Bhṛgusaṃhitā · Chapter 34

iti śrīvaikhānase bhagavacchāstre bhṛguproktāyāṃ sahitāyāṃ prakīrṇādhikāre trayastriṃśo 'dhyāyaḥ.
atha catustriṃśo 'dhyāyaḥ
svayaṃvyaktādi sthānapañcakam.
ata ūrdhvaṃ pravakṣyāmi sthalapañcakakalpanam /
devadevo mahābāhurharirnārāyaṇassvayam

yena yena prakāreṇa āvirāstedharātale /
arcāvatārarūpeṇa bhaktasaulabhyahetave

svayaṃvyaktaṃ ca divyaṃ ca saiddhaṃ paurāṇameva ca /
pauruṣaṃ ceti kathitaṃ sthalānāṃ pañcakaṃ budhaiḥ

svayaṃvyaktaṃ tu tatproktaṃ yatrāsau harivyayaḥ /
svecchayā lokarakṣāye bhūmyāmāvirbhavetsvayam

na tatra devadevasya pratiṣṭhā vidhisammatā /
na cāpi karṣaṇaṃ nāpi biṃbaśuddhyādikāḥ kriyāḥ

biṃbena saha deveśassannidhatte yatassvayam /
yānadicchā vasedbhūmau tāvatkālaṃ samarcitaḥ

svayaṃvyaktasthale pūjā sarvalokaśubhapradā /
svayaṃvyaktasthalānyatra catvāryāsata bhūtale

yatra vaikhānasaṃ śāstramāśritya paramaṃ śubham /
arcayāmo jagadyonimahamanye ca te trayaḥ

marīcirmandhare viṣṇumarcayāmāsa keśavam /
sarvadevottamaṃ devaṃ śrīnivāse 'trirarcayat

kāśyapo viṣṇvadhiṣṭhāne śubhakṣetre 'pyahaṃ bhṛguḥ /
yādṛśīvartate pūjā yā biṃbānāṃ ca saṃsthitiḥ

na kiṃ cittāmatikramya pūrvoktāṃ tu samācaret /
svayamāvirabhūddevo yatra bhaktānukaṃpayā

kartavyamakhilaṃ tatra tannideśena kalpyate /
na vāpyucchāstrakaraṇaṃ pravartayati mādhavam

tasmātsarvaprayatnena pūrvairācaritaṃ caret /
anyathā cettu kurvāṇo devāyaivāparādhyati

yanmāyāmohitaṃ sarvaṃ yasyāntaṃ ke 'pi no viduḥ /
tasya devasya māhātmyaṃ vaktuṃ śaknoti ko bhuvi

yadyadā caritaṃ tatra tatsarvaṃ śāstrameva hi /
tatrāpi ca viśeṣo 'sti prāyaścittādidarśane

sarvaṃ prāmādikaṃ kuryāttatra śāstraṃ pravartakam /
śrutismṛtī ubhetasya paramājñāṃ vadanti hī

svayaṃvyaktasthale pūjā sarvalokaśūbhāvahā /
svayaṃ vyakto jagannāthastādātmyena śilādiṣu

svayaṃ bhaktajanābhīṣṭān vicāryaiva prayacchati /
na hyatra sādhanāpekṣā svayaṃnyaktastato varaḥ

devaiḥ pratiṣṭhito yatra harirāvirbabhūva hi /
taddidyasthalamuddiṣṭaṃ devo divya udīryate

smṛtā devāstrayastriṃśattāvatkoṭīmitā api /
sarve te phalakāmāssyurve prapadyante yathā harim

tāṃstathā bhajate devo yato 'sau karuṇānidhiḥ /
phalārthino yadā devāḥ pratiṣṭhyāpya hariṃ kramāt

samabhyarcya ca saṃprāpya vāṃbhitaṃ tadanantaram /
lokānugrahahetor vai tādṛśaṃ devamandiram

cirasthāyi ca saṃkalpya yathārhaṃ samapūjayan /
divyasthalasthadevo hi devānāṃ sannidhāpanāt

atyantaṃ puṣṭivaḥ proktassarvaśāntikarassṛtaḥ /
divyasthalasthapūjā tu śatayojanavistṛtam

punāti parito deśaṃ nātra saṃdeha iṣyate /
divyasthalāni kathitānyasaṃkhyeyāni bhūtale

