Bhargava Tantra · Chapter 21

// ekaviṃśo'dhyāyaḥ //
[pavitrāropaṇavidhinirūpaṇādhyāyaḥ]
[karmasu jāyamānadoṣaparihāraviṣayakaḥ praśnaḥ]
agastyaḥ
bhagavan devadeveśa jāmadagnya kṛpānidhe/
nityanaimittikādīnāṃ nyūnādhikyādisaṃbhave

sarveṣāṃ brāhmaṇādīnāṃ cāturāśramyameyuṣām/
kiṃ nu tatra samādhānaṃ brūhi me bhaktavatsala

[pavitrāropaṇasya doṣaparihāropāyatvam]
śrīrāmaḥ
pavitrayajanaṃ nāma samārādhanamuttamam/
samāpya pūtāḥ te sarve galitāḥ karmaṇo narāḥ

[pavitrāropaṇārthaṃ kālanirdeśaḥ]
śrāvaṇe bhādrapadyāṃ vā māsi vāśvayuje bhavet/
śobhane tithinakṣatre vāsare śubhanandite

pavitrabhūṣaṇaṃ kuryāt kalyāṇaṃ kamalāpateḥ/
aśvinyoḥ śravaṇe puṣye rohiṇyāṃ vā punarvasau

uttaratritaye svātau mṛge maitre'ntyabhe'pi vā/
kuryāt pavitraṃ kalyāṇaṃ yathāvidhi munīśvara

[pavitropādānadravyasannāhaḥ]
tantūn brāhmaṇakanyābhirnirmitānathavā'paṇāt/
krītān vā doṣarahitān kauśeyān vā yathāvasu

ādāya kṣālayitvādbhiḥ mudgacūrṇairvimiśrayet/
śoṣayedātape samyak triguṇīkṛtya tān punaḥ

punaśca triguṇīkṛtya śaṅkoḥ sūtraṃ niveśayet/
aṅgasthalānuguṇyena pavitraṃ kārayet sudhīḥ

sūtrāṇyaṣṭottaraśataṃ sarvatra parikīrtitam/
[pavitramānaṃ granthisaṃkhyā ca]
pavitramadhivāsāya nābhyantaṃ parikalpayet

ācāryadevapadmānāṃ śiromānaṃ gurerbhavet/
dvātriṃśadgranthayasteṣām anale mekhalāsamam

kuṃbhasya karakasyāpi kaṇṭhamānamudīritam/
viṃśatissapta ca tayorgranthayaḥ parikīrtitāḥ

[daśapavitrāṇāṃ nāmāni lakṣaṇañca]
pavitrasaṃkhyā berāṇāṃ daśa tāni vadāmyaham/
prāmāṇyaṃ granthisaṃjñaṃ ca alaṅkārāhvayaṃ tathā

uttamādhamamadhyāni kirīṭākhyamanantaram/
śrīvatsakaustubhāhvānaṃ vanamālāhvayaṃ daśa

prāmāṇyaṃ nābhimaryādaṃ dvātriṃśad‌granthisaṃyutam/
hṛdayāntaṃ granthisaṃjñaṃ granthayaḥ pañcaviṃśatiḥ

alaṅkāraṃ tu jaṅghāntaṃ dvātriṃśad‌granthinirmitam/
uttamaṃ jānusīmāntaṃ granthayo'ṣṭottaraṃ śatam

aśīti granthisahitamūrvantaṃ madhyamaṃ bhavet/
nābhyantaṃ granthayaḥ ṣaṣṭiḥ jaghanyasya prakīrtitam

kirīṭamānaṃ tannāmno dvātriṃśat granthayaḥ smṛtāḥ/
śrīvatsaṃ snamaryādaṃ granthayaḥ saptaviṃśatiḥ

kaustubhaṃ hṛdayāntaṃ syāt dvātriṃśad‌granthisaṃyutam/
vanamālāpavitraṃ tu caraṇāntaṃ prakalpayet

anekagranthisahitaṃ svatantrāṇāmidaṃ bhavet/
[paratantrabimbānāṃ pavitramānanirdeśaḥ]
bimbānāṃ paratantrāṇāṃ devīnāṃ cottamādikam

hastamānaṃ bhavedagnergranthayo dvādaśa smṛtāḥ/
sarveṣāṃ parivārāṇāṃ dvātriṃśad‌granthibhiryutam

nābhyantaṃ dvārapālānāmapi tādṛśakalpanam/
karṇikāyāmasadṛśaṃ pīṭhāntaṃ parikalpayet

anekagranthisahitaṃ gurūṇāmṛtvijāmapi/
anyeṣāmapi sarveṣāṃ nābhyantaṃ parikalpayet

