Bhargava Tantra · Chapter 9

// navamo'dhyāyaḥ //
[pratiṣṭhāṅgakuṃbhārcanādividhinirūpaṇādhyāyaḥ]
[kuṃbhatoraṇādyārādhyadevatāvivekaḥ]
śrīrāmaḥ
gambhīravedanirghoṣavāditradhvanimaṇḍite/
digantare dvijagaṇe prasannavadanānvite

maṅgalālāpacature saṃhṛṣṭavanitājane/
ākāśe nirmale jyotsnāmaṅgale candramaṇḍale

sukhasparśe gandhavahe nirmale mānase guroḥ/
sumuhūrte śubhe lagne kumbhāvāhanamācaret

puṇyāhaṃ vācayet sārdhaṃ brāhmaṇaiḥ vedapāragaiḥ/
prokṣayedakhilān kuṃbhān yāgadravyāṇi toraṇān

bhūtaśuddhiṃ purā kṛtvā mānasaṃ yāgamācaret/
pūrvasmin toraṇe pūjyo mahendraḥ pākaśāsanaḥ

dhvajayorantarayostatra pārśvayorveṣṭayedguruḥ/
kumudaṃ kumudākṣaṃ ca paurvāparyeṇa pūjayet

kuṃbhayorubhayostatra pūjayetpūrṇapuṣkarau/
dharmarājaṃ tathā yāmye toraṇe dhvajayostathā

puṇḍarīko vāmanaśca kuṃbhayorubhayorapi/
ānando nandanaścobhau pūjanīyau yathākramam

vāruṇe toraṇe cāpi varuṇaṃ devamarcayet/
pārśvayordhvajayordevau śaṅkuśrutisunetrakau

kuṃbhayorvīrasenaṃ ca suṣeṇaṃ ca samarcayet/
saumye tu toraṇe somaṃ baddhayordhvajayostayoḥ

sumukhaṃ supratiṣṭhaṃ ca sambhavaprabhavau tathā/
kumbhayorarcayaiddevau dakṣiṇāditrayo dhvajāḥ

pītanīlāstathā śvetāḥ kalpitāḥ kalaśodbhava/
[tattadvedapārāyaṇasthānanirdeśaḥ]
ṛcaṃ prācyāṃ yajuryāmye sāmanāma ca vāruṇe

atharvaṇaṃ tathodīcyāṃ pāṭhayedbrāhmaṇottamaḥ/
[kuṃbhe bhagavadarcanaṃ homaprakāraśca]
āvāhanaṃ tu sarvatra yogapīṭhapurassaram

śāyitānāṃ tu bimbānāṃ paritaḥ sthāpiteṣvapi/
kumbheṣvāvāhanaṃ kuryāt prāgādyāśāpurassaram

viṣṇvādimūrtiraṣṭau ca tadasyetyādibhiḥ kramāt/
aṣṭabhi`rviṣṇusūkta'sya teṣāṃ pūjā yathākramam

tatastu paramātmānaṃ vāsudevaṃ sanātanam/
mahākumbhe samāvāhya `dvādaśākṣara'vidyayā

sudarśanaṃ ca karake sahasrādityasannibham/
āvāhya pūjayeddhīmān ardhyādyaiḥ sva sva vidyayā

ardhyaṃ pādyaṃ tathācāmaṃ snānavastropavītake/
gandhaṃ puṣpaṃ dhūpadīpau arcanaṃ cākṣataṃ stutiḥ

naivedyaṃ paramānnādi tāmbūlaṃ gandhavastubhiḥ/
nīrājanaṃ stutiścānte namaskāraṃ pradakṣiṇam

evaṃ samāpya tāṃ pūjāṃ tataḥ kuṇḍe'gnimarcayet/
samidbhiścarubhiścājyairvījaiścāhutimācaret

[bhagavataḥ vāsudevasya dhyānaprakāraḥ]
agastyaḥ
rāma rāma jagannātha vāsudeva sanātana/
kathaṃ dhyāyedvāsudevaṃ brūhi me kṛpayā vibho

śrīrāmaḥ
vāsudevamajaṃ śāntaṃ koṭyarkendvagnisannibhavam/
anekahastacaraṇamanekākṣiśiromukham

atīndriyamamaryādam atyadbhutavapurdharam/
bhāsayantaṃ diśaḥ sarvāḥ dehaniryatprabhācayaiḥ

anekābharaṇairyuktamanekāyudhamaṇḍitam/
nānāvarṇamayaṃ devaṃ svayaṃ surabhivigraham

