Bhela Samhita · Chapter 5.1

/----------------dve vā jāta eva vinaśyati /

hrasvaikapakṣo vitato yas tu garbhas tu susvaraḥ /
māsamekaṃ tu jīvitvā vināśāyopapadyate //

piṇḍīśirā dīrghahanuranalpe saṃhate bhruvau /
dvitīye māsi saṃprāpte mriyate garbha īdṛśaḥ //

jātamātrasya garbhasya vyañjanaṃ yatra dṛśyate /
tṛtīye māsi saṃprāpte mriyate garbha īdṛśaḥ //

trikekaro ghaṭaśirā yas tu garbhas tu susvaraḥ /
caturthe māsi saṃprāpte vināśam upagacchati //

yasya ṣoḍaśavarśasya vyañjanaṃ tūpajāyate /
śīghraṃ ca pañcadhātutvād alpāyuriha dṛśyate //

yasya viṃśativarṣasya vyañjanaṃ tūpajāyate /
sa dīrghamāyurāpnoti puruṣo nātra saṃśayaḥ //

śarīrāpacayo ' buddhirapathyāni balaṃ tathā /
bālasya yasya dṛśyante taṃ gatāyuṣamādiśet //

yasya jātasya jāyete gulmakāstunakau tathā /
aṣṭāviṃśe gate varṣe sarvaṃ taṃ hanti mānavam //

pṛṣṭhe corasi cāvartassavyatho yas tu dṛśyate /
catvāriṃśe gate varṣe maraṇāyopakalpate //

āvarto yaś ca pṛṣṭhe tu sannatastriṣu dṛśyate /
phalamasya tu vijñeyaṃ sthāpanaṃ na prasūyate //

sthūlāsthūlāṅgulī pāṇī nakhā yasyāpi lohitāḥ /
kalyāṇadeśapratyaṅgaḥ pañcāśadvarṣa eva ca //

vyūṭhorasko dīrghabhujaḥ sthūlajānuś ca yo bhavet /
dīrghāṅgulirdīrghanakhaḥ ṣaṣṭi varṣāṇi jīvati //

utpīḍitasvaraṃ vāpi tuṅganāsakaconmukham /
ūrukaṃ bhadrasampannaṃ vidyāt saptatikaṃ naraḥ //

bhadraṃ puraś ca paś cāc ca ṛjukaṃ priyavādinam /
aśītikaṃ naraṃ vidyāt kṛṣṇātreyavaco yathā //

lalāṭaṃ nāsikā karṇau yasyaitāni pṛthak pṛthak /
ṣaḍaṅgulapramāṇāni sa jīvati śataṃ samāḥ //

yasyākuñcitam eva syājjānubhyāṃ samitaṃ śiraḥ /
ūrdhvajānugatau karṇau pautraṃ paśyatyayaṃ naraḥ //

mahāntau vipulau karṇau bhavetāṃ romaśau tathā /
snigdhau bahulakeśaś ca sa ceha śatamṛcchati //

dharmeṇa satyavākyena guruśuśrūṣaṇena ca /
rasāyanopayogāc ca sa dīrghamanujīvati // ity āha bhagavān ātreyaḥ /
iti bhele indriye prathamo ' dhyāyaḥ // // dvitīyo ' dhyāyaḥ //