Bhargava Tantra · Chapter 12

// dvādaśo'dhyāyaḥ //
[utsavavidhinirūpaṇādhyāyaḥ]
[utsavāṅgabhūtāṅkurārpaṇakālaḥ]
utsavārambhadivasāt pūrvamevāṅkurārpaṇam/
tṛtīye'hani vā kuryāt pūrvasmin divase'pi vā

(ādī A. `utsavam' M. `utsavavidhiḥ' iti nirdiṣṭaḥ/ tadanantaramubhayatra- `śrīrāmaḥ' ityadhikaḥ pāṭhaḥ/)
[utsavakrame prākārādīnāṃ śodhanaṃ bhūṣaṇañca]
prākāraṃ mandiraṃ cāpi valajaṃ vīthikā api/
prapābhistoraṇaiścānyairmālikābhiḥ samantataḥ

śodhayed‌gomayāṃbhobhiḥ raṅgabalyakṣatādibhiḥ/
anyaiśca vividhairdṛśyaiḥ bhūṣayecca gṛhāṇyapi

[yāgamaṇḍapavedikuṇḍakalpanaprakāraḥ]
sambhāryāḥ yāgasambhārāḥ utsavārthaṃ viśeṣataḥ/
antarāle diśāmindre kalpayedyāgamaṇḍapam

saptabhirbāhudaṇḍaiśca samantāccaturaśrakam/
tasya madhye bhavedvediḥ hastamātrasamucchrayā

hastadvayena vistīrṇā kuṇḍāni paritastataḥ/
yadvaikakuṇḍaṃ prāgbhāge caturaśraṃ manoharam

prācyāmāhavanīyaṃ syāt dakṣiṇasyāṃ tu dakṣiṇam/
gārhapatyaṃ pratīcīne sabhyamanyatra kalpayet

toraṇādikriyāḥ sarvāḥ pūrvapanna viśiṣyate/
[utsavārthamācāryādivaraṇādikam]
ācāryāṇāmṛtvijāṃ ca tathaiva paricāriṇām

varaṇaṃ caturaḥ pūrvaṃ deśikān varayet prabhuḥ/
śobhayedbhūṣaṇairvastraiḥ gandhamālyādibhiḥ purā

[utsavārtha devādhivāsaprakāraḥ]
adhivāsaṃ prakurvīta pūrvasmin divase niśi/
snāpayitvātha devībhyāṃ śayane śāyayeddharim

tadarthaṃ kautukaṃ badhvā paścācchayanakalpanam/
koṇeṣu sthāpayeddīpān śayyāyā deśikottamaḥ

samidbhiraṣṭabhirhomo nṛsūktena caruṃ punaḥ/
sarpiṣāṣṭau punarhutvā mūlena munipuṅgava

stutvātha devadeveśaṃ vedairvādyaiśca maṅgalaiḥ/
japaiśca mūlamantrasya jāgareṇa nayenniśām

[adhivāsānantaraṃ maṇḍape devasya snapanāmarcanaṃ ca]
tataḥ prabhāte vimale dṛṣṭe bhāskaramaṇḍale/
`uttiṣṭha' iti mantreṇa harimutthāpayed‌guruḥ

`idaṃ viṣṇu'ritiśrutyā śivikāyāṃ niveśayet/
baheyurbrāhmaṇāḥ yānam dhyāyanto vihagādhipam

nṛttaiśca vividhairgeyairvādyaiśca vividhairapi/
brahmaghoṣaistathā stotrairnītvā grāmapradakṣiṇam

maṇḍape'laṅkṛte devamavaropyāsane śubhe/
upacarya yathāyogaṃ sambhārān saṃbhṛtān guruḥ

devāya darśayet sarvān ānītān janasaṃsadi/
atha saṃsnāpya deveśamabhyarcya ca nivedya ca

kṛtvā ca nityahomāntaṃ ninayet garbhamandiram/
[utsavakrame pratisarabandhaprakāraḥ]
sāyaṃ praviśya sadanaṃ yajamānena deśikaḥ

praṇamya tamanujñāpya bad‌dhvā kalyāṇakautukam/
utsavasnānabalyarcā pratimāsvapyanantaram

baddhvā pratisaraṃ paścāt teṣāṃ haste yathāvidhi/
utthāpya balibimbaṃ tat prādakṣiṇyena mandiram

yāgamaṇḍapamānīya sthāpayedāsane harim/
[kuṃbhanyāsaḥ tatra tattaddevānāmarcanakramaśca]
vedikāyāṃ dhānyapīṭhe madhye kuṃbhuṃ ca dakṣiṇe

karakaṃ vinyasetkuṃbhān aṣṭau prāgādiṣu kramāt/
dvāratoraṇakumbhānāṃ pratiṣṭhāyāmivārcanam

mūlamūrtiṃ yajetkumbhe vardhanyāmastradevatā/
prāgādidikṣu kumbheṣu vāsudevādayaḥ smṛtāḥ

