Bhargava Tantra · Chapter 10

// daśamo'dhyāyaḥ //
[pratiṣṭhākrame pratimāpīṭhasthāpanādinirūpaṇādhyāyaḥ]
[garbhagṛhe bhagavadānayanam ādhāraśilāsthāpanañca]
śrīrāmaḥ
prabhātāyāṃ tu śarvaryāṃ nirmale bhāskarodaye/
śubhe muhūrte samprāpte mañcādutthāpayeddharim

arcayedgandhapuṣpādyaiḥ alaṅkuryādviśeṣataḥ/
garbhamandiramāsādya tatrādhāraśilāṃ kṣipet

āyāmasamavistārāṃ yadvā vṛttāṃ manoharām/
sudhayā tāṃ dṛḍhīkṛtya ratnanyāsaṃ samācaret

[ādhārapīṭhagarte bījaratnanyāsakramaḥ]
yavo brīhiśca niṣpāvaḥ priyaṅgutilamāṣakāḥ/
nīvārāḥ śālayaścāṣṭau garte prāgādi vinyaset

prathamāvaraṇe paścāt dvitīyāvaraṇe tathā/
vajramauktikavaiḍūryavālajasphaṭikānyapi

puṣparāgaṃ candrakāntam indranīlaṃ kramānnyaset/
tṛtīyāvaraṇe svarṇarajatāyastrapūṇi ca

tāmrasīsakakāṃsyāni kacchapaṃ svarṇanirmitam/
krameṇa nikṣipedgarte madhyagarte vinikṣipet

śālibījaṃ pāradaṃ ca navaratnāni kāñcanam/
evaṃ vinyasya medhāvī viṣṇugāyatrividyayā

apidhāya strīśilayā śrīsūktena yathādṛḍham/
sudhayā tāṃ dṛḍhīkṛtya puṇyāhaprokṣaṇaṃ caret

[piṇḍikāyāṃ lakṣmyāḥ āvāhanamarcanaṃ ca]
āvāhayet piṇḍikāyāṃ lakṣmīṃ kamalavāsinīm/
arcayedgandhapuṣpādyaiḥ piṇḍikādhiṣṭhitāṃ śriyam

[bimbārthaṃ pīṭhārthaṃ ratnanyāsārthaṃ ca svīkāryāḥ śilāḥ]
bimbaṃ puṃśilayā kuryāt pīṭhaṃ strīśilayā bhavet/
ratnanyāsastu kartavyo napuṃsakaśilopari

[garbhagṛhe piṇḍikāyuktabimbasya niveśaḥ tatsthāpanañca]
navena vāsasācchādya piṇḍikāṃ yāgasadmani/
harimabhyarcya vidhivat agnīnapi visarjayet

dvāratoraṇakumbhasthān pālikādhiṣṭhitānapi/
somakuṃbhasthitaṃ devaṃ visṛjya tadanantaram

mahākuṃbhopakuṃbhāṃśca dhārayeyuśca mūrtipāḥ/
ācāryaḥ purato yāyāt gṛhītvā karakaṃ śubham

agrataḥ secayenmārgaṃ galantyā vāridhārayā/
garbhagehaṃ vimānasya nītvā tatra niveśayet

ācāryo ṛtvijaścānye devamutthāpya maṅgalaiḥ/
vedairvādyaiśca vividhairgaccheyurmandiraṃ prati

antaḥ praveśayeddevaṃ piṇḍikāyāṃ niveśayet/
śubhe muhūrte samprāpte brahmasūtraṃ vilokayan

`ātvā hārṣaṃ pratiṣṭhāsi' `dhruvādyau'riti vidyayā/
ācāryaḥ purataḥ sthitvā sthāpayetsarvavidyayā

[piṇḍikāpratimayoḥ saṃyojanam aṣṭabandhakalpanaprakāraśca]
brahmasūtraṃ gururdṛṣṭvā samatāṃ ca vilokayet/
aṣṭabandhena badhnīyāt lāṅgalena dṛḍhaṃ yathā

sārdhamekaṃ cūrṇabhāgaṃ bhāgamekaṃ ca guggulam/
ardhabhāgāṃ tathā lākṣāṃ kuruvindaṃ tadardhakam

madhūcchiṣṭaṃ tadardhaṃ tu tūlaṃ sarpiśca gairikam/
yatheṣṭaṃ yojayeddhīmān yathāmṛdu bhavettathā

