Bhargava Tantra · Chapter 17

// saptadaśo'dhyāyaḥ //
[agnikāryanirūpaṇādhyāyaḥ]
[agnikuṇḍa homasampādanātpūrvaṃ kartavyāni kṛtyāni]
śrīrāmaḥ
dvārapārśvasthitau devau pūjayitvāgnisadmanaḥ/
praviśya gomayāmbhobhiḥ kuṇḍamālipya paścime

āsane prāṅmukho bhūtvā samāveśyātmadakṣiṇe/
kusumāni tathā vāme dravyāṇyanyāni kalpayet

prāṇānāyamya saṅkalpya kuṇḍasyottarabhūtale/
prāgagrānnikṣipeddarbhān kramātteṣu vinikṣipet

(A. om. śrīrāmaḥ;)
ājyāpātraṃ caruṃ sthālīṃ prokṣaṇīpātramapyatha/
praṇītāṃ samidho darbhāṃstaṇḍulān paridhitrayam

sruk‌sruvau lakṣaṇopetau darvīṃ vyajanamekṣaṇe/
kāṣṭhaṃ ghaṇṭāmakṣatāṃśca gandhadravyāṇi cetarān

vinyasya kuṇḍāntarāle prāgagra udagāyatāḥ/
tisrastisro likhedrekhāḥ praṇavena pṛthak pṛthak

visṛjya lekhanaṃ kūrcaṃ hastau prakṣālya vāriṇā/
darbhastaṃbadvayenādbhirabhyukṣyāgniṃ niveśayet

adbhiḥ parisamūhyāstraiḥ paristīryānalaṃ kuśaiḥ/
daśabhirdaśabhiḥ sāgraiḥ prāgargrarudagañcalaiḥ

dravyāgnimadhye'pāṃ pūrṇāṃ praṇītāṃ viniveśayet/
sākṣatāṃ darbhayugmena kūrcaṃ nirmāya vinyaset

tatrāvāhyārcayeddevaṃ vāsudevaṃ sanātanam/
agnerāgneyakoṇe tāmāsane viniveśayet

pavitritaistribhirdarbhaiḥ ācchādya prokṣaṇīṃ puraḥ/
vinyasedātmanastatra praṇītāṃ kūrcamānakaiḥ

adbhirāpūrya cotpūya pātrāṇyuttānayan guruḥ/
prokṣayetprokṣaṇāṃvobhirājyasthālīṃ samāharet

tasyāṃ vinyasya tatkūrcaṃ kūrce tanmayaviṣṭare/
agnerdakṣiṇato devamarcayeccaturānanam

pūrayitvājyapātraṃ tat galitenaiva sarpiṣā/
udagagniṃ niveśyāsmin ājyasthālīṃ niveśayet

dīptena barhiṣā tasya paryagnikaraṇaṃ caret/
darbhāgre dve niveśyāsmin punaḥ paryagnimācaret

udaguttīrya tatpātram agnimagnau niveśayet/
śrapayeddhṛdayādyaṅgaiḥ carupātre hutāśane

agneruttarattaḥ sthāpyaṃ carupātraṃ yathākramam/
ājyapātraṃ puraskṛtya trirutpūya gurūttamaḥ

kūrcagranthiṃ visṛjyādbhiḥ spṛṣṭvāgnau viniveśayet/
saurabheyīṃ darśayitvā ghṛtaṃ tadamṛtaṃ smaret

indrādīnagnikuṇḍasya paritaḥ pūjayet kramāt/
atitaptena toyena struk‌struvau kṣālayed‌guruḥ

darbhapañcakakūrcena mūlamadhyāgrabhūmiṣu/
saṃmṛjyāgnau ca niṣṭapya tāvudīcyāṃ niveśayet

granthiṃ visṛjya kūrcasya spṛṣṭvāmb‌vagnau niveśayet/
homavastuṣu saṃsiñcet struveṇājyaṃ sakṛtsakṛt

udagagrā ca paridhirnyasanīyā ca paścime/
prāgagrā dakṣiṇe tadvadudīcyāṃ diśi vinyaset

āgneyaiśānayoḥ sthāpyavādhārasamidhāvubhau/
`aditenvi'tyādimantraiḥ pariṣecanamācaret

samidhaḥ pañcadaśa ca sikttvājyena tatassakṛt/
japa`nnaṣṭākṣaraṃ mantraṃ' dhyātvā ca parameṣṭhinam

ādadyānmudrayā muṣṭhyā veṣṭayitvā kuśaiḥ karam/
ājyapātraṃ samādāya prājāpatyaṃ tataḥ param

aindraṃ ca juhuyādagnau āgneyaṃ saumyameva ca/
vyastābhirvyāhṛtibhiśca samastābhiryathākramam

