Bhargava Tantra · Chapter 22

// dvāviṃśo'dhyāyaḥ //
[vividhaprāyaścittanirūpaṇādhyāyaḥ]
[pūjāvaikalyādau niṣkṛtiviṣayakaḥ sāmānyaḥ praśnaḥ]
agastyaḥ
nityanaimittikādyānāṃ pūjānāṃ bhagavan prabho/
vaikalye vāthavā lope niṣkṛtistatra kā bhavet

[aśuddhadehena saṃpādite arcane prāyaścittam]
śrīrāmaḥ
śṛṇuṣva maitrāvaruṇe sarvaṃ vakṣye yathākramam/
karmāṇi yena pūryante yena tuṣṭo bhaveddhariḥ

asnāto'nupanīto vā tilakena vivarjitaḥ/
vasāno malinaṃ vastraṃ kliṣṭavāso'pavitrakaḥ

pralayādikramāddehamasaṃśodhya samādhinā/
mantranyāsamakṛtvā ca pūjite ca jagatprabhau

japedaṣṭākṣaraṃ mantram aṣṭottaraśataṃ budhaḥ/
[aśuddhapādādisamarcane prāyaścittam]
pādau hastāvasaṃśodhya anācamya samarcane

japaḥ pañcopaniṣadāṃ nagno muktaśiroruhaḥ/
[śvasanādipūrvakasampādite arcane prāyaścittam]
śvasan hasan vā kupyan vā svinnāṅgaḥ pralapannapi

arcayeddevadeveśaṃ śatamastramanuṃ japet/
[lomādisparśanādipūrvakabhagavadarcane prāyaścittam]
lomaloṣṭhāsthikeśādisparśanenaiva niṣkriyā

anāplutya striyaṃ gatvā pūjayetpuraṣottamam/
snāpayetpañcagavyena pañcopaniṣadaṃ japet

[rajasvalāvastrādyasparśānantaraṃ sampādite arcane prāyaścittam]
evaṃ rajasvalāvastraṃ spṛṣṭvā devasamarcane/
vedavikrayacaṇḍālayūpaśvānarajasvalāḥ

kākapāṣaṇḍapatitapratilomakharādikān/
caityavṛkṣaṃ citiṃ sparśāyogyaṃ spṛṣṭvā samarcane

pañcavāruṇikairmantraiḥ snapanaṃ kuśavāriṇā/
kṣīreṇa snāpayeddevaṃ sakeśakusumārcane

[malamūtrādirūṣite bimbe bhagavadarcane niṣkṛtiḥ]
rūṣitairmalamūtrādyaiḥ pūjite parameśvare/
strībhirvānunītairvā bimbe spṛṣṭe'pi vācaret

kuśodakena snapanaṃ mantreṇa parameṣṭhinā/
[duṣṭānnanivedite prāyaścittam]
mlecchapulkasacaṇḍālapratilomānulomajaiḥ

aspṛśyairapi śūdrādyairācārarahitai dvijaiḥ/
śvabhiḥ sṛgālaiśca kharaiḥ spṛṣṭamannaṃ niveditam

ayājñiyaiḥ kodravādyaiḥ haviḥ kṛtvā niveditam/
pramādena ghṛtasnānaṃ snānamuṣṇāmbubhistataḥ

[atyuṣṇādihavirnivedane prāyaścittam]
atyuṣṇamatiśītaṃ vā vinā śākādibhistu vā/
havirnivedane kuryāt `pañcopaniṣadāṃ' śatam

[śavādidūṣito grāme prāyaścittam]
śavādidūṣite grāme pakvānnaṃ vinivedayet/
payasā snapanaṃ kṛtvā `pañcopaniṣadāṃ' japaḥ

[pūjāraṃbhānantaraṃ maraṇāśauce vidhiḥ]
ārabdhāyāṃ tu pūjāyāmantarā mriyate yadi/
tantreṇa sakalaṃ kṛtvā devadeve samāpayet

na snānādikriyā tatra na homo na balirmahaḥ/
naivedyamekaṃ kurvīta tattantramiti kathyate

[niveditasya anyasmai nivedane prāyaścittam]
bhūyo nivedayetpūrvam anyasmai vā niveditam/
kuśodakaiḥ snāpayitvā `mūlamantrā'yutaṃ japaḥ

