Bhargava Tantra · Chapter 4

// caturtho'dhyāyaḥ //
[pratimāṅgamānādinirūpaṇādhyāyaḥ]
[pratimānirmāṇaviṣaye sāmānyajijñāsā]
agasyaḥ
kathaṃ vā vāsudevasya nirmeyā pratimā hareḥ/
kati bhedāni bimbānāṃ brūhi me kṛpayā prabho

[reṇvādimānaviśeṣāṇāṃ lakṣaṇam]
rāmaḥ
vātāyanapathaṃ prāpya ye bhānti raviraśmayaḥ/
teṣu sūkṣmā visarpanti reṇavaḥ paramāṇavaḥ

paramāṇurajaḥ keśalīkṣāyūkayavāṣṭakaiḥ/
labdhaṃ mānāṅgulaṃ śālitribhirmānāntarāṅgulam

ācāryadakṣiṇakare madhyamāṅgulamadhyame/
parvaṇorantaraṃ dīrghaṃ mātrāṅgulamudāhṛtam

vināṅguṣṭhena śeṣābhiḥ muṣṭimaṅgulibhiḥ kṛtam/
caturdhā vibhajedeko bhāgo muṣṭyaṅguliḥ smṛtāḥ

yatkiñci pratimāmānaṃ vibhajya daśadhā punaḥ/
ekaṃ dvādaśadhā labdhaṃ dehalabdhāṅgulaṃ bhavet

(ślokāt pūrvaṃ M. kośe `bimbabhedaḥ' ityadhikaḥ;)
[upādānadravyabhedānusāraṃ saptavidhāni bimbāni]
ratnajaṃ śailajaṃ bimbaṃ dārujaṃ lohajaṃ tathā/
mṛt‌traivastukayorbimbaṃ citrajaṃ ceti saptadhā

[bimbotsedhaviṣaye uttamaḥ pakṣaḥ]
bimbāni vāsudevasya kathyante kalaśodbhava/
tatra pratikṛtestāvattadaṅgānāṃ ca kathyate

utsedhamānaṃ mūrdhādipādāntamanupūrvaśaḥ/
labdhānāṃ dehatastāvat aṅgulīnāṃ śatena ca

caturviṃśati mānena pratimāṃ parikalpayet/
[pratimāyāḥ tattadaṅgamānanirdeśaḥ]
uṣṇīṣamaṅgulamitaṃ keśāntaṃ tryaṅgulaṃ matam

dṛksūtrāntaṃ tadārabhya ṣaṭ‌triṃśat yavasammitam/
tadvannāsāpuṭāntaṃ syāt tadvacca cibukāvadhi

tena keśāntamārabhya mukhamānaṃ munīśvara/
aṣṭottarayavaśataṃ cibukāvayavāvadhi

galamardhāṅgulaṃ sārdhaṃ tryaṅgulaṃ kaṇṭhamiṣyate/
hikkāsūtraṃ samārabhya hṛdayāntaṃ mukheritam

tataḥ prabhṛti nābhyantaṃ sārdhaṃ satridaśāṅgulam/
tataḥ prabhṛti meḍhrāntaṃ tadvadutsedhamiṣyate

tanmūlājjānuparyantaṃ trinyūnaṃ tridaśāṅgulam/
caturaṅgulamutsedhaṃ jānumaṇḍalamiṣyate

jānoradhastādakṣāntamūrumānamudīritam/
tatastālāntamutsedhaṃ caturaṅgulasammitam

[bimbotsedhaviṣaye madhyamapakṣaḥ]
dehalabdhāni yāvanti daśatāle'bhipūjite/
vibhajya tāvaduktāni madhyame pratimāvidhau

trayodaśāṅgulaṃ vaktraṃ tristhāne caturaṅgulam/
ṣaḍviṃśatyaṅgulotsedhamūrumānamudāhṛtam

tad‌vajjaṅdhāsamutsedhamuttareṇetaratsamam/
[bimbotsedhaviṣaye adhamaḥ pakṣaḥ tattadaṅgavistārādikaṃ ca]
adhame daśatāle tu mukhaṃ śatayavaṃ matam

tristhāne tāvadeva syāt ūruryavaśatadvayam/
jaṅghā ca tatsamotsedhā mukhyenānyatsamaṃ smṛtam

viṃśadyavaśataṃ pādaṃ drāghimā kamalāpateḥ/
aṅkuṣṭhaṃ vedamānaṃ syāt tadāyāmā ca tarjanī

ekatriṃśadyavāyāmā madhyamāṅguliriṣyate/
triṃśadyavānāmikā syātkaniṣṭhā tryaṅgulātmikā

yavaiśca pañcabhiryuktā pārṣṇo ca caturaṅgulā/
hikkāntayoradho bāhuraṅgulissaptarviśatiḥ

tataśca maṇibandhāntaṃ ṣaḍ‌viṃśatyaṅgulāyatam/
yavadvayena ca yutaṃ maṇibandhāttalaṃ punaḥ

madhyamāṅguliparyantam aṅgulaṃ sapta kathyate/
pañcāṅgulamathāṅguṣṭhaṃ tarjanī tadvadāyatā