[homakrame vahnyādidhyānasvarūpam]
pariṣicya tato vahniṃ dhyāyeccatvāri śṛṅgayā/
omagnaye namaḥ svāhetyagnau pūrṇāhutirbhavet

dviśīrṣakaṃ saptahastaṃ tripādaṃ saptajihvakam/
varadaṃ śaktipāṇiṃ ca vibhrāṇaṃ sruk‌sruvau tathā

(A. om. asmāt ślokādārabhya 53. ślokasya b: paryantam/)
abhītidaṃ carmadharaṃ vāme cājyadharaṃ kare/
[vahneḥ saptajihvānāṃ nāmasthānādivivekaḥ]
kālī karālī sumanā lohitā dhūmra eva hi

sphuliṅginī viśvarūpī sapta jihvāḥ prakīrtitāḥ/
kālyāstu madhyamaṃ sthānaṃ karālyāḥ pūrvadigbhavet

manojavāyāścāgneyyāṃ lohitāyāstu vāruṇe/
sudhūmrā somanilayā sphuliṅginyanilāśrayā

aiśānyāṃ visvarūpī tu evaṃ sthānaṃ smaret kramāt/
jihvāyāṃ dakṣiṇe vaktre dhūmrāyāṃ māraṇādikam

lohitāyāṃ vaśīkāraḥ kālyāṃ karma ca śāntikam/
sarvasiddhiḥ sphuliṅginyāmānane dakṣiṇetare

karālikā vijayadā puṣṭidā ca manoharā/
kārṣṇyaṃ lauhityametāsāṃ varṇaḥ śyāmatvameva ca

sphuliṅgarūpaṃ ca tato varṇaḥ spaṭikasannibhaḥ/
tapanīyanibhaḥ proktaḥ jihvāyāmānupūrvaśaḥ

[agnitrayalakṣaṇaṃ teṣāmupayogaśca]
nityāgnirvṛddha ityuktaḥ utsavāgniryuvā bhavet/
dīkṣāśāntipratiṣṭhāsu bālāgnirabhidhīyate

araṇīmathanājjātaḥ bālāgniriti kathyate/
sūryakāntāśmano jāto yauvanāgniḥ prakīrtitaḥ

laukikāgnistu vṛddhāgniragnitrayamudrāhṛtam/
[samidhaḥ pramāṇaṃ doṣayuktasamidhaḥ prayogaphalanirdeśaśca]
āyāmaḥ samidhāṃ tālaḥ kaniṣṭhānāhanaṃ matam

carmahīne vināśaḥ syāt bhede kṣīṇakulaṃ bhavet/
ārdrā tu bandhunāśaḥ syāt putranāśaḥ purātane

takṣāsu bhāryāmaraṇaṃ kalahāya ca śākhinī/
udvegāya bhavetsthūlā hnasvāvagrahakāriṇī

dīrghātivṛṣṭijananī tyājyā doṣayutā samit/
[kāmanānurūpaṃ samidhāṃ homadravyāṇāṃ ca vivaraṇam]
yajñavṛkṣodbhavaiśśāntissaubhāgyaṃ kusumairbhavet

dhūpadravyaissadārogyaṃ puṣṭirdadhnā payaśśuciḥ/
annena vividhān kāmān ājyenāyuṣmatīḥ prajāḥ

śvetapadmaistu juhuyādicchan brahmaśriyaṃ naraḥ/
lakṣmīpuṣpaistu juhuyāllakṣmīkāmo'tha vāruṇaiḥ

padmairbilvasamidbhirvā jñānakāmastu sarpiṣā/
kanyākāmo huvellājaiḥ gokāmo gomayaiḥ punaḥ

āyuṣkāmastu dūrvābhirbhūmikāmastu mṛtsnayā/
yavairindriyakāmastu tilaiḥ sarvajanapriyaḥ

brahmavarcasakāmastu brahmavṛkṣasamudbhavaiḥ/
vaiṇavaiśca yavaiścaiva nīvāraiḥ śālibhistathā

sarve kāmāśca siddhyanti hoturbījairyathoditaiḥ/
lājahomena siddhyanti sarvakāmāḥ na saṃśayaḥ

annenānnādikāmastu putrakāmastu pāyasaiḥ/
nimbāpuṣpairhiraṇyārthī sarve sidhyanti sarpiṣā

