Bhāvopahārastotra with Vivaraṇa commentary · Verses 1-20

[oṃ] namaḥ sūryakalājāla&kāladehāpahāriṇe
ādhārādheyapīṭhāya & bhavāyābhavadāyine

namaḥ śiśuniśākānta&kalākamalamāline
paramānandadehāya & śivāyāvyaktamūrtaye

namaḥ pāśaughasaṃghaṭṭalayaviśleṣakāriṇe
mantragarbhodarasthāya harāya paramātmane

yadyapi tvaṃ guṇātīto vākpater apy agocaraḥ
tathāpy ā hṛdayāt stotum udyatā vāk sadā mama

atibhaktirasāveśavivaśā viśvatomukha
tvatpreritā yato nātha nāparādho 'sti me kvacit

tvatpādābjarajaḥpūtacitābhūtivibhūṣitāt
gṛhāṇa mattaḥ śrīkaṇṭha ! bhāvapūjām akṛtrimām

hṛtpuṣkarākhye snātvāntas tīrthe yoginiṣevite
saṃbodhadhautavasanaḥ śyāmakaṇṭhaṃ yajāmy aham

prabhūtabhūtasaṃbhūtaśoṇitair arghabhājanam
kriyate te mahākālakāyakaṃkālakandale

yad yad vikalpanājālaṃ bāhyārthapratipattaye
tat tad dvārādhipakulaṃ tava pūjyaṃ manasvibhiḥ

aśeṣāvaraṇonmuktaguptasauṣuptamaṇḍale
pūjyase nagajākānta ! grahaṇe candrasūryayoḥ

hānādānodayārambhasadasadvibhramojjhitam
jñaptimātrapratiṣṭhānam āsanaṃ trijagatpate

mūrtidānam anābhāsaśaktibhāsopabṛṃhitam
turyapīṭhapratiṣṭhānaṃ vitarāmi jagatpate

dikkāladeśakalanākalaṅkojjhitacetasaḥ
kaḥ karoti budhaḥ sthāṇor āhvānādivisarjanam

sūryaśītāṃunetrābhyāṃ mathitvā śaktivāridhim
parāmṛtarasābhyaṅgaṃ śivāya vinivedaye

indriyeṣv indriyārtheṣu rāgalobhānuyāyiṣu
niḥsnehatvaṃ prabhutvaṃ ca rūkṣam udvartanaṃ tava

saṃśodhyānacchakalayā baindhavaṃ tīrthamañjasā
tadvirāmarasasnānaṃ deyaṃ candrārdhamaulaye

svaprabodhāmbarodāravikasadvastragharṣaṇam
viniveśya bhavatsaṃvidvikārān vikarāmahe

jñānajñeyaparityāganaganirjharavisrutam
paramānandadaṃ me 'ntas tava pādyam anābilam

amandānandaniḥṣyandaspandamandirakandarāt
galatkaivalyasalilam ādatsvācamanaṃ vibho

prakṣālya dhāraṇāmbhobhir granthipañcakamauktikam
anarghyam arghaṃ pādebhyaḥ prayacchāmi vṛṣākape