Bhāratamañjarī 6-19 · Chapter 6

Bhīṣmaparvan
nārāyaṇaṃ namaskṛtya naraṃ caiva narottamam /
devīṃ sarasvatīṃ vyāsaṃ tato jayamudīrayet

āsūryakiraṇākrāntājjagato janagocarāt /
puṇyadhāmni kurukṣetre samāyāteṣu rājasu

ekībhūteṣu sainyeṣu kurupāṇḍavasaṃgare /
vṛddhabālāvaśeṣāsu dikṣu yātāsu śūnyatām

dāruṇeṣu nimitteṣu prādurbhūteṣu sarvataḥ /
mitho dṛṣṭipathaṃ yāte patākābhirbaladvaye

sotsāhaṃ dadhmatuḥ śaṅkhaṃ hṛṣīkeśadhanaṃjayau /
yayorgambhīraghoṣeṇa bhuvanāni cakampire

viṣamastho na hantavyo na ca senāvinirgataḥ /
na nivṛtte raṇe ceti maryādāṃ cakrire nṛpāḥ

atrāntare samabhyetya pārāśaryo munīśvaraḥ /
viṣaṇṇaṃ mandiragataṃ dhṛtarāṣṭramabhāṣata

vīrāṇāṃ bhūmipālānāmaśeṣe 'sminsamāgame /
kṣattrasya saṃkṣayo rājanviṣamaḥ samupasthitaḥ

divyaṃ gṛhāma nayanaṃ svayaṃ yuddhaṃ vilokaya /
ityukte muninā rājā jagādākulitāśayaḥ

bhagavānbandhunidhanaṃ nāhaṃ draṣṭuṃ samutsahe /
bhāvyasyāvaśyabhāvitvānna ca vārayituṃ kṣamaḥ

ityuktavati bhūpāle saṃjayaṃ varado muniḥ /
vidhāya divyanayanaṃ punaḥ kṣitipamabhyadhāt

ayaṃ te nikhilaṃ yuddhaṃ kathayiṣyati saṃjayaḥ /
nāsya kiṃcidavijñātaṃ divyadṛṣṭerbhaviṣyati

kṛtānto jṛmbhate rājñāṃ dhṛtarāṣṭra tavānayāt /
dṛśyante durnimittāni kṣayakarṇejapāni yat

saureṇa pīḍitā gāḍhaṃ rohiṇī jvalitā diśaḥ /
viparītā prasūtiśca kabandhenāvṛto raviḥ

kravyādairāvṛtaṃ vyoma meghā varṣanti śoṇitam /
kimanyadrājamahiṣī hā mahī na bhaviṣyati

pradakṣiṇaśikho vahniḥ prasādo manasastathā /
lakṣavyaktaṃ jayasyaitaddharmo yatrāsti tatra saḥ

śatānyekena jīyante naiko jeyaḥ śatairapi /
taralā hyasidhāreyaṃ niścayo nātra gaṇyate

ityuktvāntarhite kṣipraṃ munīndre saṃjayaṃ nṛpaḥ /
papraccha dvīpasaṃsthānaṃ sa ca pṛṣṭho 'bhyabhāṣata

rājanviśāle śītāṃśormaṇḍale darpaṇākṛtau /
sphāraṃ sudarśanaṃ dvīpaṃ nikhilaṃ pratibimbitam

ekataḥ pippalācchāyamanyataḥ śaśakākṛti /
dvīpe 'sminmaṇlākāre lavaṇāmbudhiveṣṭite /
karṇikevāmbuje prāṃśurmadhye kanakaparvataḥ

śayānā bhṛdharāścānye pārśvayostasya bhūbhṛtaḥ /
sthitā himālayamukhāḥ spṛśantaḥ pūrvapaścimam

himavānhemakūṭaśca niṣadaśceti dakṣiṇe /
uttare śṛṅgavānnīlaḥ śvetaśceti mahābalāḥ

eṣāṃ ratnavicatrāṇāmantare varṣabhūmayaḥ /
karmabhūrbhārataṃ varṣamanyāśca phalabhūmayaḥ

harivarṣamukheṣveva prajāsargaḥ smaropamaḥ /
sthānaṃ sukṛtināṃ yatra vikhyātā gaṇḍikā iti

jambūkhaṇḍaṃ tathā meroradho yatphalavisrutā /
jātā jambūnadī śubhrā jāmbunadavidhāyinī

uttarāḥ kuravaḥ pītvā tāmeva gatamṛtyavaḥ /
divaspṛśastarestasya nāmnedaṃ dvīpamucyate

ityuktvā saṃjayo gatvā kurukṣetre rāṇāṅgaṇe /
sametya dhṛtarāṣṭrāya śaśaṃya svabhaṭakṣayam

***** jambūkhaṇḍanirmāṇam || 1 || *****
śṛṇu rājanhatānantasāmantaḥ śantanoḥ sutaḥ /
vidadhe pāṇḍuputrāṇāṃ yathā vijayasaṃśayam

vajrasūcīmukhākhyābhyāṃ pyūhābhyāṃ rājakuñjaraiḥ
mitho vyūḍheṣvanīkeṣu gāṅgeyenārjunena ca

tasminkṣattrakṣayakṣetre sarvakṣattrasamāgame /
duryodhane 'tisaṃrabdhe pṛthusainyābhimānini

gāṅgeyaśaṅkhanādena samudbhūte balārṇave /
śaṅkhaśabdena pārthānāṃ pāñcajanyānuyāyinā

pūrite bhuvanābhoge dikṣu visphūrjitāsviva /
sarvasenāśrayaḥ śrīmānvijayo 'cyutasārathiḥ

dadarśa kurusenāsu gurusaṃbandhibāndhavān /
nijapratāpadahane sa teṣāṃ śalabhāyitam /
matvā jagāda govindaṃ viṣaṇṇaḥ karuṇānidhiḥ

aho vata vimūḍhānāṃ rājyaleśe sukhāya naḥ /
kṛṣṇa bandhuvadhe 'pyasminsasaṃrambho 'yamudyamaḥ

avatīrya sadācārastutikramyakulasthitim /
kathaṃ guruvadhaprāpyāṃ bhajedasmadvidhaṛ śriyam

ityuktvā sāsrunayano bībhatsuḥ kṛpayā rathe /
karādutsṛjya gāṇḍīvaṃ niṣasāda viṣādavān

***** śrīmadbhagavadgītāsu prathamo 'dhyāyaḥ || 2 || *****
taṃ dṛṣṭvā śokavivaśaṃ jagāda madhusūdanaḥ /
akāṇḍe dhairyasārasya keyaṃ kātaratā tava

tarasvī kṣatriyo mānī prāṇairapi yaśaḥkrayī /
nijāṃ kulasthitiṃ pārtha na dharmyāṃ hātumarhasi

saṃyuktaṃ vā viyuktaṃ vā nityaṃ dehena dehinam /
viśvamāyāprapañce 'smanko 'nuśocati tattvadhīḥ

sukhādyavasthā dehasya kāle kāle yathāvidhāḥ /
dehino 'sya tathā dehāḥ sataḥ sattāvivarjitāḥ

viṣayendriyasaṃyogānkṣayino harṣaśokadān /
sahate yo viluptātmā nirvāṇaṃ tasya śāśvatam

ajasya purāṇasya dehino 'syāvināśinaḥ /
jīrṇaparṇaparāvṛttitulyeyaṃ dehakalpanā

ādimadhyāvasāneṣu vyaktāvyaktasvarūpiṇaḥ /
sata evāsya satataṃ na virāmaḥ śarīriṇaḥ

ayaśasyamatastyaktvā saṃkocaṃ vipulāśayaḥ /
jayājayau samaṃ matvā viśa svargonmukho raṇam

āsthāya yaugikīṃ buddhiṃ karmabandhavivarjitaḥ /
śuṣkavedakriyāhīnaṃ guṇātītaṃ padaṃ bhuja

sarvavedeṣu viduṣāmetadeva prayojanam /
jalāśayeṣu pūrṇeṣu yathā salilahāriṇām

niḥsaṅgaḥ phalasaṃnyāsī kuru karma sadoditaḥ /
parameśvaramevāhi(?)vāṇijyaṃ hi phalārthinām

yadā te vītamohasya buddhiryāsyati nirvṛtim /
kṛtī bhaviṣyasi tadā śruteṣvartheṣvanādaraḥ

iti bruvāṇaḥ pārthena sthitaprajñasya lakṣaṇam /
pṛṣṭaḥ samādhisaktasya bhagavānityabhāṣata

īśvarādaparo nāhamiti svānandanirbharaḥ /
nirastākhilasaṃkalpaḥ sthitaprajño 'bhidhīyate

āste kūrma ivāṅgāni kāmānsaṃvṛtyayaḥ śrayam /
viṣayādhyānavirahātsthitadhīrna sa naśyati

kaṣṭaistapobhirviṣayāḥ śuṣyantyeva rasaṃ vinā /
anādaraviraktānāṃ sadāpyadhyātmadarśinām

nidrārlubhūtakāleṣu prabuddhistimireṣu yaḥ /
sa mahābdhirivākṣobhyaḥ sthitiṃ brāhmīṃ prapadyate

***** śrīgītāsu dvitīyo 'dhyāyaḥ || 3 || *****
śrutvaitadarjunaḥ kṛṣṇamuvācākulitāśayaḥ /
kathamevaṃ vadanghore samare 'sminyunakṣi mām

karmaṇaḥ śreyasī buddhirityuktvāpi svayaṃ vibho /
karma durmatiyogyaṃ māṃ praśaṃsasi vimohayan

śreyo vadetyuktavati śvetāśve keśavo 'bravīt /
niṣṭhā prajñānakarmabhyāṃ mayoktā sāṃkhyayogayoḥ

anārambhānna ca tyāgātkarmaṇo mucyate janaḥ /
śrotrādayo balādasya dhāvantyeva svakarmasu

smaranti manasā sarvaṃ ruddhakarmendriyā api /
mithyācārānatvasaktāḥ(?)karmiṇo niyatāntarāḥ

