Bhṛgusaṃhitā · Chapter 23

iti śrīvaikhānase bhagavacchāstre bhṛguproktāyāṃ saṃhitāyāṃ prakīrṇādhikāre dvāviṃśo 'dhyāyaḥ.
athatrayoviṃśo 'dhyāyaḥ.
athatrayoviṃśo 'dhyāyaḥ.
utsavacakram
ataḥparaṃ pravakṣyāmi pūrvoddiṣṭaṃ sudarśanam /
sudarśanasya coddiṣṭaṃ pramāṇaṃ ca viśeṣuḥ

mahāberasya mānena navāṅgulamiti smṛtam /
tasya vṛttaṃ samuddiṣṭamarāścaiva tu tṣaṅgulam

vṛttaṃ paṭṭasya vistāramekāṅgulamudāhṛtam /
tanmadhye cārakūṭaṃ syādekāṃgulamudāhṛtam

arā dvādaśa uddiṣṭā etaccakrasya vai tathā /
adhamaṃ mārgamālokya proktametatpramāṇakam

tatra madhyaṃ pramāṇantu vakṣyāmi śruṇutādarāt /
mahāberasya hastena dvādaśāṃgulamucyate

tadvṛttaṃ tasya hastena dvādaśāṃgulamucyate /
vṛttaṃ tasya samuddiṣṭamārakūṭaṃ dviyaṅgulam

vṛttapaṭṭasya vistāramekāṃgulamudāhṛtam /
aṣṭau ca caturaṅgulyā? duddiṣṭāśca samāsataḥ

arāṣṣoḍaśa uddiṣṭāścakrasyaiva tu madhyame /
kūrmaṃ vāpyatha siṃhaṃ vā padmaṃ vāpyatha kālayet

adhastādyogadaṇḍaṃ ca ekāṅgulamudāhṛtam /
ubhayoḥ pādayoścaiva siṃhenaiva tu kārayet

āyasenaiva vā kuryāddāruṇā vā tathaiva ca /
sarvatra suṃdaraṃ kuryātsajānana? vidhīyate

etallakṣaṇamudgiṣṭaṃ cakrasyaiva pramāṇataḥ /
madhūcchiṣṭena vidhinā kuryādvai tatra tatra tu

vidadhyāddeva devasya heti pravaramuttamam /
pramāṇaṃ ca tu sarvatra tattribhāgaṃ viśeṣataḥ

sthāpanāṃ mūrtimantraṃ ca cakrasya śruṇutarṣayaḥ /
athātassaṃpravakṣyāmi vaiṣṇavaṃ cakramuttamam

trividhaṃ cakramuddiṣṭaṃ brahmaṇā parameṣinā /
kālacakraṃ vīracakraṃ sahasravikacaṃ kramāt

karoddhṛtaṃ vīracakraṃ devasya mukhamānataḥ /
sarvājināṃ samūhanta bajaṃ khatrayamantataḥ?

devasya mukhamānaṃ syāddvādaśāṣṭāracihnitam /
jvālāpañcakasaṃyuktaṃ karāgre dakṣiṇe caret

mayaṃ mahīmayaṃ divyamaṣṭāraṃ dvādaśārakam /
ebhirmantraissamabhyarcya rakṣārthaṃ mokṣaśāntaye

kālacakraṃ pravakṣyāmi autsavaṃ sarvaśāntidam /
dhruvaberamukhāyāmaṃ dviguṇāyāmavistṛtam

vṛttaṃ ca ṣaḍguṇaṃ proktaṃ kṣatāntaṃ tatsuvṛttakam /
vṛttasya paṭṭavistāraṃ triyaṅgulamiti smṛtam

ṣaḍaṅgulasamāyāmamārakūṭaṃ tu tṣaṅgulam /
yavā kārakarā jñeyā ubhayatra praveśatā

arakūṭe 'tha siṃhaṃ vā makaraṃ vātha padmakam /
jvālātrikaṃ vā kartavyaṃ jvālāpañjakameva vā

śatāṣṭāraṃ niṃśatiṃ vā uttame samyagācaret /
catuṣpañcadvipañcāśanmadhyame samudāhṛtam

dvātriṃśadvā caturviṃśadadhame saṃprayojayet /
evaṃ syātkālacakrantu utsavārthaṃ prakalpayet

cakrādhastāttathā nālaṃ dvādaśāṃgulamācaret /
cakradviguṇadaṇḍantu khadiraṃ cāsanaṃ bhavet

yājñikairatha vā vṛkṣaiḥ kārayedatra śāsanam /
ṣaḍaṅgulāyatavistārāṃ phalakāṃ saṃprakalpayet

vṛttaṃ vā caturaśraṃ vā laṃbadāmasamāyutam /
triyaṅgulasamutsedhaṃ saṃdhayettarikopari

tadadhastāttu tāṭiṃ ca kuṃbhalaṃbakasaṃyutam /
aṣṭāṃgulasamutsethaṃ kārayediti śāsanam

antassuṣirasaṃ kṛtvā?daṇḍāgre cādha eva vā /
kūradaṇḍena saṃyojya phalakophalapadmakam

latā prasthataraṃ vāpi kārayediti śāsanam /
padmaṃ tu tṣaṅgunāyāmaṃ vistāramadhikāṃgulam

pālikopari siṃhau dvāvubhayoḥ pārśvayoścaret /
cakraṃ saṃvahamānau tau yāvattatra ca kālayet

tayormānaṃ samuddiṣṭaṃ pañcāṃgulamiti smṛtam /
daṇḍamadhyena kuryāttaddaṇḍamūle ṣaḍaṅgulam

pīṭhaṃ ṣaḍaṅgulotsedhaṃ caturaṅgulameva vā /
vṛttaṃ vā caturaśraṃ vā sarojadalakarṇayuk

