Bhela Samhita · Chapter 5.3

iyaṃ me śiṣṭaśibikā vaiḍūryamaṇiyantritā /
evaṃ pralāpayeccārto gatāyuriti taṃ viduḥ //

prajvalaty api yo dīpe tama evābhipaśyati /
( śabdānvipratibudhyeta cāpūrvāniva nāsti saḥ) //

āvākśirāḥ pralambāmi nāma mā parivartaya /
manujaḥ pralapannevaṃ saptāhaṃ nātivartate //

marmāṇi dalitānīva yo ' bhīkṣṇaṃ cātisāryate /
pravāhamāṇo durgandhi kuṇapaṃ pūtikaṃ tathā //

tac ca lohitagandhaṃ vāpy athavā matsyagandhikam /
kṛṣṇaṃ nīlaṃ vivarṇaṃ vā mumūrṣuś ca sa hocyate //

madhumehī vasāmehī sarpirmehī ca yo naraḥ /
bahumehī ca yo jantuḥ sa vai proktaḥ parāsukaḥ //

prameheta yadā janturbinduṃ binduṃ savedanam /
vāyunā bhinnavastiḥ syād durlabhaṃ tasya jīvitam //

krimayo bahavo yasya nissaranti śarīriṇaḥ /
āturasya śayānasya nauṣadhaṃ tasya sidhyati //

ity etāni bhiṣak dṛṣṭvā lakṣaṇāni mumūrṣatām /
na cikitsāṃ prayuñjīta yathāmārgaṃ cikīrṣakaḥ // ity āha bhagavān ātreyaḥ /
iti bhele indriye tṛtīyo ' dhyāyaḥ // // caturtho ' dhyāyaḥ //