śreyo hyakarmaṇaḥ karma na yajñaḥ karmaṇā vinā /
yajñaśeṣāśinaḥ puṇyadrumāḥ kevalabhoginaḥ

karmasthito 'pi niḥsaṃjño(saṅgo) yadā prāpnoti mānavaḥ /
ātmārāmadaśāstuṣṭhastadā kāryānnivartate

karmaṇaiva gatāḥ siddhiṃ janakapramukhāḥ purā /
tanmā kāryānnivartasva lokastvāmanuvartatām

mamāpi kṛtakṛtyasya karmedaṃ sthitirakṣiṇaḥ /
vinasyatyanyathā loko matpramāṇaviśṛṅkhalaḥ

pātraṃ sarvajñayogyeṣu nādareṣu pṛthagjanaḥ /
tasmānnotsāhayedetānpaṅgūnvegagatāniva

yudhyasva sarvakarmāṇi mayi saṃnyasya nirvṛtaḥ /
taranti hi tamo ghoraṃ nityaṃ manmatavartinaḥ

prakṛterucitaṃ sarvaṃ svadharmanirataḥ kuru /
rāgadveṣau parityajya priyāpriyasamudbhavau

śrutvaitadarjuno 'vādītpreritaḥ kena pātakam /
caratyanīśvaraḥ prāṇī balādiva vaśīkṛtaḥ

iti pṛṣṭo hṛṣīkeśo jagāda jagatāṃ patiḥ /
rajoguṇasamutthena harṣaśokādidāyinā

lokasaṃhāraśīlena kāmena krodhabandhunā /
ahaṃkāreṇa balinā ghoreṇānena vairiṇā

śevālenaiva salilaṃ rajasevāmalaṃ nabhaḥ /
āvṛto malinonātmā meghenaivodito raviḥ

manobuddhisamāyuktaṃ sthānamindriyapañjaram /
yasya taṃ duḥsahaṃ śatruṃ kāmarūpa vināśaya

***** śrīgītāsu tṛtīyo 'dhyāyaḥ || 4 || *****
sūryeṇāptaḥ purā matto yogo 'yaṃ manunā tataḥ /
ya eva kālenotsannastubhyamadya mayoditaḥ

anekajanmasākṣī tvaṃ bhaktaḥ sahacaro 'pi me /
na tatsmṛtipathaṃ yātaṃ kiṃtu te prāktanaṃ vapuḥ

ahaṃ tu nityadharamasya sthitaye guptaye satām /
yuge yuge bhavāmyeṣa vināśāya dṛrātmanām

akṛtaṃ dharmakartāraṃ karmaitannāvṛṇoti mām /
tvamapyasakto niṣkāmaḥ kuru karma kulocitam

durjñeyaḥ pravibhāgastu karmākarmavikarmaṇām /
svocitaṃ phalahīnaṃ ca viruddhaṃ ceti bhedataḥ

karmaṇaḥ phalasaṃnyāsādyo 'nupaśyatyakarmatām /
jānātyakarmaṇaḥ pāpātkarma yaśca sa buddhimān

jñānāgninā dagdhakarmā nityānando nirāśrayaḥ /
nirāśīrnirahaṃkāro yajvā brahmaṇi līyate

brahmārpaṇena brahmagnau hutvā brahmamayaṃ haviḥ /
prāṇayajñarato yāti brahma brahmasamādhinā

saṃyamāgnāvindriyāṇi viṣayānindriyānale /
tatkarmāṇyātmayogāgnau hutvā yānti parāṃ gatim

ye 'pi dravyatapoyogasvādhyāyajñānayājinaḥ /
prāṇāpānādiha viṣo dhṛtvā nāḍīṣu dhāraṇam

samarpayanti nikhilaṃ jñānaṃ vigatakalmaṣāḥ /
te prayānti paraṃ dhāma yajñaśiṣṭāmṛtāśinaḥ

tadvidhāḥ praṇipātena sevitā jñāninastvayā /
ayatnāttvāṃ vidhāsyanti svātmanyakhiladarśinam

jñānāgninā dagdhapāpaḥ pavitreṇa bhaviṣyasi /
kālena śraddadhānānāṃ svayaṃ jñānaṃ prasīdati

naśyanti saṃśayajuṣo mūḍhā na tvastasaṃśayāḥ /
jñāninaḥ saṃśayaṃ tvasmātsthitvottiṣṭha vibhūtaye

***** śrīgītāsu caturtho 'dhyāyaḥ || 5 || *****
niśamya tatpunaḥ pārthaḥ papraccha madhusūdanam /
saṃnyāsakarmayogābhyāṃ śreyo brūhi janārdana

iti pṛṣṭo 'vadacchaurirubhāvetau vimuktaye /
karmayogastu saṃnyāsādviśiṣṭa iti me matiḥ

śṛṇvanto 'pi vadanto 'pi spṛśanto 'pi svakarmaṇi /
saktā api na sajjanti paṅke ravikarā iva

tadeva vihitaṃ kiṃcitpuṃsāṃ sukṛtaduṣkṛtam /
ajñānapihite jñāne kiṃ tveṣā karmavāsanā

jñānenotsāritā jñānāḥ parāṃ niṣṭhāmupāgatāḥ /
brāhmaṇe vā śvapāke vā vibudhāḥ samadṛṣṭayaḥ

bāhye sukhe viraktānāṃ duḥkhajanmani naśvare /
antaḥsukhārāmatayā paraṃ jyotiḥ prasīdati

bahiḥ sparśānsamutsṛjya bhrūmadhyanihitekṣaṇaḥ /
nāsāntare samau dhṛtvā prāṇāpānau vimuktaye

kāmarāgamadadveṣabhayakrodhavivarjitaḥ /
ahantā jñānatamasāṃ śāntiṃ vindatyamatsaraḥ

***** śrīgītāsu pañcamo 'dhyāyaḥ || 6 || *****
kriyāvānaphalākāṅkṣī nijaṃ karma karoti yaḥ /
ārurukṣudaśātīto yogārūḍho vimatsaraḥ

kūṭastho jñānatṛptaśca paśyatyātmānamātmanā /
samāsanaḥ samākāro nistaraṅga ivodadhiḥ

ghrāṇāgradarśī śāntātmā māmupaiti samādhinā /
yuktāhārādiceṣṭasya nityaṃ niṣkampacetasaḥ

ātmalābho bhavatyeva tyaktakāmasya yoginaḥ /
manaḥ saṃyamya paśyanti sravatyetadyato yataḥ

ātmānaṃ māṃ ca sarvatra mamātmani tathākhilam /
manasaścañcalasyāsya vairāgyeṇaiva saṃyamaḥ

tathābhyāsena balinā vātasyeva pramāthinaḥ /
etadākarṇya kaunteyaḥ punaḥ papraccha keśavam

lolatvānmanaso deva yogādbhraṣṭasya kā gatiḥ /
arjuneneti bhagavānpunaḥ pṛṣṭo 'bhyabhāṣata

yogabhraṣṭo 'pi puruṣaḥ śubhakṛttu bhaviṣyati /
ciraṃ bhuktvā sukhaṃ divyaṃ sa kalyāṇapuraḥ saraḥ

bhogināṃ yogināṃ vāpi saṃbhūto mahatāṃ kule /
pūrvābhyastaṃ punardhīmāñjanmabhiḥ pratipadyate /
tapo jñānādhikaṃ yogaṃ tasmādyogī bhavārjuna

***** śrīgītāsu ṣaṣṭho 'dhyāyaḥ || 7 || *****
mayi nyastamanā nityaṃ bhaktyā māṃ vetti mānava /
aṣṭamūrtirahaṃ sarvaṃ jīvabhūtaścarācare

utpattisthitisaṃhārakāraṇaṃ māṃ vidurbudhāḥ /
sarve matprāṇitā bhāvā mayi sarvaṃ pratiṣṭhitam

devīṃ māyāṃ dadhānaṃ māṃ na jānāti vimohitaḥ /
ye tu jānanti māṃ māyāṃ bhavanti kṛtinaḥ sadā

arthī jijñāsurārto vā jñānī vā māṃ prapadyate /
priyaḥ priyasya satataṃ jñāninastvasmi gocare

ananyadevatābhaktāḥ śraddhāvanto visaṃśayāḥ /
vāsudevaḥ sarvamiti yajante māṃ mumukṣavaḥ

te brahmādhyātmakarmākhyaṃ sādhibhūtaṃ vidanti mām /
sādhidaivādhiyajñaṃ ca dehavyuparameṣvapi

***** śrīgītāsu saptame 'dhyāyaḥ || 8 || *****
acyutenetyabhihite śakrasūnurabhāṣata /
kimetadbrahma bhagavannadhiyajñaḥ kimucyate

iti pṛṣṭo hṛṣīkeśo babhāṣe śvetavāhanam /
anaśvaraṃ parabrahma bhāvo 'dhyātmā tathātmanaḥ

niḥsaṅgo bhavakṛtkarma naśvareṣvadhibhūtatā /
adhidaivo 'hamevātra hyadhiyajño 'pyahaṃ vibhuḥ

antakāle smaranto māṃ praviśantyeva bhāvitāḥ /
paryante bhāvatulyā hi nṛṇāṃ janmāntarasthitiḥ

kaviṃ purāṇaṃ śāstāramaṇīyāṃsamaṇorapi /
parastāttamaso nityaṃ ye smaranti raviprabham

bhrūmadhye vihitaprāṇā brahmarandhravibhedinaḥ /
omityekākṣaraṃ brahma japanto yānti te param

brahmādibhirbhūtasargaścakravatparivartate /
paraṃ māṃ pratipannāste na bhavanti bhave punaḥ

vairañce 'sminnahorātre bhavanti na bhavanti ca /
bhūtānyekastu bhagavānavyakto na vinaśyati /
tejomayamahaḥ śuklo mokṣāyaivottarāyaṇam