[mūlabimbe parivāradevatābimbeṣu ca bhagavataḥ āvāhanam]
puṇyāhaṃ vācayet paścāt prokṣayedapi piṇḍikām/
bimbaṃ ca vāsudevasya paścādāvāhanaṃ caret

dhyāyetparātparaṃ viṣṇuṃ hṛtpadme karṇikopari/
āvāhayettato bimbe yogapīṭhapurassaram

āvāhya mūlamantreṇa vardhanīsthena vāriṇā/
pariṣicya ṣaḍarṇena prokṣayetkuṃbhavāribhiḥ

ṛtvikṣu śāntimantrāṇi paṭhatsu brāhmaṇeṣvapi/
ghoṣayatsu brahmaghoṣaṃ tauryanṛttādimaṅgalaiḥ

dvādaśākṣaramantreṇa brahmakūrcodakokṣaṇam/
upakuṃbhāṣṭakajalaistathā vai sva sva vidyayā

tattatkuṃbhagatāṃ śaktiṃ tattanmantreṇa yojayet/
kuṃbhatoyāvaśeṣeṇa parivārān prakalpayet

aṣṭākṣarasya mantrasya nyāsaṃ bimbe samarpayet/
sānnidhyaṃ sarvadā tatra prārthayeddeśikottamaḥ

evamāvāhya deveśaṃ prokṣya śaktiṃ niveśya ca/
parivārān yathāsthānam sthāpayitvā yathāvidhi

āvāhanaprokṣaṇādi sarvaṃ karma samāpya ca/
abhyarcya devadeveśamupacāraiḥ pṛthagvidhaiḥ

mahāhavirnivedyātha sthāpiteṣu yathākramam/
baliṃ dadyāt yathāśāstramekabere tvayaṃ vidhiḥ

[bahuberapratiṣṭhāvidhau dhruvādibimbānāṃ sthānanirdeśaḥ]
bahuberapratiṣṭhāyāṃ viśeṣo'styatra kaścana/
divyamānuṣayoḥ sandhau dhruvabimbaniveśanam

brāhme pade'rcanāpīṭhaṃ karmārcā madhyame pade/
tatraiva makhabimbaṃ ca saumye snapanakautukam

tīrthabimbaṃ ca yāmye tu śayyārthabalikautuke/
laukikaṃ bimbamanyacca bāhyabhūmau niveśayet

[pratiṣṭhāṅgabhūtakarmasampādanasthānanirdeśaḥ]
sumuhūrte śubhe lagne sthāpayeddhruvakautukam/
tattvasaṃhārajanane tattvanyāsādi karma ca

śāntyantamakhilaṃ karma garbhagehe samācareta/
anyeṣāmaṅgabimbānāṃ sarvaṃ tadyāgamandire

[pratiṣṭhākrame kumbhanyāsavidhiḥ]
pratiṣṭhāsamaye prāpte kumbhānutthāpya deśikaḥ/
paścāttadaṅgabimbaiśca prādakṣiṇyena mandiram

antaḥpraviśya vinyasya kumbhānapi yathāvidhi/
[mūlabimbe śaktiniveśaprakāraḥ]
āvāhayenmūlabere paramātmānamavyayam

pañcopaniṣadairmantraiḥ tatprakāramitaḥ śrṛṇu/
sadāviṣṇuṃ mahāviṣṇau taṃ viṣṇau viniveśayet

hṛtpuṇḍarīke taṃ viṣṇuṃ taṃ ca svāñjalipaṅkaje/
dhruvabimbabrahmarandhrāt bimbe taṃ viniveśayet

pariṣiñcettato bimbaṃ vardhanīsthena vāriṇā/
mahākumbhaprokṣaṇaṃ ca `dvādaśākṣara'vidyayā

upakumbhāmbubhiḥ paścāt prokṣayetsvasvavidyayā/
śaktīstattatkumbhagatāḥ mūlabere niveśayet

apidhāya brahmarandhraṃ praṇavena samādhinā/
mantranyāsaṃ tataḥ kuryāt sargasṛṣṭyādikarmavit

