Bhargava Tantra · Chapter 20

// viṃśo'dhyāyaḥ //
[snapanavidhinirūpaṇādhyāyaḥ]
[snapanabhedanirdeśaḥ]
śrīrāmaḥ
snapanaṃ devadevasya bahudhā parikīrtyate/
tatra brāhmaṃ viśeṣaṃ syāt sarvakarmasu yojayet

athavā vaiṣṇaṃva snānaṃ yadvā puṇyaṃ samācaret/
śreṣṭhamadhyakaniṣṭhāni trividhāni mahāmune

[brāhmādisnapanalakṣaṇam]
brāhmaṃ tu pañcaviṃśadbhiraṣṭonairmadhyamaṃ bhavet/
etattu vaiṣṇavaṃ proktaṃ puṇyaṃ tu navabhirghaṭaiḥ

[snapanapīṭhakalpanaprakāraḥ]
snānamaṇḍapabhūmadhye kalpayedvedikāṃ guruḥ/
pañcahastasamāyāmavistārāṃ locanapriyām

prāgagrāṇyudagagrāṇi caturdaśa nipātayet/
candanārdrāṇi sūtrāṇi koṣṭhānyekonasaptatiḥ

tatra brāhmaṃ ca daivaṃ ca mānuṣaṃ ca padatrayam/
ekāntarāntaraṃ teṣu vīthyarthaṃ parimārjayet

brāhme tu vīthikāṃ hitvā navaiva kalaśāspadam/
daive tu kalaśāḥ sthāpyā aṣṭau dikṣu vidikṣu ca

śiṣṭāni parimārjyāni mānuṣe'ṣṭau tathā bhavet/
parimārjyāni śiṣṭāni dhānyaiḥ pīṭhaṃ prakalpayet

[brāhme pade sthāpanīyāni snapanadravyāṇi]
ghṛtamuṣṇodakaṃ raṃtnaṃ phalaṃ lohaṃ yathākramam/
snānagandhākṣatayavaṃ brāhme'ṣṭau madhyataḥ kramāt

[daivapade sthāpyāni snapanadravyāṇi]
divye padāṣṭake sthāpyaṃ pādyaṃ dadhi tataḥ param/
arghyaṃ pādyaṃ ca pānīyaṃ tato madhughaṭaṃ nyaset

[mānuṣe pade sthāpyāni snapanadravyāṇi]
mānuṣe vinyaset prācyāṃ gandhodakaghaṭaṃ guruḥ

dakṣiṇasyāmikṣurasaṃ nārikelāmbu vāruṇe/
śāntitoyamudīcīne jvalane maṅgalodakam

sarvauṣadhirasaṃ kuṃbhaṃ yātudhāne niveśayet/
sarvagandhodakaṃ vāyau raudre mūlauṣadhiṃ nyaset

[ratnodakadravyaparigaṇanam]
māṇikyaṃ padmarāgaṃ ca nīlaṃ vajraṃ ca puṣyakam/
pravālaṃ mauktikaṃ caiva tathā marakataṃ kṣipet

vaiḍūryaṃ nava ratnāni nyasedratnodake ghaṭe/
[phalodakadravyaparigaṇanam]
kadalībījapūrāmradhātrībilvaphalaissaha

nālikeraṃ ca panasaṃ mātuluṅgaphalodake/
[lohodakadravyāṇi]
suvarṇaṃ rajataṃ tāmraṃ sīsakaṃ trapukaṃ tathā

kāṃsyamāyasasāraṃ ca sapta lohaghaṭodake/
pratyekaṃ niṣkamānāni vinyasetkalpatantravit

[mārjanadrayāṇi]
snānakuṃbhe nyaseddhīmān rajanīsūryavartinīm/
sahadevīṃ śirīṣaṃ ca sadābhadraṃ kuśāñcalam

mārjanāni ṣaḍetāni muṣṭimātrāṇi vai pṛthak/
[gandhodakadravyāṇi]
candanāgarukuṣṭhāni murāmāṃsī ca kuṅkumam

hraberamapyuśīraṃ ca girijaṃ ca tathā nava/
gandhavastūni tatkuṃbhe vinyasetpalamātrataḥ