***** śrīgītāsvaṣṭamo 'dhyāyaḥ || 9 || *****
rājaguhyamidaṃ cānyatpavitraṃ śṛṇu phalguṇa /
aśraddadhāno nāpnoti māṃ saṃsāravaśīkṛtaḥ

sarvakartari bhūtāni mayi santi na teṣvaham /
lokāḥ sthitā na sthitāśca mayi vyomnīva vāyavaḥ

adhiṣṭhitaiṣā prakṛtirmayā sūte carācaram /
asaktaṃ māṃ na jānanti malināmoghadarśinaḥ

sarvaṃ sarvagataṃ yajñaṃ vedyaṃ bījaṃ bhavābhavam /
vidanti māṃ sukutinaḥ sarvakāraṇakāraṇam

trayīdharmajuṣaḥ svargabhogalābhakṣayākulāḥ /
na prāpnuvanti māṃ śuṣkakriyāpāśavaśīkṛtāḥ

madekaśaraṇā nityaṃ kṛtino 'nanyayājinaḥ /
apyanyayonisaṃbhūtāḥ svayamāyānti yatpadam

***** śrīgītāsu navamo 'dhyāyaḥ || 10 || *****
bhūyo 'pi me śṛṇu sakhe prītyā yatpratibodhyase /
na tattvenāmaragaṇā munayo vā vidanti mām

carācare 'sminpravaraṃ yadyatpaśyasi bhūtimat /
tadahaṃ sarvabhūtātmā na hi kiṃcinmayā vinā

ahaṃ viṣṇurahaṃ sūryaścandro 'haṃ maghavānaham /
śaṃkaro 'haṃ dhaneśaśca vahniḥ suragurustathā /
akṣaro 'hamahaṃ kālo jayo 'haṃ bhūtirapyaham

***** śrīgītāsu daśamo 'dhyāyaḥ || 11 || *****
śrutvaitadavadatpārtho jāne tvāṃ sarvamacyuta /
kiṃtu viśvamayaṃ rūpaṃ draṣṭumicchami te vibho

ityuktaḥ pāṇḍuputreṇa bhagavānkaiṭabhāntakaḥ /
viśvāviṣkārakalayā viśvarūpamadarśayat

tasyānantaśironetrasahasrabhujaśālinaḥ /
dehe jagannivāsasya līnaṃ viśvamadṛśyata

atisūryāgnimahasā tejasā pūritāmbaram /
dṛṣṭvā pulakitaḥ pārthastamuvāca kṛtāñjaliḥ

paśyāmyudagragīrvāṇagrāmavyāptoruvigraham /
tvāṃ yena pūritaṃ sarvamanavacchinnavarṣmaṇā

brahmarudramarudvahnimunīndrabhujagākulam /
draṣṭuṃ tadeva paryantarahitaṃ notsahe vapuḥ

bhīṣmadroṇamukhānvīrānpraviṣṭānvadanāni te /
daṃṣṭrotkaṭāni paśyāmi kālasyeva yugakṣaye

ko bhavānsarvasaṃhārāraudreṇa vapuṣāsūdanaḥ /
akāṇḍe dagdhumakhilānsvayaṃ lokānsamudyataḥ

ityuktavati kaunteye jagāda madhusūdanaḥ /
ahaṃ jagatkṣayotkṣopadīkṣitaḥ kṣitipāntakaḥ

kurusenāgragānvīrānpūrvaṃ vinihatānmayā /
hatvā yaśaḥśriyā jṛṣṭamavāpnuhi kulocitam

tacchrutvā kāliyārātervacaḥ pārthaḥ kṛtāñjaliḥ /
uvāca kampitamanāḥ praṇato gadgadasvanaḥ

kīrtyā jaganti hṛṣyanti stutayā siddhacāraṇaiḥ /
dīptyā dravanti rakṣāṃsi sthāne tava janārdana

naumi tvāṃ jagadāvāsaṃ viśvarūpamadhokṣajam /
anantaṃ śāśvataṃ dhāma sarvātmānaṃ punaḥ punaḥ

kṣamyatāṃ tatsuhṛditi svayaṃ yatpraṇatapriyaḥ /
ukto 'si kṛṣṇa govinda yādaveti purā mayā

ugraṃ tadevaṃ bhagavandṛṣṭvā rūpamahaṃ mahat /
cakrārūḍhamivāśeṣaṃ paśyāmi nikhilaṃ jagat

prasīda darśaya vibho vapuḥ saumyaṃ tadeva me /
śāntiṃ me yāti sahasā nānyatā vyathitaṃ manaḥ

iti prasāditaḥ kṛṣṇaḥ praṇatena kirīṭinā /
adarśayannijaṃ rūpaṃ tadevātha caturbhujam

devā api na paśyanti mamedaṃ sarvagaṃ vapuḥ /
ityuktvāśvāsayāmāsa kaunteyaṃ kamalādhavaḥ

***** śrīgītāsvekādaso 'dhyāyaḥ || 12 || *****
athārjuno 'vadatkṛṣṇaṃ ye bhaktāstvāmupāsate /
avyaktamakṣaraṃ ye ca teṣāṃ ke 'dhikayoginaḥ

pārtheneti hariḥ pṛṣṭo vihitānugraho 'vadat /
madbhaktāḥ śraddhayopetāḥ sarvathā yogino 'dhikāḥ

kleśenaiva tu matprāptiravyaktākṣarasevanāt /
sūkṣmasthūlagatirduḥkhaṃ tattvajñairapyavāpyate

madbhaktāstvacirādeva prāpnuvanti paraṃ padam /
atastvaṃ manmanā nityamananyanirato bhava

vaśe yadi na te cittamabhyāsena gṛhāṇa tat /
tatrāpyaśakto matkarmā satataṃ śreyase bhava

athavā phalasaṃnyāsaṃ karmaṇāṃ kuru matparaḥ /
jñānaṃ hi paramābhyāsājjñānāddhyānamihottamam

dhyānācca phalasaṃnyāsastataḥ śāntirviśiṣyate /
adveṣṭā karuṇāsindhuḥ sukhaduḥkhasamaḥ śamī

udāsīnaḥ śucirdakṣaḥ kṣamī bhaktaḥ priyo mama /
***** śrīgītāsu dvādaśo 'dhyāyaḥ || 13 || *****
śarīraṃ kṣetramityāhuḥ kṣetrajñaṃ māṃ vidurbudhāḥ /
kṣetraṃ tatsavikāraṃ tu māyā bhūtādi ca sthitam

śāntānāṃ dṛṣṭadoṣāṇāṃ jñānināṃ na vimohanam /
mānadambhamadakrodhatyāgo guruniṣevaṇam

asaktirnaśvare nityaṃ jñānamajñānamanyathā /
jñeyaṃ tu manmayaṃ brahma śuddhaṃ sadasatoḥ param

sarvataḥ pāṇivadanaṃ sarvākāramanāmayam /
prakṛtiḥ puruṣaśceti kṣetrakṣetrajñasaṃgamaḥ

prakṛtiḥ karaṇe heturbhoktā tu puruṣaḥ smṛtaḥ /
ekasthānaṃ pṛthagbhāvaṃ bhūtānāṃ yo 'nupaśyati

tatsaṃgamācca vistāraṃ sa yāti brahma śāśvatam /
paramātmā guṇātīto nityatvādayamavyayaḥ /
bhautike 'pi sthitaḥ kāye sarvavyāpī na lipyate

***** śrīgītāsu trayodaśo 'dhyāyaḥ || 14 || *****
sarvajñānamidaṃ bhūyaḥ śrūyatāṃ surasevitam /
yadyogo brahmagarbhe 'sminsaṃbhavanmūrtisaṃbhavaḥ

sattvādayastadudbhūtā vibhāntyete guṇāstrayaḥ /
vaicitryādaniśaṃ yeṣāṃ saṃsaranti śarīriṇaḥ

sattvaṃ prakāśakaṃ jñeyaṃ yadutthaiḥ stambhakaṃ rajaḥ /
tamo hyāvaraṇaṃ mohapramādādyasya saṃbhavaḥ

satataṃ saṃkareṇaiṣāṃ nyūnādhikyavibhedataḥ /
guṇadoṣāśca dṛśyante te te kila śarīriṇām

madbhaktāḥ śāntamanaso jīvanmuktidaśāṃ śritāḥ /
guṇairetaiḥ parityaktā bhajante sukhamakṣayam

***** śrīkītāsu caturdaśo 'dhyāyaḥ || 15 || *****
ūrdhvamūlaṃ bhavāśvatthamābrahmasadanoditam /
lokāntarānekaśākhaṃ vicitraviṣayāṅkuram

guṇakarmaprabuddhānāṃ śubhāśubhaphalodayam /
svabhāvabhūmāvavṛtaṃ jānīte yaḥ sa vedavit

tamasaṅgakuṭhāreṇa cchittvā yānti padaṃ mama /
nirastamohaṃ vaimalyādatisūryendupāvakam

yadaṃśo jīvaloke 'smiñjīvaścarati sarvagaḥ /
vāyurgandhamivādāya yo yātīndriyavāsanāḥ

tadvidhaṃ guṇayuktānāṃ sarvāvasthāsu nirguṇam /
paśyanti jñāninaḥ sarvajagatāṃ jīvanaṃ param

bhūtasargāmivāgatya akṣaro 'haṃ sanātanaḥ /
manmayā dhṛtimanto māṃ bhajante puruṣottamam

***** śrīgītāsu pañcadaśo 'dhyāyaḥ || 16 || *****
abhīḥ sattvaṃ śucirjñānaṃ damo dānaṃ tapaḥ kratuḥ /
ahiṃsāyā guṇāścānye jāyante divyasaṃpadām

dambhamānamadakrodhapāruṣyājñānacāpalaiḥ /
āsurī sūcyate saṃpanmohasokavivardhinī

yukto 'pi satataṃ divyasaṃpadā mā śucaḥ sakhe /
āsuraṃ bhāvamāpannā bhajante yonimāsurīm

sattvādibhirguṇairbaddho jñāyate ceṣṭitairjanaḥ /
manobhojanamācāro guṇatulyo hi dehinām