ṣaḍyavaiścādhikāyāmā madhyamā tu ṣaḍaṅgulā/
āyatā ṣaḍyavaiścāpi tarjanyānāmikā samā

kaniṣṭhāṅguṣṭhatulitā māṃsalagnaṃ nakhaṃ smṛtam/
ekāṅgulā nakhāyāmā śiṣṭā ṣaḍyavasammitā

bāhuvaccopabāhuḥ syāccaturaṅgulamāyatam/
caturyavaṃ cordhvakaṇṭhaṃ nālaṃ pañcāṅgulāyatam

liṅgaṃ pañcāṅgulāyāmaṃ muṣkaṃ tu caturaṅgulam/
sārdhāṣṭāṅgulavistāraṃ lalāṭaṃ tadanantaram

dvādaśāṅgulavistāraṃ bālacandrasamākṛtiḥ/
tatastu karṇayormadhyaṃ sārdhaṃ satridaśāṅgulam

daśāṅgulamadhastasya vistāraṃ cibukasya tu/
sapādaṃ dvyaṅgulaṃ pūrṇaṃ cāpatulyākṛtirbhavet

mūlamadhyāgravistāro grīvāyāḥ kramaśo bhavet/
navāṅgulaṃ tathaikonaṃ sārdhasaptāṅgulaṃ tathā

hikkāntatoradho bāhurmūlayorantaraṃ bhavet/
yavaiścaturbhirvistīrṇaṃ sa catvāriṃśadaṅgulam

kakṣayormadhyavistārastryaṅgalaḥ sārdhaviṃśatiḥ/
aṣṭādaśāṅgulaṃ mānaṃ stanayorapi cāntaram

ṣoḍaśāṅgulavistāraṃ tundamadhyamudāhṛtam/
aṣṭādaśāṅgulā śroṇiradharodaramiṣyate

kaṭipradeśavistārastryaṅgulaḥ sārdhaviṃśatiḥ/
ūrumūlasya vistārassārdhaṃ satridaśāṃṅgulam

agramekāṅgulaṃ sārdhaṃ dvyaṅgulaṃ madhyamiṣyate/
dvyaṅgulo mūlavistāro liṅgasya samudāhṛtam

vistīrṇaṃ tryaṅgulaṃ mūlaṃ madhyamardhādhikaṃ punaḥ/
vistīrṇamagramuṣkasya dvātriṃśadyavasammitam

vistīrṇamekādaśabhiraṅgulairūrumadhyamam/
agraṃ daśabhireva syāt vistīrṇaṃ kalaśodbhava

navāṅgulaṃ jānucakraṃ sārdhamardhendusannibham/
mūlaṃ navāṣṭau madhye syājjaṅghāgraṃ sārdhasaptakam

vistīrṇo nālikābhāgaḥ sārdhaiśca caturaṅgulaiḥ/
aṅghrimūlasya vistārastryaṅgulassacaturyavaḥ

sārdhapañcāṅgulaṃ madhyamagraṃ sārdhaṣaḍaṅgulam/
sārdhamaṣṭāṅgulaṃ mūlaṃ bāhū saptāṅgulau punaḥ

madhye'gre tulyavistāre prakoṣṭhāvayavaṃ punaḥ/
sārdhena saptabhirmūle vistīrṇaṃ sārdhapañcabhiḥ

madhye caturbhiragre syānmaṇibandhasya tūcyate/
pañcāṅgulārdhasahitastadvat karatalaṃ smṛtam

aṅguṣṭhe mūlavistāro dvyaṅgulo madhyamāṅgulam/
saṣaḍyavamamuṣyāgramaṅgulenaiva sammatam

tarjanyā mūlavistāro navabhiḥ sammito yavaiḥ/
madhyamekāṅgulaṃ sapta yavamagramudāhṛtam

