Bhargava Tantra · Chapter 25

// pañcaviṃśo'dhyāyaḥ //
[pañcakālaprakriyānirūpaṇādhyāyaḥ]
[vaiṣṇavāṇāṃ kṛte pañcakālaparatvanirdeśaḥ]
śrīrāmaḥ
traividyo dīkṣitastvevaṃ japadhyānaparāyaṇaḥ/
harinyastamanā bhūtvā pañcakālaparo bhavet

[pañcakālavibhāgakramaḥ]
prātaḥ kuryādadhi(bhi?)gamamupādadyāttaḥ param/
ijyāṃ kurvīta tadanu svādhyāyaniratastataḥ

yogena gamayedante evaṃ kālaṃ nayeddvijaḥ/
[adhigamanādividhīnāṃ saṃkṣiptavarṇanam]
prātarutthāya śayanāddharernāmāni kīrtayet

śodhayitvā tato dehaṃ dantadhāvanapūrvakam/
avagāhyāpsu nadyāde`raghamarṣaṇamu'ccaran

vāsobhyāmatha saṃvītaścandanena mṛdāpi vā/
ūrdhvapuṇḍraṃ vahet phāle dadyādardhyaṃ vivasvate

sāvitryā triḥparikramya tarpayitvātha devatāḥ/
prāṇānāyamya saṅkalpya japedāsūryamaṇḍalam

aṣṭottarasahasraṃ vā śatamaṣṭottaraṃ tu vā/
upasthāya raviṃ dṛṣṭvā karmaśeṣaṃ samāpya ca

agnau ca hutvā deveśaṃ praṇamyāpīṭhamastakam/
ālokya triḥparikramya putradārādabhiḥ saha

sambhāryānapi sambhārān sambhāryārādhanātmakān/
snātvārādhya jagannāthaṃ yatīnapyatithīnapi

toṣayitvātha bhuñjīta guruśeṣaṃ haviḥ svayam/
tato ṛgādīn śāstrān vā paṭhedvā pāṭhayedapi

[yogaprakriyānirdeśaḥ]
snātvā sādhyaṃ samāpyārghyaṃ japtvāgniṃ paricarya ca/
praṇamya devadevaśaṃ puṇḍarīkākṣavidyayā

stutvā bhuktvā ca yuñjīta svātmānaṃ dhyānakarmaṇi/
prāṇāyāmaparo bhūyāt `mūmantre'ṇa tattvavit

nāḍīmiḍāṃ piṅgalāṃ ca śodhayecca gatāgataiḥ/
tatra tatra ca yogena kārayedvāyudhāraṇam

pṛthivīmapsu tāṃ vahnau taṃ vāyāvambare ca tam/
taṃ jīve taṃ pare brahmaṇyamale viniveśayet

rātrau niśīthe vimale snātvā tīrthe'nvahaṃ sudhīḥ/
āsane samyagāsīnaḥ vivikte'malamānasaḥ

evaṃ dhyāyet paraṃ brahma yogakarmaṇi dīkṣitaḥ/
hṛtpuṇḍarīkamadhyasthaṃ caitanyaṃ jyotiravyayam

kadambamukulākāraṃ nityatṛptaṃ nirāmayam/
anantamānandamayaṃ cinmayaṃ bhāsvaraṃ vibhum

nivātadīpasadṛśamakṛtrimamaṇiprabham/
evaṃ dhyāyannayetkālaṃ yogavidyāviśāradaḥ

[nidrāsvīkāraprakāraḥ]
yogāvasāne bhūyo'pi layakramaviparyayāt/
jīvādivasumatyantaṃ sṛṣṭvā devāya tarpayet

tataḥ śayīta khaṭvāyāṃ suvāsinyā vināpi vā/
evaṃ dināni gamayannante devaṃ hariṃ vrajet

[nidrāsvīkārābhāve vikalpaḥ aṣṭākṣaramaṃtrajapaphalañca]
athavā`ṣṭākṣaraṃ mantraṃ' yathāśakti japecchuciḥ/
mumukṣurlabhate muktiṃ muktikāmo'tulāṃ śriyam

ārogyaṃ putrasaṃpattiṃ dharaṇīṃ sasyamālinīm/
rājaśrīvasyamatulaṃ rājyalakṣmīṃ ca śāśvatīm

āyuśca jñānamatulaṃ prāvaṇyaṃ sarvakarmasu/
yadyadicchanti japtāraḥ sarvaṃ karatale bhavet

[asya śāstrasya grahaṇe adhikāriṇaḥ]
śāstrametanmuniśreṣṭha sarvaguhyaṃ sanātanam/
viṣṇubhaktāya dātavyaṃ jagatāmupakāriṇe

puṇyakṛdbhyaḥ pradātavyaṃ bhīrubhyaḥ pāpakarmaṇaḥ/
na nāstikāya dātavyaṃ nābhaktāya kadācana

gopanīyamidaṃ śāstraṃ yadetad‌brahmasampuṭam/
[asya śāstrasyādhyayanaphalaśrutiḥ]
etadyaḥ paṭhate bhaktyā tasmin devaḥ prasīdati

tasya muktiḥ karatale sa pāpebhyaḥ pramucyate/
sutārthī sutamāpnoti strīkāmaḥ sudatīṃ drutam

āyuṣkāmo dīrghamāyuḥ rugṇo rogādvimucyate/
atulāṃ śriyamāpnoti lakṣmīkāmo na saṃśayaḥ

bahunātra kimuktena labhate yadyadīpsitam/
[pāñcarātropadeśānantaraṃ rāmasyāntardhyānatvam]
etadrahasyamuditaṃ prītyā tvayi munīśvara

muktastvaṃ kilviṣātsarvāt vraja sthānamiti buvan/
ālokitaśca sa mayā parameṣṭhī jagatprabhuḥ

paśyato'ntardadhe devo rāmo raktāntalocanaḥ/
sarahasyamidaṃ śāstramagrahīṣaṃ jagatprabhoḥ

(a> A.T. paśyanto for paśyato;)
oṃ namo vāsudevāya nirmalānantaśaktaye/
puṇyāya puruhūtāya puruṣāya parātmane

[viṣṇavārādhanaphalakīrtanaṃ granthopasaṃhāraśca]
agastyaḥ
anena vidhinā yūyamarcayadhvamadhokṣajam/
sarvapāpaharaṃ devaṃ jagad‌bījaṃ parāt param

tatparaṃ tatparaṃ tīrthaṃ tattapo maṅgalaṃ bahu/
tena sarvaṃ karatale bhavatyatra na saṃśayaḥ

yaḥ pūjayati deveśaṃ vāsudevaṃ sanātanam/
kiṃ tasya bahubhistīrthaiḥ kiṃ yajñaiḥ kiṃ vratairapi

tatsarvaṃ viṣṇuyajanāt hastaprāptaṃ bhaviṣyati/
tasmāt sarvaprayatnena vāsudevaṃ samarcayet

iti śāstraṃ mahaddivyaṃ gṛhītaṃ bhārgavānmuneḥ/
upādiśattapasvibhyaḥ agastyo bhagavān ṛṣiḥ