Bhargava Tantra · Chapter 8

// aṣṭamo'dhyāyaḥ //
[pratiṣṭhāṅgabhūtapratimānetronmīlanādinirūpaṇādhyāyaḥ]
[yāgamaṇḍapālaṅkaraṇaprakāraḥ]
śrīrāmaḥ
yāgamaṇḍapasādya yajamānena deśikaḥ/
sthūṇāṃśca maṇḍape tasmin vāsobhirveṣṭayennavaiḥ

vitānayecchubhairvastraiḥ patākābhiśca bhūṣayet/
muktādāmabhiranyaiśca kadalīkramukādibhiḥ

saphalairdarbhamālābhirmaṇikāñcanabhūṣaṇaiḥ/
śobhayenmaṇḍapaṃ sarvaṃ toraṇāni ca bandhayet

khātvā dvitālaṃ dharaṇīṃ dvāre dvāre caturdaśam/
sthāpayedapi pūrvādipatākāścāpi bandhayet

aśvatthodumbaravaṭaplakṣaklṛptāni vai kramāt/
śobhayitvā yathādṛśyaṃ dīpānuddīpya sarvataḥ

[adhivāsitabimbotthāpanam yāgamaṇḍapānayanaṃ ca]
aparāhṇe tu samprāpte kāle saṃkalpite gate/
utthāpya bimbānyudakāt kumbhācca kalaśādapi

udvāsya devatāḥ sarvāḥ pratimāstīraviṣṭare/
niveśya prāṅmukhaṃ śuddhairvāribhiḥ kṣālayedguruḥ

lohajāni ca bimbāni tintriṇīphalavāriṇā/
vastrābharaṇapuṣpādyairalaṅkṛtya vicakṣaṇaḥ

yānamāropya viprendrairvedavādyādimaṅgalaiḥ/
prādakṣiṇyena vai dhāmno gamayedyāgamaṇḍapam

uttare viṣṭare bimbaṃ prāṅmukhaṃ viniveśayet/
tata utthāpya kūrcāni bimbe tāṃ śaktimudvaset

kumbhebhyaḥ devatāḥ sarvāḥ pūrvavacca visarjayet/
[pratimānayanonmīlanakramaḥ]
nayononmīlanaṃ kuryāt bimbānāṃ tu yathāvidhi

sauvarṇaṃ rājataṃ cāpi pātrayugmaṃ śalākayā/
rājatyā svarṇamayyā ca dhānyarāśau niveśayet

sauvarṇaṃ pūrvadigbhāge paścime rājataṃ nyaset/
paritaḥ kalaśānaṣṭau caṇakaiḥ paripūritān

sthāpayedvācayetpaścāt puṇyāhaṃ prokṣayedapi/
āvāhayenmadhughaṭe `udvaṃya tamase'tyṛcā

ādityamitare'pīnduṃ `somodhenvi'ti vidyayā/
sampūjya gandhapuṣpādyairdve pātre saśalākike

`madhutrayeṇa' ca madhu `savirājeti' vai ghṛtam/
kanyakārucirāścāṣṭau gāḥ savatsāḥ manoharāḥ

sthāpayitvātha tatpārśve trayī ghoṣaṃ pravartayet/
śalākayā ca sauvarṇyā madhvāktamukhayā guruḥ

unmīlya dakṣiṇaṃ netraṃ rājatyā ca ghṛtāktayā/
unmīlanaṃ tu vāmākṣṇaḥ dakṣiṇottarayormanuḥ

`citraṃ devā' ca `tacchakṣu'riti mantradvayaṃ smṛtam/
evamunmīlya netre dve ācchādanapaṭaṃ tyajet

makarandaśca sarpiśca caṇakaṃ cāpi kanyakāḥ/
gāḥ savatsāśca devāya darśayeddeśikottamaḥ

sarveṣāmapi bimbānāmevamunmīlanaṃ dṛśām/
[pratisarabandhanāvasaranirdeśaḥ]
kautukaṃ tu kare dhāryaṃ snapane'mbvadhivāsane

pratiṣṭhāyāṃ ca bimbānām ācāryasyāpi ṛtvijām/
tatprakāramito vakṣye śṛṇu kumbhasamudbhava

[pratisaraparikalpanam]
sauvarṇaṃ vātha kauśeyaṃ kārpāsaṃ vā yathāvasu/
saptabhirpañcabhirvāpi sūtraiḥ pratisaraṃ bhaveta

niṣkapramāṇasvarṇena kautukaṃ parikalpayet/
[kautukasaṃskāraḥ kautukabandhanaprakāraśca]
kamale taṇḍulaiḥ pūrṇe tāmbūlīdalaśobhite

kadalīnārikerādyaiḥ phalaiśca parimaṇḍite/
vinyasya tatra sūtrāṇi prokṣya puṇyāhavāribhiḥ

sudarśanaṃ hetirājaṃ tatrāvāhya samarcayet/
sudarśanaṣaḍarṇena saptavārābhimantraṇam

aṅguṣṭhānāmikābhyāṃ tu candanakṣodavāriṇā/
āliṃpet kautukaṃ samyagaparājitavidyayā

mūlamantreṇa devasya vadhnīyāddakṣiṇe kare/
devīnāṃ tu śriyādīnāṃ vāme kautukamaṅgalam