mūlaṃ daśayavaṃ madhyaṃ madhyamāyāḥ yavā nava/
agramekāṅgulaṃ proktamitarā tarjanī samā

mūlamaṣṭau kaniṣṭhāyāḥ yavāḥ saptaiva madhyame/
ṣaḍyavo'gre'ṅgulāgrebhyaḥ pādonā nakhavistṛtiḥ

madhye karatale rekhā madhyamāmūlamāsthitā/
kaniṣṭhāmūlamārabhya rekhā madhyamagā bhavet

madhyāṅgulitarjanyornimātavyā vicakṣaṇaiḥ/
aṅguṣṭhamūlamārabhya tarjanyantaśca madhyamā

tayośca rekhayormadhye tarjanī mūlagāminī/
rekhā kalpyā yathāśāstraṃ śāstrābhijñena śilpinā

lalāṭasya ca vistārassapādastryaṅgulo bhavet/
tasyādhastād‌bhruvau kalpyau catvāriṃśadyavāyatau

madhye yavena vistīrṇe yūkāgre cāpasannibhe/
tayormadhyaṃ nava yavam aṣṭādaśayavāyatam

cakṣuḥkanīnikāyāmo vistāraśca yavaḥ smṛtaḥ/
aṅgulaṃ śvetabimbasya vistāraṃ kṛṣṇamaṇḍalam

yavonamaṅgulaṃ jyotistanmadhye yavasammitam/
yūkamānaṃ tu tanmadhye dṛṣṭiḥ pakṣmāvalī punaḥ

aśīti pakṣmaromāṇi vaktrāgrāṇyasitāni ca/
dvyaṅgulaṃ cakṣuṣormadhyaṃ madhyaṃ ca śrutyapāṅgayoḥ

catvāriṃśadyavaṃ karṇavistāro dvyaṅgulo bhavet/
ūrdhvakarṇasya cāyāmassahārdhacaturaṅgulaḥ

nālaṃ pañcāṅgulamitaṃ vistāraḥ ṣaḍyavaṃ punaḥ/
paścāccaturyavā pālī nālatulyaṃ prakalpayet

śravaṇasya ca pippalyā madhyagartaṃ caturyavam/
trivakrakarṇapiplyā gallapātramiva sthitam

bandhanaṃ tryaṅgulaṃ randhraṃ netrasūtrasamunnatam/
nāsikāmūlamadhyāgravistāraḥ kathyate kramāt

aṅgulaṃ cāṅgulaṃ sārdhaṃ dvyaṅgulaṃ sacaturyavam/
aṅgulenonnataṃ mūlaṃ tena sārdhena madhyamam

dvābhyāṃ yavābhyā mūlena dvyaṅgulenāgramuttamam/
ṣaḍyavaṃ suṣiraṃ tasya puṭamadhyaṃ caturyavam

puṭapārśvasya vistāro dviyavaḥ parikīrtitaḥ/
utsedho'rdhāṅgulastasya nāsikā tilapuṣpavat

uttaroṣṭhāyataṃ sārdhaṃ caturaṅgulamiṣyate/
vistāro'rdhāṅgulastasya para sārdhāṅgulāyatam

vistīrṇamaṅgulaṃ tasya pālī caikayavāyatā/
cibuko'ṣṭādaśayavaḥ vistārāyāmasammitaḥ

gulphaṃ pādāṅgulotsedhaṃ darpaṇodarasannibham/
vistīrṇāvayavau tulyau rājadantau caturyavau

dvātriṃśaddaśanāḥ kalpyāḥ yathāśāstraṃ vicakṣaṇaiḥ/
jihvā ṣaḍaṅgulāyāmā vistīrṇā tryaṅgulairbhavet

rekhātrayāṅkitā grīvā hikkāsūtrāt stanasthitiḥ/
ekādaśāṅgulaṃ vṛttaṃ dvyaṅgulaṃ stanamaṇḍalam

caturyavaṃ cūcukaṃ syāt stanamaṇḍalamadhyagam/
caturyavaṃ nābhigartaṃ dakṣiṇāvartamiṣyate

adhyardhamaṅgulaṃ vṛttamakṣamardhāṅgulonnatam/
uṣṇīṣātpṛṣṭhakeśāntamekādhikadaśāṅgulam

uṣṇīṣātpārśvakeśāntaṃ dvādaśāṅgulamānakam/
karṇayorantaraṃ vidyāt sārdhaṃ satridaśāṅgulam

mūlamadhyāgrabhāgeṣu pṛṣṭhagrīvā yathākramam/
vistīrṇā navabhiḥ sārdhairaṅgulairnavabhistathā

aṣṭabhiśca bhavettasyā adhastāt kakudasthitiḥ/
āyāmotsedhavistāraiḥ kakudantaṃ caturyavam