āgneyādiṣu koṇeṣu puruṣādīn samarcayet/
puruṣaśca tathā satyaḥ acyuto'nanta ityamī

abhyarcayecca vidhivat havīṃṣi ca nivedayet/
balibimbaṃ tathābhyarcya nivedya ca yathāvidhi

[yāgamaṇḍape vedapārāyaṇādikramaḥ]
prāgādyāśāsu sarvāsu ṛgyajuḥ sāmapāṭhakān/
atharvāṅgirasābhijñān pāṭhayitvā yathākramam

tūryādivādyaghoṣeṇa pūrite ca digantare/
[yāgamaṇḍape tattaddhomakuṇḍeṣu tattaddevoddeśyakahomakramaḥ]
prāgādyāśāsu kuṇḍeṣu vāsudevādikān yajet

tīrthāvasānikaṃ tatra sānnidhyaṃ prārthayedapi/
evamabhyarcite kumbhe bhagavatyakhileśvare

sarpirādyairbhaveddhomaḥ tattanmantrairyathākramam/
sarpibhiḥ kusumairdhūpadravyaiśca samidhā punaḥ

payasā cāpi dadhnā ca tilavrīhiyavairapi/
kuṇḍādhidaivatairmantraiḥ pṛthagaṣṭottaraṃ śatam

aṣṭaviṃśatiraṣṭau vā homaḥ prāgādipūrvavat/
evaṃ hutvātha vidhivat nṛsūktena caruṃ punaḥ

pratikuṇḍaṃ brahmakuṇḍe pāyasena ghṛtena vā/
brahmādidevānuddiśya juhuyāt kalaśodbhava

brahmaṇe cātha rudrāya prajānāṃ pataye tathā/
indrāya ca mahendrāya bhānave jātavedhase

dharmarājāya marute kuberāya ca yātune/
varuṇāya ṛṣibhyaśca vedebhyaḥ puṣpadhanvane

(b:A. dhātune for yātune;
viśvebhyaścāpi devebhyaḥ chandobhyaḥ kālamūrtaye/
dharaṇyai adrirājāya nadībhyo vanamūrtaye

bhūtebhyaśca paśubhyaśca oṣadhībhyaḥ śriyai tathā/
apsarobhyaśca lokebhyaḥ samudrebhyo'mbarāya ca

gandharvebhyaśca yakṣebhyaḥ pārṣadebhyaśca cakriṇe/
caṇḍādidvārapālebhyaḥ sarvebhyaścāpi viṣṇave

praṇavādyagnijāyāntaṃ uktvā homaṃ samācaret/
tatastu mūlamantreṇa hutvedaṃ viṣṇurityṛcā

[utsavakrame balidānaprakāraḥ]
kṛtvā tu sviṣṭakṛddhomaṃ balidānaṃ samācaret/
māṣānnaṃ ghṛtasaṃsiktamādāya paricārakāḥ

dhūpaṃ dīpaṃ tathā gandhaṃ puṣpāṇi surabhīṇi ca/
anyāni pūjādravyāṇi vedavādyapurassaram

yānamāropya balyarcāṃ tayā sākaṃ baliṃ caret/
prathamaṃ yāgaśālāyāṃ pratidvāraṃ baliṃ kṣipet

caṇḍādidvārapālānāṃ dadyānnityotsave yathā/
grāmamadhyaṃ samāsādya brahmaṇe vitaredbalim

prāgādīśānaparyantam indrādīnāṃ baliṃ kṣipet/
baliśiṣṭaṃ mahāpīṭhe nikṣipetpīṭhamūrdhani

toyapūrvottaraṃ dadyādbaliṃ kalaśasaṃbhava/
tatra devaṃ samabhyarcya ninayedyāgamandiram

[utsavaprasaṅge vīthikāsu bhagavataḥ parikramaṇaprakāraḥ]
makhakautukamārādhya rathaṃ vā śivikādikam/
āropya samalaṅkṛtya brāhmaṇaiḥ svastivācakaiḥ

niṣkramya mandirāttasmāt sarvāvaraṇabhūmikāḥ/
parikramedvīthikāśca vidvadbhirvedapāṭhakaiḥ