[anyadevārcanaprayuktasādhanopayoge prāyaścittam]
anyadevārcitaṃ puṣpam anyadīyaṃ rathādikam/
pūjādiṣūpayuktaṃ cet gandhavastrādikaṃ tathā

kalyāṇasnapanaṃ kṛtvā `mūlamantraṃ' śataṃ japet/
[kṛmyādidūṣitapuṣpādyupayoge prāyaścittam]
kṛmikīṭādibhirduṣṭamanyadevāya nirmitam

pūjādiṣūpayuktaṃ cet dadhnā snānaṃ samācaret/
[samarpitāvaśeṣopayoga prāyaścittam]
bhuktaśeṣeṇa vā viṣṇordattaśeṣeṇa vā punaḥ

`mūlamantra'sahasra tu japedaṣṭottaraṃ budhaḥ/
[pūjāyāṃ paryuṣitodakopayoge prāyaścittam]
pūjāyāṃ snapane vāpi yadi paryuṣitodakam

yojayecchāntaye tasya kuśodakaghaṭāplavaḥ/
[malādiduṣṭavastuprayoge prāyaścittam]
malamūtrādiduṣṭena vastunā pūjite yadi

snāpayedvaiṣṇavaiḥ kumbhaiḥ punaḥ pūjādi kārayet/
[kūpadoṣe prāyaścittam]
śavādidūṣitāt kūpāt jalaṃ sarvaṃ samuddharet

puṇyāhaṃ vācayitvānte prokṣayejjalaśuddhaye/
[vihitopacārabhaṅge prāyaścittam]
klṛptopacārabhaṅge tu dviguṇaṃ kārayettataḥ

śāntaye'ṣṭottaraśataṃ `mūlamantraṃ'japetsudhīḥ/
[pūjāvaikalyādau prāyaścittam]
vaikalye devadevasya pūjāyāḥ dviguṇārcanam

pūjāvaikalyakālānāṃ dviguṇairvastubhiḥ punaḥ/
prāyaścittāvasāne tu pūjayetparameśvaram

[pūjākālavaikalye prāyaścittavidhiḥ]
ekāhapūjāvaikalye snapanaṃ śāntivāriṇā/
dinamekamatikramya vaikalyañceddinatraye

(M. trayam for traye;)
maṅgalodakakuṃbhena snapanaṃ kārayetsudhīḥ/
ata ūrdhvaṃ dvādaśāhaṃ pūjāvaikalyasaṃbhave

snāpayetsarvagandhena pakṣāntaṃ vikale sati/
mūlauṣadhībhiḥ snapanaṃ māsaṃ pūjāviparyaye

brāhmeṇa kārayetsnānaṃ vatsarāntaṃ yadā bhavet/
snāpayetpārameṣṭhena vatsaradvayalaṅghane

vāsudevaṃ bhavetsnānaṃ tataḥ saṃvatsarāvadhi/
saṃprokṣaṇaṃ prakurvīta pratiṣṭhāvatsaratrayāt

prāyaścitteṣu sarveṣu kuryād‌brāhmaṇabhojanam/
[aśāstrīyapūjādau prāyaścittam]
aśāstrīyeṇa pūjāṃ vā baliṃ vā homakarma vā

kurute'kṣatatoyena snapanaṃ tasya niṣkṛtiḥ/
evaṃ bahudine jāte vidhivarjitapūjane

snāpayedvāsudevena tena śāntirbhaviṣyati/
[agnidoṣe prāyaścittam]
aspṛśyasparśane vahneḥ kṛmikeśādidūṣaṇe

aṣṭottaraśataṃ homo vyāhṛtyā tena śāmyati/
caṇḍālasūtakodakyāṃśavapulkasadūṣite

ayutaṃ homa udito vyāhṛtyā havyavāhane/
[parivārārcananāśādau prāyaścittam]
parivārārcane naṣṭe bhaṅge vā balikarmaṇaḥ

tattanmantreryathākālaṃ dviguṇīkṛtya pāvake/
juhuyācchāntaye teṣāṃ samidhā vā ghṛtena vā

[balidravyabalibimbapatane prāyaścittam]
patite tu balidravye punaranyena kārayet/
śāntaye snapanaṃ kuryāt nārikelāmbhasā hareḥ

balibimbe nipatite yānādeḥ sthāpayetpunaḥ/
baliśeṣaṃ samāpyātha vaiṣṇavaṃ snapanaṃ caret

[ajñātajāticauraiḥ spṛṣṭe bimbe prāyaścittam]
ajñātajātibhiścoraiḥ spṛṣṭe bimbe jagatpateḥ/
prājāpatyaṃ prakurvīta snapanaṃ tasya śāntaye

