Bhargava Tantra · Chapter 6

// ṣaṣṭho'dhyāyaḥ //
[pratiṣṭhāviṣayavivecanādhyāyaḥ]
[pratiṣṭhāviṣayakajijñāsopasthāpanam]
pratiṣṭhā kīdṛśī brahmān pratiṣṭhatā tu kīdṛśaḥ/
ko vā kālaḥ pratiṣṭhāyāḥ śubhadaḥ sarvadehinām

kīdṛśo'pyadhikārī vā kathaṃ vā tatsamāpyate/
jāmadagnyaparaṃ dhāman kṛpayā brūhi me prabho

[pratiṣṭhākrame yajamānalakṣaṇam]
śrīrāmaḥ
śraddhayā parayā yuktaḥ kalyāṇahṛdayaḥ svayam/
āstiko devadeveśe nyastacittaḥ svayaṃ prabhuḥ

aprameyaṃ dhanaṃ dhānyam utsāhasca ime trayaḥ/
vasantyavirataṃ yatra sa pratiṣṭhāpako bhavet

pariśuddhaśca dakṣaśca kṛtajño gurupaṅktiṣu/
alobhayati kāryāṇi yaḥ sa evārabhet kriyām

cāturvarṇyo'nulomo vā jñātibhiḥ sakalairyutaḥ/
ācāryaṃ purataḥ kṛtvā pratiṣṭhāṃ tena sādhayet

[pratiṣṭhākrame ācāryasya lakṣaṇam]
pāñcarātravidaṃ śāntaṃ sarvasiddhāntakovidam/
niḥspṛhaṃ nirjitadvandvaṃ sarvadoṣavivarjitam

ṛjubuddhiṃ sadā brahmadhyānaikanirataṃ śubham/
ādyavarṇaṃ bhāgavataṃ nārāyaṇaparāyaṇam

pratiṣṭhotsavakāryeṣu prāyaścittādikarmasu/
nipuṇaṃ varayetpūrvamācāryatve subuddhimān

[pratiṣṭhāsampādanārthamṛtvigādivicāraḥ]
tatastenaiva guruṇā ṛtvijaḥ ṣoḍaśāthavā/
aṣṭau vā caturo yadvā trīn dvau vā varayet sudhīḥ

alābhe ṛtvijāṃ yajñaṃ gururekaḥ samāpayet/
ekādhvaravidhānena yathāvatkalaśodbhava

[ācāryavaraṇakrame niṣiddhāḥ]
vānaprastho yatiścāpi brāhmaṇāditare trayaḥ/
naivādhikāriṇaḥ sarve pañcasaṃskāravarjitāḥ

na kuṇḍagolakau naiva bhaveyuranulomajāḥ/
karmādhikāriṇo naiva jātyā brāhmaṇayonayaḥ

[ācāryavaraṇakramaḥ]
vidhuro'pyadhikārī syāt gurutve jñānagauravāt/
evaṃ vicārya sakalamācāryaṃ varayetpurā

samaye yajamānastu gāṃ bhuvaṃ kāñcanaṃ tathā/
nārikelaṃ ca karmādāvācāryāya pradāpayet

[pratiṣṭhākrame grāhyāgrāhyakālavivekaḥ]
pratiṣṭhākālamadhunā vakṣe śrṛṇu manīśvara/
mukhyaṃ pūrvāyanaṃ proktaṃ jaghanyaṃ dakṣiṇāyanam

dhruvaberapratiṣṭhāyāṃ mukhyamevāyanaṃ varam/
jaghanyaṃ karmabimbānāṃ doṣāya na kadācana

pratiṣṭhākaraṇe tyājyaṃ pitṛmāsacatuṣṭayam/
māseṣvanyeṣu sarveṣu kārayedavicārayan

bālyaṃ ca somaputrasya mauḍhyaṃ ca guruśukrayoḥ/
uparāgayutaṃ māsaṃ sarvathā parivarjayet

yadvā pakṣaṃ purastācca parastācca parityajet/
durdinaṃ ravisaṅkrāntimatimāsaṃ malāhvayam

gaṇḍātigaṇḍayogāni sarvathā parivarjayet/
arkāravārau mandasya vāraṃ viṣṭaṃ ca varjayet

amāriktāṣṭamītithyaḥ varjanīyāḥ prayatnataḥ/
kṛttikā bharaṇī jeṣṭhā sarvaraudradvidaivatam

trīṇi pūrvāṇi pitṛbhaṃ ninditāni parityajet/
āsuraṃ mārutaṃ citrā śraviṣṭhā śatatārakam

nātyuccaṃ nātinīcaṃ ca samaṃ grāhyaṃ manīṣibhiḥ/
pāpadṛgyogasahitamaṣṭame grahasaṃyutam

daśame pāpasaṃyuktaṃ tallagnaṃ parivarjayet/
evaṃ vilokya nitarāṃ saha mauhūrtikairguruḥ

vilokya guṇasaṃvādhaṃ guṇagrāmaṃ ca śāstrataḥ/
yajamānagrāmadhāmnāmanukūle samācaret