[tattaddhomadravyaparimāṇanirdeśaḥ]
home sarpirmadhukṣīradhārāḥ syuścaturaṅgulāḥ/
śuktirdadhnāhutirgrāsaṃ pāyasādyāhutirbhavet

bhakṣyāhutistadardhena phalaiḥ puṣpairakhaṇḍitaiḥ/
niṣpāvabījamānena dhūpadravyāhutirbhavet

aṣṭāṅgulā tadardhā vā samiddūrvā ṣaḍaṅgulā/
mṛdvikākṣapramāṇā tu gomayāhutirucyate

pūrṇāhutirghṛtasya syātkuḍavena munīśvara/
nyūnādhikapramāṇena havyakavyāhutīḥ kṛtāḥ

bhuñjate dānavāḥ daityāḥ na phalāya prakalpate/
[agnikuṇḍe hareḥ āvāhanam ārādhanaṃ ca]
varmaṇā pariṣicyāgnimagnau pīṭhaprakalpanam

(C: A. varṣma for varma;)
ādhāraśaktyādimantrairvahnāvāvāhanaṃ hareḥ/
pūrvavatsakalaṃ kuryāt upacāramuṣarbudhe

taistairmantraiśca svāhāntaissarpiṣaiva sakṛt sakṛt/
nivedanāntaṃ kṛtvaivaṃ parivārārthamapyatha

hutvā kavacamantreṇa pūrvavatpariṣecayet/
etannityārcanaṃ vahnau pratiṣṭhādāvanantaram

[agnau nityārādhanavidhyādau viśeṣaḥ]
tattatkriyoktavidhinā homamanyatsamācaret/
nitye dhāryo vītihotraḥ na praṇītā na cātmabhūḥ

nedhyaprakṣepaṇaṃ cāgnau na caruśrapaṇaṃ bhavet/
ājyena kevalaṃ vahnau viṣṇoḥ pūjā japāvadhiḥ

nā'ghārahomaḥ kartavyaḥ agnau naṣṭe tu niṣkṛtiḥ/
pratiṣṭhādiṣu sarveṣu sarvametatsamācaret

karmāvasānaṃ brahmādīn nodvāsettantravittamaḥ/
[pūrṇāhutisampādanavidhiḥ]
prāyaścittāhutīrhutvā kuryātpūrṇāhutiṃ tataḥ

ātmano'gre sruvaṃ yāmye cājyasthālīṃ tathottare/
srucaṃ vinyasya hastābhyām ādadyātsāditān kuśān

ājyasthālyāṃ nyasenmūlaṃ madhye madhyaṃ srucītaram/
spṛṣṭvā trirevaṃ juhuyādagnau darbhān tathā dahet

paridhīnātmanaḥ pūrvaṃ praṇītāṃ vinyased‌guruḥ/
āpūrya prokṣaṇītīrthaiḥ pūrvādyāśāsu secayet

avanyāṃ visṛjeccheṣaṃ prokṣayedātmanaḥ śiraḥ/
brahmāṇamudvasetpaścātsrucaṃ toyena pūrayet

pariṣicya tataḥ kuṇḍaṃ devamagneḥ samuddharet/
bhasmanā tilakaṃ kuryāt hutenādhāpanodinā

`agnenaye'ti mantreṇa hyupasthāya tato'nalam/
bhaktyā yadagnau vihitaṃ yathāśakti yathāvidhi

ārādhanaṃ tvaṃ deveśa gṛhāṇa parameśvara/
iti devapadāmbhoje nyaseddhavanajaṃ phalam

[pūrṇāhutividhiḥ]
agastyaḥ
śruto mayā paraṃdhāmnaḥ vahnau pūjākramo'dhunā/
pūrṇāhutividhānaṃ tatkathamadya bravīhi me

śrīrāmaḥ
arghyādyairarcayeddevamanale sarpiṣā gavām/
srucamājyena sampūrya kuḍavena gurūttamaḥ

darbheṇa samidhā yuktaṃ phalena paripūritam/
gandhaiḥ puṣpairakṣataiśca pūjayitvā srucaṃ guruḥ

apidhāya sruveṇātha nāsikāgrāntamuddharan/
utthāya vādya ghoṣeṣu sarvato nāditeṣu ca

`pūrṇāhutimi'ti manuṃ ghoṣayastu dvijātiṣu/
`mūlamantre'ṇa juhuyādanale vimale guruḥ

kurvīta sviṣṭakṛddhomaṃ kukkuṭāṇḍapramāṇakam/
caruṃ ghṛtāplutaṃ sarvairupadaṃśaissamanvitam

saśarkaraṃ ca samadhu sadarbhasamidhaṃ sruci/
vinyasya sarpiṣāplāvya sruvāgreṇāpidhāya ca