Bhargava Tantra · Chapter 24

// caturviṃśo'dhyāyaḥ //
[aṣṭākṣaramantranirūpaṇādhyāyaḥ]
[rāmasya māhātmyakīrtanaṃ kārtajñyajñāpanañca]
agastyaḥ
bhagavan sarvalokeśa sarvarṣigaṇasevita/
tvameva bhagavān viṣṇustvaṃ brahmā tvaṃ maheśvaraḥ

tvamādityastvamagniśca cdramāstvaṃ purandaraḥ/
vāyustvaṃ sarvabhūtātmā nāgarājo'si vāsukiḥ

anantaḥ phaṇināmindraḥ sraṣṭā tvaṃ sarvadehinām/
antaścarasi bhūtānāmādimadhyāntavarjitaḥ

puruṣastvaṃ paraṃ brahma jagad‌bījaṃ sanātanam/
tvāṃ vinā naiva paśyāmi parātparataraṃ prabhum

kalpānte sāgare kṣubdhe saṃhṛtya nikhilaṃ jagat/
kukṣau vahasi deveśa śeṣatvaṃ śeṣamaṇḍale

tvaṃ yāsi pakṣirājena śriyaṃ vahasi vakṣasi/
śeṣaṃ sarvaṃ jagadidaṃ śeṣī tvaṃ parameśvara

tvayādyānugṛhīto'smi kaṭākṣābhyāṃ vilokitaḥ/
pūto'smi puruṣeśāna puṇyaloke'smi kaścana

kṛtsnasya pañcarātrasya sāramagrāhiṣaṃ prabho/
[aṣṭākṣaramantrādhikāritvaviṣaye jijñāsā]
kṛpayā te dayāsindho śuśrūṣā kācidasti me

tadapyadyopadeṣṭavyaṃ rahasyamapi durlabham/
aṣṭākṣarākhyamantrasya adhikārī ca tajjape

[aṣṭākṣaramantrādhikārilakṣaṇam]
śrīrāmaḥ
samyak pṛṣṭaṃ muniśreṣṭha sarvasvaṃ saṅgraheṇa te/
upadekṣyāmi tanmantramadhikārī prapañcyate

ātmānaṃ manyate śeṣaṃ śeṣiṇaṃ parameśvaram/
anukampāsya bhūteṣu tairapyeṣo'nukampyate

nirīhaḥ sarvakāryeṣu so'hamasmiñjagatrayam/
mṛtyumapyātmano mitraṃ manyate'smādvibheti saḥ

kṣudhito vā na tṛṣitaḥ cintayānaḥ sada harim/
varṣaṃ vātaṃ ca bhānuṃ ca sahajaṃ manyate samam

kṛcchreṣvapyatisaṃtuṣṭo vinītaḥ kṣemavṛddhiṣu/
vanitāsu bhavet ṣaṇḍaḥ janmāndho doṣadarśane

paradoṣapravacane mūko nindāpraśaṃsane/
badhiro vedavid‌goṣṭhyām ānandāśrupariplutaḥ

kiṅkaro haribhaktānāṃ harisevaikamānasaḥ/
adhikārī bhavedeṣaḥ grahītuṃ manumīdṛśam

[śuddhamiśrayoḥ sāmānyabhedaḥ]
śuddho miśra iti dvaidhīṃ bhajeta sa munīśvaraḥ/
ādyamekāyanaṃ vedaṃ bahmaikapratipādakam

tenaiva saṃskṛtaḥ śuddhaḥ miśrastraiyyā prakīrtitaḥ/
aṣṭākṣarastraividyānāṃ śuddhānāṃ dvādaśākṣarī

balādimantrairacchidraṃ pañcakālapravartanam/
ekāghnā niṣekādisaṃskāraśca balādibhiḥ

dvādaśākṣaravidyaiva teṣāṃ vidyā na ca trayī/
na sāvitrī na mantro'nyaḥ svādhyāyajapakarmaṇoḥ

mūleṣu nispṛhāḥ sarve `dvādaśākṣara'cintakāḥ/
śāvasūtakahīnāste kevalaṃ mokṣakāminaḥ

karṣaṇādikriyāsvete kalpyante nādhikāriṇaḥ/
ajñānādyadi tāḥ kuryuścayavante nātra śaṃsayaḥ

mantrasiddhāntaniṣṭhena dīkṣitena pratiṣṭhitam/
pūjārthamātmano bimbaṃ pratigṛhya samacayet

bījaśaktyaṅgarahitaṃ `dvādaśākṣara'vidyayā/
kṛtvā pratiṣṭhāṃ tadbimbaṃ dāpayanmūlaśākhine

na dīkṣā naiva dehasya dahanādiviśodhanam/
nāṅganyāsādisakalaṃ neṣṭamekāyane'rdhvani

ekāyanapraviṣṭānāṃ traividyānāmapīdṛśaḥ/
bījaśaktyaṅgarahitam ṛṣicchando vivarjitam

svarūpameva mantrasya japaḥ svādhyāyakarmaṇoḥ/
[dīkṣayā yogyatotpādanaṃ mukhyā dīkṣā ca]
dīkṣayā jāyate yogyaḥ traividyaḥ devapūjane

cakrābjamaṇḍale dīkṣā tasya mukhyā prakīrtitā/
anukalpā bhaveddīkṣā kevalaṃ vahnisannidhau

dīkṣito devadevasya karṣaṇādikriyāṃ caret/
nādhikārī bhavedyastu dīkṣāvirahito dvijaḥ

tasmāddharyarcanākāṅkṣī dīkṣeta harisannidhau/
kuṃbhe ca maṇḍale cāgnau harimāvāhya pūjayet

māyāsūtraṃ ca nirbhidya pūto bhavati mānavaḥ/
netrabandhādvinirmukto dṛṣṭvā cakrābjamaṇḍalam

vikīrṇasvarṇakusumo labdhapuṇḍrāhvayo guroḥ/
adhītya sakalān mantrān aṣṭākṣarapurassarān

