Bhargava Tantra · Chapter 5

// pañcamo'dhyāyaḥ //
[pratiṣṭhāṅgasaṃbhāravivaraṇādhyāyaḥ]
[pratiṣṭhākrame maṇḍapādīnāṃ kalpanādiviṣaye jijñāsā]
agastyaḥ
kathaṃ tu bhagavan viṣṇoḥ pratiṣṭhāṃ kārayetsudhīḥ/
saṃbhārāḥ ke ca sambhāryāstatra yogyāḥ bravītu me

[maṇḍapakuṇḍasvarūpādinirdeśaḥ]
śrīrāmaḥ
prasādasyāgrataḥ kuryādadhivāsanaṇḍapam/
prathamāvaraṇe vāpi dvitīyāvaraṇe'pi vā

tṛtīyāvaraṇe yadvā deśe yogyāvakāśake/
bāhudaṇḍaiśca daśabhiścaturaśraṃ manoharam

caturdvārasamāyuktaṃ kalpayecchilpavittamaḥ/
tanmadhye pañcabhirhastaiḥ caturaśrā manoharā

(d: A. caturaśraṃ manoharam;
M. cakṣu for catuo;)
hastocchrāyāthavārdhena caturaśreṣṭakācitā/
tālatrayāt bahistasyāḥ kuṇḍāni parikalpayet

caturaśraṃ bhavetprācyāṃ yāmye cāpasamākṛtiḥ/
vṛttakuṇḍaṃ tu vāruṇyāṃ saumye koṇatrayānvitam

caturviṃśāṅgulaṃ sūtraṃ vistārāyāmasammitam/
prāgbhāge kalpitaṃ kuṇḍaṃ caturaśraṃ vidhīyate

ṣaṣṭhyaṅgulaṃ bhaveccāpaṃ jyā tu ṣaṭ‌triṃśadaṃgulā/
cāpakuṇḍaṃ bhavedetaddakṣiṇe vedikā bhuvaḥ

dvātriṃśadaṅgulaṃ sūtraṃ triguṇena prakalpayet/
uttare vedikābhūmeḥ trikoṇaṃ vidyate sphuṭam

pakṣasaṃkhyāṅgulaṃ sūtraṃ madhyato bhrāmayedyadi/
vṛttakuṇḍaṃ bhavedetadvāruṇe vedikā bhuvaḥ

sūtrapātaṃ purā kṛtvā viṃśatyā caturaṅgulaiḥ/
agādhamavanīṃ khātvā dvyaṅgulaṃ tad‌bahiḥ pade

[kuṇḍamekhalākalpanaprakāraḥ]
mekhalāyāstrayaṃ kuryāt dṛḍhayeṣṭakayā sudhīḥ/
athavā prakṛterbāhye caturaṅgulamānataḥ

mekhalāyāstrayaṃ kuryāt supakveṣṭakayā dṛḍham/
prathamā tālamānā syāt madhyamāṣṭāṅgulonnatā

caturaṅgulamānaiva caramā mekhalā bhavet/
[kuṇḍe yonikalpanakramaḥ]
paścime vāthavā yāmye bhāge yoniṃ prakalpayet

pakṣasaṃkhyāṅgulāyāmāṃ kāhalākṛtisannibhām/
mūlasūkṣmordhvavistīrṇāṃ madhye nimnāṃ śiro bhuvi

aśvatthadalavad‌dṛśyāṃ pratikuṇḍaṃ prakalpayet/
mumukṣornaiva yoniḥ syāt kuṇḍaṃ vā saikamekhalam

[prapādikalpanakramanirdeśaḥ]
prapāṃ vā parikurvīta caturdvārasamanvitām/
samadhyavedikuṇḍāḍhyāmaiśānyāṃ snānamaṇḍapam

aṅkurārpaṇabhūbhāgaṃ kalpayena surakṣitam/
dṛḍhāstiraskariṇyaśca bandhanīyā yathāvidhi

dvihastā vā trihastā vā vedikā snānamaṇḍape/
[sruk‌sru voḥ kalpanaprakāraḥ]
sruk‌sruvau kalpanīyau ca rambhāpuṣpadalānanau

sūcyagre sūkaramukhaṃ ghṛtakulyā niveśanam/
sarpiḥ kuṇḍababhṛdvaktraṃ na sūkaramukhaṃ sruve

mukhādadhastāt kaṇṭhaṃ ca bāhudaṇḍāyatāvubhau/
kandaṃ vā kamalaṃ vāpi tayormūle prakalpayet

