Bhargava Tantra · Chapter 18

// aṣṭādaśo'dhyāyaḥ //
[nityotsavabalisamarpaṇavidhinirūpaṇādhyāyaḥ]
[agnikāryasampādanānantaramutsavācaraṇa nirdeśaḥ]
śrīrāmaḥ
nityotsavavidhiṃ vakṣye yathāvadavadhāraya/
abhyarcyāgnau jagannāthamatha nityotsavaṃ caret

[nityotsavakrame balidravyānayanakramaḥ]
antaḥ praviśya sadanaṃ balibimbaṃ samarcayet/
śibikādau samāropya balidravyaṃ samāharet

sopadaṃśaṃ mahānnaṃ vā payodadhi ghṛtānvitam/
athavā śuddhamannaṃ vā balyarthaṃ parikalpayet

sarvārthatoyaṃ śuddhākhyaṃ gandhapuṣpākṣatāni ca/
dhūpaṃ dīpaṃ ca vibhrāṇāḥ vrajeyuḥ paricārakāḥ

gāyantaścāpi nṛtyantaḥ tālamaddalapāṇayaḥ/
vrajeyuragre devasya pradīpairbahubhiḥ saha

vyajanaṃ cāmaraṃ chatramutsavāṅgaṃ tathetarat/
sarvamādāya gaccheyurdevasyāgre'dhikāriṇaḥ

[balidānakramanirdeśaḥ]
caṇḍapracaṇḍāvārabhya balidānaṃ samācaret/
tattannāma tu devānāṃ caturthyā namasānvitam

praṇavādi samuccārya balidānaṃ samācaret/
idamardhyaṃ balirayam idaṃ te udakaṃ tviti

toyaṃ pūrvottaraṃ dadyāt tālanṛttasvarānvitam/
gandhaṃ puṣpaṃ tathā dīpamardhyaṃ balistataḥ

udakaṃ ca pradātavyaṃ prāṅgaṇe balikarmaṇi/
[tattaddevānāṃ svaranṛttatālavivekaḥ]
caṇḍādidvārapālānāṃ sarveṣāmṛṣabhasvaraḥ

nṛttaṃ tu vaijayantī syānmallatālamudāhṛtam/
viṣṇukrāntaṃ khageśasya nṛttaṃ tālaṃ tu gāruḍam

svarastu madhyamaḥ proktaḥ viṣvaksenasya kathyate/
nṛttaṃ svastikamityuktaṃ balitālarṣabhasvarau

tadvannṛttaṃ gaṇeśasya bhadratālaṃ tu pañcamaḥ/
svaraśca kuṃbhatanaya durgāyāḥ dhaivataḥ svaraḥ

sarvamaṅgalanṛttaṃ syāt bhadratālamudīritam/
brahmaṇo brahmatālaṃ syāt nṛttaṃ syāt sarvamaṅgalam

svarastu madhyamastasya śunāsīrasya kathyate/
vilāsanṛttamuditaṃ svaraḥ ṣaष़ḍja udāhṛtaḥ

samatālaṃ tathā vahneḥ kathyate ṛṣabhasvaraḥ/
baddhāvatālaṃ nṛttaṃ tu sarvatobhadramīritam

yamasya kheṭakaṃ nṛttaṃ gāndhāraḥ svara ucyate/
tālaṃ tu śṛṅgiṇī proktā nirṛtermadhyamaḥ svaraḥ

mallatālaṃ tathā nṛttaṃ pathitaṃ cakramaṇḍalam/
varumasya svaraḥ proktaḥ pañcamo maṅgalāhvayaḥ

tālaṃ kāntāranṛttaṃ syāt maruto dhaivataḥ svaraḥ/
jayatālaṃ tu kathitaṃ nṛttaṃ syāt pṛṣṭhakuṭṭimam

somasya bhadratālaṃ syāt nartanaṃ kaṭibandhanam/
svaro niṣādaḥ kathitaḥ śaṅkarasya tu dhaivatam

svarastu ḍhakkarī tālaṃ vāmajānūrdhvanartanam //
anyeṣāmapi devānāṃ svaraḥ pañcama iṣyate

bhadratālaṃ tu kathitaṃ sarvamaṅgalanartanam/
bhūtānāṃ balitālaṃ syāt svaro gāndhāra ucyate

sarvamaṅgalanṛttaṃ ca darśayetkumbhasambhava/
[utsavabhramaṇe balidānakramaḥ]
tṛtīyāvaraṇāntaṃ tat parikramya yathākramam

tattannṛttādisahitaṃ baliṃ datvā yathāvidhi/
mahāpīṭhe balidravyaṃ baliśiṣṭaṃ vinikṣipet

utsavānte hariṃ tatra prāpaṇāntaṃ yathocitam/
pūjayitvātha yānāderavaropya gurūttamaḥ

mandirāntarbhuvaṃ nītvā yathāsthānaṃ niveśayet/
śriyādīnāṃ ca devīnāṃ brahmādīnāṃ tathaiva ca

anyeṣāṃ parivārāṇāmāśritānāṃ ca pūjanam/
tattanmantraiṇa kurvīta mukhyebhyastu nivedanam

[dvārapālādibhyo balipradānādividhiḥ]
balistu dvārapālānāṃ tathā vai vidhirudrayoḥ/
indrādilokapālānāṃ sarvāvaraṇavāsinām

pīṭhādhidevatānāñca balimevaṃ vinikṣipet/
devīnāmāśritānāṃ ca tārkṣyaśeneśayorapi

āśritānāṃ ca bhaktānāṃ prāpaṇāntaṃ samarcan/
// iti bhārgavatantre aṣṭādaśo'dhyāyaḥ //