[pavitranirmāṇavidhiḥ]
gandhaiḥ parimalīkuryāt dravyaiḥ karpūrikādibhiḥ/
maṇimuktāpravālādyaiḥ svarṇairvā kusumairapi

granthīnāṃ pūraṇaṃ kuryāt kuṅkumādyaiśca śobhayet/
yathāvibhavavistāraṃ pavitrāṇi prakalpayet

[pavitrotsavasampādanārthamanujñāyācanam]
aṅkurāṇyarpayodrātrau daśamyāṃ prārthayeddharim/
praṇamya ca parikramya ṛtvigbhiḥ sahito guruḥ

cāturvarṇasyāśramiṇāṃ karmavaikalyaśāntaye/
sarvadoṣavināśārthaṃ sevatāṃ ca mahotsavam

sampade sarvalokānāṃ durbhikṣotsādanāya ca/
ārogyasidhyai rugṇānāṃ prabhoriṣṭārthasiddhaye

pavitrārohaṇaṃ nāma kriyate'dya mahotsavaḥ/
anujānīhi deveśa karmasvasmānniyojaya

[pavitrādhivāsanavidhinirdeśaḥ]
prārthyaivaṃ mandirāttasmāt ācāryo maṇḍapāntare/
ṛtvigbhiḥ saha darbheṣu prāgānana upoṣitaḥ

japairdhyānena ca hareḥ rātriṃ sarvāṃ samāpayet/
ārabheta prabhātāyāmadhivāsanakarmaṇi

nyastacitto havirbhuktvā niśāyāmadhivāsayet/
pavitrabhūṣaṇasnānakautukāni dhruve bhavet

ekabere taditare sava kalyāṇakautuke/
tataḥ pratisaraṃ badhvā pūjayet dvāratoraṇān

caturvedavido viprān sthāpayecca caturdiśam/
vādyaghoṣe ca saṃghuṣṭe dhānyarāśau ca maṇḍape

prāgagreṣu ca darbheṣu pavitrāṇi niveśayet/
puṇyāhavāribhiḥ prokṣya śoṣayecchoṣaṇādibhiḥ

gandhavastubhirālipya sugandhairapi dhūpayet/
kusumāni vikīryātha veṣṭayennavavāsasā

pradarśya cakramudrāṃ ca pūjayedastravidyayā/
sūtrairīśānamārabhya maṇḍapaṃ pariveṣṭayet

ūrdhvaṃ cakramadhaḥ padmaṃ gadāṃ dvāreṣu cāṣṭasu/
dikṣu śaṃkhaṃ maṇḍapasya dhvātvā bhūtabaliṃ kṣipet

chidrayanti ca karmāṇi vighnayanti ca yāni vai/
baliṃ gṛhītvā niryāntu tāni bhūtāni vai bahiḥ

iti mantreṇa bhūtebhyo māṣānnena balirbhavet/
[pavitrotsavakrame bhagavataḥ catuḥsthānārcanam]
tataḥ saṃsnāpya deveśamupavītāntamarcayet

nirmāya maṇḍalaṃ tasmin devamāropya pūjayet/
maṇḍalaṃ ca tataḥ kuṃbhe vāsudevaṃ samarcayet

sudarśanaṃ ca karake nivedyānnaṃ yathāvidhi/
tataḥ kuṇḍegnimādhāya mūlena samidaṣṭakam

