Bhargava Tantra · Chapter 23

// trayoviṃśo'dhyāyaḥ //
[samprokṣaṇanirūpaṇādhyāyaḥ]
[sarvatra prāyaścitteṣu sāmānyakṛtyāni]
śrīrāmaḥ
prāyaścittāni sarvāṇi kathitāni mahāmune/
teṣu sarveṣu kurvīta sāṅkuraṃ kautukaṃ purā

adhivāsaśca kartavyaḥ pratiṣṭhāyāṃ yatheritaḥ/
aparedyurbhavet prātaḥ kalaśasthāpanakramaḥ

brāhmavaiṣṇavapuṇyānāṃ vinānyatrāparājitam/
prāyaścitte dravyakuṃbhasthāpane sodakaṃ bhavet

madhye nyased‌dravyakuṃbhaṃ paritaḥ śuddhavāri ca/
mauktikaṃ rajataṃ vāpi teṣu nyasyāmbupūraṇam

āvāhya devamabhyarcya pratiṣṭhāpya hutāśanam/
hutvā yathāvidhi guruḥ pūrṇāhutyavasānikam

snāpayitvātha japtvā ca bhojayitvā dvijottamān/
gurumabhyarcya natvā ca dattvā tasmai ca dakṣiṇām

ṛtvigbhyaḥ sahakāribhyo brāhmaṇebhyaśca dakṣiṇām/
vitīrya devaṃ ninayet mandirāntarbhuvaṃ guruḥ

[samprākṣaṇāvasaraḥ]
śṛṇu vakṣye'dhunā brahman saṃprokṣaṇavidhiṃ kramāt/
aṅgabhaṅgādisandhāne dhāmno vā kautukasya vā

cirāya pūjālope vā bhūgupte maraṇe'pi yā/
janane maithune dhāmni śilpispṛṣṭe'pi kautuke

evamādiṣu cānyeṣu samprokṣaṇamudāhṛtam/
[samprokṣaṇasannāhaḥ]
puṇyāhaṃ vācayetpūrvaṃ `viṣṇornukami'ti bruvam

prokṣayeddhāmabimbādīn abliṅgaiḥ kṣālayedapi/
aṅkurāṇyarpayetpaścāt badhvā pratisaraṃ tataḥ

karmāṅgasnapanaṃ kuryāt vaiṣṇavenaiva vartmanā/
śāyayecchayane devaṃ pratiṣṭhāyāmivātmavān

dvāratoraṇakuṃbhādīn yathāpūrvaṃ samarcayet/
vedikāyāṃ dhānyapīṭhe mahākuṃbhaṃ niveśayet

sūtraveṣṭitasarvāṅgaṃ saratnaṃ pratimānvitam/
kūrcāpidhānapatrāḍhyaṃ vastrayugmasamanvitam

tasyaiva dakṣiṇe pārśve tādṛśaṃ karakaṃ nyaset/
vāsudevaṃ mahākuṃbhe karake ca sudarśanam

āvāhyātha yathānyāyaṃ naivedyāntaṃ samarcayet/
[samprokṣaṇāṅgahomavidhiḥ prokṣaṇaprakāraśca]
agniṃ saṃsādhya vidhivat tatrāvāhya jagatprabhum

samidbhirājyaiścarubhistalaiścāpi pṛthak pṛthak/
aṣṭottaraśataṃ hutvā śāntihomaṃ yathāpuram

pūrṇāhutiṃ tato hutvā samuddhāsyānalasthitam/
anyāṃśca devānudvāsya devamantarniveśayet

mahākuṃbhajalenaiva prokṣayetpuruṣottamam/
kūrcena pañcopaniṣadairabliṅgairitarairapi

śāntimantrāṇi samaye paṭheyurbrāhmaṇottamāḥ/
evaṃ samprokṣya deveśaṃ yathāpūrvaṃ samarcayet

[brāhmaṇādisammānanaṃ dakṣiṇāpradānaṃ ca]
brāhmaṇān bhojayedbhaktyā deyā tāmbūladakṣiṇā/
ācāryadakṣiṇāṃ dadyāt śataniṣkaṃ tato'dhikam

// iti bhārgavatantre trayoviṃśo'dhyāyaḥ //