājyaṃ praśāsati //

paridevanti vidhavā nānarthāś ca kadācana
sarvam āsīc chubhaṃ tatra rāme rājyaṃ praśāsati //

na prāṇināṃ bhayaṃ cāsīj jalāgnyanilaghātajam
na cāpi vṛddhā bālānāṃ pretakāryāṇi cakrire //

brahmacaryaparaṃ kṣatraṃ viśas tu kṣatriye ratāḥ
śūdrāś caiva hi varṇāṃs trīñ śuśrūṣanty anahaṃkṛtāḥ //

nāryo nātyacaran bhartṝn bhāryāṃ nātyacarat patiḥ
sarvam āsīj jagad dāntaṃ nirdasyur abhavan mahī //

rāma eko 'bhavad bhartā rāmaḥ pālayitābhavat
āsan varṣasahasrāṇi tathā putrasahasriṇaḥ //

arogāḥ prāṇinaś cāsan rāme rājyaṃ praśāsati
devatānām ṛṣīṇāṃ ca manuṣyāṇāṃ ca sarvaśaḥ //

pṛthivyāṃ samavāyo 'bhūd rāme rājyaṃ praśāsati
gāthām apy atra gāyanti ye purāṇavido janāḥ //

rāme nibaddhatattvārthā māhātmyaṃ tasya dhīmataḥ
śyāmo yuvā lohitākṣo dīptāsyo mitabhāṣitaḥ //

ājānubāhuḥ sumukhaḥ siṃhaskandho mahābhujaḥ
daśa varṣasahasrāṇi rāmo rājyam akārayat //

ṛksāmayajuṣāṃ ghoṣo jyāghoṣaś ca mahātmanaḥ
avyucchinno 'bhavad rāṣṭre dīyatāṃ bhujyatām iti //

sattvavān guṇasaṃpanno dīpyamānaḥ svatejasā
ati candraṃ ca sūryaṃ ca rāmo dāśarathir babhau //

īje kratuśataiḥ puṇyaiḥ samāptavaradakṣiṇaiḥ
hitvāyodhyāṃ divaṃ yāto rāghavo hi mahābalaḥ //

evam eva mahābāhur ikṣvākukulanandanaḥ
rāvaṇaṃ sagaṇaṃ hatvā divam ācakrame vibhuḥ //

aparaḥ keśavasyāyaṃ prādurbhāvo mahātmanaḥ
vikhyāto māthure kalpe sarvalokahitāya vai //

yatra śālvaṃ ca caidyaṃ ca kaṃsaṃ dvividam eva ca
ariṣṭaṃ vṛṣabhaṃ keśiṃ pūtanāṃ daityadārikām //

nāgaṃ kuvalayāpīḍaṃ cāṇūraṃ muṣṭikaṃ tathā
daityān mānuṣadehena sūdayām āsa vīryavān //

chinnaṃ bāhusahasraṃ ca bāṇasyādbhutakarmaṇaḥ
narakaś ca hataḥ saṃkhye yavanaś ca mahābalaḥ //

hṛtāni ca mahīpānāṃ sarvaratnāni tejasā
durācārāś ca nihitāḥ pārthivā ye mahītale //

eṣa lokahitārthāya prādurbhāvo mahātmanaḥ
kalkī viṣṇuyaśā nāma śambhalagrāmasaṃbhavaḥ //

sarvalokahitārthāya bhūyo devo mahāyaśāḥ
ete cānye ca bahavo divyā devagaṇair vṛtāḥ //

prādurbhāvāḥ purāṇeṣu gīyante brahmavādibhiḥ
yatra devā vimuhyanti prādurbhāvānukīrtane //

purāṇaṃ vartate yatra vedaśrutisamāhitam
etad uddeśamātreṇa prādurbhāvānukīrtanam //

kīrtitaṃ kīrtanīyasya sarvalokaguror vibhoḥ
prīyante pitaras tasya prādurbhāvānukīrtanāt //

viṣṇor amitavīryasya yaḥ śṛṇoti kṛtāñjaliḥ //

etāś ca yogeśvarayogamāyāḥ śrutvā naro mucyati sarvapāpaiḥ
ṛddhiṃ samṛddhiṃ vipulāṃś ca bhogān prāpnoti śīghraṃ bhagavatprasādāt

evaṃ mayā muniśreṣṭhā viṣṇor amitatejasaḥ
sarvapāpaharāḥ puṇyāḥ prādurbhāvāḥ prakīrtitāḥ //