[mṛṇmayādibimbadoṣe prāyaśttim]
mṛṇmayaṃ citralikhitaṃ kautukaṃ ca trivastukam/
caṇḍālādyairduṣitaṃ cet tyaktvā sarvaṃ punaḥ sṛjet

[aspṛśyaiḥ spṛṣṭe bimbe prāyaścittam]
bimbe pātakibhiḥ sapṛṣṭe brāhmaṃ snapanamācaret/
śūdreṇa kautuke spṛṣṭe puṇyena snāpayeddharim

sāmānyairbrāhmaṇaiḥ spṛṣṭe kautuke parameṣṭhinaḥ/
snāpanaṃ kuśatoyena tasya niṣkṛtaye bhavet

duṣṭastrībhistathā'spṛśyaiḥ kuṇḍervā golakaistu vā/
spṛṣṭe tacchāntaye kuryāt puṇyena snapanaṃ hareḥ

[vaiśyādibhiḥ garbhagehapraveśe prāyaścittam]
vaiśyaśūdrānulomādyairgarbhagehapraveśane/
strībhirvā pañcagavyena prokṣaṇaṃ tatra kalpayet

garbhagehapraveśaścet caṇḍālaiḥ pulkasādibhiḥ/
mṛdādikautukaṃ tyājyaṃ kṣālayet gomayāmbubhiḥ

prokṣayetpañcagavyena puṇyāhaṃ vācayettataḥ/
punaḥ sṛṣṭvā yathāpūrvaṃ sarvamanyadyathā puram

śailādīnāṃ tu bimbānāṃ sparśe brāhmaṃ samācaret/
aśaucavatpraveśe'pi snānaṃ caṇḍālavat smṛtam

[śūdrādibhiḥ sampādite karmaṇi prāyaścittam]
śūdrapulkasacaṇḍālayavanāśaucipāpinaḥ/
karmasvadhikṛtā jñānādajñānātkāmato'pi vā

kurvīran yadi karmāṇi śodhayenmandiraṃ tataḥ/
puṇyāhaṃ vācayet paścāt vedān vipraiśca ghoṣayet

snāpayedvāsudevena kuryād‌brāhmaṇabhojanam/
[mandire cāṇḍālādipraveśe prāyaścittam]
caṇḍālapulkasasvānasṛgālāśaucigardabhaiḥ

dhāmāvaraṇabhūbhāge praviṣṭe niṣkṛtiṃ śṛṇu/
prokṣaṇaṃ pañcagavyena puṇyāhaṃ vācayettataḥ

sparśe tatratya bimbānāṃ parivāragaṇasya vā/
pīṭhānāṃ vā yathāpūrvaṃ kṛtvā kuryācca niṣkṛtim

[khadyotasparśādau prāyaścittam]
khadyotavarṣasaṃsparśe yātrāyāmathavāgninā/
kurvīta puṇyasnapanaṃ dagdhaścet sarvathā tataḥ

punarnirmāya vidhivat yathāpūrvaṃ samācaret/
snāpayedvāsudevena pratiṣṭhānte jagatpatim

sthāpite yāgaśālāyāṃ kalaśe'gnau pratiṣṭhite/
caṇḍālapratilomādyairaspṛśyairitarairapi

spaṣṭe tyaktvāparaṃ sthāpya mūlenāṣṭau śatāhutīḥ/
tattaddevatamantrāṇi japedaṣṭottaraṃ śatam

snapane vāpi yātrāyāṃ patite kautuke bhuvi/
punaḥ saṃsthāpya tadvimbaṃ puṇyasnapanamācaret

maṇḍūkamūṣikādyaistu sarvairmārjārakādibhiḥ/
[cāṇḍālādibhiḥkalaśādisparśe prāyaścittam]
sthāpite kalaśe spṛṣṭe naṣṭe vā taṃ parityajet

kuṃbhāntaraṃ tu saṃsthāpya tattadāvāhanaṃ caret/
taddaivatyān japenmantrān dhvajapūrve mahotsave

skhālityaṃ yadi jāyeta puṣpayāgena śāmyati/
hīnanityotsave dhāmni kāryaṃ na dhvajapūrvakam

utsavaṃ kārayeddhīmān kṛte tanniṣkṛtaye punaḥ/
snānena pārameṣṭhyena prīṇayetparameśvaram