īdṛśaṃ maṅgaladinaṃ viniścitya dvijottamaiḥ/
ārabheta pratiṣṭhātuṃ deśikaḥ śāstrasāravit

[aṅkuramṛtsaṃgrahaṇāt pūrvaṃ sampādanīyāni kṛtyāni]
tadarthaṃ yajamānaśca ṛtvijaśca gurūttamaḥ/
anukūle śubhe kāle snāyāsuḥ kṣurakarmaṇā

snātāśśuddhāmbaradharāssarvālaṅkārabhūṣitāḥ/
āhūya rathakāraṃ ca kulālamapi śilpinaḥ

ācāryastoṣayitvā tānvisṛjyānu ca śilpinā/
netrāṇyunmīlya vidhivat karmabinbeṣu śilpinaḥ

toṣayitvā dhanairvastraiḥ manaḥ prahlādanairapi/
nirgamayyātha puṇyāhaṃ vācayetsarvaśuddhaye

gomayālepite bhūmau raṅgabalyā pariṣkṛte/
dhānyapīṭhe nyaset kuṃbhaṃ sākṣataṃ sūtraveṣṭitam

śarāvakūrcapatrāḍhyaṃ tatrāvāhya śriyaḥ patim/
gāyatryā caiva vaiṣṇavyā samabhyarcyākṣatādibhiḥ

abliṅgaiḥ pavanairmantraiḥ pavamānaiḥ pavitrakaiḥ/
śāntimantraiśca ṛtvigbhiḥ japtvā vyāhṛtividyayā

pīṭhaṃ saṃkṣālitaṃ bimbamāsāditaśubhodakaiḥ/
prokṣayedaṅkurāyātha mṛtsaṅgrahamācaret

[aṃkurārthaṃ mṛtsaṅgrahakramaḥ]
ājānupādau prakṣālya hastau cāmaṇibandhanāt/
trirācamya mṛdā puṇḍrairalaṅkṛtya pavitravān

piṭakaṃ ca khanitraṃ ca śodhayitvā śubhodakaiḥ/
vastrairgandhaiśca mālyaiśca khanitraṃ bhūṣitaṃ purā

śirasā dhārayedṛtvigathavā paricārakaḥ/
brāhmaṇaiḥ śākunaṃ sūktaṃ paṭhadbhiḥ vādyamaṅgalaiḥ

bāhupradīpairvimalaiḥ pūjopakaraṇaiḥ saha/
diśaṃ prācīmudīcāṃ vā śubhāṃ bhūmiṃ samāśrayan

āsīnaḥ prāṅmukho bhūtvā prāṇānāyamya deśikaḥ/
bhūtagrāmaṃ viśodhyātha puṇyāhamapi vācayet

`vyāhṛtyā' prokṣayed‌bhūmiṃ khanitraṃ piṭakaṃ tathā/
`bhūmisūktena' dharaṇīm ṛtvigbhirabhimantrayet

samudravasanāṃ devīṃ parvatastanamaṇḍitām/
ratnagarbhāṃ gururdhyāyet vasudhāṃ sasyasālinīm

āvāhya bhūmimantreṇa bhūmiṃ bhūmau samarcayet/
ardhyapādyādibhirgandhaiḥ puṣpairnānāvidhairapi

dhūpairdīpaiśca naivedyaiḥ vividhai rasanāpriyaiḥ/
stotreṇābhiṣṭuyāddevīṃ vasudhāṃ ratnamaṇḍitām

[mṛtsaṅgrahakrame bhūstutiḥ]
sarvabhūtadhare kānte sarvalokanamaskṛte/
viṣṇupatni jagaddhātri vasudhe sasyamālini

puṇyakānanakeśāḍhye parvatastanamaṇḍite/
samudravasane devi nadīviṣayavāsini

valmīkaśravaṇe vedabhāṣiṇi śrutisevite/
phullāmbujekṣaṇe devi prasīda harivallabhe

namaste bhuvaneśāne namaḥ sarvasurārcite/
namo bhārgavi me mātaḥ praṇato'smi vasundhare

viṣṇuśaktisamudbhūte śaṅkhavarṇe maheśvari/
anekaratnasaṅkīrṇe bhūmi tumyaṃ namo namaḥ

iti stutvā ca natvā ca dhyātvā vimalacetasā/
[mṛtsaṅgrahamantranirdeśaḥ]
`aśvakrānte'ti mantreṇa khanitreṇa gurūttamaḥ

mṛdaṃ samagrāṃ gṛhṇīyāt prāṅmukhaḥ kroḍavidyayā/
[mṛdānayanaṃ gurvādisammānanaṃ ca]
tāṃ mṛdaṃ mūlamantreṇa piṭake vetranirmite