na hi devāssvayaṃ bhūmāvavatīrya kalau kvacit /
pratiṣṭhāṃ devadevasya kurvanti kuhiciddhruvam

divyasthalāni bhūbhāge kalau tu viralāni vai /
bhaviṣyanti bahūnyatra luptabūjāni sattamāḥ

divyasthalakṛtā pūjā śāstrasiddhā na saṃśayaḥ /
nocchāstraṃ tu pratiṣṭhādi kurvantidivi devatāḥ

devāśca devaloke 'pi kṛtvā vaiṣṇavamandiram /
ārādhya ca jagannāthaṃ prāpnuvanti phalaṃ bahu

yā tu bhūmitale pūjā tādṛśī divijā na vai /
karmabhūmistu saṃproktā bhūmirdyairna hi tatsamā

saṃcintya puṇyaṃ pāpaṃ vā bhūmau lokāntarenarāḥ /
gamiṣyantitato jyāyān bhūbhāgassarvakarmasu

tato devāḥ pratiṣṭhāpya cārcayitvā ramāpatim /
arcāvatārarūpeṇa svayaṃ tīrṇāḥ punaḥ punaḥ

bhūmisthānakhilān jantūn tāryayiṣyantyanugrahāt /
ato viprāssadā yajñairdānaiśca tapasā muhuḥ

toṣayiṣyanti devānvai teṣāmānṛṇyahetave /
devā nisargaripavo manuṣyeṣu bhavantyapi

ārādhanena devasya copakurvanti mānavān /
idameva hareḥ pūjābalaṃ saṃpāditaṃ phalam

sarve 'pi sāttvikā yānti tuṣyanti svārjitaiḥ phalaiḥ /
na dviṣyanti ripūnvāpi tatro dāharaṇaṃ surāḥ

yathā cyavanadharmā syātsvargassvargāśrito 'tha vā /
tathādinyasthalāniha na syuśśāśvatikāni tu

divyasthaleṣu sarvatra divyenaivāgamena tu /
vaikhānasena pūjāsītsāhi śrautī ca sammatā

prāyaścittocitānyatra nimittāni yadātadā /
śāstroktaṃ kārayedeva nānyathā kārayedvidhiḥ

ye tu pūrvārjitaireva tapobhiḥ paramātmani /
raktātmānastapassiddhāssaṃkalpya svatapaḥphalam

devadevaṃ jagannāthaṃ nārāyaṇamanāyam /
pratiṣṭhāpya kvacidbiṃbe samabhyarcya viśeṣataḥ

ujjīvanāya lākānāṃ pradāsyantīha pūjanam /
sa deśassaiddha ityuktassaiddhā tatrārcanocyate

na hi siddhāstapassiddhiṃ kurvanti vibhalāṃ kvacit /
yasyānugrahamicchantastapasyantīha sādhavaḥ

yaṃ prasādayituṃ viprā yajñadānādi kurvate /
tasyaivārādhanaṃ hitvā kiṃ siddhāssaṃprakurvate

te siddhāste mahātmānaste santa nte tapasvinaḥ /
ye svakarmaphalaṃ devaṃ viditvā śrīpatiṃ harim

pratiṣṭhāpya tu tadrūpamarcayanti nirantaram /
na hyanyaḥ prāpaṇe heturarcanānmuktihetave

saiddhasthale tu yā pūjā sarvaśāntikarī smṛtā /
pañcāśadyojanaṃ tasya paritaḥ pāvayenmahīm

siddhapratiṣṭhitā deśā bahavo viditāḥ purā /
utpadyante bhaviṣyanti santisiddhā dharātale

saiddhasthalāni bhūyāṃsi bhaviṣyanti ca santi ca /
siddhā vaikhānasaṃ śāstramāśrityaiva svanirmitam

devaṃ saṃpūjayantīha tatprāyaḥ pracalatyapi /
na hi siddhāḥ prakurvantikiñciducchāstramāpadi

tasmātsarvaprayatnena sarvaṃ siddhāśritasthale /
kuryādvaikhānasaṃ śāstramāśritya sakalāḥ kriyāḥ

siddhā jānanti śāstrārthān siddhā jānanti cāgamān /
siddhāssamarcayantyeva vaikhānasavidhānataḥ