.(a:T.vikīrṇam, for vikīrṇa;)
vidyāṃ haryarcanamayīm abhiṣikto ghaṭodakaiḥ/
arharyarcayituṃ viṣṇuṃ pratiṣṭhātuṃ yathāvidhi

mahotsavādikaṃ kartuṃ nityanaimittikādikam/
eṣā mukhyā bhaveddīkṣā jaghanyā vakṣyate śṛṇu

[jaghanyāyāḥ dīkṣāyāḥ svarūpam]
sthaṇḍilaṃ pratimāṃ viṣṇoḥ kuṃbhamarciśca pūjayet/
athavā tu yathālābhaṃ kevalaṃ vā hutāśanam

juhuyāddhetirājena bāhumūle samaṅkitaḥ/
pāñcajanyena vā sākaṃ tato nāmādipūrvavat

labdhvā guroryathāśāstraṃ bhūyādeṣo'rcanāvidhau/
nitye naimittike kāmaye karṣaṇādiṣu karmasu

eṣā dīkṣā dvitīyā syāt pañcasaṃskāralakṣaṇā/
ime'dhikāriṇaḥ proktāḥ vāsudevārcanāvidhau

ete hyaṣṭākṣarān japtum itarān api vā manūn/
nānye'dhikāriṇastaiṣāṃ kīrtane smaraṇe'pi vā

[aṣṭākṣaramantroddhāraprakāraḥ]
aṣṭākṣaramanuṃ vakṣye sāvadhānamanāḥ śṛṇu/
ādau tu chandasāmādirvighneśastadanantaram

otadehena jīvātmā tṛtīyo varṇa īritaḥ/
viṣṇunā saha vighneśaḥ caturthaḥ kalaśodbha

viṣṇuṃ vibhran mahājvālaḥ pañcamo mārutastataḥ/
sa viṣṇuḥ sumukhaḥ ṣaṣṭhādanantara udīritaḥ

avasāne marudbhāti prāṇo bhūtabhṛtāṃ sadā/
eṣa te'ṣṭakṣaro mantro yathāvadudito mayā

[aṣṭākṣaramantrasya ṛṣyādinirdeśaḥ]
ṛṣirnārāyaṇo devo devatā cāsya kīrtitau/
chandastu devī gāyatrī bījaṃ viṣṇuḥ sabindukaḥ

tribhiḥ padaiśca bhūyo'pi ṣaḍaṅgāni mahāmune/
samaste kathito bhāvaḥ vyaste vakṣyāmi tacchṛṇu

bharadvājaḥ kauśikaśca jamadagnirudīritaḥ/
vasiṣṭhaḥ kasyapaścātriragastyaḥ ṛṣayaḥ kramāt

dvitīyādyāstārakasya parameṣṭhī ṛṣirbhavet/
chandāṃsi praṇavādīnāṃ gāyatryādīni cāñcale

virāṭ ca devatā vacmi kramādeṣāṃ dharo dhruvaḥ/
soma āpastathā'gniśca ṣaṣṭho varuṇa īritaḥ

pratyūhaśca prabhātaśca devā aṣṭau yathākramam/
nābhyādihṛdayānteṣu nyasanīyāśca bhūmiṣu

[aṣṭākṣaramantrajapāt pūrvaṃ dhyeyaṃ bhagavatsvarūpam]
caturbhujamudārāṅgaṃ śaṃkhacakradharaṃ vibhum/
kālameghapratīkāśaṃ padmapatranibhekṣaṇam

kirīṭahārakeyūrakāñcīkaṭakamaṇḍitam/
śrīvatsakaustubhoraskaṃ kuṇḍalāṅgulibhūṣaṇam

pītāmbareṇa saṃvītaṃ yajñasūtropaśobhitam/
lalāṭe cordhvatilakaṃ śvetayā mṛdumṛtsnayā

śriyā bhūmyā ca satataṃ vālavyajanavījitam/
praphullavārijamukha meghagambhīraniḥsvanam

evaṃ dhyātvā japenmantraṃ caturvargaphalapradam/
[aṣṭākṣamantropayogaḥ tasya phalaśrutiśca]
anena sakalāḥ devāḥ sādhyāḥ santi na saṃśayaḥ

kuryādanena mantreṇa prāṇāyāmaṃ dvijottamaḥ/
sarvapāpavinirmukto mahāyogī bhaved‌dhruvam

aṅgānivedāścatvāraḥ śāstrāṇi vividhānyapi/
sarvamaṣṭākṣare mantre svayameva pratiṣṭhitam

etajjapan sadā dhyāyan sarvapāpāt pramucyate/
kimanyairbahubhirmantraiḥ sarvametena sidhyati

// iti bhārgavatantre caturviṃśo'dhyāyaḥ //