Bhargava Tantra · Chapter 16

// ṣoḍaśo'dhyāyaḥ //
[samārādhanavidhinirūpaṇādhyāyaḥ]
[ārādhakasyālayapraveśakramaḥ]
śrīrāmaḥ
snātvā pūrvāhnikaṃ kṛtvā gururdevālayādbahiḥ/
prakṣālya pādau pāṇī ca trirācamyālayaṃ viśet

[kavāṭeddhāṭanaṃ bhagavatprabodhanañca]
prathamāvaraṇaṃ gatvā natvoddiśya śriyaḥ patim/
kṛte tālatraye paścāt kavāṭoddhāṭanaṃ caret

tadā prabodhayeddevaṃ vāsudevaṃ sanātanam/
prabuddha jagadīśāna prabuddha kamalāpate

prabuddha puṇḍarīkākṣa prabuddha ramayā saha/
prabuddhānantakalyāṇavāridhe karuṇāmbudhe

prabuddha candravadana kamalāṅghrisaroruha/
stuvanti vedāścatvāraḥ namanti druhiṇādayaḥ

astācalaṃ gataścandraḥ udayaṃ yāti bhāskaraḥ/
unmīlayākṣiyugalaṃ nṛtyatyapsarasāṃ gaṇaḥ

tumbururnāradaścobhau vīṇayā mañju gāyataḥ/
tiṣṭhanti ṛṣayaḥ sarve sevārthaṃ gopurādbahiḥ

bālātapā visarpanti prabuddhānyambujānyapi/
ṣaṭpadā makarandāya bhramanti kamalodare

cakravākadvijagaṇairgārhasthyamanubhūyate/
uttiṣṭha iti mantraistvāmupāsante dvijottamāḥ

uttiṣṭhotiṣṭha govinda uttiṣṭha puruṣottama/
[nirmālyaviniyogaḥ pātraprakṣālanaṃ ca]
evaṃ prabodhya deveśaṃ dīpeṣu jvaliteṣvapi

mālyagandhādidevasya viṣvaksenāya dāpayet/
pūjāyogyāni pātrāṇi kṣālayecca yathātatham

[bhūtaśuddhiprakāraḥ]
sapavitrakaro bhūtvā sordhvapuṇḍraḥ svalaṅkṛtaḥ/
nādite sakale vādye brahmadhoṣe ca ghoṣite

śabdabrahmamayīṃ dhyātvā dhaṇṭāṃ hastena cālayet/
`astramantreṇa' badhniyāddeśikaḥ kakubho daśa

`mūlamantreṇa' kurvīta prāṇāyāmatrayaṃ tataḥ/
recakaṃ purakaṃ caiva kubhakaṃ recakaṃ tathā

evaṃ caturvidhairyuktaḥ prāṇāyāma udāhṛtaḥ/
saptabhirdviguṇairvāpi punastadvaccaturguṇaiḥ

ādyaiśca `mūlamantra'sya saṃkhyoktā śāstravittamaiḥ/
gandhena sahitāṃ pṛthvīṃ saṃharedapsu yogavit

tā rasena samaṃ vahnau taṃ vāyau rūpamātrayā/
tamākāśe sparśayutaṃ tacca śabdena mānase

saṃharottadahaṃkāre taṃ buddhau tāṃ mahatyapi/
mahāntaṃ saṃharejjīve jīvaṃ taṃ brahmaṇi dhruve

niveśya vahnibījena dagdhaṃ dhyāyedvapurguruḥ/
vāruṇenaiva bījena siktaṃ jātaṃ punaḥ smaret

brahmaṇo nirgataṃ jīvaṃ smṛtvā tasmādgurūttamaḥ/
mahāntaṃ ca tato buddhiṃ buddherjātāmahaṃkṛtim

ahaṃkṛtermano dhyāyet tasmācchabdena cāmbaram/
sparśana cāmbarādvāyuṃ vāyo rūpeṇa cānalam

analādrasasaṃyuktā āpaśtābhyo mahīṃ smaret/
gandhena sahitāmevaṃ viśodhya vapurātmavān

