Bhargava Tantra · Chapter 7

// saptamo'dhyāyaḥ //
[vāstupūjābimbajalādhivāsavivaraṇādhyāyaḥ]
[vāstupūjāyāḥ prayojananirdeśaḥ]
rāmaḥ
aṅkurāṇyarpayitvaivaṃ vāstupūjāṃ samācaret/
vimānamaṇḍapādīnāṃ prākārāṇāñca śuddhaye

śāntaye sarvadoṣāṇāṃ kriyamāṇasya karmaṇaḥ/
nirvighnena samāptyarthaṃ vāstupūjā praśasyate

[vāstupūjāprakāraḥ]
kuśaiḥ kāśaistṛṇaiścāpi vāstunāthasya vigraham/
kṛtvā sarvāṅgasampūrṇaṃ vāsasā bhūṣaṇena ca

kusumairapyalaṅkṛtya maṇḍape dakṣiṇe bhuvi/
saptadarbhakṛtaṃ kūrcaṃ kṛtvorasi niyojayet

puṇyāhavāribhiḥ prokṣya pūjayedvāstunāyakam/
vāstvīśāṣṭākṣareṇaiva kūrte āvāhya deśikaḥ

`asunīte'ti mantreṇa kuryātprāṇaṃ pratiṣṭhitam/
ardhyaiḥ pādyaistathācāmairgandhaiḥ puṣpaistathākṣataiḥ

dhūpairdīpaiśca naivedyaistāmbūlairvāsanāyutaiḥ/
arcayitvā yathāśāstraṃ toṣayitvā yathāvasu

[vāstupūjāṅgahomaḥ vāstuśeṣaparityāgādikañca]
paścime vāstunāthasya juhuyājjātavedasi/
`pañcopaniṣadai'rmantraiḥ sarpiṣā juhuyācchatam

śamyapāmārgakhadirasamidbhiśca yathākramam/
`vāstvīśa'mūlamantreṇa hyaṣṭāvaṣṭau pṛthak pṛthak

`vāstospate pratītyādi' ṛgbhiścāpi catasṛbhiḥ/
caruṇā juhuyādagnau tato `vāstvīśa'mūlataḥ

aṣṭottaraśataṃ vārān sarpiṣā juhuyātpunaḥ/
`idaṃ viṣṇu'riti śrutyā hutvā pūrṇāhutiṃ tataḥ

dagdhvā vāstupratikṛtiṃ `parivāje'ti vai ṛcā/
paryagnikaraṇaṃ kṛtvā dhāma tanmaṇḍapādikam

īśānabhāge grāmasya vāstuśeṣaṃ parityajet/
tataḥ snātvā vidhānena puṇyāhaprokṣaṇaṃ caret

[mānādiprayuktadoṣaśāntiprakāraḥ]
mānonmānamāṇāderhānivṛddhyaghaśāntaye/
pratimālayapīṭhānāṃ śāntihomaṃ samācaret

pīṭhe bimbāni vinyasya kṣālayitvā śubhodakaiḥ/
pīṭhāni ca tathā dhāmādyaliṃped‌gomayādibhiḥ

bimbānāṃ purato vahniṃ pratiṣṭhāpya samīdalaiḥ/
sākṣatairvyāhṛtībhiśca homaścāṣṭottaraṃ śatam

pūrṇāhutyavasāne tu vahnyupasthānamācaret/
`namastubhyaṃ bhagavate jātavedaḥsvarūpiṇe

nārāyaṇāya havyasya kavyasya ca yathākramam/
hotre yaṣṭavyadevānāmātmane paramātmane

sannidhatsva ciraṃ deva pratimāyāṃ hitāya naḥ/'
ityupasthāya medhāvī śuddhasnapanamācaret

[bimbādhivāsakrame ghṛtasnānaprakāraḥ]
bimbānāṃ purataḥ kuṃbhaṃ dānyapīṭhe niveśayet/
sūtraveṣṭitasarvāṅgaṃ gandhavastrādyalaṅkṛtam

