Bhavishya Purana · Chapter 7

// śrīkṛṣṇa uvāca // //
yadetatte samākhyātaṃ gaṃbhīraṃ narakārṇavama//
vratopavāsaniyamaplavenottīryate sukham

durllabhaṃ prāpya mānuṣyaṃ vidyutpatanacañcalam //
tathātmānaṃ samādadhyādbhraśyate na punaryathā

dāna vratamayī kīrtiryasya syādiha dehinaḥ //
paraloke'pi sa tayā jñāyate jñātivarddhanaḥ

jñāyate neha nāmutra vratasvādhyāyavarjitaḥ //
puruṣaḥ puruṣavyāghra tasmādvrataparo bhavet

atra te kathayiṣyāmi itihāsaṃ purātanam //
siddhena saha saṃvādamavaṃtyāṃ brāhmaṇasya hi

yogarddhisiddhyā saṃsiddhaḥ kaścitsiddho mahītalam //
cacāra vikṛtaṃ kṛtvā vapuḥ paramabhīṣaṇam

nigīrṇadaṃto laṃboṣṭhaḥ piṃgākṣastanumūrddhajaḥ //
truṭitaika karṇo durvaṇaḥ śīrṇavastro mahodaraḥ

cipiṭākṣaḥ sphuṭitapājjaṃghāḍhyaḥ kṛśakūrparaḥ //
diśaḥ paśyati saṃhṛṣṭo babhrāmodbhrāṃtacittavat

mūlajālikavipreṇa dṛṣṭaḥ pṛṣṭaśca ko bhavān //
kadā svargātsamāyātaḥ kena kāryeṇa me vada

kacciddṛṣṭā tvayā raṃbhā bhābhāsitadigaṃtarā //
cittasaṃmohanakarī devānāmekasundarī

gatvā madvacanādvācyā nirvācyā doṣadarśibhiḥ //
āvaṃtyastvāṃ kuśalinīṃ pṛcchati sma dvijo ttamaḥ

siddhaḥ prasiddhaṃ taṃ vipraṃ prāhedaṃ vismayānvitaḥ //
kathaṃ tvayāhaṃ vijñātaḥ svargādabhyāgataḥ sphuṭam

brāhmaṇastamathovāca vijñāto'si mayā yathā //
tathā te'haṃ pravakṣyāmi kṣīṇāghaughāvadhāraya

gātratrayaṃ virūpaṃ syāddvitīyaṃ vā svarūpataḥ//
dṛṣṭvā sarvāṃga vairūpyaṃ vijñāto'si tato mayā

durllaṃghyā prakṛtiḥ sākṣādanubhūtakarī bhavet //
prakṛteranyathābhāvaḥ sarvathā lakṣyate janaiḥ

viprasyaivaṃ vacaḥ śrutvā jagāmādarśanaṃ śanaiḥ //
punaḥ kaiścidahorātrairājagāma sa tāṃ purīm

mūlajālakavipreṇa pṛṣṭaḥ prāhāmarāvatīm //
gato'haṃ pṛṣṭavāṃ statra raṃbhāṃ vibhramakāriṇīm

śakrasyāvasare vṛtte vrajantyāḥ svagṛhaṃ mayā //
tvatsaṃdeśaḥ samākhyātaḥ sāvadatko na vedmi tam

vidyayā kalayā cāpi pauruṣeṇa vratena ca //
tapasā vā pumāmartyo divi vijñāyate ciram

brāhmaṇastamathovāca mugdhā dagdhāgnisaṃbhavā //
na bhakṣayāmi śakaṭaṃ vratenaitena vetti mām

tasyaitadvacanaṃ śrutvā sa siddhaḥ suviśuddhadhīḥ //
prahasyāmaṃtrya taṃ vipraṃ jagāmādarśanaṃ punaḥ

kadācicca ratā tena svargamārgaṃ yadṛcchayā //
dṛṣṭvā raṃbhāṃ dvijaproktaṃ sarvameva niveditam

// raṃbhovāca // //
ko na jānāmi taṃ vipraṃ śakaṭavratacāriṇam //
mūlajālairvartayaṃtaṃ mahākālavanāśrayam

darśanādatha saṃbhāṣādupakārātsahāsanāt //
caturdhā snehanirbaṃdho nṛṇāṃ saṃjāyate'dhikaḥ

na darśanaṃ na saṃbhāṣā kadācitsaha tena me //
nāmaśravaṇamātreṇa snehaḥ saṃdarśito mahān

ityevamuktvā raṃbhorū raṃbhā jaṃbhāriṇoṃtikam //
vismayotphullanayanā jagāma gajagāminī

gatvā nivedayāmāsa snehavrataviceṣṭitam //
purato ruddhahṛdayā brāhmaṇasya ca dhīmataḥ

śakraḥ provāca cārvaṃgīṃ gīrvāṇahṛdayaṃgamām //
kimānayāmi taṃ vipraṃ samīpaṃ tava suvratam

divyamālyāṃbaradharaṃ divyasragunulepanam //
vimānavaramāropya darśayāmāsa taṃ punaḥ

tatrasthaḥ sa dvijo bhogīvibhunakti saha raṃbhayā //
śakaṭavratamāhātmyamityetatte mayoditam

rājyaśriyaṃ jagati sarvajanopabhogyāmāpnoti śakraśivakeśavayornivāsam//
nāprāpyabhasti bhuvane sudṛḍhavratānāṃ tasmātsadā vratapareṇa nareṇa bhāvyam

iti śrībha viṣye mahāpurāṇe uttaraparvaṇi śrīkṛṣṇayudhiṣṭhirasaṃvāde śakaṭavratamāhātmyakathanaṃnāma saptamo'dhyāyaḥ