śāstravidbhiśca kavibhiḥ tathā paurāṇikairapi/
mauhūrtikairbhiṣagbhiśca gadyapadyavimiśrakam

paṭhadbhiśca stutiparaiḥ nānābhāṣāviśāradaiḥ/
nṛtyadbhiścāpi gāyadbhiḥ gāṇikyena ca nṛtyatā

vedāntibhiśca yatibhiḥ yogibhirbhagavan‌mayaiḥ/
bruvadbhirbhagavacchāstraṃ māhātmyaṃ ca punaḥ punaḥ

nānāvādyarataiḥ puṃbhi strībhiścākṣimanoharaiḥ/
sarvālaṅkārayuktābhirgamayedvīthikāṃ harim

chatraṃ ca vālavyajanaṃ tālavṛntaṃ ca śobhanam/
patākādīpikāsstaṃbhāḥ pradīpāśca viśeṣataḥ

gandhod‌gārīṇi dhūpāni toraṇaṃ ca gavākṣikam/
patākāhastinaścāśvā vādyāni vividhāni ca

anyaiśca maṅgalaiḥ sākaṃ parikramya pradakṣiṇam /
[vīthiparikramaṇānantaraṃ mandire bhagavata ārādhanam]
mandirābhyantare yānādavaropyāsane śubhe

niveśya prāṅmukhaṃ devamupacāraiḥ pṛthagvidhaiḥ/
upacarya tataḥ snāpya nivedya ca mahāhaviḥ

nīrājya parameśānaṃ ninayenmaṅgalāvanim/
āropya śayane devam arcayitvā yathocitam

śayyopacāramakhilam nṛttagītādibhiḥ saha/
śriyā dharaṇyā dvābhyāṃ vā svāpayetpuruṣottamam

[bhagavataḥ dainandinotsavakramaḥ]
tataḥ prabhāte taṃ devam utthāpya śayanādguruḥ/
arcayitvā yathāśāstraṃ kumbhādīn yāgamandire

balibimbaṃ samabhyarcya hutvā vahnau yathāpurā/
baliṃ ca pūrvavaddatvā yātrāṃ kuryāt yathā niśi

sāyaṃ prātaḥ pratidinaṃ pūjanaṃ havanaṃ baliḥ/
yātrā ca vidhivatkāryā snapanaṃ ca yathākramam

divase divase kuryādutsavaṃ śārṅgadhanvanaḥ/
devībhyāṃ vā śriyā vāpi vinā vā kevalaṃ hareḥ

(ślokādanantaraṃ A. koṣe `sarvālaṅkārayuktābhiḥ gamayet vīthikāṃ harim' ityekā paṃktiḥ adhikā/)
[bhagavataḥ maṅgalotsavakramaḥ]
evaṃ mahotsave viṣṇorvardhamāne mahāmune/
devībhyāṃ saha vā lakṣmyā kārayenmaṅgalotsavam

pūjādibalidānāntamanuṣṭhāya yathāvidhi/
alaṅkṛtya ca devībhyāṃ yānamāropya maṇḍapam

anyaṃ nītvāvaropyātha hemarsihāsane śubhe/
niveśya prāṅmukhaṃ devaṃ snāpayenmaṅgalodakaiḥ

dhānyapaṭhisya purataḥ musalaṃ cāpyulūkhalam/
śuddhodakena saṃkṣālya mūlamantraṃ samuccaran

sthāpayitvā navairvastraiḥ pariveṣṭya ca pallavaiḥ/
kusumaiścandanairdravyeḥ alaṅkṛtya manoharam

haridrāṃ tatra nikṣipya śriyaṃ trailokyamātaram/
dhyāyannabhyarcayet gandhapuṣpadhūpādibhiḥ kramāt

tato maṅgalavādinyo devadāsyaḥ svalaṅkṛtāḥ/
āvahanyurniśāṃ sarvāṃ yathāsūkṣmaṃ yathāvidham

sauvarṇādimayaṃ kuṃbhaṃ sūtravastrādiveṣṭitam/
dhānyarāśau samāveśya niśācūrṇena pūrayet

sauvarṇalakṣmīpratimāṃ ratnāni ca niveśayet/
kūrcaṃ ca pallavaṃ cāpi śarāveṇa pidhāpayet

tatra śriyaṃ samāvāhya sāṅgaṃ pūjāṃ samācaret/
mūlamantreṇa vidhivattaiścūrṇairabhiṣecayet