[bhūtaśuddhikrame aṅgeṣu varṇanyāsakramaḥ]
nyasedaṅgeṣu `mūla'sya varṇānaṣṭau yathākramam/
vinyasetpraṇavaṃ nābhau nakāraṃ mehane nyaset

mokāraṃ jānuyugale nākāraṃ pādayordvayoḥ/
rākāraṃ vinyasenmūrdhni yakāraṃ nayanadvaye

ṇākāraṃ vadanāmbhoje yakāraṃ hṛdayāmbuje/
evaṃ vinyasya varṇāṃstān dhyātvā taṃ puruṣottamam

[mānasayāgavidhiḥ]
manasārādhayeddevamardhyādyairvividhaiḥ kramaiḥ/
ardhyaṃ pādyaṃ tathācāmaṃ snānaṃ vastropavītake

gandhaṃ puṣpaṃ tathā dhūpaṃ dīpaṃ puṣpāñjaliṃ tathā/
naivedyaṃ vividhaṃ cāti tāmbūlaṃ mukhavāsanām

ityādi mānasenaiva `mūlamantre'ṇa kārayet/
mūlamantraṃ japetpaścādaṣṭottaraśatāvaram

[pūjāpātrādisannāhaḥ]
devasya purataḥ pātre ādhāre pañca vinyaset/
pātrāpi pariśuddhāni śuddhalohamayāni ca

āvāhanāhvayaṃ pātramanyadekaṃ niveśayet/
pūrayedgalitāmbhobhiḥ `praṇave'nābhimantrayet

śoṣaṇaṃ plāvanaṃ cāpi kuryā`dagnyamṛtākṣaraiḥ'/
darśayetsurabhīmudrāṃ taccaturthyā namo'ntayā

pādyaṃ madhye dakṣiṇe'rdhyaṃ vāme cācāmavāri ca/
snānīyaṃ śāṅkare koṇe śuddhodamitaratra ca

spṛśan dakṣiṇahastena tattannāma smaran dvijaḥ/
uccārya kalpayāmīti pātrādardhyājjalaṃ haret

kiñcidanyena pātreṇa ninayennāsikāsamam/
saṃmantrya `mūlamantre'ṇa saptavāraṃ dvijottamaḥ

prokṣayetpañcapātrāṇi pūjādravyāṇyaśeṣataḥ/
[nityārcanātpūrvaṃ yogapīṭhakalpanaprakāraḥ]
pādapīṭhe tu devasya mūlabere gurūttamaḥ

`āyāntvādyena' mantreṇa yogapīṭhaṃ prakalpayet/
ādhāraśaktiḥ prathamā kūrmakālānalastataḥ

ananto'tha mahīpaścādūrdhvamūrdhvaṃ yathākramam/
dharmo jñānaṃ ca vairāgyamaiśvaryaṃ ca yathākramam

prāgādidikṣu kramaśaḥ adharmādicatuṣṭayam/
āgneyyādiṣu koṇeṣu teṣāṃ madhye sadāśivaḥ

ete pādamayāḥ proktāḥ khaṭvāyāḥ kamalāpateḥ/
ṛgādivedāścatvāraḥ khaṭvākāṣṭhacatuṣṭayam

vaikārikastaijasaśca bhautikaśceti te tridhā/
pūrvāparaguṇāḥ proktāstathā satvādayo guṇāḥ

dakṣiṇottarasūtrāṇi tūlikā pañcabhūmikā/
jīvātmāstaraṇaṃ tasmādūrdhvaṃ padmāsanaṃ smṛtam

pārśvayorubhayoḥ kalpyau parameṣṭhitrilocanau/
sanatkumāraḥ sanakaḥ sanandaḥ pṛṣṭhatastrayaḥ

eteṣāntu namo'ntena caturthyā praṇavādinā/
arcayenmantramuddhṛtya tantraśāstrārthatattavavit

tato devaṃ samālokya sāmmukhyaṃ śāśvatīṃ sthitim/
prārthya mantrākṣaranyāsaḥ kartavyaḥ pūrvavartmanā