ācchādya nava vastreṇa mantreṇā`stre'ṇa deśikaḥ/
svayaṃ gṛhītvā śirasā brāhmaṇaiḥ svastipāṭhakaiḥ

vividhairmaṅgalairanyaiḥ praviśenmandiraṃ guruḥ/
dhāma pradakṣiṇīkṛtya aṅkurārpaṇamaṇḍape

vinyasettāṃ mṛdaṃ paścāt yajamāno guruṃ tathā/
ṛtvijo vastragandhādyaiḥ puṣpaiḥ pañcāṅgabhūṣaṇaiḥ

hāropavītakaṭakakeyūrāṅgulibhūṣaṇam/
pañcāṅgabhūṣaṇamidaṃ kathitaṃ kamalodbhava

[pālikāsthāpanamaṅkuradhānyasaṃskāraḥ tattaddevatārādhanañca]
atha te'laṅkṛtāḥ samyak aṅkurārpaṇabhūtale/
puṇyāhaṃ vācayitvātha prokṣayet pālikādikam

pālikā dvādaśāhṛtya tāsāṃ kaṇṭhaṃ tṛṇādibhiḥ/
baddhvā'pūrya mṛdā paścādaṅkurārpaṇabhūtale

gomayena samāliptāṃ raṅgavalyā pariṣkṛtām/
āsādya dhānyaiḥ sampūrṇaiḥ pīṭhaṃ tatra prakalpayet

prāgāyatāni pañcaiva tathā tiryañci pātayet/
sūtrāṇi ṣoḍaśapade madhye padacatuṣṭayam

somakuṃbhāya sammārjya paritaḥ pālikāspadam/
`pauruṣe'ṇaiva mantreṇa pālikāsthāpanaṃ caret

somakuṃbhamalaṅkṛtya gandhaiḥ puṣpaiśca sākṣataiḥ/
sūtrairvastraiśśarāveṇa kūrcena ca yathākramam

vinyasyāṅkuradhānyāni godhūmabrīhisāḍhakī/
mugdaṃ sacaṇakaṃ rājamāṣaṃ ca satilaṃ tathā

māṣaṃ kalutthametāni dhānyāni nava cāharet/
saṃkṣālya `viṣṇugāyatryā' cāplutya payasā gavām

`ṛtaṃ satye'ti mantreṇa brahmāvāhya samarcayet/
gandhodakena sampūrya somakumbhaṃ saratnakam

`sante payāṃsi' mantreṇa somamāvāhya pūjayet/
pālikāsu dvādaśasu viṣṇorāvāhanaṃ caret

`tadasyoru' `pratadviṣṇu'ryasyoru'ca pare ubhe/
`vicakrame' `dhruvāso'sya' `trirdevaśca' `praviṣṇakama'

`ato devā' `idaṃ viṣṇa'riti mantrairyathākramama/
pālikāsu sakūrcāsu prāgādīśāvasānakam

āvāhya gandhapuṣpādyairarcayitvā tataḥ parama/
[homaprakāraḥ]
prāgbhāge pālikāvedyāḥ sthaṇḍilaṃ parikatpayet

aginaṃ saṃsādhya vidhivat sarpiṣāṣṭottaraṃ śatam/
`sante payāṃsi'mantreṇa hutvā sampātamāharet

`idaṃ viṣṇuri'ti śrutyā hutvā pūrṇāhutiṃ guruḥ/
[bījāvāparakṣaṇādiprakāraḥ]
sampātājyena saṃsiñcedbījapātraṃ ca pālikāḥ

somakuṃbhe punaḥ somamabhyarcya ca nivedya ca/
`dvādaśākṣara'mantreṇa bījāvāpaṃ samācaret

ācāryo vāpayedbījaṃ tūṣṇīmanye ca ṛtvijaḥ/
`mūrdhānami'ti mantreṇa mṛdbhirācchādayettataḥ

`imaṃ me varuṇo'tyeva payasā secayedapi/
anirvāṇaṃ tato dīpaṃ rakṣennaktaṃ divaṃ mudā

somakumbhārcanaṃ nityaṃ yāvatkarma samāpyate/
pālikārādhanaṃ kuryāt sāyaṃ prātarnivedayet