Bhargava Tantra · Chapter 19

// ekonaviṃśo'dhyāyaḥ //
[jīrṇoddhāravidhinirūpaṇādhyāyaḥ]
[jīrṇoddhārāvasaraḥ]
dhāmno vā kautukānāṃ vā vaikalye'vayavādiṣu/
sandhātuṃ yadi śakyeta tadā sandhānamācaret

[saṃdhānānarhe bimbādau vidhiḥ]
aśakye tucchite dhāmni bimbe tyaktvā punaḥ sṛjet/
pūrvadravyaṃ punaḥ sṛṣṭau yogyaṃ saṃyojya kalpayet

(M.T. kośayoḥ ādau `bālālayam' ityadhikaḥ pāṭhaḥ)
(a. M. tuccite T. tūcchrite for tucchite;)
ayogyaṃ tucchitaṃ dhīmān agādhe nikṣipejjale/
bhinnaṃ vā sphuṭitaṃ bimbaṃ bhūtikāmo na pūjayet

[sandhānāvasare bhagavataḥ ārādhanasthalam/]
laghusādhye'ṅgasandhāne kuṃbhe śaktiṃ niveśayet/
anantajīrṇe bimbādau bālabimbe'rcayeddharim

[ajīrṇadhāmabimbatyāganiṣedhaḥ]
ajīrṇa dhāma bimbaṃ vā tyaktvā nānyatra kalpayet/
kalpane tu mahān doṣaḥ ācāryayajamānayoḥ

[vimānādijīrṇoddhārakrame śaktyāvāhanavyavasthā]
sandhāne tu vimānasya śaktimāvāhayed‌dhruve

dhruvaberasya sandhāne kumbhe vā bālakautuke/
vaikalye parivārāṇāṃ teṣāmāvāhanaṃ dhruve

aṅgabimbāṅgasandhāne tatrāpi parivāravat/
evaṃ sarvaṃ samālocya jīrṇoddhāraṃ samācaret

[bālālayakalpanavivekaḥ]
diśaśca vidiśaścāpi madhye mādhavasadmanaḥ/
sāvakāśe'bhirucite bālasadma prakalpayet

pañcavā bāhudaṇḍena sapta saṃkucite trikam/
caturaśraṃ manohāri kalpayet bālasadma tat

yasyāṃ diśyabhavad‌dvāraṃ mandire pūrvanirmite/
tasyāṃ bālālaye cāpi balajaṃ parikalpayet

[bālābimbakalpanaprakāraḥ]
lohajaṃ dārujaṃ yadvā śailajaṃ vā manoharam/
bālabimbaṃ prakapyeta yathā prācīnamandire

utsedho bālabimbasya vṛddhau pañcabhiraṅgulaiḥ/
sākaṃ hastena hānau tu viṃśatyāṅgulibhirbhavet

pūrvavatkalpayed‌bimbaṃ nānyathā kalaśodbhavaḥ/
[aṅgavaikalyaśāntyarthaṃ homakramaḥ]
evaṃ prakalpya medhāvī bālabimbaṃ ca mandiram

śubhe kāle tu samprati pūjayitvā dvijottamān/
āśiṣo vācayitvā ca dattvā tebhyo'pi dakṣiṇām

bhūsuraistairanujñātaḥ ācārya varayetpurā/
taṃ praṇamya yathāśāstraṃ maṇḍayitvābhipūjayet

[bālabimbasthāpanakrame ācāryavaraṇakramaḥ]
tataḥ śāstravidācāryaḥ aṅgavaikalyaśāntaye/
dūrvābhirmadhuyuktābhiḥ sahasraṃ homamācaret

vyāhṛtyā sarpiṣā paścāt `pañcopaniṣadā' śatam/
hutvā pūrṇāhutiṃ kuryāt tena śāntirna saṃśayaḥ

[bālabimbapratiṣṭhārādhanakramaḥ]
aṅkurāṇyarpayetpaścāt badhvā pratisaraṃ tataḥ/
jalādhivāsādyakhilaṃ karma kuryāt yathāpuram

bālālayasya madhye vā divye vā mānuṣe'pi vā/
hastamātronnatāṃ vediṃ kṛtvā tasyāṃ niveśayet

`mūlamantreṇa' vidhivat ratnanyāsaṃ na kārayet/
prokṣayecca yathāpūrvaṃ tato mūlālayaṃ vrajet

mūlabimbaṃ samārādhya kuṃbhaṃ nyasyāgrato hareḥ/
tatra tasmāt samāvāhya saṃhārakramamāśrayan

abhyarcya kumbhamardhyārvedavādyapurassaram/
ādāya kuṃbhamarcābhiḥ anyābhiḥ saha deśikaḥ

prādakṣiṇyena taddhāmnaḥ bālasadma praviśya ca/
karmārcādīni bimbāni tatra sthāne niveśayet

tataḥ kuṃbhagatāṃ śaktiṃ bālabimbe niyojayet/
pūrvavatsakalaṃ kuryāt sānnidhyaṃ yācayettataḥ

bhagavan punaruddhāraḥ tava dhāmnaśca varṣmaṇaḥ/
yāvatsamāpyate tāvat sānnidhyamiha ācara

iti prārthya tato devam aṅgaiḥ sākaṃ samarcayet/
vaikalyarahitān sarvān parivāram samarcayet

F(c:d: om A;)
vikalānarpayeddevān devapādāravindayoḥ/
luptānāmapi pīṭhānāṃ parivāravadiṣyate

āśritānāṃ tu pārthakyaṃ bhaktānāṃ parivāravat/
devīnāṃ ca śriyādīnāṃ sarvāsāṃ parivāravat

nityaṃ naimittikaṃ kāmyaṃ yathāpūrvaṃ samācaret/
athavā nityameva syāt jīrṇoddhārasamāptaye

mahotsavaṃ prakurvīta yadyannityaṃ purātanam/
sthaṇḍile balidānaṃ syāt satāyāṃ pīṭhamastake

[jīrṇabimbaprakṣepaprakāraḥ]
evaṃ samāpya medhāvī gatvā gabhagṛhaṃ guruḥ/
haimaṃ lāṅgalamādāya mocayetpīṭhabandhanam

kuśaiḥ kāśaistṛṇaiścānyaiḥ tathā govālanirmitaḥ/
rajjubhirveṣṭayedvimbaṃ rathamāropayettataḥ

grāmaṃ pradakṣiṇīkṛtya samudraṃ vā sarovaram/
agādhaṃ cāpyaśoṣyaṃ ca salilaṃ yatra nityaśaḥ

tatra gatvā kṣipedvimbaṃ yadvā bhūmau khanedapi/
[saṃskārānantaraṃ punaḥ pratiṣṭhākramaḥ]
tataḥ snātvā vidhānena sandhāne yadi karmaṇi

sandhānāya gururdadyāt bimbaṃ devasya śārṅgiṇaḥ/
kārayitvā punaḥ sṛṣṭiṃ sandhānaṃ vā yathāvidhi

jalādhivāsādyakhilaṃ sarvaṃ karma yathāpuram/
punaḥ sṛṣṭau prakurvīta sandhāne naitadiṣyate

samprokṣaṇaṃ prakurvīta bālaśaktiṃ niveśayet/
evaṃ samprokṣya vidhivat karmabimbaiḥ samanvitam

abhyarcayedyathāpūrvaṃ bhagavantaṃ munīśvara/
// iti bhārgavatantre ekonaviṃśo'dhyāyaḥ //