Brahma Purana · Chapter 162

manyutīrtham iti khyātaṃ sarvapāpapraṇāśanam
sarvakāmapradaṃ nṝṇāṃ smaraṇād aghanāśanam //

tasya prabhāvaṃ vakṣyāmi śṛṇuṣvāvahito mune
devānāṃ dānavānāṃ ca saṃgaro 'bhūn mithaḥ purā //

tatrājayan naiva surā dānavā jayino 'bhavan
parāṅmukhāḥ suragaṇāḥ saṃgarād gatacetasaḥ //

mām abhyetya samūcus te dehi no 'bhayakāraṇam
tān ahaṃ pratyavocaṃ vai gaṅgāṃ gacchata sarvaśaḥ //

tatra vai gautamītīre stutvā devaṃ maheśvaram
anapāyanirāyāsa sahajānandasundaram //

lapsyate sarvavibudhā jayahetur maheśvarāt
tathety uktvā suragaṇāḥ stuvanti sma maheśvaram //

tapo 'tapyanta kecid vai nanṛtuś ca tathāpare
asnāpayaṃś ca kecic ca 'pūjayaṃś ca tathāpare //

tataḥ prasanno bhagavāñ śūlapāṇir maheśvaraḥ
devān athābravīt tuṣṭo vriyatāṃ yad abhīpsitam //

devā ūcuḥ surapatiṃ vijayāya dadasva naḥ
puruṣaṃ paramaślāghyaṃ raṇeṣu purataḥ sthitam //

yadbāhubalam āśritya bhavāmaḥ sukhino vayam
tathety uvāca bhagavān devān prati maheśvaraḥ //

ātmanas tejasā kaścin nirmitaḥ parameṣṭhinā
manyunāmānam atyugraṃ devasainyapurogamam //

taṃ natvā tridaśāḥ sarve śivaṃ natvā svam ālayam
manyunā saha cābhyetya punar yuddhāya tasthire //

yuddhe sthitvā tu danujair daiteyaiś ca mahābalaiḥ
vibudhā jātasaṃnaddhā manyum ūcuḥ puraḥ sthitāḥ //

sāmarthyaṃ tava paśyāmaḥ paścād yotsyāmahe paraiḥ
tasmād darśaya cātmānaṃ manyo 'smākaṃ yuyutsatām //

tad devavacanaṃ śrutvā manyur āha smayann iva //

janitā mama deveśaḥ sarvajñaḥ sarvadṛk prabhuḥ
yaḥ sarvaṃ vetti sarveṣāṃ dhāmanāma manaḥsthitam //

naiva kaścic ca taṃ vetti yaḥ sarvaṃ vetti sarvadā
amūrtaṃ mūrtam apy etad vetti kartā jaganmayaḥ //

paro 'sau bhagavān sākṣāt tathā divy antarikṣagaḥ
kas tasya rūpaṃ yo veda kasya kartā jaganmayaḥ //

evaṃvidhād ahaṃ jāto māṃ kathaṃ vettum arhatha
athavā draṣṭukāmā vai bhavanto mānupaśyata //

ity uktvā darśayām āsa manyū rūpaṃ svakaṃ mahat
tārtīyacakṣuṣodbhūtaṃ bhavasya parameṣṭhinaḥ //

tejasā saṃbhṛtaṃ rūpaṃ yataḥ sarvaṃ tad ucyate
pauruṣaṃ puruṣeṣv eva ahaṃkāraś ca jantuṣu //

krodhaḥ sarvasya yo bhīma upasaṃhārakṛd bhavet
taṃ śaṃkarapratinidhiṃ jvalantaṃ nijatejasā //

sarvāyudhadharaṃ dṛṣṭvā praṇemuḥ sarvadevatāḥ
vitresur daityadanujāḥ kṛtāñjalipuṭāḥ surāḥ //

bhūtvā manyum athocus te tvaṃ senānīḥ prabho bhava
tvayā dattam idaṃ rājyaṃ manyo bhokṣyāmahe vayam //

tasmāt sarveṣu kāryeṣu jetā tvaṃ jayavardhanaḥ
tvam indras tvaṃ ca varuṇo lokapālās tvam eva ca //

asmāsu sarvadeveṣu praviśa tvaṃ jayāya vai
manyuḥ provāca tān sarvān vinā matto na kiṃcana //

sarveṣv antaḥ praviṣṭo 'haṃ na māṃ jānāti kaścana
sa eva bhagavān manyus tato jātaḥ pṛthak pṛthak //

sa eva rudrarūpī syād rudro manyuḥ śivo 'bhavat
sthāvaraṃ jaṅgamaṃ caiva sarvaṃ vyāptaṃ hi manyunā //

tam avāpya surāḥ sarve jayam āpuś ca saṃgare
jayo manyuś ca śauryaṃ ca īśatejaḥsamudbhavam //

manyunā jayam āpyātha kṛtvā daityaiś ca saṃgamam
yathāgataṃ yayuḥ sarve manyunā parirakṣitāḥ //

yatra vai gautamītīre śivam ārādhya te surāḥ
manyum āpur jayaṃ caiva manyutīrthaṃ tad ucyate //

utpattiṃ ca tathā manyor yo naraḥ prayataḥ smaret
vijayo jāyate tasya na kaiścit paribhūyate //

na manyutīrthasadṛśaṃ pāvanaṃ hi mahāmune
yatra sākṣān manyurūpī sarvadā śaṃkaraḥ sthitaḥ
tatra snānaṃ ca dānaṃ ca smaraṇaṃ sarvakāmadam //