[ṣaḍakṣatadravyāṇi]
nīvārāḥ vaiṇavāśśālyaḥ priyaṅguṣṣāṣṭikāstathā/
godhūmāḥ taṇḍulāścaite muṣṭimātrāḥ ṣaḍakṣatāḥ

[yavāmbudravyāṇi]
yāvaśca vrīhayaścāpi veṇavaśca ime trayaḥ/
pṛthak kuḍavamātreṇa yavāmbu kalaśe nyaset

[pādyadravyāṇi]
tulasīpadmadūrvāñca śyāmākaṃ cākṣataṃ tathā/
viṣṇukrāntaṃ bilvapatraṃ muṣṭimātraṃ pṛthak pṛthak

palamekaṃ candanaṃ ca pādye'ṣṭau viniveśayet/
[ardhyadravyāṇi]
kuśāgrākṣatasiddhārthatilapuṣpaphalāni ca

yavāḥ pṛthaṅmuṣṭimātrāḥ palamātraṃ ca candanam/
aṣṭau dravyāṇyardhyakuṃbhe vinyaset phalitaṃ phalam

[ācāmabhājane nikṣepyadravyāṇi]
elālavaṅgatakkolajātikarpūracampakāḥ/
candanaṃ kusumānyevamaṣṭau ācāmabhājane

palārdhaparimāṇāni pratyekaṃ tatra nikṣipet/
[pañcagavyadravyāṇi]
gomūtraṃ gomayaṃ kṣīraṃ dadhisarpirimāni vai

catuṣpalāni pratyekaṃ pañcagavyaghaṭe kṣipet/
[kaṣāyodakadravyāṇi]
kaṣāyāmbughaṭe dravyāṇyetāni viniveśayet

śamīpalāśakakhadirabilvāśvatthavikaṅkatāḥ/
audumbaraśca nyagrodhasteṣāmaṣṭau tvacaḥ smṛtāḥ

[śāntikuṃbhadravyāṇi maṅgalodakadravyāṇi]
tulasīveṇunīvārayavāśca śvetasarṣapāḥ/
tilāśca ṣaṭ śāntikuṃbhe dravyāṇi parikalpayet

pratyekaṃ muṣṭimātrāṇi cūrṇitāśca tvacastathā/
indravalyaṅkurāśvatthapallavaṃ ca kuśeśayam

ekapatrāmbujaṃ kuṣṭhaṃ kuṃkumaṃ rohiṇīdrumam/
puṇyāssumanasaścāṣṭau yūthikā mallikā api

trīṇyutpalāni jātiśca campakaṃ ketakī tathā/
dravyāṇi pañcadaśa ca nyaset maṅgalapāthasi

[sarvauṣadhijaladravyāṇi]
māṃsī kuṣṭhaṃ haridre dve murā śaileyacampake/
mustā vacā ca karpūraṃ pratyekaṃ palamātrakam

viṣṭvā sarvauṣadhijale daśaitāni vinikṣipet/
[sarvagandhodakadravyāṇi]
karpūraṃ kuṃkumaṃ kuṣṭhaṃ māṃsī malayajaṃ murā

priyaṅgukesaraṃ mustā tamālaṃ nāgakesaram/
mūladvayaṃ ca kaccoraṃ surasarpikakesaram

uśīraṃ tagaraṃ lodhraṃ tathaiva haricandanam/
agarūdvāsitaṃ kuṣṭhaṃ kāleyaṃ granthipallavam

(M. kāṣṭaṃ for kuṣṭham;)
mukulaṃ campakasyeti pratyekaṃ palasammitam/
cūrṇīkṛtya nyasettatra sarvagandhodake ghaṭe

[mūlauṣadhidravyāṇi]
vyāghrī siṃhī balākāgnī śarapuṃkhā śatāvarī/
bilvamūlaṃ vacā śuṇṭhī koraṇḍaṃ śatamūlikā

pratyekaṃ palamānāḥ syuḥ piṣṭvā kuṃbhe vinikṣipet/
mūlauṣadhyaḥ imāḥ proktāḥ devasnapanakarmaṇi

[makarandādisnapanadravyaparimāṇam]
makarandadadhikṣīrapañcagavyaghṛtānyapi/
pratyekaṃ droṇamānīya yadvā śivamathāḍhakam

dravyakuṃbhāni sarvāṇi tatpramāṇāni kalpayet/
[cūrṇakuṃbhadravyāṇi]
cūrṇakuṃbhaṃ niśācūrṇaiḥ kaṇṭhadadhnaiḥ prapūrayet