ṣaṭ‌triṃśadaṅgulaṃ bāhvormadhyaṃ vistāra pṛṣṭhataḥ/
ṣaḍviṃśatiścāṅgulānāṃ kakṣayorantaraṃ bhavet

pṛṣṭhamadhyasya vistāro brahman saptadaśāṅgulaḥ/
vistīrṇau pañcaviṃśatyā śroṇīpārśvau tathāṅgulaiḥ

kaṭipradeśavistāraṣṣaṅviśatyaṅgulo bhavet/
ṣaṭtriṃśadaṅgulaṃ madhye kakudasya kaṭestathā

dvyaṅgulonnatiretasya sphītau tanmadhyamāṅgulam/
aṣṭāṅgulaṃ stane mūlaṃ madhyaṃ saptāṅgulaṃ bhavet

agryaṃ tryaṅgulavistāram ūrvormūlādiṣu triṣu/
bhavetkrameṇa vistāraḥ sārdhaḥ satridaśāṅgulaḥ

dvādaśāṅgulayuktaḥ syāt tathaiva dvādaśāṅgulaḥ/
jānvaṣṭāṅgulavistāraṃ sārdhamaṣṭāṅgulaṃ bhavet

jaṅghāmadhyasya vistāro nalakā caturaṅgulā/
caturyavādhikā caiva gulphaśca caturaṅgulaḥ

vistāramānaṃ triguṇaṃ sarveṣāṃ nahanaṃ matam/
abhītido vā varado mukhyo vāmetaraḥ karaḥ

stanasūtrasamaṃ kāryaṃ aṅgulāgraṃ karasya tu/
tayorbhavedantarālaṃ dvādaśāṅgulamānakam

[pratimāyāḥ ābhūṣaṇānām vivaraṇam]
aṅguṣṭhatarjanīmadhye sanālaṃ kamalaṃ bhavet/
varade kamalākāraṃ likhet karatalodare

adhomukhe vāmahaste mukhye kuryādgadāṃ śubhām/
jaghanyayostu karayoḥ śaṅkhaṃ cakraṃ niveśayet

bāhuṣvaṣṭasu devasya tāni tānyāyudhānyapi/
niveśayedyathākāmaṃ śilpaśāstravicakṣaṇaḥ

kirīṭaṃ kuṇḍale hārān yajñasūtrāṅguliyake/
kaustubhaṃ vanamālāṃ ca śrīvatsaṃ dakṣiṇorasi

aṅgade kaṭake ramye kāñcīdāma ca nūpure/
dukūlamantarīyaṃ ca sottarīyaṃ niveśayet

deśakālopalālyāni bhūṣaṇāni niveśayet/
[bhagavataḥ pratimāyāḥ āsīnādisvarūpavivekaḥ]
āsīnaṃ vā śayānaṃ vā tiṣṭhantaṃ vā yathāruci

āruḍhaṃ pakṣirāje vā kalpayedviṣṇuvigraham/
[pratimāyāḥ sthāpanasthānavivekaḥ]
evaṃ garbhagṛhe devaṃ brahmasthāne niveśayet

yadvā divye mānuṣe vā dvārasūtre niveśayet/
evaṃ saṃsthāpayeddevaṃ pratiṣṭhāsamaye sudhīḥ

[devīpratimāsthāpanasthānanirdeśaḥ]
aṣṭau devīḥ śriyādyāśca pārśvayorviniveśayet/
śrīrdakṣiṇe dharā vāme devyau devasya kalpayet

ratissarasvatī tuṣṭirdevyo devasya dakṣiṇe/
kīrtiḥ prītiśca śāntiśca vāme devasya saṃsthitāḥ

[devyāḥ saṃkhyāvicāraḥ]
aṣṭabhirvā catasṛbhirdvābhyāṃ yadvaikayāpi vā/
vinā vā devadeveśaṃ saśrīvatsaṃ niveśayet