śrīsūktavidyayābhyarcya yathāvidhi yathāpuram/
mahāhavirnivedyānte deśikendraśca ṛtvijaḥ

pradakṣiṇīkṛtya hariṃ vikiret kusumāñjalim/
stotrayedvividhaiḥ stotraiḥ manaḥprahlādanairapi

[maṅgalotsavakrame jaladroṇyāṃ bhagavataḥ snapanaprakāraḥ]
kasmiṃścit divase paścāt kārite maṅgalotsave/
snāpayetsaha devībhyāṃ jaladroṇyāṃ jagad‌gurum

aparāhṇe tu samprāpte śibikāyāṃ jagadgurum/
śrībhūmibhyāṃ samāropya nadītīraṃ nayedguruḥ

maṇḍape vā prapāyāṃ vā sarvālaṅkārasaṃyute/
bherīmṛdaṅgādiravaiḥ pūrite ca digantare

ṛgyajussāmavedānāṃ ghoṣeṇa parimaṇḍite/
nṛtyantīnāṃ tu dāsīnāṃ gītisvananinādite

śāstraśravaṇasaktānāṃ parasparajigīṣuṇām/
anyonyākrośavinyastapāruṣyaninadānvite

dṛśyaiśca dīpikāstambhairdarpaṇaiśca virājite/
kadalīkramukastambhaiḥ saphalaiḥ parimaṇḍite

lambamānaiḥ puṣpasaraiḥ muktādāmabhiranvite/
atisvacchena vastreṇa savitāne manohare

tatra madhye dhānyapīṭhaṃ parikalpya manoharam/
sauvarṇīṃ vā rājatīṃ vā jaladroṇīṃ niveśayet

kuṅkumakṣodakarpūrakastūrīreṇumiśritaiḥ/
candanakṣodabharitairambubhiḥ paripūrayet

puṇyāhavācanaṃ kṛtvā brāhmaṇairvedapāragaiḥ/
prokṣayettāṃ jaladroṇīmādhārādi vicintayet

gaṅgādyāssaritastatra mantrairāvāhayejjale/
pūjayecca nivedyāntaṃ tāssarvāstīrthadevatāḥ

`aghamarṣaṇasūktaṃ' tat japeyuḥ sāmavāruṇam/
atthāpya devaṃ devībhyāṃ jaladroṇyāṃ niveśayet

tatra devaṃ samabhyarcya sauvarṇānyakṣatānyapi/
parito vikireddikṣu cāstramantrābhimantritān

tata utthāpya deveśaṃ devībhyāṃ siṃhaviṣṭare/
vinyasyābhyarcya vidhivannivedya ca mahāhaviḥ

yānamāropya vidhivat prāpayenmaṅgalāvanim/
[bhagavataḥ mṛgayotsavavidhiḥ]
anyasmin divase kuryānmṛgayāṃ śārṅgadhanvanaḥ

rātrau praśastā devasya mṛgayā bhunipuṅgava/
balyantamakhilaṃ kṛtvā turage vāraṇe'pi vā

āropya devaṃ bhūṣādyairalaṅkṛtya manoharam/
śārṅgaṃ ca sāyakaṃ tūṇīṃ yathāsthānaṃ niveśayet

uṣṇīṣaṃ kavacaṃ cāpi kalpayetkanakāmbaram/
kamanīyatamaṃ sarvaṃ vāhanaṃ ca paricchadam

sāyudhaiḥ parivāraiśca maṅgalairakhilaiḥ saha/
araṇyabhāgamakhilaṃ nītvā tatra prapābhuvi

abhyarcayedyathāyogaṃ naivedyāntaṃ madhudviṣam/
tataḥ pradakṣiṇīkṛtya yathāpūrvaṃ niveśayet

