Bhargava Tantra · Chapter 11

// ekādaśo'dhyāyaḥ //
[mahotsavāṅgadhvajārohaṇādinirūpaṇādhyāyaḥ]
[mahotsavavidhinirūpaṇārthaṃ prārthanā]
agasatyaḥ
kathaṃ mahotsavavidhaḥ kartavyaḥ paramātmanaḥ/
kṛpayā bhārgava śrīman brūhi me bhaktavatsala

(ślokataḥ pūrvam M. kośe "atha mahotsavavidhirucyate" ityadhikaḥ pāṭhaḥ/)
[mahotsavamāhātmyam mahotsavadināvadhiśca]
śrīrāmaḥ
śṛṇu tvaṃ muniśārdūla devadevamahotsavam/
yenārādhya hariṃ śakro vimukto vṛtrahatyayā

tamadya tava vakṣyāmi śṛṇuṣva vinayānvitaḥ/
dvādaśāhena kurvīta kalyāṇaṃ śārṅgadhanvanaḥ

yadvā navabhirahobhiḥ saptabhirvātha pañcabhiḥ/
[dhvajapaṭe karuḍasya svarūpaṃ tadakṣimocanaṃ ca]
ārambhadivasāt pūrvaṃ vainateyadhvajotsavaḥ

tadarthamaṅkuranyāsaṃ kṛtvā śāstravidhānataḥ/
paṭe tu vilikhed‌devaṃ vainateyaṃ khagādhipam

navatālapramāṇaṃ taṃ taptakāñcanasannibham/
dvibhujaṃ kañtukayutaṃ puṣpāñcalidharaṃ vibhum

kirīṭakuṇḍaladharaṃ nāgābharaṇabhūṣitam/
pṛṣṭhavinyastasavyāṅghrimitareṇāpi kuñcitam

pakṣavikṣepasahitaṃ gaganotpatanonmukham/
nīlanāsāñcalaṃ devaṃ nayanonmīlanaṃ caret

[garuḍasya kumbhādīnāṃ ca adhivāsanam]
śilpinānyāḥ kriyāḥ sarvāḥ pratiṣṭhoktavidhānataḥ/
chāyādhivāsanaṃ kṛtvā snāpayitvā ca darpaṇe

vainateyasya gāyatryā pūjayitvā yathāvidhi/
śālipīṭhe suvistīrṇe sāyayitvā tato guruḥ

taddakṣiṇe dhānyarāśau sopakuṃbhaṃ salakṣaṇam/
vardhanyā stāpayetkumbhaṃ sarvālaṅkārasaṃyutam

vainateyaṃ mahākumbhe vardhanyo tu sudarśanam/
aṣṭaṣvanyeṣu cendrādyāḥ pūjanīyā yathāvidhi

[garuḍādhivāsanāṅgahomakramaḥ]
ekasminneva kurvīta prākkuṇḍe vā mahānase/
mūrtihomaṃ bṛhatsāmnā gāyatryā vā yathāruci

tattvasaṃhārajanane tattvahomādi pūrvavat/
[garuḍāvāhanārcanaprakāraḥ]
paṭaṃ vistārya tadanu mandirābhimukhaṃ guruḥ

pradarśya devadevāya tadanvāvāhanaṃ cerat/
bhagavan puṇḍarīkākṣa sarvśvarajaganmaya

tvayā yathā tu kathitaṃ tathā kartuṃ na śakyate/
asvāntryādasāmarthyāt śraddhādīnāmabhāvataḥ

tvadātmanādya sarveṣāṃ nyūnādhikyopaśāntaye/
samālokaya netrābhyāṃ sītalābhyāṃ paṭasthitam

sarvadoṣāpahāribhyāṃ vainateyaṃ prasādaya/
darśayitvaivamācāryo vyāhṛtyāvāhanaṃ caret

mahābala mahābāho vainateya vayodhipa/
sannidhatsva paṭe tubhyaṃ namaḥ praṇavamūrtaye

iti samprārthya sānnidhyaṃ gāyatryaiva tadīyayā/
pūjayitvārdhyapādyādyaiḥ nivedyānnaṃ caturvidham

kumbhāya ca yathāśāstraṃ japenmantraṃ ca gāruḍam/
vedaghoṣaistūryaghoṣairjāgareṇa nayenniśām

[utsavāṅgadhvajārohaṇavidhiḥ]
tataḥ prabhāte vimale samārādhya khageśvaram/
alaṅkṛtya yathāyogaṃ yānamāropya maṅgalaiḥ

prādakṣiṇyena ninayet dvajayaṣṭeḥ puro bhuvi/
prāsādābhimukhaṃ devaṃ vistārya paṭasaṃsthitam

puṇyāhaṃ vācayet paścāt prokṣayetkumbhavāribhiḥ/
`gāruḍenai'va mantreṇa vardhanyā pariṣecayet

svaiḥ svaiḥ mantraistathendrādikumbhaprokṣaṇamācaret/
vinyasya `gāruḍaṃ'mantraṃ sānnidhyaprārthanaṃ caret

utsavāntaṃ paramadhāmnaḥ sannidhatsva paṭodare/
bhagavan pakṣibhūpāla pālayāsmān vilokaya

iti prārthya khageśānaṃ muhūrte sarvamaṅgale/
manaḥprahlādane lagne dhvajārohaṇamācaret

utsavapratimāṃ tatra yānamāropya cānayet/
aṅguṣṭhaghanamātreṇa pāśena trivṛtena ca

tāntavena ca badhnīyānmantreṇa `puruṣā'tmanā/
`suparṇo'sī'ti mantreṇa dhvajārohaṇamucyate

