Bodhisattvayogācāracatuḥśatakaṭīkā · Chapter 8

tatraiva rajyate kaścit kaścit tatraiva duṣyati /
kaścin muhyati tatraiva tasmāt kāmo nirarthakaḥ //

vinā kalpanayāstitvaṃ rāgādīnāṃ na vidyate /
bhūtārthaḥ kalpanā ceti ko grahīṣyati buddhimān //

kasyacit kenacit sārdhaṃ bandho nāma na vidyate //

pareṇa saha bandhasya viprayogo na yujyate //

asmin dharme 'lpapuṇyasya saṃdeho 'pi na jāyate /
bhavaḥ saṃdehamātreṇa jāyate jarjarīkṛtaḥ //

ā mokṣād yasya dharmasya vṛddhim evoktavān muniḥ /
tatra bhaktir na yasyāsti suvyaktaṃ buddhimān na saḥ //

nāśūnyaṃ śūnyavad dṛṣṭaṃ nirvāṇaṃ me bhavatv iti //

mithyādṛṣṭer na nirvāṇaṃ varṇayanti tathāgatāḥ //

laukikī deśa nā yatra pravṛttis tatra varṇyate /
paramārthakathā yatra nivṛttis tatra varṇyate //

kiṃ kariṣyāmy asat sarvam iti te jāyate bhayam /
vidyate yadi kartavyaṃ nāyaṃ dharmo nivartakaḥ //

svapakṣe vidyate rāgaḥ parapakṣas tu te 'priyaḥ /
na gamiṣyasi nirvāṇaṃ na śivaṃ dvandvacāriṇaḥ //

akurvāṇasya nirvāṇaṃ kurvāṇasya punarbhavaḥ /
niścintena sukhaṃ prāptuṃ nirvāṇaṃ tena netaraḥ //

udvego yasya nāstīha bhaktis tasya kutaḥ śive /
nirgamaś ca bhavād asmāt svagṛhād iva duṣkaraḥ //

duḥkhābhibhūtā dṛśyante kecin maraṇakāṅkṣiṇaḥ /
te tadā kevalaṃ mohān na gacchanti paraṃ padam //

sad asat sadasac ceti nobhayaṃ ceti kathyate //

nanu vyādhivaśāt pathyam auṣadhaṃ nāma jāyate //

samyagdṛṣṭe paraṃ sthānaṃ kiṃcid dṛṣṭe śubhā gatiḥ /
tasmād adhyātmacintāyāṃ kāryā nityaṃ matir budhaiḥ //

iha yady api tattvajño nirvāṇaṃ nādhigacchati /
prāpnoty ayatnato 'vaśyaṃ punarjanmani karmavat /

sarvakāryeṣu niṣpattiś cintyamānā sudurlabhā /
na ca nāstīha nirvāṇaṃ yuktā muktāś ca durlabhāḥ //

śrutvā śarīranairguṇyaṃ kṣaṇaṃ rāgo na tiṣṭhati /
prāptas tenaiva mārgeṇa sarvasyāpi nanu kṣayaḥ //

yathā bījasya dṛṣṭo 'nto na cādis tasya vidyate /
tathā kāraṇavaikalyāj janmano 'pi na sambhavaḥ //