[tīrthayātrārtham anujñāprārthanaṃ pratisarabandhanaṃ ca]
ardharātre tu samprāpte gatvā garbhagṛhaṃ guruḥ/
praṇamya yajamānena prārthayetpuruṣottamam

tīrthayātrā tvayā kāryā śvaḥ prabhāte surottama/
tatra pratisarāraṃbhaṃ tvamanujñātumarhasi

prārthyaivaṃ tīrthabimbasya badhnīyātkautukaṃ kare/
śāyayitvārcayitvā ca prātarutthāpya taṃ punaḥ

abhyarcya vidhivatsarvaṃ karma balyantamācaret/
[tīrthayātrākrame bhagavataḥ abhiṣekakramaḥ]
tīrthabimbaṃ samādāya niveśya mukhamaṇḍape

sthāpayitvāgratastasya dhānyapīṭhaṃ prakalpayet/
sthāpitān yāgaśālāyāṃ kuṃbhānādāya deśikaḥ

pariṣicya ca vardhanyā taiḥ kuṃbhairabhiṣecayet/
prokṣaṇaṃ mūlamantreṇa nṛsūktenābhiṣecanam

ekabere mūlaberaṃ taiḥ kumbhairabhiṣecayet/
pūrvādimadhyakumbhāntamabhiṣekakramaḥ smṛtaḥ

vastrādidīpaparyantam abhyarcya ca nivedya ca/
[tīrthaṃ prati bhagavataḥ ānayanam tatra snapanakramaśca]
sarvamaṅgalasaṃyuktam āropya makhakautukam

hastyādi vā rathaṃ yānaṃ tīrthabimbapurassaram/
nadītīraṃ samudraṃ vā taṭākaṃ vāthavā saraḥ

gamayitvotsavāṅgena kalpite tatra maṇḍape/
avaropyāsane yānānniviṣṭaṃ tīrthakautukam

snāpayennavabhiḥ kuṃbhairarcitaiśca yathāvidhi/
tīrtheṣu saridādīnāṃ gaṅgādyāvāhanaṃ caret

[tīrthayātrākrame tīrthabimbādyalābhe vikalpāḥ]
tīrthabimbamalābhe tu cakraṃ vā trirnimajjayet/
cakreṇa tīrthe kartavye sati nadyādi vāribhiḥ

kūrcāgrapatitairdhīmān prokṣya kalyāṇakautukam/
saritsu cakramādāyā cakramantreṇa majjayet

alābhe cāpi cakrasya kūrcenaiva samācaret/
[tīrthasnānaphalakīrtanam]
snānti ye devadevena te narā muktakalmaṣāḥ

yānti dhruvaṃ suduṣprāpaṃ śāśvataṃ kamalāpateḥ/
[tīrthasnapanānantaraṃ bhagavataḥ arcanamānayanañca]
tato maṇḍapamānīya samabhyarcya yathāvidhi

prādakṣiṇyena gamanaṃ prāpaṇaṃ maṅgalāvaneḥ/
[utsavakrame brāhmaṇabhojanavidhānam]
sahasraṃ vā śataṃ vāpi lakṣaṃ vāpi yathāvasu

bhojanaṃ brāhmaṇānāṃ tu pratyahaṃ ca mahotsave/
[utsavāntasnapanaṃ havirnivedanaṃ tattaddhomaprakāraḥ agnivisarjanaṃ ca]
tadrātrau snapanaṃ kuryāt utsavāntocitaṃ kramāt

havirnivedanāntaṃ tu samārādhya yathāvidhi/
yāgamaṇḍapamāsādya homaṃ kṛtvā yathāpuram

śāntihomaṃ tataḥ kuryāt saṃpātājyaṃ na cāharet/
prāyaścittāya juhuyāt pañcopaniṣadā śatam

agnīn visarjayet paścāt pālikātoraṇāsthitān/
[garuḍārādhanam tadudvāsanam dhvajāvarohaṇañca]
devamāropya yānādau dhvajastaṃbhaṃ samānayet

vainateyaṃ samabhyarcya nivedya ca mahāhaviḥ/
saṃhārakramamāśritya paṭāttārkṣyaṃ tamudvaset

sannidhāne tu bimbasya dhvajaṃ tamavarohayet/
[utsavaprasaṃge āvāhitānāṃ devānāmudvāsanavidhiḥ]
āvāhitāṃstato devān sthāne sthāne sthitānapi

kevalenaiva tūryeṇa baliṃ dattvā gurūttamaḥ/
udvāsya nāmabhiḥ svaiḥ svaiḥ mūkaiḥ parikaraiḥ saha

[ālaye tattatsthāne utsavādibimbānāṃ niveśaḥ ārādhakasya gamanaṃ ca]
praviśya dhāma devasya garbhagehe niveśayet/
utsavasnānabalyarcātīrthabimbāni pūrvavat

aṣṭākṣaraṃ tato mantraṃ sahasraṃ vā śatāvaram/
japtvā praṇamya deveśamanujñāpya samāvrajet

// iti śrī bhārgavatantre dvādaśo'dhyāyaḥ //