[devīnāṃ mūrtikalpane viśeṣaḥ]
devīnāntu śriyādīnāṃ viśeṣaścaiṣa kalpane/
rekhātrayāṅkitā grīvā hikkāsūtrātstanasthitiḥ

ekādaśāṅgulaṃ vṛttaṃ dvyaṅgulaṃ stanamaṇḍalam/
caturyavaṃ cūcukaṃ syāt stanamaṇḍalamadhyagam

aṣṭādaśāṅgulamurasstanayorapi maṇḍalam/
aṅgulaiḥ pañcadaśabhiḥ paricchinnaṃ yathātatham

navāṅgulaśca vistāraḥ utsedhaścāpi tādṛśaḥ/
dvādaśāṅgulavistāraḥ stanayormadhya iṣyate

kṛṣṇamaṇḍalavistāro dvyaṅgulaṃ parikīrtitam/
śroṇī ṣaḍaṅgulā yāmā yonissārdhāṅgulatrayam

[devīpratimāyāḥ ābhūṣaṇādinirdeśaḥ]
abalānuguṇairanyairambarairapi bhūṣaṇaiḥ/
bhūṣayenmakuṭaṃ yadvā dhammilaṃ vā prakalpayet

asvatantrāḥ yadā devyaḥ dvibhūjāḥ pārśvabhūmiṣu/
caturbhujāstāḥ svātantrye dvibhujā vā yathāmati

dakṣiṇetarabhāgasthā dakṣiṇe puṣpadhāriṇī/
vāmetarasthitā devī vāme kamaladhāriṇī

anyena coruviśrāntāḥ kalpayecchilpatantravit/
[utsavādipratimotsedhādivivaraṇam]
mūlabimbatṛtīyāṃśasamamutsavakautukam

snapanapratimā cāpi tadutsedhāḥ prakīrtitāḥ/
balibimbapratikṛtiḥ śayanotthānakautukam

karmabimbaṃ ca nirmeyaṃ mūlatālapramāṇataḥ/
[aṅgabimbakalpanavicāraḥ]
brāhme bhāge dhruve nyaste naivāṅgaparikalpanā

laukikenaiva bimbena kuryānnaimittikaṃ budhaḥ/
dhruvaberārdhamānena kautukaṃ lohanirmitam

laukikaṃ tena kurvīta sarvāṃ devakriyāṃ sudhīḥ/
cakreṇa balidānaṃ syāt tathā tīrthāvagāhanam

kūrcena śayanaṃ kāryaṃ brāhme mūlārcanāvidhau/
daiva vā mānuṣye sthāpye brāhme karmāṇi vinyaset

nityaṃ naimittikaṃ kāmyaṃ sarvaṃ tenaiva pūryate/
sthānayānāsanavidhau dhruvabimbaṃ yathākramam

(C; A. snāna for sthāna;)
karmārcādīni tadvat syād‌dhruve tu śayite punaḥ/
tiṣṭhedvāsīta vā kāmaṃ karmādyarcā yathāmati

nityotsavapratikṛtiḥ sarvatraiva sthitā bhavet/
karmādibimbaṣaṭkaṃ ca śrībhūmisahitaṃ bhavet

yadvā śrībhūmisahitamekaṃ vā makhakautukam/
[pīṭhakalpanaprakāraḥ]
arcāyāmaṃ tridhā kṛtvā pīṭhamekena kalpayet

upānahādipañcāṅgayuktaṃ vṛttaṃ sukhāvaham/
athavā caturaśraṃ vā vistāratulitāyati

pīṭhotsedhaṃ tridhā kṛtvā padmamekena kalpayet/
dalairdvādaśabhiryuktamaṣṭābhirvā yathāruci

pādamānaṃ dalāyāmaṃ kevalaṃ vā saroruham/
pīṭhaṃ vā kevalaṃ vāpi kalpayetkalaśodbhava

āsīne'śrāyataṃ yadvā kuryād‌vṛttāyataṃ tu vā/
pratimārdhena vā pīṭhaṃ tṛtīyāṃśena vā tathā

padmaṃ bahudalairyuktaṃ karṇikākesarānvitam/
lambamānapadādhāraṃ kamalaṃ tatra kalpayet

saṅkocitaprasavyāṅghreritaraṃ lambayedadhaḥ/
mūlaberatripādena pādenārdhena vā bhavet

ucchrāyaḥ parivārāṇām evaṃ vaikuṇṭhabhāṣitam/
aṃsatulyā harerdevī brahmadyā parivāravat

balipīṭhāni sarvāṇi piṇḍikāmānamānataḥ /
[vimāne kīlakalpanādyavasaraḥ]
evaṃ prakalpya bimbāni vimāne kīlakalpanam

tatastu kalaśanyāsaḥ pratiṣṭhā tadanantaram/
// iti bhārgavatantre caturtho'dhyāyaḥ //