ṣāḍhaśāṃgulamāyāmaṃ vistāraṃ saṃprakīrtitam /
karṇikāmadhyame nālamaṣṭāṃgula samāyutam

nāladaṇḍena saṃyojya bandhayedaṣṭabandhanaiḥ /
hāravatsudṛḍhaṃ kuryādavakramṛjusaṃyutam

evaṃ kṛtvā yathāmārgaṃ sthāpanaṃ samyagācaret /
sahasravikacaṃ cakraṃ puruṣākāramācaret

raktābhaṃ nīlavarṇaṃ ca navatālena mānataḥ /
dvibhujaṃ mukuṭodbandhaṃ cakracūlinamācaret

sudarśanaṃ tathā cakraṃ sahasravikacaṃ tathā /
anapāyinamityevaṃ mūrtimantraissamarcayet

śatadhāraṃ kālacakraṃ sarvāsuravimardanam /
sarvavighnaharaṃ ceti kālacakraṃ samarcayet

kālacakraṃ pravakṣyāmi sarvāsuravināśanam /
ṣaṭṭriṃśadaṅgulaṃ vāpi ṣaṭ pañcāśacchatāṣṭakam

vistārāyāmatomānamuttamādhamamadhyamam /
mānāṃgulena tadgrāhyaṃ takṣakaṃ vartulaṃ bhavet

sahasrārā aṣṭaśataṃ triśataṃ ṣaṣṭimeva vā /
arāḥkrameṇa saṃyuktā uttamādhamamadhyamāḥ

caturviṃśattathā jvālāṣṣoḍaśa dvādaśātha vā /
daśasaptāṅgulaṃ pañca vṛttaṃ paṭṭasya saṃyutam

cakraprabhehakaṃ bhāgaṃ pīṭhaṃ padmakamācaret /
daṇḍādīni vinā tasya padmaṃ pīṭhasyayojayet

etaduktaṃ mahaccakraṃ sarvāriṣṭavināśanam /
cakrasya sthāpanaṃ mārgaṃ pravakṣyāmi tapodhanāḥ

aṅkurānarpayitvātu kārayedakṣimocanam /
tathādhivāsanaṃ kṛtvā gavyānāmadhivāsanam

yāgaśālāṃ tathā kṛtvā bhūṣayettoraṇānvitam /
śayyāvediṃ ca tanmadhye cādhyardhāyāmavistṛtam

tatturyāṃśodayāṃ vediṃ kṛtvā tāṃ caturaśrakam /
prācyāmāhavanīyaṃ ca kuṇḍamaupāsanāgnivat

prācyāṃ tu snānavediṃ ca kṛtvācaiva vicakṣaṇaḥ /
athādhivāsitaṃ cakramādāyevābhiṣicya ca

agniṃ saṃsādhya pūrvoktaṃ kuṃbhaṃ saṃsāthayetpunaḥ /
cakrasyābhimukhe kuṃbhaṃ dhānyapīṭhoparikramāt

sannyasya tu gururdhīmān yaditaṃ bhāvayettathā /
grāmaṃ pradakṣiṇaṃ kṛtvā śālāyāṃ sthāpayettathā

hṛtpadmamadhye cakreśaṃ dvibhujaṃ prāṃjalīkṛtam /
raktābhaṃ kṛtavastrābhaṃ dhyātvāsamyak prapūrya ca

tasmātkuṃbhe samāvāhya pūrvoktamabhipūjya ca /
vedyāṃ saṃsnāpya taccakraṃ kalaśaisnāpayettadā

samala kṛtya vaktrādyairdhānyapīṭhoparikramāt /
sannyasya kuṃbhaṃ saṃyuktaṃ baddhvā pratisaraṃ tataḥ

śāyayitvā tathā cakraṃ hautraṃ samyak praśaṃsya ca /
cakrāṅgānyāyadhāṃgāni mūrtimantrān pracakṣate

paścādagniṃ paristīrya vaiṣṇavairmantra saṃyutaiḥ /
"bhūmānano 'gre vandyāna'hutvā gāyatrisaṃyutam

śatamaṣṭottaraṃ hutvā rātriśeṣaṃ vyapohya ca /
snātvā prabhāte pūrvoktaṃ cakramādāya pūrvavat

grāmaṃ pradakṣiṇaṃ kṛtvā kuṃbhenāsādayettathā /
maṇḍape dakṣiṇe pārśve kṛtapīṭhe viśeṣataḥ

ratnaṃ nikṣipya pūrvoktamantreṇa sthāpayettadā /
cakramantrau susannyasya bījān sannyasya pūrvavat

kuṃbhācchaktiṃ tathāvāhya pūjayedāsanādibhiḥ /
pāyasādyairni vaidyātha guruṃ samyak prapūjayet