yadi siddhāśrito deśaḥpūjyate 'nyaiḥ pramādataḥ /
rājā taṃ tu vicāryaiva punarvaikhānasaiḥkramāt

satvaraṃ yājayetkṛtvā prāyaścittaṃ yathāvidhi /
saiddhameke sthalaṃ prāhurārṣametacca sammatam

atha paurāṇiko deśaḥ kathyate yatra yatra vai /
gādhā paurāṇikī bhūyāttatpurāṇasthalaṃ matam

ajñātakartṛkāṇyatra smaryante prāyaśo bahu /
sthalānīmānitattāni?purāṇāni pracakṣate

purāṇāni tvanantāni sthalāni pṛthivītale /
bhavantyatha kalau prāpte lupyante tānyanekaśaḥ

daśayojanaparyantāṃ bhūmiṃ tu paritassakṛt /
punāti deśaḥ paurāṇastatra kiṃ cinna hīyate

svayaṃvyaktādayassarve paurāṇāḥ kīrtitā api /
svayaṃvyaktādibhedena vyavahārasya darśanāt

purāṇatvaṃ ca teṣāṃ syādanyat paurāṇamucyate /
purāṇasthaladevasya pratiṣṭhā vidhisammatā

pratiṣṭhite tvavidhinā sthare naiva rameddhariḥ /
na hi vṛddhāssamarcanti biṃbamucchāstranirmitam

na hi paurāṇike deśe yajamānasya gauravam /
arthasya gauravaṃ cāpi darśanīyaṃ mahātmabhiḥ?

yadi paśyedvisūḍhātmā rauravaṃ narakaṃvrajet /
eṣa eva viśeṣassyādanyatsaiddhavadācaret

purāṇasthalapūjā tu śāstradṛṣṭena vartmanā /
pramādetu samīkāryāna tena syādvyatikramaḥ

mānuṣaṃ pañcamaṃ proktaṃ sthalaṃ yatra viśeṣataḥ /
grāme vā nagare vāpi śāstrokte sumanorame

pratiṣṭāpyārcake viṣṇussarvadeveśvareśvaraḥ /
brāhmaṇaiḥ kṣatriyairvaiśyaiśśūdrairvānyairnarottamaiḥ

vaikhānasena śāstreṇa pañcarātreṇa vā punaḥ /
mānuṣasthalapūjā tu yojanaṃ paritasthsalam

pāpayettasya tu proktāśaktiranyātu tāvatī /
manuṣyāḥ puṇyakarmāṇastatra tatra dine dine

preritā bhagavadbhaktyādhanino nirdhanā api /
nirmāya bhagavadgehaṃ pratiṣṭhāpya śriyaḥpatim

arcayanti viśeṣeṇa vaikhānasavidhānataḥ /
viśālaḥ pṛthivībhāgaḥ kālo 'nādirantakaḥ

śāstraṃ cāpyatigaṃbhīraṃ bhaktāśca bahavo harau /
tasmātsarvaprayatnena sarvasyāpyanuśāsanam

proktaṃ vikhanasā pūrvaṃ bhagavacchāstramuttamam /
anenaiva prakāreṇa sarvatrārādhayeddharim

bhaktāśca bahudhā śāstraṃ praśaṃsantīdameva hī /
taduktenaiva vidhinā kalpayedālayādikam

yathā mānādhikaraṇe mayā proktassa vistaraḥ /
yatra vā dṛśyate bhedo bhagavacchāstraśilpayoḥ

śilpaśāstraṃ parityajya bhagavacchāstrataścaret /
pradhānametacchāstraṃ syādbhagavadgehakalpane

na tacchāstramanādṛtya kāryaṃ kiṃ citsamācaret /
lobhānmohādathājñānācchāstre 'sminna dhṛtaṃ caret

atikramyāpi śāstraṃ tatpūjā niṣbhalā bhavet /
yajamāno vipadyeta tasmādatroktamācaret

tenaiva tu vidhānena pratiṣṭhādikamācaret /
aihikāmuṣmikaṃ yasmātphaladvayamavāpyate

grāme viṣṇvarcanāhīne viṣṇvarcāhīnaveśmani /
tīrthapānaṃ surāpānamannaṃ gomāṃsabhakṣaṇam