ṛṣibhiśca marīcyādyairbrahmādyairapi daivateḥ/
acintyamahimānaṃ tamindirādyairabhiṣṭutam

ko vā dhyātuṃ kṣamo loke ko vā stotuṃ bhuvi kṣamaḥ/
tathāpi parameśānaṃ puruṣaṃ bhaktavatsalam

caturbhujamudārāṅgaṃ śaṅkhacakragadādharam/
kirīṭahārakaṭakakāñcīkuṇḍalamaṇḍitam

śrīvatsakaustubhasvacchayajñasūtrāṅgulīyakam/
divyapītāmbaradharaṃ kalak‌vaṇitanūpuram

aṣṭabhiścāpi devībhiḥ prāñcalībhiśca sevitam/
pakṣīndraviṣvaksenābhyāṃ parivāraiśca sevitam

atiprasannavadanaṃ bālakaṃ tilakojvalam/
abhayapradamāsīnaṃ śeṣabhogāsane śubhe

divyagandhaviliptāṅgaṃ nānāmālyopaśobhitam/
smitena vijitajyotsnaṃ nīlanīrajalocanam

kambukaṇṭhaṃ mahāsatvaṃ pīnottuṅgāṃsaśobhitam/
uttuṃgapīnavipulasamasnigdhamahorasam

puṣṭodaraṃ magnanābhiṃ pṛthuśroṇībharāñcitam/
ūrudvayakṛtadvandvaraṃ bhāsaṃraṃbhalakṣitam

caraṇadvandvavijitavikasatsarasīruham/
aṅguṣṭhanakhaniryadbhirbhānubhirjitabhāskaram

ājānudīrghaiḥ pṛthulaiḥ hastairāyudhadhāriṇam/
dhyātvaivaṃ vāsudevaṃ taṃ kuryādāvāhanakriyām

[tattaddevānāṃ homakramanirdeśaḥ]
mathitaṃ maṇijaṃ yadvā laukikaṃ vā hutāśanam/
`dvādaśākṣara'mantreṇa prokṣayitvā sasarpiṣā

paryagnikaraṇaṃ kuryāt kuṇḍānāṃ darbhamuṣṭibhiḥ/
uddīpya jvalanaṃ samyak `parivājatī'tyṛcā

saṃskuryātpaścime kuṇḍe jvalantaṃ jālavedasam/
prāgādiṣu ca kuṇḍeṣu pratyak kuṇḍāt samāharet

agnimadhye tu kuṇḍeṣu yogapīṭhaṃ prakalpayet/
śunāsīre vāsudevaṃ yāmye saṅkarṣaṇaṃ tathā

pradyumnaṃ vāruṇe kuṇḍe aniruddhamudak‌pade/
evamāvāhya deveśaṃ pūjayetsarpiṣā tataḥ

[homakrame samidhādivivekaḥ]
catasraḥ samidhaḥ proktā prāgādiṣu yathākramam/
palāśakhadirāśvatthavilvodumbarabhūruhāḥ

alābhe sarvakuṇḍeṣu pālāśyekaiva śasyate/
pāyasaṃ kṛsaraṃ cāpi guḍānnaṃ ca yathākramam

haridrānnaṃ ca pūrvādikuṇḍeṣu caravaḥ smṛtāḥ/
pāyasānnena vā kuryāt śuddhānnenāthavā bhavet

tilaśāliyavā veṇurhome bījānyanukramāt/
tilairvā sarvakuṇḍeṣu bījālābhe samācaret

vāsudevādibhirmantrairhomāḥ prāgādivahniṣu/
samidbhirājyaiścarubhiḥ bījaiḥ kāryāśca mūrtipaiḥ

aṣṭottaraśataṃ homaḥ pratyekaṃ kalaśodbhava/
evaṃ juhvatsu ṛtvikṣu mūrtihomaṃ yathākramam

[tattvahomavidhiḥ]
tattvahomaṃ svayaṃ kuryāt brāhmakuṇḍe gurūttamaḥ/
purastāddevadevasya bimbaṃ bhūtamayaṃ smaret

ardhyādyairupacaryātha tattvasaṃhāramācaret/
saṃharetpṛthivīmapsu tāṃ vahnau taṃ ca mārute

tamākāśe ca manasi tacca tanmātrayā saha/
tadīyaiścāpi tattvaiśca tanmano'haṃkṛtau haret

ahaṃkṛtiṃ tato buddhau prakṛtau tāṃ samāharet/
tāṃ ca jīve tato'bhyarcya punarutpādayedguruḥ

prācīnakuṇḍe juhuyāt tattvāni kapilāghṛtaiḥ/
varmaṇā pariṣicyādau sṛṣṭipanthānamāsthitaḥ

tattvavyāhṛtibhiḥ kuryāt pṛthagaṣṭottaraṃ śatam/
aṣṭāviṃśati vāṣṭau vā pratimantrāhutirbhavet