[mṛttikodakadravyāṇi]
puṇyakṣetre nadītīre parvate puline hrade/
nirjhare saṅgame'śoṣye vedikorvarayostathā

śālikṣetre devakhāte vṛṣaśṛṅge ca hastinaḥ/
varāhadhṛṣṭe valmīke kulīrāvasathe tathā

nalinyāṃ dīrghikāyāṃ ca sthitāścaikonaviṃśatiḥ/
pṛthak ca muṣṭimātrābhiḥ pūrayenmṛttikodakam

[pratisarabandhaḥ śayanakramaśca]
aṅkurāṇyarpayetpūrvaṃ kuryātpratisaraṃ kare/
ekabere mūlabere bāhulye snānakautuke

śayyāyāṃ śāyayed‌bimbaṃ snānīyamitaradyadi/
kūrcadvāreṇa śayanaṃ prātarutthāpya deśikaḥ

[snānamaṇḍape snapanabimbasthāpanaṃ kalaśasthāpanādikaṃ ca]
dvāratoraṇakuṃbhādīn samabhyarcya yathāpuram/
dvāreṣvadhyayanaṃ nṛttaṃ gītaṃ vādyaṃ pravartayet

snapanapratimāṃ paścāt sthāpayetsnānamaṇḍape/
puṇyāhaṃ vācayetpaścāt prokṣayetkalaśānapi

snānīyānyapi vastūni kalaśasthāpanaṃ caret/
`indraṃ natve'ti mantreṇa tantubhirveṣṭanaṃ bhavet

tattatsthāneṣu kalaśān sthāpaye'nmūlavidyayā'/
`sarvamantreṇa' kuṃbheṣu dravyairambuprapūraṇam

kūrcena pallavanyāso yathānetramanoharaḥ/
`astramantreṇa' tān kuṃbhān śarāvairapidhāpayet

nārikelaphalaiḥ teṣāmalaṅkāraḥ śubhodayaḥ/
vāsobhirveṣṭayetkumbhān maṇḍayeccandanākṣataiḥ

[snapanakalaśeṣu tattaddevānāmāvahanādikramaḥ]
vedaturyādighoṣaiśca ghoṣite ca digantare/
devatāvāhanaṃ kuryāt kalaśeṣu gurūttamaḥ

ghṛtakuṃbhe vāsudevaḥ puruṣaścoṣṇavāriṇi/
phalatoye tu satyaḥ syāt snāne'cyuta udāhṛtaḥ

ananta akṣate kuṃbhe keśavo maṇivāriṇi/
lohe nārāyaṇo devo mādhavo gandhavāriṇi

yavodake tu govindaḥ pādye viṣṇuḥ prakīrtitaḥ/
madhuhantā'rdhyakalaśe ācāme tu trivikramaḥ

vāmanaḥ pañcagavye ca śrīdharo dadhibhājane/
dugdhakuṃbhe hṛṣīkeśaḥ padmanābho madhunyapi

dāmodaraḥ kaṣāyāmbhasyevaṃ kṛtvātha mānuṣe/
guḍakumbhe varāhassyānnṛsiṃhaścaikṣavodake

śrīdharo nālikerode hayāsyaḥ śāntivāriṇi/
vāsudevo maṅgalode sarvauṣadhyāṃ saṅkarṣaṇaḥ

pradyumnaḥ sarvagandhāpsu mūlauṣadhyāmaniruddhaḥ/
evaṃ brāhme tu kuṃbhānāṃ devatāḥ parikīrtitāḥ

cūrṇakubhe bhavellakṣmīḥ mṛttikākalaśe mahī/
evamāvāhayeddhīmān yogapīṭhapurassaram

tattannāmacaturthyaiva namaḥ praṇavayuktayā/
aṣṭāvaraṃ samuccārya tata āvāhanaṃ caret

arghyādi praṇavāntaṃ taṃ samabhyarcya yathāvidhi/
[agnihomamantrāṇāṃ nirdeśaḥ]
agniṃ saṃskṛtya vidhivat tatrārādhya śriyaḥ patim