āropya caivaṃ vihagaṃ pūjayitvā yathāvidhi/
pāyasānnaṃ tathā'pūpaṃ phalāni vividhāni ca

nivedya vainateyāyā indradīn parito'rcayet/
pūjayitvā yathānyāyaṃ baliṃ dadyādvicakṣaṇaḥ

makhakautukamāsādya praṇamyābhyarcya deśikaḥ/
anujñāṃ ca samāsādya puṣpāṇyādāya śārṅgiṇaḥ

udagravadano bhūtvā samālokya khageśvaram/
asmāddinātsamārabhya yāvattīrthadināntikam

sannidhiṃ kuru pakṣīndra rājño janapadasya ca/
grāmasya yajamānasya vaiṣṇavānāṃ mahātmanām

tuṣṭaye puṣṭaye caiva sarvaśatrujayāya ca/
apamṛtyuharārthāya vainateya prasīda om

iti puṣpāñjiṃ samyak vikiredvihagopari/
[dhvajārohaṇāṅgabrāhmaṇasammānanam]
dadyādgobhūhiraṇyādi brāhmaṇebhyastadā prabhuḥ

[utsavapratimāpūjanakramaḥ]
utsavapratimāṃ paścānninayenmaṇḍapāntaram/
pūjayecca yathānyāyaṃ prāpayed‌garbhamandiram

[bherītāḍanadevātāhvānaprakāraḥ]
āhvānārthamaśeṣāṇāṃ lokānāṃ deśikottamaḥ/
devānāmapi sarveṣāṃ bherītāḍanamācaret

dhvajapīṭhasamīporvīṃ gomayena viśodhayet/
bhūṣabhedraṅgaballībhiḥ pīṭhaṃ tatra niveśayet

balibimbaṃ samādāya tatra nyasya samarcayet/
puratastasya bimbasya dhānyapīṭhaṃ prakalpayet

tatra bherīṃ ca koṇaṃ ca vinyasya tadanantaram/
snātaṃ śuddhāmbaradharaṃ sordhvapuṇḍraṃ svalaṅkṛtam

yajñopavītinaṃ pārśve dakṣiṇe gaṇikājanam/
sthāpayedindradigbhāge nṛttavidyāviśāradam

gītavāditrakuśalān uttare sthāpayed‌budhaḥ/
puṇyāhavāribhirbherīṃ tathā pāraśavādikān

prokṣayitvā mahābherīṃ pūjayedbhāratīmayīm/
navena vāsasā bherīṃ veṣṭayecchabdarūpiṇīm

puṣpādibhiralaṅkuryāt gandhaiśca vividhairapi/
bherīmadhye'rcayeddevīṃ triguṇāṃ bhāratīmayīm

dakṣiṇottarayorviṣṇuṃ lakṣmīṃ ca paripūjayet/
koṇe samarcayeddevaṃ vāyuṃ kalaśasaṃbhava

tato mūrtitrayaṃ dhyāyan śabdatanmātravidyayā/
koṇena tāḍayedbherīṃ devatānāma kīrtayan

vaikuṇṭhavāsino ye ca satyalokanivāsinaḥ/
rudralokasthitā ye ca tathā svarlokavāsinaḥ

pātālādiṣu lokeṣu ye vasanti mahītale/
anye'pi ye ca lokeṣu sarvatrāhvānamācaret

ṛṣīṇāmagnikalpānāṃ devānāṃ ditijanmanām/
sarveṣāṃ ca samāhvānaṃ parivārapadānvitam

āyudhaiḥ saha devībhiḥ vāhanaiśca mahotsave/
āhvānaṃ kārayeddhīmān sevārthaṃ madhuvidviṣaḥ

[pratyāhvānakramaḥ]
pratyāhvānaṃ mahābheryāḥ tāḍanatrayamācaret/
teṣāṃ nṛttaṃ svaraṃ tālaṃ trayaṃ tatra prakāśayet

[utsavakrame devatāhvānāṅgabalinivedanam]
āhūya devatāḥ sarvāḥ balibimbapurassaram/
grāmamadhyaṃ samāsādya brahmāṇaṃ sanniveśayet

grāmasya parito vīthyāṃ sthaṇḍileṣu yathākramam/
indrādilokapālāṃstān balyarthaṃ sanniveśayet

evamāhūya medhāvī devadevasya śārṅgiṇaḥ/
utsavāya yatetātha deśakālānusārataḥ