[makārādyakṣaratattvānāṃ pratimāṅgeṣu nyāsakramaḥ]
jīvamantro makāraḥ syāt bhakāraḥ prakṛtirbhavet/
buddhitattvaṃ bakāraḥ syāt phakāraḥ syādahaṃkṛtiḥ

manastattvaṃ pakāraḥ syāt pratimāhṛdayasthitāḥ/
nakāraśśabdatanmātraṃ śrotraikaviṣayaṃ bhavet

dhakāraḥ sparśatanmātraṃ tvaci nityaṃ pratiṣṭhitam/
dakāro rūpatanmātraṃ netrayorviṣayaṃ bhavet

thakāro rasatanmātraṃ jihvāyāmeva vartate/
takāro gandhatanmātraṃ vartate nāsikāñcale

ṇakāraḥ śrotratattvaṃ syāt śrotrayornityamāvaset/
ḍhakārastu tvagātmā syāt tvaci sarvatra vartate

ḍakāro netra tattvātmā nityaṃ nayanayorvaset/
jihvātmā tu ṭhakāraḥ syāt jihvārūpaṃ jagatraye

ghrāṇātmā tu ṭakāraḥ syāt nāsikāgre niveśitaḥ/
ñakāro vāṅmayo varṇo vāci nityaṃ pratiṣṭhitaḥ

jhakāraḥ karatattvaṃ syāt karayorvidhinirmitaḥ/
jakāraḥ pādatattvārṇaḥ nityaṃ pādatale sthitaḥ

chakāraḥ pāyutattvātmā pāyumūlamupāśritaḥ/
cakāro mehanātmā syāt mehane sanniveśitaḥ

ṅakāraḥ pṛthivītattvam pādājjānupravartakam/
aptattvaṃ tu dhakārassyāt jānorguhyāvadhisthitaḥ

tejastattvaṃ gakāraḥ syāta guhyādānābhi vartate/
khakāro vāyutattvātmā nābhernāsāntamāsthitaḥ

kakāro'mbaratattvātmā tato brahmabilāvadhi/
evaṃ tattvākṣakaḥ proktaḥ praṇavādi samuddharet

praṇavastattvamantraśca natiśca sthānanāma ca/
caturthyantaṃ samuddhṛtya vahnijāyāṃ gurūttamaḥ

hutvā sampātamāhṛtya tattadaṅgeṣu secayet/
[pratimāyāṃ śaktiniveśaprakāraḥ]
evaṃ hutvā tataḥ prāṇavāyuhomaṃ samācaret

prāṇaṃ hutvā suṣumnāyāmilāyāṃ tadanantaram/
apānaṃ piṅgalāyāntu samānaṃ gandhasaṃjñike

udānaṃ hastijihvāyāṃ vyānavāyuṃ niveśayet/
pūṣāyāmapi nāgendraṃ yaśasvinyāṃ tu kacchapam

alambusāyāṃ kṛkaraṃ devadattaṃ kuhūpade/
dhanañjayaṃ tu kaiśinyāṃ hṛtvā hṛtvā svavidyayā

sampātaṃ secayedbimbe tatra śaktiṃ niveśayet/
saṅkhaṃ cakraṃ gadāpadmaṃ śārṅgaṃ śrīvatsakaustubhe

vanamālāṃ khageśaṃ ca hutvā sampātasecanam/
`asunīte'ti mantreṇa aṣṭottaraśatāhutīḥ

hṛtvā prāṇapratiṣṭhārṇa śiraskenājyasecanam/
sampātasecane kāle tattacchaktiṃ niveśayet

[caṇḍādiparivāṇām adhivāsanādividhiḥ]
caṇḍādīnāṃ ca pīṭhānāṃ parivāragaṇasya ca/
anyeṣāmapi sarveṣāṃ dhānyapīṭhe'dhivāsanam

kṛtvā tattadvidyayaiva hutvā cāṣṭottaraṃ śatam/
sarpiṣā'hṛtya sampātaṃ tattadbimbeṣu secayet

evaṃ niravaśeṣeṇa kṛte home yathāvidhi/
śāntihomaṃ tataḥ kuryāt sarvadoṣāpanuttaye

oṃ bhūrbhuvaḥ suvaḥ svāhetyaṣṭottarasahasrakam/
aṣṭottaraśataṃ yadvā sarpiṣā pūrvavarhiṣi