`madhuvātā' `madhunaktaṃ' `madhumānno' `vanaspati'/
`vedāhaṃ' `viṣṇornukaṃ' ca `oṣadhayaḥ saṃvadante'

nārāyaṇānuvākaśca tathā `yā oṣadhīriti'/
viṣṇugāyatriyā cāpi `tadviṣṇori'tyanantaram

`na te viṣṇuri'ti śrutyā `viṣṇoḥ karmeti' mantrataḥ/
`dadhikrāvṇeti'yajuṣā `āpyāyasveti' vai ṛcā

`madhuvātā' `oṣadhayastvaṃ' `viṣṇuryā phalinī'riti/
`śannodevīśca' sāvitrī trātāramiti deśikaḥ

mahāvyāhṛtibhiḥ paścāt `gandhadvārāma'nantaram/
śatadhāraṃ vasūnāṃ ca tato ghṛtaṃ mimikṣire

sarpiṣā juhuyādetairmantraiḥ sampātamāharet/
secayeccāpi kuṃbheṣu devamagnervisarjayet

[brāhmasnapanavidhinirdeśaḥ]
ṛtvigbhiḥ sahitaḥ kuṃbhān śāntimantraiśca pañcabhiḥ/
abhimantryāstramantreṇa vastreṇācchādya deśikaḥ

dantakāṣṭhaṃ gandhatailaṃ dadyādāmalakaṃ tataḥ/
gaṇḍūṣācamane ca dve devāyārdhyādi dāpayet

pauruṣeṇaiva sūktena kalaśaiḥ snāpayeddharim/
vastrayajñopavītādi naivedyāntaṃ samarcayet

pūrvaṃ kūrcena samprokṣya paścātkuṃbhābhiṣecanam/
etad‌brāhmaṃ bhavet snānam
[vaiṣṇava-snapanavidhinirdeśaḥ]
vaiṣṇavaṃ śṛṇu vakṣyate

brāhme daive ca tānkuṃbhān saṃsthāpyāvāhya pūrvavat/
vaiṣṇavenaiva sūktena juhuyāt ṣoḍaśāhutīḥ

ante ca viṣṇugāyatryā hutvā sampātasecanam/
anyat sarvaṃ yathāpūrvaṃ na viśeṣo'sti kaścana

[puṇyasnapanavidhinirdeśaḥ]
atha puṇyaṃ pravakṣyāmi snapanaṃ śārṅgadhanvanaḥ/
divyaṃ ca mānuṣaṃ tyaktvā brāhme navaghaṭāspadam

ghṛtaṃ brāhme nyaset kuṃbhaṃ prācyāṃ pādyaghaṭaṃ nyaset/
arghyakuṃbhaṃ pade yāmye ācāmāmbu ca vāruṇe

pañcagavyamudīcīne āgneye dadhibhājanam/
nairṛte tu payaḥ kuṃbhaṃ mārute madhubhājanam

kaṣāyamīśakoṇe ca dravyadevāśca pūrvavat/
adbhayaḥ sambhūta iti ca vedāhaṃ ca prajāpiḥ

yo devebhyaḥ ṛcaṃ brāhmaṃ yadvāgdevīṃ tataḥ param/
....................catvāri śraddhayeti ca

navabhirjuhuyādagnau saṃpātājyena secayet/
anyatsavaṃ yathāpūrvaṃ kathitaṃ kalaśodbhava

[haridrāmṛttikāsnapanamantranirdeśaḥ]
`śrī sūktena' bhaveddhomo haridrāsnānakarmaṇi/
havanaṃ `bhūmisūktena' mṛttikāsnapane sati

[mahāsnapanabhedāḥ]
vāsudevaṃ pārameṣṭhyaṃ prājāpatyamiti tridhā/
mahāsnapanametattu prāyaścitteṣu karmasu

[vāsudevasnapanavidhiḥ]
brāhmāṇāṃ dravyakuṃbhānāmaṣṭāvaṣṭau samantataḥ/
śuddhodakuṃbhāḥ saṃsthāpyāḥ teṣāṃ saṃkhyā śatadvayam

dravyakuṃbhārcanaṃ pūrvaṃ kathitaṃ kalaśodbhava/
sarvaśuddhodakuṃbhānāṃ devo nārāyaṇaḥ smṛtaḥ