[toraṇasnānapīṭhādikalpanakramaḥ]
toraṇāni ca catvāri śūlatrayayutāni ca/
adhaḥ śākhāvihīnāni kalpayetkalaśodbhava

dvāviṃśatyaṅgulāyāmaṃ tadardhena ca vistṛtam/
ghanaṃ cāpi tadardhena kalpayedaṣṭamaṅgulam

bimbapramāṇānuguṇaṃ snānapīṭhaṃ prakalpayet/
ṛtvijāṃ pūjakānāṃ ca deśikasyāsanāni ca

[pādukādisaṃbhārāṇāṃ vivaraṇam]
pāduke pādasadṛśau sarvaṃ syādyajñavṛkṣajam/
śrīvatsaṃ pūrṇakuṃbhaṃ ca bherīṃ darpamaṇḍalam

matsyayugmaṃ tathā śaṃkhaṃ cakraṃ kāśyapanandana/
pratyekamaṣṭāvetāni vilikhidaṣṭamaṅgale

kūrmākāraṃ likhettattadāsaneṣvadhikāriṇām/
śvetau raktau tathā pītau nīlāvaṣṭāvime dhvajāḥ

mahākuṃbhopakuṃbhāśca karakaṃ maṇikaṃ tathā/
kalaśāścāpi sambhāryāḥ dīpastambhāstathā ghṛtam

tailaṃ ca dīpapātrāṇi vartinī suguṇānyapi/
candanāni sugandhāni puṣpāṇi surabhīṇi ca

vastrāṇi ca dukūlāni kambalānyāvikāni ca/
vyāghrakṛṣṇājinādīni śobhanānyakṣatāni

samidhaśca kuśāḥ kāśāḥ dhānyāni śayanāsanam/
śiropadhānaṃ gaṇḍūṣaṃ tūlikāratnakambalam

vividhāni ca dhānyāni ratnāni vividhāni ca/
svarṇādisaptalohāni gāḥ savatsāḥ manoharāḥ

dhūpadravyāṇi karpūraṃ ghanasāraṃ ca guggulam/
tāmbūlaṃ kramukaṃ mālā hārāśca kusumaiḥ kṛtāḥ

phalāni makarandaṃ ca payodadhi ca śarkarā/
guḍaṃ ca netra sāmagrī śalāke dve ca hemaje

kuṃbhapratikṛtiḥ pañca bhūṣaṇāni ca kaṅkaṇam/
kaṭāhaṃ ca jaladroṇī sauvarṇakamalāni ca

tantavaścāpi kuṃbhānāṃ pālikāśca ghaṭādayaḥ/
śarāvāścāpi sāmānyā mṛdbhāṇḍāni śubhānyapi

kanyakārucirāśaacāpi rūpavatyaḥ svalaṅkṛtāḥ/
dhūpapātraṃ dīpapātraṃ ghaṇṭākarpūrapaṅkajam

pādyācamanayoḥ pātramardhyamāvāhanāhvayam/
naivedyapātraṃ pānīyabhājanaṃ ca pratigraham

pādukādarpaṇaṃ svarṇakaṅkataṃ ghaṭadīpakam/
nīrājanasyāñjanasya balidānasya bhājanam

vyajanaṃ cātapatraṃ ca cāmaraṃ puṣpabhājanam/
piṭakāni khanitraṃ ca karīṣaṃ kāṣṭhasaṃcayaḥ

hivaḥ pātraṃ mekṣaṇaṃ ca dhamanyo vyajanāni ca/
ājyapātraṃ carusthālī praṇītā prokṣaṇī tathā

aṣṭabandhanavastūni lāṅgalaṃ hemanirmitam/
dakṣiṇārthaṃ dhanaṃ pūrṇaṃ vādyāni vividhānyapi

rūpavatyaśca gaṇikāḥ nṛttagītaviśāradāḥ/
vedavedāṅganipuṇāḥ brāhmaṇāḥ bhagavanmayāḥ

yātrāpīṭhaṃ ca devasya yānāni vividhānyapi/
bāhupradīpāḥ vividhāḥ śubhado mattavāraṇaḥ

sūtrāṇyapi śalākāśca sambhāryā yajñakarmaṇi/
// iti bhārgavatantre pañcamo'dhyāyaḥ //