hutbā sampātamādāya sarveṣvaṅgeṣu secayet/
[ekaberabahaberapratiṣṭhāvidhau viśeṣaḥ]
brāhme pade sthāpanīye dhruvabere munīśvara

vedikādighaṭāmbobhirabliṅgaiḥ prokṣayettataḥ/
āgneyādighaṭāmbhobhi`rviṣṇugāyatriyo'kṣaṇam

bahubere tu sadanaṃ praviśyaivokṣaṇaṃ bhavet/
tataścaturvidhānnaṃ ca haraye vinivedayet

praṇavenopacārāṃstān sarvānapi samācaret/
[balisamarpaṇavidhiḥ]
bimbamutthāpya tejasvī prāṅmukhaṃ viniveśya ca

abhyarcya gandhapuṣpādyaiḥ balidānaṃ samācaret/
māṣodanena bhūtebhyaḥ sarvebhyo'pi yathāvidhi

gomayālepite bhūmitale samyagalaṅkṛte/
ādyāśca karmajāścaiva bhūtāḥ prāgādiṣu sthitāḥ

parvateṣvapyaraṇyeṣu vṛkṣāgreṣu vasanti ye/
ālayeṣu ca tīrtheṣu ṛṣīṇāmāśrameṣu ca

kūpeṣu ca taṭākeṣu ye vasanti gṛhādiṣu/
uttamāḥ madhyamāścāpi rājasāstāmasāstu vā

balyarthinaḥ samāyāntu tebhyaḥ pūjāṃ karomyaham/
idamardhyamidaṃ pādyamidamācamanīyakam

snānametat sagandhodaṃ vastramettasunirmalam/
idaṃ gandhamidaṃ puṣpam idaṃ dhūpaṃ sadīpakam

anarghamakṣatamidaṃ gṛhṇantu balidevatāḥ/
māṣaudanaṃ tat saghṛtaṃ dadhimiśraṃ guḍānvitam

bhakṣyaiśca vividhairyuktaṃ pāyasena ca miśritam/
tāmbūlapūgasahitaṃ madhudravasamanvitam

bhoktuṃ tripuruṣairyojñaṃ miśrayetpayasā gavām/
vibhajya tatttridhā dhīmāna balidānaṃ samācaret

kurvanti vighnaṃ ye bhūtāḥ dharmakāryeṣu ye bhuvi/
ye haranti ca puṇyāni tebhyastebhyaḥ ayaṃ baliḥ

viniyujya ca kāryeṣu phalārtha vindate ta ye/
rājasā madhyamaguṇāḥ tebhyastebhyaḥ ayaṃ baliḥ

yāgādiṣu pravṛtteṣu dṛṣṭvā tuṣṭimavāpnuyuḥ/
ye bhūtāḥ uttamaguṇāḥ tebhyastebhyaḥ ayaṃ baliḥ

[pratiṣṭhāsthānāt gantuṃ balidevaprārthanākramaḥ]
dattvaiva balimācāryaḥ prārthayedbalidevatāḥ/
pratiṣṭhā devadevasya kriyate paramātmanaḥ

itaḥ prabhṛti yuṣmabhirnaiṣā vastuṃ kṣamā mahī/
tasmādanyatra gacchadhvaṃ balidānena toṣitāḥ

deśikaḥ prārthayedevaṃ vinīto balidevatāḥ/
te tuṣṭāḥ balidānena prārthitāḥ yānti niścayam

[piṇḍikādyadhivāsaḥ tadaṅgabhūtahomaśca]
piṇḍikāṃ devadevasya dhānyapīṭhe'dhivāsayet/
ratnānyapi ca lohāni dhānyānyapyadhivāsayet

pṛthak pṛthak bhājaneṣu vāsobhirveṣṭayennavaiḥ/
viṣṇugāyatriyājyena homaścāṣṭottaraṃ śatam

[pratisarabandhaḥ pūrṇāhutikramaḥ maṅgalasūcakalakṣaṇāni ca]
hemasūtraṃ pratisaraṃ pratiṣṭhārtha gurūttamaḥ/
bandhayeddevadevasya haste puṇyāhapūrvakam

tataḥ pūrṇāhutiṃ kuryuḥ kuṇḍe kuṇḍe yathākramam/
puṇyagandhavaho dhūmaḥ jvālādakṣiṇamaṇḍalā

agniḥ kanakavarṇābhaḥ yadvā kamalasannibhaḥ/
ācāryasya manastuṣṭirime maṅgalasūcakāḥ

[rātriyāpanakramaḥ]
gītavāditranirghoṣaiḥ brahmaghoṣaiśca maṅgalaiḥ/
nayeyustāṃ niśāmṛtvik yajamānagurūttamāḥ