Brahma Purana · Chapter 147

apsaroyugam ākhyātam apsarāsaṃgamaṃ tataḥ
tīre ca dakṣiṇe puṇyaṃ smaraṇāt subhago bhavet //

mukto bhavaty asaṃdehaṃ tatra snānādinā naraḥ
strī satī saṃgame tasminn ṛtusnātā ca nārada //

vandhyāpi janayet putraṃ trimāsāt patinā saha
snānadānena vartantī nānyathā madvaco bhavet //

apsaroyugam ākhyātaṃ tīrthaṃ yena ca hetunā
tatredaṃ kāraṇaṃ vakṣye śṛṇu nārada yatnataḥ //

spardhāsīn mahatī brahman viśvāmitravasiṣṭhayoḥ
tapasyantaṃ gādhisutaṃ brāhmaṇyārthe yatavratam //

gaṅgādvāre samāsīnaṃ preritendreṇa menakā
taṃ gatvā tapaso bhraṣṭaṃ kuru bhadre mamājñayā //

tadoktendreṇa sā menā viśvāmitraṃ tapaścyutam
kṛtvā kanyāṃ tathā dattvā jagāmendrapuraṃ punaḥ //

tasyāṃ gatāyāṃ sasmāra gādhiputro 'khilaṃ kṛtam
taṃ tu deśaṃ parityajya tīrthaṃ tu suravallabham //

jagāma dakṣiṇāṃ gaṅgāṃ yatra kālañjaro haraḥ
tapasyantaṃ tadovāca punar indraḥ sahasradṛk //

urvaśīṃ ca tato menāṃ rambhāṃ cāpi tilottamām
naivety ūcur bhayatrastāḥ punar āha śacīpatiḥ //

gambhīrāṃ cātigambhīrām ubhe ye garvite tadā
te ūcatur ubhe devaṃ sahasrākṣaṃ puraṃdaram //

āvāṃ gatvā tapasyantaṃ gādhiputraṃ mahādyutim
cyāvayāvo nṛtyagītai rūpayauvanasaṃpadā //

yāsām apāṅge hasite vāci vibhramasaṃpadi
nityaṃ vasati pañceṣus tābhiḥ ko 'tra na jīyate //

tathety ukte sahasrākṣe te āgatya mahānadīm
dadṛśāte tapasyantaṃ viśvāmitraṃ mahāmunim //

mṛtyor api durādharṣaṃ bhūmistham iva dhūrjaṭim
sahasram ekaṃ varṣāṇām īkṣituṃ na ca śaknutaḥ //

dūre sthite nṛtyagīta cāṭukārarate tadā
vilokya muniśārdūlas tataḥ kopākulo 'bhavat //

pratīpācaraṇaṃ dṛṣṭvā krodhaḥ kasya na jāyate
nispṛho 'pi mahābāhus tam indraṃ prahasann iva //

ābhyāṃ muktaḥ sahasrākṣo hy apsarobhyāṃ bruvann iva
śaśāpa te sa gādheyo dravarūpe bhaviṣyathaḥ //

dravituṃ māṃ samāyāte yatas tv iha tato laghu
tataḥ prasāditas tābhyāṃ śāpamokṣaṃ cakāra saḥ //

bhavetāṃ divyarūpe vāṃ gaṅgayā saṃgate yadā
tacchāpāt te nadīrūpe tatkṣaṇāt saṃbabhūvatuḥ //

apsaroyugam ākhyātaṃ nadīdvayam ato 'bhavat
tābhyāṃ parasparaṃ cāpi tābhyāṃ gaṅgāsusaṃgamaḥ //

sarvalokeṣu vikhyāto bhuktimuktipradaḥ śivaḥ
tatrāste dṛṣṭa evāsau sarvasiddhipradāyakaḥ //

tatra snātvā tu taṃ dṛṣṭvā mucyate sarvabandhanāt //