ācāryāṇāṃ mūrtipānāmaṅkurārpaṇakarmaṇi/
kautukaṃ dakṣiṇe haste yena dīkṣā prasidhyati

mantrastu devadevīnāmanyāsāṃ vā munīśvara/
bandhane sva sva vidyaiva cakramantrābhimantraṇam

viśvetāteti mantreṇa bandhanaṃ kautuke guroḥ/
ṛtvijāmapi sarveṣāṃ yo brahmetyabhimantraṇam

vṛhatsāmeti mantreṇa rakṣaiṣāṃ dhūpabhasmanā/
praṇamya puṇḍarīkākṣaṃ dvādaśākṣaravidyayā

[snapanakuṃbhānāṃ sthāpanakramaḥ]
snānapīṭhe tu bimbāni samāropya gurūttamaḥ/
kalaśān saptadaśa ca dhānyapīṭhe niveśayet

ghṛtakumbhaṃ pade brāhme soṣṇamambu divaspatau/
phalodakaṃ yamapade snānīyaṃ vāruṇe diśi

saumye bhavedakṣatāmbu vahnau tu maṇijīvanam/
yātudhāne lohatīrthaṃ gandhatīrthaṃ tu mārute

somaiśānayorakṣatayave prācyāṃ pādāmbu kalpanam/
ardhyatīrthaṃ pade yāmye ācāmaṃ vāruṇe diśi // 8.36 /
pañcagavyamudīcīne dadhyagnau nairṛte payaḥ/
mārute madhu bhūteśe kāṣāyāmbuprakalpanam

[homābhiṣecanakramaḥ]
devatāvāhanaṃ kṛtvā tattannāmabhiraṣṭadhā/
āvṛtya juhuyādagnau sampātaṃ tatra secayet

mantrastu vaiṣṇavaḥ sūktaḥ puṃsūktenābhiṣecanam/
ghṛtakumbhasya mantrastu gāyatrī vaiṣṇavī matā

[bimbādhivāsanaprakāraḥ]
śāyayedvedikāmadhye śālitaṇḍulakalpite/
satile mañcamāropya kṛṣṇājinapariṣkṛtam

tūlikāṃ tatra vinyasya ratnakaṃbalamaṇḍitām/
kṣaumaṃ ca citravastraṃ ca gaṇḍūṣāṇi ca vinyaset

śiropadhānaṃ ca tathā sugandhairadhivāsayet/
`idaṃviṣṇu'riti prāyairmantraiḥ paramapāvanaiḥ

śāyayeddevadeveśaṃ sāṃgaṃ vai dakṣiṇe śiraḥ/
kambalaiśca dukūlaiśca pratimāṃ chādayedguruḥ

[kumbhasthāpanaprakāraḥ]
āśāsvaṣṭasvaṣṭakumbhān sūtravastrādiveṣṭitān/
sakūrcān pallavayutān saratnān svarṇasaṃyutān

veṣṭitān vastrayugmena yadvaikena samaṣṭinā/
gandhodakena sampūrṇān dhānyapīṭhe niveśayet

śālīnāṃ taṇḍulānūrdhvaṃ teṣāmūrdhvaṃ tilaṃ bhavet/
antarāntaravastrāḍhyaṃ dhānyapīṭhamidaṃ smṛtam

tattatpratikṛtiṃ tatra sauvarṇīṃ viniveśayet/
kumbhānāmantarāleṣu vinyaseṣṭamaṅgalān

apidhāya śaraveṇa nālikerādibhiḥ phalaiḥ/
alaṅkṛtya yathāyogyaṃ mahākumbhaṃ tu paścime

karakeṇa samāyuktaṃ navaratnasamanvitam/
sarvalohayutaṃ sarvagandhayuktaṃ sakūrcakam

piplacchadasaṃyuktaṃ mūlapratimayānvitam/
sūtraveṣṭatasarvāṅgaṃ jambīraphalasāntaram

vedikāyāṃ dhānyapīṭhe saśarāvaṃ niveśayet/
alaṅkuryādviśeṣeṇa vastrayugmena veṣṭayet

tasya dakṣiṇapārśve tu tādṛśaṃ karakaṃ nyaset/
toraṇānāmubhayataḥ dvārakumbhau niveśayet

alaṅkuryādyathāyogaṃ pūrayed‌gandhavāriṇā/
mahākumbhaṃ ca karakaṃ pūrayed‌gandhavāribhiḥ

evaṃ saṃsthāpya medhāvī vedaghoṣe pravartite/
tūryavāditraninade pravṛddhe'ti kutūhale

āvāhayenmahākumbhe vāsudevaṃ sanātanam/
// iti bhārgavatantre'ṣṭamo'dhyāyaḥ //