***** śrīgītāsu ṣoḍaśo 'dhyāyaḥ || 17 || *****
ākarṇyaitadathovāca phalgunaḥ punaracyutam /
saṃnyāsatyāgayostatvaṃ jñātumicchāmyahaṃ vibho

ukte pāṇḍusuteneti bhagavānabhyabhāṣata /
kāmyakarmaphalatyāgaṃ saṃnyāsaṃ saṃpracakṣate

sarvakarmaphalatyāgastyāga ityabhidhīyate /
ma(sa)tkarma na parityājyaṃ tyājyaṃ tu vidhigarhitam

nityakarmaparityāgo mohāttāmasa ucyate /
kleśaduḥkhabhayāttyāgo rājaso niṣphalaḥ smṛtaḥ /
kurvatāmapyasaktānāṃ tyāgaḥ sattvocito mataḥ

***** śrīgītāsu saptadaśo 'dhyāyaḥ || 18 || *****
karma kartā ca buddhiśca trividhā guṇabhedataḥ /
dhṛtiḥ sukhaṃ ca traiguṇyāttrividhaṃ dehināṃ matam

yathoktasevī niḥsaṅgaḥ kuru karma nijaṃ sakhe /
madbhakto matstutiparaḥ paraṃ padamavāpsyasi

idaṃ bhaktāya te jñānamupadiṣṭaṃ mayā svayam /
yaḥ śroṣyati sa saṃsāraduḥkhānyatitariṣyati

kaccinmoho vinaṣṭaste kaccidetacchrutaṃ tvayā /
keśaveneti kathite babhāṣe śakranandanaḥ

bhagavanvītamoho 'haṃ kariṣye tava śāsanam /
uktveti vīro gāṇḍīvamācakarṣa raṇotsukaḥ

***** śrīgītāsvaṃṣṭādaśo 'dhyāyaḥ || 19 || *****
athodatiṣṭhadgambhīrajaladadhvānamantharaḥ /
yuyutsuṃ pārthamālokya sainyānāṃ harṣaniḥsvanaḥ

pūrvaṃ tataḥ subhaṭakaṅkaṭapātikhaṅgaṭāṅkāranādamukhareṣu baleṣu rājñām /
dharmātmajaḥ kavacacāpaśarānvimucya devavratābhimukhamutsukadhīḥ sasarpaḥ

dhigdhiṅnṛpaṃ kṛpaṇaceṣṭa manuṣyasaṃjñaṃ bhūruṃ yudhiṣṭhiramalīkakṛtābhidhānam /
yācñā kṛtāñjalirupaiti parānyadeṣa śūrāstadiṅgitajaḍāḥ pṛthagityavocan

so 'pyacchakīrtiratha bhīṣmamukhānupetya prahvaḥ śarīrapaṇasaṃśritadhārtarāṣṭrān /
tatpādalagnamukuṭaḥ prakaṭaṃ praṇamya lebhe tadāśiṣamaśeṣamahīpajaitrīm

abhyāhataṃ ca raṇaraṅgamṛdaṅgatūrye pārthānguṇaikarasiko guṇavānyuyutsuḥ /
abhyāyayau tava sutaḥ svakurūnnirasya dhāvanti tulyagumameva nṛṇāṃ manāṃsi

asminmahākṣayamukhe karavālapaṭṭasaṃrakṣitapratimukhe raṇaraṅganāṭye /
vyākīrṇakīrtikusumāñjalirarjunāgranāndīmivāpaṭhadamandadhanurninādaiḥ

atrāntare nṛpaticakrakirīṭakoṭisaṃpātajātavabuśākulavisphuliṅga /
jaitrī triśūlakaraśiṣyamunerudagrā gāṅgeyaśātaviśisvāvalirullalāsa

saṃtrāsasaṃkucitaniścalakarṇatāladikkuñjarākalitakampitasarvalokam /
kṣubhyatkṣayāmbudharabhairavabhīmanādaṃ bhīmaṃ niśamya bhayamāvirabhūdbhaṭānām

atha bhīmaṃ samabhyāyātsvayaṃ rājā suyodhanaḥ /
bhrātṛbhiḥ sahito vīrairdhunāno vipulaṃ dhanuḥ

tataḥ pravṛtte saṃgrāme durlakṣye śaravṛṣṭibhiḥ /
svayaṃ śāntanavaḥ śrīmānabhyadhāvaddhanaṃjayam

sātyakiṃ kṛtavarmā ca hyabhimanyuṃ bṛhadbalaḥ /
duḥśāsano 'pi nakulaṃ sahadevaṃ ca durmukhaḥ

yudhiṣṭhiraṃ tathā śalya ācāryo drupadātmajam /
somadattaśca vairāṭiṃ bāhlikaścedibhūpatim

rakṣasāṃ pravaraṃ vīraṃ ghaṭotkacamalumbusaḥ /
śikhaṇḍinaṃ droṇasuto matsyaṃ prāgjyotiṣeśvaraḥ

kṛpaḥ kekayabhūpālaṃ drupadaṃ ca jayadrathaḥ /
sutasomaṃ vikarṇaśca bhīmasenasutaṃ balī

cekitānaḥ vikarṇaśca praaitivindhyaṃ ca saubalaḥ /
irāvataśca vikrāntaṃ śatāyuḥ phalguṇātmajam

vindānuvindāvāvantyau kuntibhojaṃ yaśasvinam /
kauravo vīrabāhuśca virāṭasutamuttaram

anye ca vīrā rājāno rājasiṃhāḥ prahāriṇaḥ /
utsāhasattvasaṃpannāḥ sasainyāḥ yamupādravan

teṣāṃ kaṅkaṇaratnāṃśupaṭalāḥ karanirgatāḥ /
hemapuṅkhā śarāścakrurvahnivyāptaṃ digantaram

athopuṅkhā rajasā gajavājirathākulam /
vīrāṇāṃ tumulaṃ yuddhaṃ nirmaryādamavartata

tataḥ śirobhirvīrāṇāṃ patitotphullitairmuhuḥ /
amandakandukakrīḍā babhūveva raṇaśriyaḥ

tataḥ pāṇḍavasainyeṣu bhīṣmacāpacyutaiḥ śaraiḥ /
vidāriteṣa bahuśaḥ samuttasthau mahāravaḥ

athābhimanyurabhyetya śatamanyusutātmajaḥ /
bhīṣmamabhyādravadvīro miṣatāṃ sarvabhūbhujām

kṛtavarmaprabhṛtibhiḥ sahitaṃ bhīṣmamojasā /
ayodhayatsa viśiśvairdhvajamasya cakarta ca

hematāle nipatite saṃrabdho 'tha pitāmahaḥ /
divyāsravarṣī sāvegaṃ saubhadraṃ samupādravat

tato vṛkodaramukhā vinadanto mahārathāḥ /
sānugaṃ śantanusutaṃ samantātparyavārayan

bhīṣmo 'pi sātyakiṃ viddhvā dhvajaṃ pavanajanmanaḥ /
unmamātha śarāgreṇa haimaṃ kesariṇaṃ rathāt

atrāntare giriprāṃśumāruhya madakuñjaram /
ayodhyanmadrarājaṃ hṛṣṭo vairāṭiruttaraḥ

sa kuñjarendraḥ śalyasya pādena caturo hayān /
jaghānākṛṣya hastena garjañjaladaniḥsvanaḥ

tato madrādhipaḥ kruddhaḥ śaktiṃ śaktimatāṃ varaḥ /
pradīptāṃ prāhiṇodvegāduttarāyeṣuvarṣiṇe

sa tayā bhinnahṛdayaḥ papāta galitāyudhaḥ /
karṇikāra iva bhraṣṭaḥ karīndrācalaśekharāt

uttaraṃ nihataṃ dṛṣṭvā śaṅkhastasyānujaḥ krudhā /
cakāra śalyamabhyetya śarairjaṭilavigraham

tasya śalyo 'tha gadayā vidārya dalaśo ratham /
unnanādābhavanyena diśaḥ śakalitā iva

śaṅkho hatāśvaḥ sahasā phalguṇasya rathaṃ yayau /
bhīṣmo 'tha pāṇḍavacamūṃ vyagāhata nṛpāntakaḥ

matsyakekayāpāñcālacedisenāsu sarvaśaḥ /
bhīṣmabāṇavibhinnāsu sūryo 'staśikharaṃ yayau

tato nivṛtte saṃgrāme śibirāṇi nareśvarāḥ /
bhejire pratisaṃsanto vipulaṃ bhīṣmavikramam