[karmabimbādiṣu śaktyāvāhanakramaḥ]
sarveṣāṃ karmabimbānāṃ mūlādāvāhanaṃ matam/
kumbhatoyāvaśeṣeṇa prokṣaṇaṃ parikalpayet

brahmādiparivārāṇāmanyeṣāṃ prāṅgaṇe satām/
caṇḍādīnāṃ śriyādīnāṃ balipīṭhāvasānikam

mahākumbhaṃ samāhṛtya deśiko brāhmaṇaiḥ saha/
svasvamantreṇa samprokṣya karmajālaṃ samāpayet

arcayeddevadeveśaṃ naivedyāntaṃ yathāpuram/
[gurvādibhyo dakṣiṇādānādinirdeśaḥ]
pūjayedyajamāno'pi pratiṣṭhāsamaye gurum

sauvarṇakusumairvastraiḥ keyūrairaṅgulīyakaiḥ/
kuṇḍalaiḥ kaṭakairyajñasūtraiśca sumanoharaiḥ

paṭṭavastrairdukūlaiśca sasvarṇairuttarīyakaiḥ/
uṣṇīṣairgandhapuṣpaiśca bhūṣayedvividhairapi

ghaṭodhnīrgāssavassāśca dharaṇīṃ sasyaśālinīm/
svarṇaniṣkasahasraṃ ca dadyāttasmai svayaṃ prabhuḥ

aśaktaścetttripādaṃ vā dalaṃ vā pādameva vā/
yadvā niṣkaśataṃ dadyāt gurave dakṣiṇāṃ prabhuḥ

tadardham ṛtvijāṃ dadyāt tadardhaṃ paricāriṇām/
pratiṣṭhāyāṃ tu devasya bhojayed‌brāhmaṇān bahūn

lakṣaṃ vāpyayutaṃ vāpi sahasraṃ vā yathābalam/
sarvāśaktaḥ śataṃ viprān bhojayedyajñasiddhaye

bhojayitvā dvijān nityaṃ pratiṣṭhādivase prabhuḥ/
dakṣiṇāṃ vitarebhyo tāmbūlaparimaṇḍitām

trayīvidbhyaḥ śāstravidbhyaḥ stotṛbhyaśca viśeṣataḥ/
itarebhyo dvijebhyaśca deyaiva dvijadakṣiṇā

[dakṣiṇārahitayāgasya phalarāhityakathanam]
dakṣiṇārahito yajñaḥ prabhave na phalapradaḥ/
tasmād‌dvijebhyaḥ sarvebhyaḥ vitareddakṣiṇāṃ prabhuḥ

[pratiṣṭhākarmaṇaḥ samāptau deśikasya gṛhānayanam]
evaṃ saṃsthāpya deveśaṃ sarvamaṅgalasaṃyutam/
ṛtvigbhiḥ saha santuṣṭaṃ bhojanena dhanena ca

gītavāditradhoṣeṇa chatracāmarabījanaiḥ/
svastibrūvāṇairvipraiśca deśikaṃ ninayed‌gṛham

[pratiṣṭhāsampādakasya sahāyakānāṃ ca kṛte phalakīrtanam]
evaṃ yaḥ sthāpayeddevaṃ yajamāno mahītale/
tasya vaṃśarddhiratulā dhanena dhanadopamaḥ

vidyāvān balavān dhīmān bhūyāccāpi mahīpatiḥ/
vinaśyanti ca vighnāni pāpāḥ yānti kṣayaṃ dhruvam

atulā śrīśca tasya syāt dīrghāyuśca bhaviṣyati/
amaraiḥ stūyate nityaṃ puṇyakṛdbhiśca pūjyate

upakurvanti ye martyāḥ teṣāṃ puṇyaṃ na tarkyate/
bahunā kiṃ devaloke vasanti divi devavat

paṭhatāṃ ca trayīṃ śāstraṃ vāso bhūyātttriviṣṭape/
vādyavādanaśaktānāṃ gītanṛttādi kurvatām

gandharvaloke vasatirannapānādidāyinām/
na punarjananaṃ teṣāṃ yānachatrādidhāriṇām

yānādhikāriṇo devāḥ devaloke na saṃśayaḥ/
ācāryāṇāmṛtvijāṃ ca tathaiva paricāriṇām

karmiṇāṃ na panarjanma sthāpito yairjanārdanaḥ/
kāmanārahitaṃ karma kāritaṃ yaistu mānavaiḥ

teṣāṃ triviṣṭape vāsaḥ punarāvṛttivarjitaḥ/
[yāgadarśanasya māhātmyam]
kevalaṃ darśanaṃ viṣṇoḥ sarvakāmaphalapradam

kiṃ punaḥ phalamicchadbhiḥ yāgakāle viśeṣataḥ/
[pratiṣṭhānte bhagavataḥ snapanasya mahotsavasya ca nirdeśaḥ]
evaṃ saṃsthāpya medhāvī vāsudevaṃ sanātanam

snāpayitvā pratiṣṭhānte dhvajapūrvaṃ mahotsavam/
kuryāttatprītaye bhūyācchārṅgiṇaḥ paramātmanaḥ