Brahma Purana · Chapter 112

mātṛtīrtham iti khyātaṃ sarvasiddhikaraṃ nṛṇām
ādhibhir mucyate jantus tattīrthasmaraṇād api //

devānām asurāṇāṃ ca saṃgaro 'bhūt sudāruṇaḥ
nāśaknuvaṃs tadā jetuṃ devā dānavasaṃgaram //

tadāham agamaṃ devais tiṣṭhantaṃ śūlapāṇinam
astavaṃ vividhair vākyaiḥ kṛtāñjalipuṭaḥ śanaiḥ //

saṃmantrya devair asuraiś ca sarvair yadāhṛtaṃ saṃmathituṃ samudram
yat kālakūṭaṃ samabhūn maheśa tat tvāṃ vinā ko grasituṃ samarthaḥ

puṣpaprahāreṇa jagattrayaṃ yaḥ svādhīnam āpādayituṃ samarthaḥ
māro hare 'py anyasurādivandyo vitāyamāno vilayaṃ prayātaḥ

vimathya vārīśam anaṅgaśatro yad uttamaṃ tat tu divaukasebhyaḥ
dattvā viṣaṃ saṃharan nīlakaṇṭha ko vā dhartuṃ tvām ṛte vai samarthaḥ

tataś ca tuṣṭo bhagavān ādikartā trilocanaḥ //

dāsye 'haṃ yad abhīṣṭaṃ vo bruvantu surasattamāḥ //

dānavebhyo bhayaṃ ghoraṃ tatraihi vṛṣabhadhvaja
jahi śatrūn surān pāhi nāthavantas tvayā prabho //

niṣkāraṇaḥ suhṛc chaṃbho nābhaviṣyad bhavān yadi
tadākariṣyan kim iva duḥkhārtāḥ sarvadehinaḥ //

ity uktas tatkṣaṇāt prāyād yatra te devaśatravaḥ
tatra tad yuddham abhavac chaṃkareṇa suradviṣām //

tatas trilocanaḥ śrāntas tamorūpadharaḥ śivaḥ
lalāṭād vyapataṃs tasya yudhyataḥ svedabindavaḥ //

sa saṃharan daityagaṇāṃs tāmasīṃ mūrtim āśritaḥ
tāṃ mūrtim asurā dṛṣṭvā merupṛṣṭhād bhuvaṃ yayuḥ //

sa saṃharan sarvadaityāṃs tadāgacchad bhuvaṃ haraḥ
itaś cetaś ca bhītās te 'dhāvan sarvāṃ mahīm imām //

tathaiva kopād rudro 'pi śatrūṃs tān anudhāvati
tathaiva yudhyataḥ śaṃbhoḥ patitāḥ svedabindavaḥ //

yatra yatra bhuvaṃ prāpto bindur māheśvaro mune
tatra tatra śivākārā mātaro jajñire tataḥ //

procur maheśvaraṃ sarvāḥ khādāmas tv asurān iti
tataḥ provāca bhagavān sarvaiḥ suragaṇair vṛtaḥ //

svargād bhuvam anuprāptā rākṣasās te rasātalam
anuprāptās tataḥ sarvāḥ śṛṇvantu mama bhāṣitam //

yatra yatra dviṣo yānti tatra gacchantu mātaraḥ
rasātalam anuprāptā idānīṃ madbhayād dviṣaḥ
bhavatyo 'py anugacchantu rasātalam anu dviṣaḥ //

tāś ca jagmur bhuvaṃ bhittvā yatra te daityadānavāḥ
tān hatvā mātaraḥ sarvān devārīn atibhīṣaṇān //

punar devān upājagmuḥ pathā tenaiva mātaraḥ
gatāś ca mātaro yāvad yāvac ca punar āgatāḥ //

tāvad devāḥ sthitā āsan gautamītīram āśritāḥ
prasthānāt tatra mātṝṇāṃ surāṇāṃ ca pratiṣṭhiteḥ //

pratiṣṭhānaṃ tu tat kṣetraṃ puṇyaṃ vijayavardhanam
mātṝṇāṃ yatra cotpattir mātṛtīrthaṃ pṛthak pṛthak //

tatra tatra bilāny āsan rasātalagatāni ca
surās tābhyo varān procur loke pūjāṃ yathā śivaḥ //

prāpnoti tadvan mātṛbhyaḥ pūjā bhavatu sarvadā
ity uktvāntardadhur devā āsaṃs tatraiva mātaraḥ //

yatra yatra sthitā devyo mātṛtīrthaṃ tato viduḥ
surāṇām api sevyāni kiṃ punar mānuṣādibhiḥ //

teṣu snānam atho dānaṃ pitṝṇāṃ caiva tarpaṇam
sarvaṃ tad akṣayaṃ jñeyaṃ śivasya vacanaṃ yathā //

yas tv idaṃ śṛṇuyān nityaṃ smared api paṭhet tathā
ākhyānaṃ mātṛtīrthānām āyuṣmān sa sukhī bhavet //