[snapanādau bimbapatane prāyaścittam]
mahotsave vartamāne dhvaje kenāpi hetunā/
naṣṭe dhvajāntaraṃ kṛtvā bhojayed‌brāhmaṇān bahūn

dhvaje tu patite bhūmau hetunā yena kena vā/
punarāropya taṃ paścāt viprebhyo bhūribhojanam

bhaṅgacchidrādiviṣaye varṇalopādisaṃbhave/
saṃdhāya ca yathāyogaṃ saṃprokṣya vidhipūrvakam

punarāropya tacchāntyai brāhmaṇebhyo'nnatarpaṇam/
caṇḍālādipraveśena yathākuṃbhāntaraṃ bhavet

[cāṇḍālādibhiḥ pālikādisparśe prāyaścittam]
tathaiva pālikādīnāṃ mṛṇmayānāṃ bhaved‌dhruvam/
aṅkurāṇyarpayedbhūyaḥ tacchāntyai viprabhojanam

[aṅkure aprāśastyādau prāyaścittam]
aṅkureṣvapraśasteṣu mūṣikā paśuvājibhiḥ/
bhakṣiteṣvapi tacchātyai valmīkādisamudbhave

śāntihomo vyāhṛtibhiḥ brāhmaṇānāṃ ca bhojanam/
[grāmādirahite mandire parikramaṇavidhiḥ]
grāmādirahite dhāmni dhāmanyena parikramaḥ

[mahotsave varṣādibhiḥ śaithilye prāyaścittam]
mahotsave vartamāne varṣavātānalādibhiḥ/
grāmādau śithile paścāt prāyaścittaṃ punarmahaḥ

prājāpatyavidhānena snapanaṃ niṣkṛtirbhavet/
[utsave vighne saṃjāte sati prāyaścittam]
utsave daivayogena vighnite mānuṣeṇa vā

balimeva kṣipeddhāmni grāme vīthyāṃ caturdiśam/
naṣṭakarmāṇyaśeṣāṇi punaḥ kṛtvā yathāpuram

kartavyamakhilaṃ paścāt kuryādvidhyuktavartmanā/
balipradāne'pyakṛte atikrāntaṃ purācaret

anyadyathāvata kartavyaṃ mahāvātādyupadrave/
caṇḍapracaṇḍayoreva bhūtebhyaśca tadantare

[tīrthayātrāhīne utsave prāyaścittam]
hīnāyāṃ tīrthayātrāyāṃ snapanaṃ vāsudevajam/
[utsavabimbacauryādau vidhiḥ prāyaścittañca]
naṣṭe corādibhirbimbe kuryātkarmārcayā mahaḥ

bimbe tu patite vīthyāṃ yānamāropya tatpunaḥ/
vīthīparikramaṃ kṛtvā prājāpatyamathācaret

patanenāṅgahīnaṃ cet kuryāt karmārcayā mahaḥ/
sandhāya vidhivat sarvamanyat kāryaṃ vicakṣaṇaiḥ

yānabhaṅge nayeddevaṃ yānenānyena kenacit/
[karmādhikṛtajane vighnite vidhiḥ]
karmaṇyadhikṛtā ye ca pratiṣṭhāyāḥ savasya vā

daivādvā mānuṣādyadvā vighnitā yadi kāraṇāt/
tāṃ kriyāṃ pūrayedanyaiḥ sadṛśairadhikāribhiḥ

[pavitrādinyūnādhikye pāyaścittam]
pavitrabhūṣaṇānāṃ vā kuṇḍānāṃ maṇḍalasya vā/
nyūnātirekaśāntyarthamastramantraṃ śataṃ japet

[jalādhivāsahīnapratiṣṭhāyāṃ prāyaścittam]
jalādhivāsarahitaṃ pratiṣṭhā kāritā yadi/
snapanaṃ pārameṣṭhyena `mūlamantraṃ' śataṃ japet

[kleśavāsāvadhyatikrānte prāyaścittam]
māsādūrdhvaṃ dvādaśābdādarvākkleśaṃ saheddhariḥ/
ata ūrdhvaṃ kleśavāsaṃ vāsudevo na manyate

kleśāvadhāvatikrānte kuryāt bālālayāntaram/
prāyaścittaṃ vāsudevaṃ snapanaṃ parikalpayet

[siddhāntānāṃ parasparasāṃkarye prāyaścittam]
siddhāntānāṃ tu sarveṣāṃ saṃkaro jāyate yadi/
parasparaṃ vā tantrāṇāṃ pārameṣṭhyaṃ tu niṣkṛtiḥ

[mantrasiddhāntasvarūpam]
parivārayutā vāpi vinā vā taiḥ samarcyate/
mantrasiddhāntamityuktaṃ mūrtirekaiva nānyathā

