Bhargava Tantra · Chapter 3

// tṛtīyo'dhyāyaḥ //
[devālayakalpanaprayojanasthānādinirūpaṇādhyāyaḥ]
[bhagavadālayakalpanaviṣayakajijñāsā]
agastyaḥ
bhagavan bhārgava śrīman sarvakalyāṇavigraha/
harimandiranirmāṇaṃ kathaṃ kuryājjagat‌prabho

(prāraṃbhaṃ M. kośe-`tṛtīyodhyāya prāraṃbhaḥ/ śrīmate hayagrīvāya paramātmane namaḥ/ mandiranirmāṇam/' iti pāṭhaḥ/)
[bhagavadālayanirmāṇasya prayojanadvayam]
śrīrāmaḥ
kṛtvā prabhūtaṃ salilamārāmān viniveśya ca/
devatāyatanaṃ kuryāt yaśodharmābhivṛddhaye

iṣṭāpūrtena labhyante ye lokāstān bibhūṣatā/
devānāmālayaḥ kāryo dvayamapyatra dṛśyate

[bhagavadālayakalpanayogyasthānanirdeśaḥ]
salilodyānayukteṣu kṛteṣvakṛtakeṣu ca/
sthāneṣveteṣu sānnidhyamupagacchanti devatāḥ

sarassu nalinīcchatranirastaraviraśmiṣu/
haṃsāṃsākṣiptakalhāravīcīvimalavāriṣu

haṃsakāraṇḍavaktrauñcacakravākavirāviṣu/
paryantaniculacchāyāviśrāntajalacāriṣu

krauñcakrauñcīkalāpāśca kalahaṃsakalasvanāḥ/
phullanīradrumottaṃsāssaṅgamaśreṇimaṅgalāḥ

pulinābhyunnatorasthā haṃsahāsāśca nimnagāḥ/
vanopāntanadīśailanirjharopāntabhūmiṣu

ramante devatāḥ nityaṃ pureṣūdyānavatsu ca/
parvateṣu praśasteṣu tīreṣu ca payonidheḥ

āśrameṣu munīnāṃ ca brāhmaṇāḥ yatra nityaśaḥ/
tatra haryādayo devāḥ vastumicchanti sarvadā

yatra bhūmiḥ praśastā syāt bhūsurāṇāṃ manoharā/
sā bhaveddevatānāṃ ca priyā kalaśasaṃbhava

(ślokānantaraṃ M. kośe `pramāṇam' ityadhikaḥ/)
[devālayakalpanakrame dvārāditattadbhāgānāṃ pramāṇādiḥ]
catuṣṣaṣṭipadaṃ kāryaṃ devatāyatanaṃ sadā/
dvāraṃ ca madhyamaṃ tatra samadiksthaṃ praśasyate

yo vistāro bhavedyasya dviguṇā tatsamunnatiḥ/
ucchrāyādyastṛtīyoṃ'śastena tulyā kaṭirbhavet

vistārārdhaṃ bhavedgarbho bhittayo'nyāssamantataḥ/
garbhapādena vistīrṇaṃ dvāraṃ dviguṇamucchritam

ucchrāyātpādavistīrṇā śākhā tadvadudumbaraḥ/
vistārapādapratimaṃ bāhulyaṃ śākhayoḥ smṛtam

tripañcasaptanavabhiḥ śākhābhistatpraśasyate/
adhaśśākhācaturbhāge pratihārau niveśayet

śeṣaṃ maṅgalyavihagaiḥ śrīvṛkṣasvastikairghaṭaiḥ/
mithunaiḥ patravallībhiḥ pratimābhiśca śobhayet

dvāramānāṣṭabhāgonā pratimā syāt sapiṇḍikā/
dvau bhāgau pratimā tatra tṛtīyāṃśaśca paṇḍikā

(ślokānantaraṃ M. kośe `vimānāni' ityadhikaḥ/)
[viṃśatisaṃkhyākānām ālayānāṃ parigaṇanam]
merumandarakailāsavimānacchandanandanāḥ/
samudrapadmagaruḍanadīvardhanakuñjarāḥ

guharājo vṛṣo siṃhassarvatobhadrako ghaṭaḥ/
haṃso vṛttaścatuṣkoṇaḥ ṣoḍaśāṣṭāśrakastathā

ityete viṃśatiḥ proktāḥ prāsādāḥ śārṅgadhanvanaḥ/
[devālayasya sāmānyaṃ lakṣaṇam]
yathoktena krameṇaiva teṣāṃ lakṣaṇamucyate

pūrvoktāyāmavistārāvardhīkṛtya yathāvasu/
caturbhāgena vā kuryāt sarvaṃ vittānusārataḥ

