Bhāvopahārastotra with Vivaraṇa commentary · Verses 21-40

turīyodyānavikasatsaṃvitsaurabhanirbharaiḥ
girīśa tisṛbhir vāgbhiḥ stutipuṣpaiḥ prapūjyase

prāṇavahniśikhāstreṇa bhaṅktvā brahmabilaṃ lasat
dhūpavartinibhābhāso dhūpas te nagajādhava

anāhatā nadaty antar yā gaur dhāmni pare parā
sā ghaṇṭā vādyate śambhor agre granthārthagarbhiṇī

kandānalollasacchaktiśikhāṃ dīpaśikhopamām
uddīpayāmi bhagavan mohadhvāntāpanuttaye

vṛttityāgāmṛtakalācandraś candrakirīṭinaḥ
samālambhanavevāstu mumukṣūṇāṃ vimuktaye

nādaśaktyuditaṃ dhāma malatrayavivarjitam
uṣṇīṣam astu te rudra vidrāvitanabho 'rgalam

bhavadbhaktisudhāsārasaṃplāvitahṛdambudheḥ
prollasadbrahmakamalam amalaṃ te 'stu śekharam

bodhāravindasaṃdoho hara hāralatā tava
nityoditāntaravyāptikalā candrakalā ca te

ākṛṣyārkakaraiḥ śāktair viśvākāśakuśeśayāt
ciccandrāmṛtaniḥṣyandam āsvādaya jagatpate

mantraṃ manasi tacchaktau tāṃ svadhāmni sadodite
kṛtvā japavidhiṃ samyak śivāya vinivedaye

niḥśeṣārthaparityāge grahaṇe vāmitād dyute
anābilaṃ parāṃ vyāptiṃ mudrāṃ badhnāmi dhūrjaṭe

śaṣkulīkarṇayor baddhvā yo rāvo 'tra vijṛmbhate
tadgītam atha te vādyam ādyasaṃpuṭaghaṭṭanāt

bhavadbhāvarasāveśāt tāṇḍavāḍambaroddhataḥ
mantrādhvani nadāmy antaḥ kim u bāhyārthabhāvanaiḥ

akhaṇḍamaṇḍalākāraśivatābhāvanāmbaram
upariṣṭān mayā śambhor vitānam upakalpitam

recayitvā karandhreṇa bhācakraṃ hṛdayāmbarāt
dhāryate dhūrjaṭer agre cārucāmaravan mayā

nāsāpuṭakuṭīkoṭivisṛtaiḥ prasṛtaiḥ puraḥ
tālavṛntair iva vibho vījyase haṃsamārutaiḥ

sarvātapavinirmuktaṃ & bhavadbhaktisudhāsitam
ātapatram athāsmābhir & dhāryate te mahāśaya

mamatāmandurātyāgā&trailokyākarṣaṇakṣamaḥ
ahaṃkāraturaṅgas te & vāhanāya prakalpitaḥ

svasaṃvinnandanānanda&nāgavallīdalojjvalam
sphuratspandendusurabhi & tāmbūlaṃ te nivedyate

bhogyabhoktṛvibhedottha&vāsanendhanasaṃcayam
advaitāgnau juhomy antaḥ & śāṃkare sreyasām nidhau