***** prathame yuddhadivase uttaravadhaḥ || 20 || *****
dinānte dīrṇapṛtanaḥ śokārto dharmanandanaḥ /
saṃhāraṃ nijasainyānāṃ pradadhyau bhīṣmavikramam

sa rājamadhye govindamuvāca karuṇākulaḥ /
kṣīyamāṇasya samare satyaṃ śreyastapo mama

alaṃ yuddhena me kṛṣṇa pṛthivīkṣayakāriṇā /
ko mucyeta raṇe prāpya bhīṣmaṃ bhīṣmaparākramam

iti bruvāṇaṃ rājānamuvāca madhusūdanaḥ /
dhruvaste vijayo rājanyasya yoddhā dhanaṃjayaḥ

sātyakirdrupadaḥ śaibyaḥ sikhaṇḍī pañca kekayāḥ /
saubhadraśca raṇe kruddho hanyādeva gaṇānapi

ukte janārdaneneti tīvraṃ bhīṣmaparākramam /
mithaḥ kathayatāṃ teṣāṃ sā jagāma vibhāvarī

athodite sahasrāṃśau vihite pāṇḍunandanaiḥ /
kruñcavyūhe mahotsāhairvyūhamanye 'pi cakrire

tataḥ pravṛtte samare tīvre bhīrubhayaṃkare /
hṛdayākampane nājñāṃ tālaketuradṛśyata

gambhīradhīrasaṃrambho varjayansa pṛthagjanam /
cakarta bhūbhujāmeva śirāṃsi laghuvikramaḥ

bhīṣmeṇālolite vyūhe vātoddhūta ivārmave /
tamabhyadhāvatsaṃrabdhaḥ śvetāśvo 'cyutasārathiḥ

tamāpatantaṃ viśakhairbhīṣmaḥ kṣipramapūrayat /
droṇaduryodhanamukhāḥ sarve cānye mahārathāḥ

pārtho 'pi sāyakaiścakre samantātkuruvāhinīm /
tatpakṣapavanasphārairdīrṇāmiva sahasradhā

duryodhanaprerito 'tha svayaṃ śantanunandanaḥ /
nindannijaṃ kṣatradharmamabhyadāvaddhanaṃjayam

nirviśeṣaṃ tayostatra suciraṃ yudhyamānayoḥ /
niruddhāṃ śarajālena nādṛśyanta diśo daśa

na dadarśa tayoḥ kaścidantaraṃ kṣipatoḥ śarān /
dhārāsāraprabalayornadatoriva meghayoḥ

tato droṇamukhā vīrā dhṛṣṭadyumnapurogamaiḥ /
ayudhyantābhavanyena surāḥ pulakitā divi

bhībhasenaḥ kaliṅgānāṃ praviśyātha varuthinīm /
pātayankuñjarāṃścakre niḥsaṃcārāṃ vasuṃdharām

bhīmanirbhinnamattebhakumbhodbhūtāsṛgambhasām /
pravāhairyayurākaṇṭhaṃ turaṅgāḥ kṛcchagāminaḥ

nihatya kuñjarānīkaṃ kaliṅgānāṃ prahāriṇām /
ketumantaṃ narapatiṃ jaghāna sapadānugam

niḥśeṣitakaliṅgasya bhīmasenasya nādataḥ /
ghanagambhīranādena pṛthivī samakampata

tato bhīṣmaḥ samabhyetya dṛṣṭvā dīrṇāmanīkinīm /
vidhāya virathaṃ bhīmaṃ śaineyāśvānapothayat

duryodhanasutaṃ vīraṃ lakṣmaṇaṃ śauryalakṣaṇam /
abhimanyuḥ śitairbāṇaiḥ kṣiprahastamapothayat

gocare patitaṃ putraṃ saubhadrasya pramāthinaḥ /
dṛṣṭvā duryodhano rājā sānugaḥ svayamādravat

kuruvīraiḥ parivṛtaṃ vilokya sutamarjunaḥ /
maṇḍalīkṛtagāṇḍīvastūrṇaṃ pratyudyayau parān

lāghavādabhitastasya sāyakāścitrayodhinaḥ /
jahnuḥ śirāṃsi śūrāṇāṃ phalānīva mahīruhām

ākhaṇḍalabhuvā caṇḍagāṇḍīvapreritaiḥ śaraiḥ /
vidāriteṣvanīkeṣu vidhvastarathasādiṣu

rudhireṇeva gagane saṃdhyārāgema pūrite /
avahāraṃ raṇe cakre vāsarānte pitāmahaḥ

***** ditīyo yuddhadivasaḥ || 21 || *****
anyedyurgāruḍaṃ vyūhaṃ dṛṣṭvā bhīṣmeṇa kalpitam /
ardhacandraṃ prativyūhaṃ cakrire pāṇḍunandanāḥ

tataḥ pravṛte samare bhīrūṇāṃ dhṛtikhaṇḍane /
ārūḍheva mahīvyoma rajasā samalakṣyata

asṛkpravāhaiḥ sahasā praśānte reṇumaṇḍale /
sughoraḥ saṃprahāro 'bhūnnṛpāṇāṃ tridaśekṣitaḥ

bhīṣmadroṇamukhairvīraiḥ/ phalguṇapramukhā raṇe /
saṃsaktāḥ samadṛśyanta pūrvadevairivāmarāḥ

bāṇajālena mahatā saṃhatānāṃ samantataḥ /
arjunena niruddhāsu ripūṇāṃ śastravṛṣṭiṣu

akampitau kuruvyūhe bhīmasenaghaṭotkacau /
praviśya cakraturvīrau vyākulāṃ paravāhinīm

tāvabhyadhāvatsaṃrambhādamarṣī dhṛtarāṣṭrajaḥ /
kurvannājasamājena mauliradnāruṇā diśaḥ

haiḍambabāṇanihatā vīrāstasya padānugāḥ /
mahāvātasamākrāntā drumā iva cakampire

duryodhanapreritānāṃ śarāṇāṃ dīptatejasām /
vṛṣṭimabhyudgatāṃ ghorāṃ cicchedāśu vṛkodaraḥ

bhīmotsṛṣṭena pṛthunā pṛṣaṅke(tke)nātha kauravaḥ /
hṛdi viddho nimagnena mumoha bhṛśavihvalaḥ

tasminsārathinā nīte rathenākulaketunā /
dudrāva sainyaṃ tatsarvaṃ paśyatordreṇabhīṣmayoḥ

mahārathairvārite 'pi kīrṇe tasminbalārṇave /
pratyudyayau samāśvasya tūrṇaṃ rājā suyodhanaḥ

pārthasātyakisaubhadraiḥ sa dṛṣṭvā bahuśaścamūm /
vidrāvitāṃ samabhyetya pitāmahamabhāṣata

dāritaṃ paśya me sainyaṃ labdhalakṣairarātibhiḥ /
pāṇḍuputreṣu kṛpayā tvayi mādhyasthyamāśrite

alaṃ dromasahāyasya paristhātuṃ purastava /
madabhāgyavaśānna syādyadi pārtheṣu vaḥ kṛpā

etatsuyodhanenoktaṃ śrutvā surasaritsutaḥ /
īṣatsmitasudhādhautakapolaphalako 'vadat

ukto 'si bahuśo rājannajeyāḥ pāṇḍavā iti /
yattu śakyaṃ mayā kiṃcidvṛddhenādya karomi kim

ityuktvā cāpamākṛṣya tālamātraṃ mahābhujaḥ /
mandāyamāne divase samamabhyudyayau parān

tato bhīṣmarathodīrṇaiḥ śaraiḥ sūryakaraprabhaiḥ /
vidāritānyanekāni tamāṃsīva kṣayaṃ yayuḥ

tomareṣvātapatreṣu śarīreṣu ca bhūbhujām /
petuḥ punarabhāvāya bhīṣmanāmāṅkitāḥ śarāḥ

adṛṣṭapuṅkhavadanairghanaśreṇīkṛtairmuhuḥ /
tatsāyakairadṛśyābhūtpāṇḍavānāmanīkinī

taṃ yudhyamānaṃ dīptāstraṃ varjayanto 'pi saṃgare /
dikṣu bhīṣmasahasrāṇi dadṛśuḥ sarvapārthivāḥ

vrajatsu rājacakreṣu bhīṣmānalapataṅgatām /
ekenaikena bāṇena bhinneṣu triṣu dantiṣu

yāte sahasradhā sainye pāṇḍavānāṃ tarasvinām /
anayatphalguṇarathaṃ gāṅgeyāntikamacyutaḥ

tato 'bhavadbhīṣmaśarairbhāsvaraiḥ savyasācinaḥ /
kṣaṇaṃ pañcānanasyeva cārukāñcanapañjaraḥ

niruddhaśarasaṃcāro yatnena śatamanyujaḥ /
vicitrairvicaranmārgairyuyudhe kṛṣṇasārathiḥ

tasyātimānuṣaṃ dhairyamāsthitasya pitāmahaḥ /
sādhu putreti saṃhṛṣṭaḥ parākramamapūjayat

tatkaṅkapattrinirbhinnau kṛṣṇāvekarathe sthitau /
raktāśokāvivotphullau babhatuḥ kṣatajokṣitau

tato nirantarairbāṇairbhīṣmakārmukanirgataiḥ /
ākrāntabhuvanābhogairnādṛśyanta diśo daśa

bhīṣme pṛthuśarajvāle kālānala ivodyate /
dudrāva pāṇḍavacamūḥ paścādabhisṛtā paraiḥ

bhagneṣu bhaṭamukhyeṣu babhāṣe kaiṭabhāntakaḥ /
kva nu mānadhanā yūyamapārayaśaso raṇe /
parityajya kulācāraṃ yātāḥ kātaratāmimām

ityuktvā tānsamālokya vidrutāneva keśavaḥ /
uvāca sātyakiṃ vīraṃ yudhyamānaṃ prayatnataḥ

tiṣṭhantu yāntu vā sarve sātyake pṛtanāgragāḥ /
eṣa svayaṃ nihanmyadya sānugaṃ śantanoḥ sutam

ityuktvā caṇḍamārtaṇḍamaṇḍalāgraṃ sudarśanam /
svayamudyamya kaṃsāriḥ syandanāgrādavātarat

kruddhasya tasya kalpāntakarālānalarociṣaḥ /
na rūpaṃ sehire draṣṭuṃ surā api divi sthitāḥ

saṃrambhodbhrāntadordaṇḍavilasatpītavāsasā /
śobhāṃ bheje sa nīlādreḥ sarpatsaṃdhyābhraśālinaḥ

tamantakamivāyāntaṃ jagatsaṃhāradīkṣitam /
dhīraḥ śāntanavo dṛṣṭvā dhunāno dhanurabhyadhāt

ehyehi bhagavanviṣṇo jiṣṇo tridaśavidviṣām /
cakreṇa me śiraśchindhi bhavakleśakṛśānunā

bhavatā nābhijāmbhojasamuddhūtasvayaṃbhuvā /
hato jagannivāsena dhanyatāṃ yātvayaṃ janaḥ

siddhasindhusuteneti bhāṣite natamaulinā /
avaruhya radhāttūrṇamarjunaḥ kṛṣṇamanvagāt

sa niṣpīḍya balātpādau purastātkāliyadviṣaḥ /
uvāca saṃhara vibho kopaṃ viśvakṣayocitam

kṣapayāmi ripūnsarvānyudhi satyena te śape /
iti prasādya taṃ pārtho rathamāropayatpunaḥ