devadhāmavihīnaṃ tu śmaśānaṃ grāma ucyate /
gṛhaṃ ca cititulyaṃ syādyatra nārādhyate hariḥ

yo mohādatha vālasyādakṛtvā devatārcanam /
bhuṅkte sa yāti narakān sūkareṣvasi jāyate

keśavārcāgṛhe yasya na tiṣṭhati śūbhapradā /
tasyānnaṃ naiva bhoktavyamabhakṣyeṇa samaṃ hi tat

biṃbaśuddhyādikaṃ kṛtvā śāstroktavidhinā punaḥ /
kalānyāsādikaṃ sarvaṃ vidhāya parameśvaraḥ

pratiṣṭhāpyārcyate yatra parito yojanāvadhi /
pūyate 'nugrahādviṣṇoḥ sa deśo 'prākṛtassmṛtaḥ

tatra pārṣadasaṃyuktaśśriyā lakṣmyā samanvitaḥ /
yathā ca parame vyomni sannidhatte tathā hariḥ

tatra devāstrayastriṃśatpitaraḥ pannagāśca ye /
sādhyā vidyādharā yakṣāssarvā vai devayonayaḥ

sarvasaṃvatsamṛddhissyātparjanyo varṣuko bhavet /
vāyurvāti sukhaṃ tatra sūryastapati tejasā

candramāśśītalairdeśaṃ sevate kiraṇaistathā /
bhūmissasyavatī ca syātprasannaṃ ca nabho bhavet

nakṣatragrahatārāśca prasādābhimukhāssame /
rājanvatī prajā ca syātpaśuputrasamanvitā

na vyādhijaṃ bhayaṃ kiṃ cinnāpi jvarakṛtaṃ tathā /
na vyālajaṃ bhayaṃ vāpi bhavedatrana saṃśayaḥ

nopaplavo nṛpāṇāṃ vā mṛgāṇāṃ vāpyapāṃ bhavet /
brāhmaṇāḥ kṣatriyā vaiśyāśśūdrāstatra nivāsinaḥ

sve sve karmaṇyabhiratā bhaveyussukhajīvinaḥ /
āgnihotrāśca hūyante tapyante 'tra tapāṃsi ca

dīyante bhūridānāni yatra devo harispvayam /
aprākṛtamimaṃ deśaṃ sannidhānācchriyaḥ pateḥ

prākṛtaṃ yo vadenmūḍhassa yāti narakaṃ dhruvam /
aprākṛtamimaṃ devaṃ naro yaścāpanihnute

caṇḍālassa tu vijñeyo niṣkṛtirnāsya dṛśyate /
mahāpātakīnāṃ tadvaddṛṣṭaṃ pātakināmapi

upapātakināṃ cāpi prāyaścittaṃ viśeṣataḥ /
śāstrāpalāpināṃ naiva prāyaścittaṃ pradṛśyate

yastu sāmānyabhāvena manyate sthalamīdṛśam /
brahmahatyāmavāpnoti bhrūṇahatyāṃ tathaiva ca

svarṇasteye ca yatpāpaṃ surāpāne ca yadbhavet /
gurutalpasya gamane yaccapāpamudīritam

vṛṣalīgamane yacca pāpaṃ sarvaṃ tadaśnute /
nāsti śāstrātparaṃ jñānaṃ nasyāttasmātpravartakam

tasmāttasyāvamānena sadyaḥ patati dūṣakaḥ /
tasmin deśe viśeṣeṇa sarvebhāgavatā harau

devapādodakādīni pītvā yāsyantisadgatim /
na hi sarvo 'pi sarvatra svayaṃvyaktasthalādikam

gatvaivārādhayedviṣṇuṃ sadā taccāpyasaṃbhavi /
ata eva kṛpāsiṃdhurbhagavān bhūtabhāvanaḥ

arcāvatārarūpeṇa grāme grāme gṛhe gṛhe /
avatīrya mahābāhurbhaktasaulabhyahetave

arcyate śāstravidhinā tatra kāryona saṃśayaḥ /
tasmādaprākṛtaṃ deśaṃ na brūyātprākṛtaṃ naraḥ

na ca sāmānyabhāvena taṃ paśyedyadi paśyati /
naśyatyeva na saṃdeha iti śāstraviniścayaḥ