[ālayakalpanakrame ardhamaṇḍapādyāyāmādiḥ]
garbhagehasamāyāmam ardhamaṇṭapamucyate/
sapādaṃ sārdhayuktaṃ vā tripādādhikasaṃyutā

ardhamaṇḍapamānena sārdhaṃ nṛttārdhamaṇḍapam/
vaipulyasadṛśaṃ sārdhaṃ dviguṇaṃ vā yathecchayā

tayormaṇḍapayorevamāyāmo munipuṅgava/
antarmaṇḍalanāmānaṃ prākāraṃ prathamaṃ viduḥ

vimānaṃ veṣṭayedetat yadvā syādardhamaṇḍapam/
antarhārāhvayaṃ vapraṃ kārayettadanantaram

maryādākhyaṃ tṛtīyaṃ tatprākāraṃ vidhibhāṣitam/
[mūlabimbādisthāpanasthānanirdeśaḥ]
mūlabimbaṃ pratiṣṭhāpyaṃ garbhagehe vidheḥ pade

yadvā daive mānuṣe vā dhruvasthāpanamācaret/
[dvārapālasthānanirdeśaḥ]
caṇḍapracaṇḍau saṃsthāpya garbhadvāre yathākramam

ardhamaṇḍapakadvāre śaṅkhacakrottamāṅginau/
antarmaṇḍalasaṃjñasya sthalasya dvārapārśvayoḥ

jayaśca vijayaścobhau kartavyau munipuṅgava/
antarhārāhvaye dhāmni dvāri padmagadādharau

durjayaprabalau sthāpyau maryādādvārapārśvayoḥ/
[parivāradevasthānanirdeśaḥ]
ekāvaraṇake dhāmni parivārānnimān śṛṇu

nṛttārdhamaṇḍapasyāgre kalpanīyo vihaṅgarāṭ/
gopurasyottare sāle mandirābhimukhe raviḥ

tasyaiva dakṣiṇe sāle candramāḥ parikalpyate/
vahnau kāmo yame brahmā nairṛte syādgajānanaḥ

vāruṇe ṣaṇmukho durgā vāyau saumye dhanādhipaḥ/
īśāne śaṃkaraṃ tatra kṣetrapālaṃ prakalpayet

someśayorantarāle viṣvaksenaṃ prakalpayet/
aṅgaṇe dakṣiṇe saptamātaraḥ śrīstu nairṛte

indrādayo lokapālāḥ pūjyāḥ svāśāsu cāṅgaṇe/
gopurasya bhavedantarbahirvā balipīṭhikā

antarharāhvayopete viśeṣo dhāmni kathyate/
sūryācandramasoḥ sthāne viśeṣau puruṣācyutau

sūryācandramasau kalpyau dvītīyāvaraṇe tathā/
hayagrīvaḥ smarasthāne sthāpyaḥ saṅkarṣaṇo vidheḥ

varāho vighnarāṭ sthāne pradyumnaḥ ṣaṇmukhasya ca/
kātyāyinyāḥ anantaḥ syāt aniruddho narāsane

nṛkesarī śaṃkarasya cāṅgaṇe pīṭhikāsu cet/
indrādayaḥ samabhyarcyāḥ teṣāṃ sthāne yathākramam

cakrī ca musalī śaṃkhī khaḍgī caiva gadādharaḥ/
śarṅgī padmī tathā vajrī pūjyā divyāstradhāriṇaḥ

prathamāvaraṇe yeṣāṃ sthānā ye samudīritāḥ/
[ālaye dvitīyāvaraṇasthaparivāradevānāṃ sthānāni]
jñeyāḥ dvitīye te sarve parivārāḥ yathākramam

maryādāvaraṇe dhāmni gopurobhayapārśvayoḥ/
śaṅkhaṃ cakraṃ tathā sthāpya devadevāyudhottamau

upendraṃ gopuraśirobhāge sthāpya tataḥ param/
āgneyādikrameṇaiva prākṛtādīn prakalpayet

upendraḥ prākṛtaḥ puṇyaḥ puṣkaro viśvabhāvanaḥ/
asuraghnaḥ kṛtāntaśca bhūtanātho'ṣṭamaḥ smṛtaḥ

aṅgaṇe pīṭhikāsthāne kumudādīn prakalpayet/
kumudaḥ kumudākṣaśca puṇḍarīkaśca vāmanaḥ

śaṅkukarṇaḥ sarpanetraḥ sumukhassupratiṣṭhitaḥ/
viṣvaksenaṃ tadāgneyyāṃ kṣetrapālaṃ khageśvaram

pradhānavedyabhimukhaṃ kalpayetkumbhasaṃbhava/
mahāpīṭhaṃ ca tatraiva dhvajayaṣṭiṃ ca śārṅgiṇaḥ

[ālaye mahānasādisthānanirdeśaḥ]
prathamāvaraṇe vāpi dvitīyāvaraṇe'pi vā/
tṛtīyāvaraṇe vāpi pākasthānaṃ prakalpayet

(ślokataḥ pūrva M. kośe-`mahānasam' ityadhikaḥ/)
vāruṇe vā'thavā saumye kūpaṃ śārve'pi vā bhavet/
yatra vā'pāṃ rasāssanti tatra kūpaṃ prakalpayet

[trividhaṃ vaiṣṇavavimānam]
nāgaraṃ drāviḍaṃ ceti vesaraṃ ca tridhā matam/
vimānaṃ devadevasya vimalaṃ vaiṣṇavaṃ smṛtam

// iti bhārgavatantre tṛtīyo'dhyāyaḥ //(1) (1. adhyāyaḥ ityataḥ anantaram M. kośe `hariḥ om' ityadhikaḥ/)