tato gāṇḍīvaghoṣeṇa pāñcajanyaraveṇa ca /
cakrāte rājacakrāṇāṃ kṛṣṇau kṛṣṇāmbudabhramam

tato nirvivarairbāṇaiḥ śalyabhiriśravaḥśalāḥ /
avākiranbhīṣmamukhāḥ phalguṇaṃ śastravṛṣṭibhiḥ

tāmāyudhamahāvṛṣṭiṃ chittvā sapadi pāṇjavaḥ /
māhendramastraṃ vidadhe sarvalokakṣayakṣamam

tasminnudīrṇe sahasā mahāstre dīptatejasi /
caṇḍavātavikīrṇeva cakampe kuruvāhinī

vadhyamāneṣu saineṣu kṣipraṃ gāṇḍīvadhanvanā /
naranāgāśvadehotthā sasarpa rudhirāpagā

chattrācchaphenapaṭalāṃ calaccāmarasārasām /
keśaśevālaśabalāṃ piśācāstāṃ siṣevire

ghore nṛpakṣaye tasminvartamāne raṇotsave /
saṃdhyayā dikṣu jātāsu śoṇitena bhṛtāsviva

yāte 'staṃ caṇḍakiraṇe pratyagrarudhiratviṣi /
māṃsapiṇḍa iva graste ghoreṇa dhvāntarakṣasā

vidhvastacāpakavacā viprakīrṇarathadhvajāḥ /
avahāramakurvanta pāṇḍavāḥ śastravikṣatāḥ

***** tṛtīyo yuddhadivasaḥ || 22 || *****
punaḥ prabhāte saṃrabdhā niryayuḥ kurupāṇḍavāḥ /
vinadanto mahotsāhā vyāḍavyūhāgravartinaḥ

atha pravṛtte samare pṛthivīkṣayaśaṃsini /
saubhadrapramukhā vīrānbhīṣmamukhyānayodhayan

tataḥ śaraśatāsārasaṃpūritadigantaraḥ /
mahārathānatītyānyānbhīṣmor'junamupādravat

nirviśeṣaṃ tayoḥ kṣipraṃ pīrayoryudhyamānayoḥ /
eko droṇimukhānvīrānabhimanyurayodhayat

chinnavarmadhvajarathānsa vidhāya mahārathān /
śiraḥprakaramucchinnaṃ rājñāṃ kṣipramapātayat

droṇaprabhṛtibhiḥ sarvairdṛṣṭvā saubhadramāvṛtam /
dhṛṣṭadyumnaścamūnāthaścakartābhyetya kauravān

sa hatvā cāmaraṃ śūraḥ pauravyatanayaṃ nṛpam /
śiraḥsaṃyamaneḥ kāyājjahārākulakuṇḍalam

atrāntare gajānīkairvipulaiśca gajādhipaḥ /
bhīmaduryodhanādiṣṭo gadāpāṇiḥ samādravat

bhīmaseno 'tha rabhasādavaruhya rathādgajān /
garjannurugadāghātairjaghāna ghanavikramaḥ

gadāprahārābhihatairvajrabhinnairivācalaiḥ /
patadbhirmattamātaṅgaiścakampe cakiteva bhūḥ

nihate kuñjarānīke bhīmena bhayadāyinā /
tamabhyadhāvansaṃkruddhāḥ sarve duryodhanādayaḥ

suyodhanaśarāghātamūrchito 'tha vṛkodaraḥ /
samāśvāsya parānīkaṃ rathena kupito 'viśat

viśvasaṃhārasaṃkruddhaṃ taṃ kṛtāntamivotthitam /
prāpyānujāḥ kurupateścaturdaśa yayuḥ kṣayam

senāpatiṃ suṣeṇaṃ ca jayasaṃdhaṃ sulocanam /
bhīmamugraṃ bhīmarathaṃ bhīmabāhumalolupam

samaṃ vavitsuṃ kaṭakaṃ durmukhaṃ duṣpradarśanam /
hatvaināmakarotsenāṃ kauravāṇāṃ sahasradhā

tamabhyadhāvanmattena supratīkena dantinā /
gambhīraghoraghoṣeṇa bhagadattaḥ sahānugaiḥ

gajodayācalaraveḥ śaraistīkṣṇairivāṃśubhiḥ /
pratāpadhāmnastasyārātsa ca kopārivāhinī

tatsāyakena viddho 'tha hṛdi marmāvabhedinā /
dhvajayaṣṭiṃ samālambya tasthau bhīmo 'timūrchitaḥ

tato ghaṭotkacaḥ kruddho dṛṣṭvā janakamākulam /
bhagadattamabhidrutya ghorāṃ māyāṃ samādade

airāvaṇagataḥ so 'tha prabhinnairdigdvipaiḥ saha /
apīḍayatsupratīkaṃ dīptābhiḥ śastravṛṣṭibhiḥ

tasya nirbhidyamānasya kuñjarendrasya garjataḥ /
śabdena tasthurālīya sarve saṃkucitā gajāḥ

ghaṭotkacena saṃsaktaṃ dṛṣṭvā prāgjyotiṣeśvaram /
saha droṇādibhirvīrairbhīṣmastaṃ deśamādravat

ghaṭotkacaṃ kālarūpaṃ nadantaṃ vīkṣya bhairavam /
saṃdhyāyāṃ durjayaṃ matvā bhīṣmastaṃ bhīmavikramam

avahāraṃ susainyānāṃ vidadhe dhīmatāṃ varaḥ /
yenābhavankālavaktrānniṣkrāntā iva kauravāḥ

***** caturtho yuddhadivasaḥ || 23 || *****
tato niśāyāmabhyetya kururājaḥ pitāmaham /
papraccha pāṇḍuputrāṇāṃ duḥkhito jayakāraṇam

tamabravīcchāntanavo rājannukto 'si sarvadā /
devena viṣṇunā guptā na jeyāḥ pāṇḍavā iti

purā bhūbhāraśāntyarthaṃ svayaṃbhūrmunisaṃsadi /
prādurbhūtaṃ svayaṃ viṣṇuṃ tuṣṭāva sahasāṃ nidhim

jaya viśveśa viśvātmanviśvaksena sudhānidhe /
amandaciddhanānanda saṃvitsamarasadyute

namastubhyaṃ jagatsargasthitisaṃhārakāriṇe /
trivikramāya mahate triguṇāya trimūrtaye

namaḥ pracaṇḍacakrāgraprabhābāsurabāhave /
daityāndhakārasaṃhārakāriṇe mohadāriṇe

avatīrṇā bhuvaṃ nātha dānavā ye hatāstvayā /
teṣāṃ vadhāya dṛptānāṃ mānuṣī tanumāviśa

iti stutāḥ padmabhuvā devo nārāyaṇaḥ prabhuḥ /
nareṇa sākaṃ bhūbhāraśāntyai kṣitimavātarat

sa eṣa kṛṣṇo bhagavāñjāto yādavanandanaḥ /
naraśca vijayo dhīraḥ pravaraḥ sarvadhanvinām

devau kṛṣṇārjunāvetau na jeyau tridaśairapi /
iti jñātvā śamaḥ putra kriyatāṃ pāṇḍunandanaiḥ

***** viśvepākhyānam || 25 || *****
atha prabhāte makaraśyenavyūhāgravartinaḥ /
bhīṣmabhīmamukhā yuddhaṃ cakrire pāṇḍunandanāḥ

hatānāṃ hanyamānānāṃ ghnatāṃ ca samare mithaḥ /
patatāṃ tatra vīrāṇāṃ niḥsvastumulo 'bhavat

bhīmaphalguṇasaubhadramatsyasātyakipārṣataiḥ /
bhīṣmamukhyaiśca te sene bhinne saṃśayamāpatuḥ

kabandhatāṇḍavaścaṇḍe mattavetālasaṃkule /
tasminnāyodhane ghore bhūtānāmutsavo 'bhavat

dhanvināṃ śarajālena divamutpatatāṃ muhuḥ /
ravau saṃchādite rājñāṃ vyartho 'bhūcchastrasaṃgrahaḥ

bīreṇa bhūriśravasā saṃsaktaṃ vīkṣya sātyakim /
abhyādrabandhanvinastaṃ deśaṃ sātyakisūnavaḥ

teṣāmāpatatāṃ pūrṇaṃ sṛjatāṃ śaradurdinam /
bhūriśravāḥ śirāṃsyārāduścakarta śitaiḥ śaraiḥ

hateṣu teṣu kupitaḥ pradīptāstro dhanaṃjayaḥ /
cakāra kurusenānāṃ saṃhāraṃ harisārathiḥ

hate lakṣacaturbhāge bhūbhujāmanivartinām /
gāmḍīvadhanvanā sainyaṃ vāsarānte nyavartata

***** pañcamo yuddhadivasaḥ || 26 || *****
punaḥ prabhāte saṃnaddhā niryayuḥ kurupāṇḍavāḥ /
alakṣyabhedāvyūhābhyāṃ krauñcena makareṇa ca

tataḥ pramathya sahasā bhīmaseno 'rivāhinīm /
viveśa bhṛśasaṃkruddhaḥ samaṃ drupadasūnunā

tābhyāṃ vidārite vyūhe kupitāḥ kurunandanāḥ /
vimukhaiḥ kuñjarānīkaistau tūrṇaṃ paryavārayan

bhīmasenagadāghātaniṣpiṣṭavapuṣāṃ raṇe /
abhūdvyatikaro ghoraḥ patatāṃ gajayodhinām

yudhyamāneṣu sainyeṣu bhīmena bhujaśālinā /
abhyādravatsānugastaṃ svayaṃ rājā suyodhanaḥ

chāditaṃ kauravairdṛṣṭvā bhīmaṃ viśikhavarṣibhiḥ /
vimohaṃ vidadhe teṣāṃ mohanāstreṇa pārṣanaḥ

droṇena svayamabhyetya jñānāstreṇa vināśite /
mohanāstre kurupatiṃ bhīmastūrṇamupādravat

madāndha kvādhunā jīvanmayi jīvati yāsyasi /
ityuktvā te śaraśatairvajravegairavākiran

bhīmacāpacyutairbāṇaiḥ so 'tha kṛttarathadhvajaḥ /
hṛdi nirdārito bheje mūrchāṃ vyathitamānasaḥ

atrāntare bhīṣmaśarairhanyamāneṣu rājasu /
ghoro babhūva saṃmardaḥ kṛtāntasamarotsavaḥ

draupadeyeṣu vīreṣu yudhyamāneṣu kauravaiḥ /
avartata raṇo ghoro gajavājirathakṣayaḥ

athāvahāraṃ sainyānāṃ cakre śantanunandanaḥ /
rājasevāvṛte sūrye yāte 'staṃ rudhirāruṇe