āḍhakadvayamātreṇa godhṛtena prapūritam/
sakūrcaṃ pallavayutaṃ śarāveṇāvakuṇṭhitam

saṃsthāpya kṛtvā puṇyāhaṃ prokṣayitvā yathāvidhi/
vāsudevaṃ samāvāhya `dvādaśākṣara'vidyayā

abhyarcya gandhapuṣpādyairnaivedyāntaṃ yathākramam/
`ghṛtaṃ mimikṣi' mantreṇa ghṛtena snapanaṃ caret

`mānastoke'ti mantreṇa snāpayeduṣṇavāribhiḥ/
tato bimbāni sarvāṇi bhūṣiyitvā navāmbaraiḥ

bhūṣaṇairgandhamālyaiśca yathāvidhi yathāvasu/
[jalādhivāsaprakāraḥ]
jalādhivāsaṃ kurvīta nadyādau maṅgalodake

jalādhivāsāyogyānāṃ trivastukamṛdātmanām/
citrāṇāṃ paṭajānāṃ vā gurūṇāṃ ca śilādiṣu

chāyādhivāsaṃ kurvīta pratiṣṭhatantrasāravit/
jaladroṇyāṃ kaṭāhe vā samuddhṛtya mahajjalam

dhānyarāśau vinikṣipya gandhaistadadhivāsya ca/
gaṅgādyāssaritastatra samāvāhya samarcayet

aṣṭāviṃśatibhirdarbhaiḥ kṛtaṃ kūrcaṃ vinikṣipet/
tatra devaṃ samāvāhya pūjayitvā yathāvidhi

saṃhārakramamācāryaḥ saṃsmarettatra tantravit/
cakramudrāṃ darśayitvā rakṣākumbhārcanaṃ caret

dhānyapīṭhe'tha tatpārśve toyapūrṇān ghaṭān nava/
sālaṅkārān sakarakān saratnān lohasaṃyutān

saṃsthāpya madhye brahmāṇaṃ karake cāyudheśvaram/
indrādidikpatīnanyakalaśeṣvarcayed budhaḥ

sarvāṇyaṅgāni bimbasya veṣṭayennavavāsasā/
`rakṣohaṇe'ti mantreṇa siddhārthān vikiredbudhaḥ

devīnāṃ tu śriyādīnāṃ trayoviṃśatibhiḥ kuśaiḥ/
pañcaviṃśatibhirdarbhaiḥ rudrasya parameṣṭhinaḥ

dvāviṃśadbhiḥ kuśaiḥ kūrcaṃ kuryādanyāmṛtāsinām/
āropya yāne bimbāni vedavādyasamanvitam

sarvamaṅgalasaṃyuktaṃ prāpayecca nadītaṭam/
tīre niveśya nadyādeḥ prokṣya puṇyāhavāriṇā

śoṣayedvāyubījena `vahnimantreṇa' dāhayet/
sudhākṣareṇa saṃplāpya gaṅgāmāvāhya pūjayet

evaṃ śuddhe nadītoye pīṭhaṃ tatra vinikṣipet/
kalpayitvā yogapīṭhaṃ bimbaṃ prāk‌śirasaṃ nyaset

śāyayecca sambhyarcya saṃhāraṃ cintayettataḥ/
cakramudrāṃ pradarśyātha nadītīre yathāpuram

rakṣākumbhārcanaṃ kuryāt siddhārthān dikṣupātayet/
āropayedanirvāṇān dīpān api suvarcasaḥ

trayī pravartanaṃ kuryāt brāhmaṇaiḥ vedapāragaiḥ/
tasmin jale na kurvīran snānapānādikāḥ kriyāḥ

vādyāni ca vicitrāṇi ghoṣayeṣuḥ samantataḥ/
trirātramekarātraṃ vā yadvā yāmaṃ muhūrtakam

jalādhivāsaṃ kurvīta tatra nadyādyasaṃbhave/
kaṭāhe vā jaladroṇyāṃ bimbānāmadhivāsanam