(T. tataḥ kuṃbhe vidhāyātha;)
caruṇātha `nṛsūktena' juhuyāt ṣoḍaśāhutīḥ/
sruveṇājyena cāṣṭau ca mūlamantreṇa deśikaḥ

sampātamājyaṃ saṅgṛhya pavitreṣu visarjayet/
[pavitrārohaṇaprakāraḥ]
`idaṃ viṣṇu'riti śrutyā pavitrārohaṇaṃ bhavet

kalyāṇakautuke kumbhe karake'gnau ca maṇḍale/
āropya maṅgalaiḥ sārdhaṃ mūlabimbe tathā caret

sarvārcāsu tathā katvā prāsādaṃ veṣṭayettataḥ/
pañcavarṇaistathā sūtrairnayedrātriṃ japādibhiḥ

[pavitrotsavadvitīyadinakṛtyam]
jāgareṇa tataḥ prātarmaṇḍalasthaṃ jagadgurum/
snāpayitvā samabhyarcya cakrābjaṃ vartayet panaḥ

dvārādiyajanaṃ kṛttvā pūjayeccakrapaṅkajam/
tasmin devaṃ samāropya kuṃbhaṃ ca karakaṃ tathā

dīpāntamarcayetprājñaḥ nivedya ca caturvidham/
[pavitrotsavakrame homavidhiḥ]
haviragnau ca juhuyāt `nṛsūktena' caturvidham

yavaṃ brīhiṃ ca veṇuṃ ca tilaṃ lājaṃ tathā sumam/
agaruṃ ca ghṛtaṃ paścāt samidho navamaṃ pṛthak

aṣṭottaraśataṃ homo muhūrte śobhane guruḥ/
[maṇḍalādīnāṃ pavitraiḥ bhūṣaṇaprakāraḥ]
pavitrairmaṇḍalaṃ kuṃbhaṃ karakaṃ makhakautukam

kuṇḍaṃ ca havyavāhaṃ ca bhūṣayitvābjamaṇḍalam/
pradakṣiṇīkṛtya tato mandire dhruvakautukam

pavitraiḥ samalaṅkṛtya havirantaṃ samarcayet/
berāṇyanyāni sarvāṇi paratantrāṃstathetarān

devīśca parivārāṃśca pīṭhānyapi yathākramam/
vādyavedādighoṣeśca pavitrārohaṇaṃ caret

`mūlamantre'ṇa sarveṣāṃ pavitrārohaṇaṃ matam/
ācāryo mūrtipaiḥ sārdhaṃ praviśya harimandiram

praṇamya svāñjaliṃ puṣpairāpūrya stunuyāttataḥ/
vikirettāni puṣpāṇi devapādāravindayoḥ

manuṣyārthāni sarvāṇi pavitrāṇi tathā hareḥ/
vinyasya pādayoḥ stutvā natvā svārtha samāharet

tataḥ pūjakamukhyānām ṛtvijāṃ sahakāriṇām/
[aparāhṇe bhagavantaṃ prati kṣamāprārthanam]
anyeṣāṃ brāhmaṇādīnāmitareṣāṃ ca dāpayet

devasyānanamālokya pādau spṛṣṭvā jagadguroḥ/
vijñāpayedimāṃ gāthāṃ prāñcalirvinayānvitaḥ

bhagavan devadeveśa sarvalokanamaskṛtaḥ/
saṃvatsaropacāreṣu nyūnādhikyopaśāntaye

ārādhanamidaṃ bhaktyā sahāsmābhiranuṣṭhitam/
gṛhāṇa neha kiñcicca svātantryaṃ mama mādhava

tvadājñayā kṛtaṃ sarvaṃ tvameva paramā gatiḥ/
atra nyūnātirekāṇi kṣamasva puruṣottama

iti taṃ prārthayeddevamaparāhṇe jagatpateḥ/
[utsavakrame dainandinakṛtyam mahotsavadivasaśca]
utsavaṃ kārayedbhaktyā pratyahaṃ snapanaṃ tathā

kāladvaye'pi homaśca nava vā sapta pañca vā/
trirātramekarātraṃ vā dvārādiyajanānvitam

mahotsavaṃ prakurvīta carame divase guruḥ/
[pavitrārohaṇe vaikalpikamantraḥ]
pavitrārohaṇaṃ kuryāt `puṃsūkte'nāpi vā hareḥ

[pavitrārohaṇaphalaśrutiḥ]
ityeṣa kathito brahman pavitrārohaṇo vidhiḥ/
evaṃ yaḥ kurute bhaktyā sa yāti paramāṃ gatim