***** ṣaṣṭho yuddhadivasaḥ || 27 || *****
anyedyurmaṇḍalavyūhe bhīṣmeṇa vihite svayam /
yudhiṣṭhiraḥ sa durbhedyaṃ vajravyūhamakalpayat

tataḥ pravṛtte samare bhīṣaṇe bhīṣmapārthayoḥ /
virāṭa ādravaddroṇaṃ gariṣṭhaṃ sarvadhanvinām

dromastaṃ bāṇavarṣeṇa saṃchādya śaravarṣiṇam /
unnanāda dhanadhvāno rathamasya jaghāna ca

sa hatāśvaṃ samutsṛjya rathaṃ putrasya saṃbhramāt /
āruroha hatānīkaṃ śaṅkhasyārūḍhadhanvinaḥ

droṇo 'tha tau pitāputrau vilokyaikarathe sthitau /
śaṅkhāya prāhiṇoddhoraṃ mṛtyudaṇḍopamaṃ śaram

sa tena bhinnahṛdayaḥ papāta kṣatajokṣitaḥ /
vātenonmathitaḥ śailādutphulla iva kiśukaḥ

tataḥ śikhaṇḍinaṃ droṇaḥ śarairviśikhavarṣiṇam /
hatāśve sātyakirathaṃ samārūḍhe śikhaṇḍini /
alambuso rākṣasendraḥ krūrakarmā tamādravat

māyayā yudhyamānaṃ taṃ garjantaṃ rākṣaseśvaram /
cakāra vimukhaṃ kopādraurdreṇāstreṇa sātyakiḥ

śaineyena jite tasminnirāvānarjunātmajaḥ /
vindānuvindāvabhyāyājjambhārisamavikramaḥ

ghaṭotkacamathāyāntaṃ kṛtāntamiva bhairavam /
avārayadgajendreṇa bhagadatto nṛpāgraṇīḥ

vīraṃ sa hatvā haiḍambaṃ pāṇḍavānāmanīkinīm /
darpādviloḍayāmāsa gajendro nalinīmiva

mādrīsutau tataḥ śalyaṃ vidhāya virathaṃ śaraiḥ /
cakraturvimukhaṃ saṃkhye rājacakrasya paśyata

svayaṃ yudhiṣṭhiro rājā nṛpaṃ jitvā śrutāyudham /
vigāhya kauravānīkaṃ vidadhe vimukhaṃ śaraiḥ

cekitānena vijite gautame dhanvināṃ gurau /
bhīṣmaścakāra kadanaṃ rājñāmanyatra cārjunaḥ

yudhiṣṭhiragirā vīkṣya bhīṣmāya samabhidravat /
śikhaṇḍinaṃ madrarājo divyairastrairavārayat

bhīṣmeṇa hanyamāneṣu bhūpāleṣvanivartiṣu /
pārthena ca trigarteṣu jagāmāstaṃ divākaraḥ

tamobhirāvṛte loke raṇe raktāsavākule /
pramattairiva vetālaiḥ śibirāṇi yayurnṛpāḥ

***** saptamo yuddhadivasaḥ || 28 || *****
bhīṣmeṇa sāgaravyūhe prātarviracite punaḥ /
śṛṅgāṭakaṃ mahāvyūhaṃ cakre drupadanandanaḥ

vidīrṇeṣviva sainyeṣu bhīṣmacāpacyutaiḥ śaraiḥ /
babhūvābhimukhaḥ kopādeka eva vṛkodaraḥ

sa hatvā sārathiṃ bāṇaistūrṇaṃ śantanujanmanaḥ /
droṇasya ca samudbhrāntapatākaṃ vidadhe ratham

labdhalakṣyastato bhīmaḥ sapta duryodhanānujān /
jaghāna madasaṃrabdhānpañcānana iva dvipān

bahvāśinaṃ kuṇḍadhāraṃ viśālākṣaṃ sudurjayam /
mahodaraṃ maṇḍitakaṃ sunābhaṃ ca nihatya tān

vidrāvya kauravacamūṃ nanādāsphālayandiśaḥ /
kṣayāya sarvajagatāṃ devai rudra ivoditaḥ

irāvānatha vikrānto viveśa kuruvāhinīm /
ulūpī nāgalalanā phalgunādyamajījanat

kāryaṃ samārasāhāyyaṃ svayamityarjunena saḥ /
uktaḥ purā surapure tāṃ yuddhabhuvamāyayau

ratnakāñcanasaṃnāhaiḥ sa pātālaturaṅgamaiḥ /
uhyamānaḥ śaraiścakre phaṇilokamivāparam

sa gatvā vipulānīkāngāndhārānhayayodhinaḥ /
śakunestanayānsapta jaghāna ghanavikramān

tato duryodhanādiṣṭo māyāvī rākṣasādhipaḥ /
alambusaḥ samabhyāyādirāvantaṃ raṇotkaṭaḥ

irāvanatha khaṅgena chittvā sapadi rakṣasaḥ /
sa niṣaṅgaṃ dhanurdīptaṃ nanāda balināṃ varaḥ

tato māyāṃ samāśritya mahatīṃ mohanīṃ nṛṇām /
yuyudhāte samāviśya tau nabho bhīmavikramau

irāvatā nijāstraughairhanyamānasya rakṣasaḥ /
ghoraḥ samudabhūnnādaḥ sarvaprāṇibhayaṃkaraḥ

atha sāhāyyakaṃ cakrurbhujaṅgā bhujagībhuvaḥ /
tadvamanto viṣaṃ tīkṣṇaṃ bhogānbhogabhṛtāṃ varāḥ

rākṣaso 'tha bhṛśaṃ kruddho rūpamāsthāya gāruḍam /
bhakṣayitvākhilānsarpānbhīmaṃ svaṃ vapurādade

māyāvimohitasyātha khaṅgenārādirāvataḥ /
jahāra rākṣasaṃ kāyācchirastalakuṇḍalam

hate dhanaṃjayasute haiḍambaḥ krodhamūrchitaḥ /
rurāva yena vasudhā cacāla sakulācalā

tamabhidrutamālokya rājā duryodhanaḥ svayam /
saha sarvairnijānīkairmahāmāyamayodhayat

vidyujjihvaṃ vegavantaṃ mahāraudraṃ pramāthinam /
haiḍimbānucarānghorānsa jaghāna niśācarān

śaktiṃ ghaṭotkacenātha preritāṃ kurubhubhūje /
mahāgajena jagrāha vaṅgānāmadhipaḥ puraḥ

nāge nipatite tasminrakṣite ca suyodhane /
saṃhāraṃ purusainyānāṃ cakāra piśitāśanaḥ

bhagadatto 'tha vidrāvya pāṇḍavānāmanīkinīm /
supratīkena nāgena ghaṭotkacamayodhayat

tanayaṃ nihataṃ śrutvā kupitaḥ śatamanyujaḥ /
śirobhirbhūmipālānāṃ durgamāṃ vasudhāṃ vyadhāt

bhīmo 'pi krodhasaṃtapto bhrātuḥ putre nipātite /
suyodhanānujānvīrānprāhiṇodyamamandiram

anādhṛṣṭiṃ kuṇḍalinaṃ kuṇḍabhediṃ sulocanam /
virāṭaṃ dīrghabāhuṃ ca subāhuṃ kanakadhvajam

hatvaitānkauravānīkaṃ kabandhaśatasaṃkulam /
vidadhe mattavetālanandane dinasaṃkṣaye

visrastacāpakavace bhagnasyandanakuñjare /
raṇe 'vahāraṃ sainyānāṃ tataścakrurmahārathāḥ

***** aṣṭame yuddhadivase irāvadvadhaḥ || 29 || *****
tato niśāyāmanujaiḥ saha rājā suyodhanaḥ /
karmamānāyya pārthānāṃ parābhavamacintayat

vaikartanastamavadatkriyatāṃ madvacaḥ sakhe /
śastraṃ nyāsaya gāṅgeyamahaṃ jeṣyāmi pāṇḍavān

eṣa vṛddho nirīhaśca sapakṣaśca dhanaṃjaye /
tvayā nyasto 'tibhāro 'sminnavicāryaiva kevalam

etadākarṇya karṇoktaṃ harṣātkarmaśatairiva /
utthāya bhīṣmaśibiraṃ pratasthe bhrātṛbhiḥ saha

maṇidīpasahasrāṃśupiṅgīkṛtadigantaraḥ /
naktaṃ dīptauṣadhivanaḥ sakulādririvābabhau

ratnakuṇḍalakeyūrakirīṭadyutinirjitāḥ /
puro niṣpratibhā dīpāstasyāsaṃllajjitā iva

praṇatāndṛktrimodāraiḥ bhūmipālānvilokayan /
nāmabhirvikrabhāgena sūcitānvetrimaṇḍalaiḥ

sa babhau gatilolena hāreṇa tuhinātviṣā /
sudhākallolajālena pādadāreṇa manmathaḥ