[karmārcāyāḥ yogapīṭhakalpanakramaḥ]
karmārcāsahaje pīṭhe yogapīṭhaṃ yathāpuram/
[bhagavataḥ nityārcanavidhiḥ]
prakalpyāvāhane pātre jalamardhyārthamāharet

lalāṭāntaṃ samuddhṛtya mūlenāgaccha cañcunā/
āvāhayenmūlaberāt siñcenmūrdhani karmaṇaḥ

praṇavena brahmarandhraṃ pidhāya kamalāpateḥ/
sāmmukhyaṃ svāgataṃ coktvā sthitiṃ yāgāvasānikīm

pārthya mantrākṣarānnyasya yajedardhyādibhiḥ kramāt/
`sāvitryā' vitaredardhyaṃ pādyaṃ `trīṇi padeti' ca

ācāmo `viṣṇugāyatryā' `tadviṣṇo' dantadhāvanam/
jihvānirlehanaṃ kuryāt `tadviprāso' viparyayāt

`ṛtaṃ satyami'ti śrutyā gaṇḍūṣaparikalpanam/
`pauruṣeṇaiva sūktena' snāpayetpuruṣottamam

`yuvā suvāse'ti ṛcā vastre dve dhautanirmale/
`yajñopavītamantreṇa' brahmasūtraṃ prakalpayet

`gandhadvāreti'mantreṇa gandhenālepanaṃ hareḥ/
`viṣṇornukami'ti śrutyā puṣpaiśca parimaṇḍayet

`jitanta' iti mantreṇa bhūṣayetsarvabhūṣaṇaiḥ/
`irāvatīti' mantreṇa pādayorakṣatārpaṇam

dhūpaḥ kālāgarumukhaiḥ `dhūrasī'ti manuṃ japet/
`uddīpyasve'ti mantreṇa dīpānujvālya darśayet

ādhoṣya caturo devān nṛttaṃ gītaṃ ca darśayan/
[bhagavataḥnityārcanakrame naivedyasamarpaṇaprakāraḥ]
arcayedvividhaiḥ puṣpairnāmabhirbahubhirharim

havīṃṣi sukhapak‌vāni vividhāni mahānasāt/
siktāni sarpibhiḥ samyak sopadaṃśāni pānakaiḥ

ānītāni yathāyogaṃ vinyastānyāsane'grataḥ/
prokṣayedastramantreṇa varmaṇā pariṣecayet

`devasya tveti' mantreṇa darśayat grāsamudrayā/
tripañca sapta vāraṃ vā devāya vinivedayet

evaṃ nivedya vidhivat sodakaṃ sopadaṃśakam/
tāmbūlīṃ vāsanāyuktāṃ dadyāccaraṇamityapi

[nityārādhanakrame homādisampādananirdeśaḥ]
tato nirgatya sadanānnityahomaṃ samāpayet/
baliṃ ca dadyādbhūtebhyo nityotsavamathācaret

[nittārcanaprasaṃge nīrājanod‌vāsanādikramaḥ]
tataḥ praviśya sadanaṃ nīrājya `carameṇa' ca/
udvāsayenmūlabere yathāpūrvaṃ gurūttamaḥ

japerdaṣṭākṣaraṃ mantraṃ' yathāśakti praṇamya ca/
svīkṛtya pādasalilaṃ pibetttriḥ śirasā punaḥ

dhārayetpādukāṃ cāpi tulasyādi tathā haret/
sevārthamāgatānāṃ ca yatīnāṃ viduṣāmapi

anyeṣāṃ viṣṇubhaktānāṃ pādyādi vitaredguruḥ/
[bhagavanniveditānnaviniyogaḥ]
viṣṇorniveditānnādi svīkṛtya svayamātmanaḥ

sevārthamāgatebhyaśca sarvebhyo'pi pradāpayet/
viṣṇorniveditānnena yaṣṭavyā gṛhadevatāḥ

bhuñjīta viṣṇunaivedyam devībhyo viniveditam/
[caṇḍādiniveditānnaviniyogādiḥ]
caṇḍādiparivārāṇāṃ yadannaṃ viniveditam

tanna bhuñjīta manujo jale'gnau vā vinikṣit/
taranti pitaraścāpi tena tṛptāḥ na saṃśayaḥ

idamārādhanaṃ viṣṇoḥ kathitaṃ te samāsataḥ/
// iti bhārgavatantre ṣoḍaśo'dhyāyaḥ //