[āgamasiddhāntasvarūpam]
vāsudevādayo vyūhāḥ parivāravivarjitāḥ/
catvāro yatra pūjyante siddhāntaṃ syāttadāgamam

[tantrasiddhāntasvarūpam]
vāsudevādibhiḥ sārdhaṃ nārāyaṇahayānanau/
viṣṇuśca narasiṃhaśca mūrtayo nava sūkaraḥ

pūjyante parivāraiśca siddhāntaṃ tantrasaṃjñitam/
[tantrāntarasiddhāntasvarūpam]
nṛsiṃhakapilakroḍahaṃsavāgīśvarādayaḥ

vaktṛbhedena pūjyante dvitryādivadanāstathā/
ekaiva mūrtistatrāpi parivārairvināpi vā

tattantrāntaramuddiṣṭaṃ tantrametaccaturvidham/
[siddhāntādīnāṃ parasparasāṃkaryaniṣedhaḥ]
siddhāntānāṃ ca tantrāṇāṃ sāṅkaryaṃ vyasanāya tat

tasmādasaṃkareṇaiva pūjayetparameśvaram/
[tantracatuṣṭayaṃ sāṃkaryadoṣaḥ ekatraikasyaiva grāhyatvañca]
vaikhānasaṃ pāñcarātraṃ bhārgavaṃ śaivamityapi

tantrāṇyamūni catvāri praśastānyarcanāvidhau/
asaṃkareṇa deveśamarcayetpuruṣottamam

sāṅkaryaṃ yadi jāyeta pratiṣṭhotsavakarmasu/
pūjāyāṃ snapanādau vā rājarāṣṭrakṣayo mahān

tasmādasaṃkareṇaiva tathaivānyādhikāriṇām/
asparśanena kurvīta karmajālaṃ yathāvidhi

karṣaṇādipratiṣṭhāntā kriyā yena purātanī/
tenaiva punaruddhāre nānyathā parikalpayet

sā mūrtistacca tantraṃ ca sa eva sthāpakaḥ punaḥ/
punaḥ prakalpanenaiva kriyājālaviparyayaḥ

[ajñātādhikārijīrṇamandirādau vidhiḥ]
lupte purātane dhāmni pratimā vā purātanī/
na jñāyate cādhikārī punaḥ sṛṣṭiryathecchayā

[jñātādhikārimandirādau pūjālopādau vidhiḥ]
adhikārī parijñātaḥ ajīrṇaṃ dhruvakautukam/
mandiraṃ ca manohāri pūjālopaścirādabhūt

pūrvatantrānurodhena bhūyastenādhikāriṇā/
kurvīta sakalaṃ karma rāṣṭrakṣobho viparyaye

[tantrāntarānusāraṃ bhagavataḥ ārādhanāvasaraḥ]
kleśavāsaṃ gate deve grāme vā pattane'pi vā/
āmūlakarmanirvṛttirna kuryāttatra maṅgalam

kiṃ pūnardevadevasya pūjāvaikalyasaṃbhave/
tasmāt sarvātmanā tīvraṃ saṃprokṣyātha samarcayet

hetunā yena kenāpi pūjālope tu śārṅgiṇaḥ/
tantrādhikāryalābhaścet yajamānecchayārcanam

[bhagavadārādhanādau siddhāntādīnāṃ vyatikramaniṣedhaḥ]
vaikalyaśāntiṃ kṛtvātha saṃprokṣya vidhivatprabhuḥ/
tantrāntareṇa yajanaṃ tataḥ prīto bhaveddhariḥ

siddhānte vā'thavā tantre śāstre vā na vyatikramaḥ/
kāryo'nāpadi śāstrajñaiḥ bhūtikāmairviśeṣataḥ

[gṛhārcākrame pūjālope prāyaścittam]
pūjālope gṛhārcāyāḥ pañcagavyābhiṣecanam/
māsādupari ṣaṇmāsaṃ puṇyasnapanamācaret

ṣaṇmāsādvatsarādarvāk saṃprokṣaṇavidhirbhavet/
ata ūrdhvaṃ pratiṣṭhā syād‌gṛhārcārādhanakṣaye

tridaśādipratiṣṭhāyāṃ pūjāvaikalyasaṃbhave/
kevalaṃ pauruṣaiḥ sūktaiḥ snapanaṃ nānyadiṣyate

[sālagrāmaśilāpūjāvaikalyādau prāyaścittam]
sālagrāmaśilādīnāṃ pūjāvaikalyasaṃbhave/
aspṛśya sparśane vāpi kṣālayitvārccayejjalaiḥ