śuddhodakeṣu sarveṣu mauktikaṃ rājataṃ tu vā/
vinyaseddhomamantrastu pūrvamevoditaṃ mune

tairhutvā sarpiṣā paścāt dvādaśākṣaravidyayā/
sahasramaṣṭasahitaṃ hutvā sampāta homayet

anyat sarvaṃ yathāpūrvaṃ kārayetkarmakovidaḥ/
etattu vāsudevākhyaṃ snapanaṃ sarvakāmadam

[pārameṣṭhyasnapanavidhiḥ]
pārameṣṭhyamatho vakṣye yathāvadavadhāraya/
vaiṣṇavānāṃ tu kuṃbhānāṃ parito'ṣṭau pṛthak pṛthak

eteṣāmudakuṃbhānāṃ ṣaṭ‌triṃśat sahitāḥ śatam/
pūrvavat sakalaṃ kṛtvā vaiṣṇavoktavidhānataḥ

(a; A. eke for eteo;)
nārāyaṇārcanaṃ kuryāt mūlenaiva ghaṭāmbuṣu/
vaiṣṇavenaiva sūktena gāyatryantaṃ yathāpuram

hutvā mūlena manunā homaścāṣṭasahasrakam/
anyat sarvaṃ yathāpūrvam prājāpatyamatha śṛṇu

[prājāpatyasnapanavidhiḥ]
puṇyasnapanavat kāryam aṣṭāvaṣṭau samantataḥ/
teṣāṃ tathākṛte'mbūnāṃ dvisaptati ghaṭāstathā

vaiṣṇavena ṣaḍarṇena viṣṇorāvāhanaṃ bhavet/
viśeṣayajanaṃ tena aṣṭottarasahasrakam

abhiṣicya dravyakuṃbhaiḥ taistaisteṣāmupodakaiḥ/
snāpayitvā maṇḍayitvā samabhyarcya yathāvidhi

praṇamya ca parikramya stutvā stotrairanekadhā/
mandirābhyantaraṃ paścāt gamayetsnānakautukam

ekaberavidhānaṃ cet snapanaṃ mūlakautuke/
[kauberasnapanavidhiḥ]
kauberaṃ snapanaṃ vakṣye śṛṇuṣva kalaśodbhava

ghṛtaṃ madhye dadhyanale pīyūṣaṃ nairṛte pade/
makarandaṃ ganadhavade śarkarā śāṅkare pade

nṛsiṃhaḥ śarkarādevaḥ itareṣāṃ yathāpuram/
`brahmajajñānami'ti ca `ayāścāgneti' vidyayā

`asunvante'ti ca ṛcā `cānoniyuni' (?)mantrataḥ/
`tamīśānami'tītyevaṃ sarvamanyat yathāpuram

[kalyāṇasnapanaprakāraḥ]
anenaiva prakāreṇa catvāriṃśacchubhodakaiḥ/
snānaṃ kalyāṇamuditaṃ vyāhṛtyāvāhanaṃ hareḥ

tayaiva juhuyādagnau aṣṭottarasahasrakam/
[aparājitasnapanasya aindrasnapanasya ca svarūpam]
ekena ghṛtakuṃbhena snānaṃ syādaparājitam

upakuṃbhāṣṭakayutamaindrametanmunīśvara/
`aparājitamantreṇa' homaḥ syādaparājite

aindre śuddhodakuṃbhānāṃ devastrailokyamohanaḥ/
homastrailokyamantreṇa aṣṭottarasahasrakam

anyatsarvaṃ yathāpūrvaṃ kartavyaṃ karmakovidaiḥ/
[snapanajalasnānādiphalaśrutiḥ]
evaṃ te snapanaṃ proktaṃ saprakāraṃ mahāmune

devasnānāmbubhiḥ snātaḥ narake na nimajjati/
tattīrthaṃ pāti yo bhaktyā punarjanma na vidyate

pādukāṃ śirasā vibhran vaikuṇṭai kiṅkaro bhavet/
cūrṇaṃ dhṛtvā tu śirasi modate divi devavat

[snapane pādukātīrthādipradānanirdeśaḥ]
pādukātīrthacūrṇāni gṛhītvā deśikottamaḥ
siṣeviṣubhyaḥ sarvebhyo bhaktebhyo'pi pradāpayet