śrīmānsaṃprāpya śibiraṃ śubhraṃ śantanujanmanaḥ /
śayānaṃ ratnaparyaṅke praṇanāma vilokya tam

rājñeti pūjitastena kṛtāsanaparigrahaḥ /
duryodhanaḥ kṣaṇaṃ dhyātvā pitāmahamabhāṣata

ayaṃ jetā bhṛgubhuvaḥ kārmukapramayī tava /
bhujastrailokyavijaye paryāpta iti me matiḥ

kāruṇyādānṛśaṃsyādvā rakṣyāste yadi pāṇḍavāḥ /
tatkarṇamanujānīhi yuddhāya raṇakarkaśam

ityuktaḥ kururājena marmaṇīva samāhataḥ /
prabhāte drakṣyasītyuktvā niḥśvasankṣmāmalokayat

kauravo 'pi tamāmantrya nijaṃ śibiramāyayau /
diśaḥ śabalayankṣiptaṃ dīpadīptaurvibhūṣaṇaiḥ

atha prabhāte bhīṣmeṇa droṇadrauṇimukhaiḥ saha /
vihite sarvatobhadre vyūhe vyūhāgravartinā

prativyūheṣvanīkeṣu nadadbhiḥ pāṇḍunandanaiḥ /
abhimanyuḥ kurucamūragre vīro vyadārayat

śarāṃśuśataduṣprekṣyaṃ nidāghārkamivodyatam /
na sehire taṃ bhūpālā māninaḥ saṃhatā api

duryodhanaprerito 'tha rakṣaḥpatiralambusaḥ /
tamabhyadhāvadbibhrāṇo māyāṃ trailokyamohinīm

tasya nādena mahatā jagatpralayaśaṃsinā /
nipetuḥ sahasā yodhā bahavo vigatāsavaḥ

draupadeyaiḥ puraḥ prāptaiḥ sa vidhāya raṇaṃ kṣaṇam /
abhimanyuradhaṃ bāṇaiḥ samaṃ dehamivākarot

śaranirdāritenātha vihitāṃ tena rakṣasā /
saubhadrastāmasīṃ māyāṃ cicchedārkāstratejasā

atha drauṇiprabhṛtibhiḥ sātyakipramukhā yudhi /
saṃsaktā gaganaṃ cakrurdivyāstradahanākulam

arjuno droṇamabhyetya mahāstragrāmaduḥsaham /
vāyavyāstreṇa vidadhe jagatāṃ kṣokṣavibhramam

samudīrya ca śailāstraṃ drauṇena kṣapite 'nale /
dhanaṃjayaḥ kurucamūṃ śarajālairapūrayat

bhīmabhīmagadāghātanirbhinne gajamaṇḍale /
susrāva śoṇitanadī patākāphenamālinī

tasminnākulasaṃgrāme vartamāne bhayaṃkare /
vetāladattatāleṣu nṛtyatsu cchinnamūrdhasu

bhīṣmaḥ pṛthuśarajvālāduḥsahaḥ subhaṭendhanaḥ /
jajvāla cāpakreṅkāramantrapūta ivānalaḥ

tadbhujapreritāḥ kṣipraṃ sāyakā viviśurnupān /
vihaṅgā iva sāyāhne ghanacchāyānmahīruhān

khadyotā iva vṛkṣeṣu śalabhā iva śāliṣu /
bhīṣmabāṇā narendreṣu peturhaṃsāḥ sahaḥsviva

nikṛttaiścāmaroṣṇīṣaiśchannāśca pṛthivībhujām /
cakāra samare bhīṣmaḥ svayaśoviṣadā diśaḥ

rājñāṃ śirobhiḥ pṛthivīmāstīrya pulakojjvalaḥ /
raṇalakṣmyāḥ sa vidadhe kelipadmākarāniva

śirastraśaranirgharṣajātā vahnikaṇā babhuḥ /
rājñāṃ hatānāṃ bhīṣmeṇa jīvā iva nabhaścarāḥ

ghanena śarajālena grastā lokena sarvataḥ /
sa cakre sarvasainyānāmakaṇḍarajanībhramam

vidīrṇe pāṇḍavabale chinnavarmarathadhvaje /
gajānīkeṣu bhagneṣu bhāghaśeṣeṣu rājasu

lajjāmutsṛjya yāteṣu tyaktacāpeṣu keśavaḥ /
satyasaṃdhaṃ raṇe bhīṣmaṃ jahītyarjunamabravīt

dhanaṃjayo 'tha niḥśvasya viṣaṇṇavadanāmbujaḥ /
nindanmuhuḥ kṣattradharmaṃ pitāmahamupādravat

dṛṣaṭvā gāṇḍīvadhanvānamudyataṃ śaravarṣiṇam /
bale tūrṇamupāvṛtte punaryuyudhire bhaṭāḥ

bhīṣmacāpacyutairbāṇaiśchāditaṃ vīkṣya phalguṇam /
rathamutsṛjya kaṃsāristamadhāvadbhujāyudhaḥ

vilokya kupitaṃ bhīṣmaḥ svayaṃ kṛṣmamabhidrutam /
uvāca dhanyatāmānī pulakālaṃkṛtākṛtiḥ

puṇyabhājāmahaṃ dhuryo bhagavankṛtināṃ varaḥ /
yasya tvaṃ jagatāṃ nātho vadhāya svayamudyataḥ

iti vādini gāṅgeye rathāttūrṇaṃ dhanaṃjayaḥ /
avaruhya tataḥ kṛṣṇamānināya rathaṃ punaḥ

athārjunaśarāsārairākīrṇe kurukānane /
punaḥ śāntanavaścakre saṃhāraṃ pṛthivībhujām

ghore vyatikare tasminbhagne subhaṭamaṇḍale /
avahāramakurvanta dinānte pāṇḍunandanāḥ

***** navamo yuddhadivasaḥ || 30 || *****
tato rājanyāṃ vijane dharmarājo janārdanam /
jagāda rājakaṃ dṛṣṭvā bhinnaṃ bhīṣmeṇa duḥkhitaḥ

paśya kṛṣṇa prabuddhena gāṅgeyavaḍavāgninā /
sainyāmbudhiraparyante mama nīto 'lpaśeṣatām

maṇḍalīkṛtacāpasya sahasrāṃśuśatatviṣaḥ /
bhīṣmasyākhaṇḍalopyagre satyaṃ paribhāvāspadam

alaṃ rājyena me tāvaditi vādini dharmaje /
uvāca śauriryotsye 'haṃ svayaṃ śantanunandanam

nākārya me bhavatkāryamutsṛṣṭasamayo 'dhunā /
pālayāmi raṇe bhīṣmaṃ paśyatāṃ jagatībhujām

etadākarṇya kṛṣṇoktaṃ babhāṣe pāṇḍavāgrajaḥ /
na mithyāvādinaṃ kāmāttvāṃ kuryāmahamacyuta

jayopāyamito gatvā bhīṣmaṃ pṛcchāmi bhūtale /
sa hi māmāśiṣā pūrvaṃ vātsalyātsamayojayat

iti niścitya kṛṣṇena bhrātṛbhiśca sahāśu kṛt /
jagāma bhīṣmaśibiraṃ gūḍhacārī yudhiṣṭhiraḥ

sa pramamyānujasakhaḥ śauryarāśiṃ pitāmaham /
papraccha vijayopāyaṃ sa ca pṛṣṭastamabravīt

na taṃ paśyāmi lokeṣu vīro māṃ vijayeta yaḥ /
jayalābhe ca yuṣmākaṃ mayi jīvati kā kathā

na viśastrena saṃtraste na strīpūrve mameṣavaḥ /
patanti tasmātklīvena māṃ ghātaya śikhaṇḍinā

ukte devavrateneti lajjāvinamitānanaḥ /
akāma iva duḥkhena yayau svaśibiraṃ nṛpaḥ

tataḥ prabhāte vyūheṣu sainyeṣu subhaṭairmithaḥ /
śikhaṇḍipramukhā vīrā parānīkamupādravan

tato bhīṣmaśaraśreṇīlulite rājamaṇḍale /
śikhaṇḍī dhutakodaṇḍaścaṇḍakopastamabhyadhāt

tamabravīcchāntanavaḥ kāmaṃ prahara pārṣata /
nanāma bhīṣmaviśikhāḥ patantyanujane jane

iti vādinamabhyetya maṇḍalīkṛtakārmukaḥ /
śikhaṇḍī niḥśvasankopādāpageyamabhāṣata

jetāraṃ bhārgavasyāpi jānāmi tvāṃ mahaujasam /
yudhi yudhyasva vā mā vā na me jīvangamiṣyasi

uktvaitadbāṇajālena pārṣataḥ samapūrayat /
rakṣyamāṇaḥ samabhyetya paścādgāṇḍīvadhanvanā

bhīṣmo 'pi tamanādṛtya viddhvā kṛṣṇārjunau śaraiḥ /
viveśa pāṇḍavacamūṃ rājaveṇuvanānalaḥ

dhṛṣṭadyumnamukhairvīraiḥ kauravāṇāṃ tarasvinām /
dāruṇo 'tha prahāro 'bhūdrajaḥpihitadiḍbhukhaḥ

tato droṇiprabhṛtayo vīrā droṇasya śāsanāt /
rakṣantaḥ samare bhīṣmaṃ dhanaṃjayamayodhayan

tataḥ śāntanavo rājñāṃ śarairaśanigauravaiḥ /
mauliratnāṃśuśabalaṃ samunmathya virocanam

ākrīḍamiva kālasya vidhāya kadanaṃ raṇe /
abravītkūṇitamanā dūrādeva yudhiṣṭhiram

vadhāya kuru kaunteya yatnaṃ me nṛpatikṣayāt /
viṣaṇṇo 'haṃ bhṛśaṃ putra raudreṇānena karmaṇā

iti vādini gāṅgeye śithilīkṛtakārmuke /
sṛñjayāḥ saha pāñcālaiḥ somakaiśca sahādravan

tataḥ kurucamūvīrāḥ pāṇḍavānāṃ mahārathān /
āvārya bhīṣmarakṣāyai dvandvaṃ yuddhāni cakrire

atha gāṅgeyaviśikhairaprayatnojjhitairapi /
avartata mahāraudro rājajīvitasaṃkṣayaḥ

tamabhyadhāvadākarṇākṛṣṭakodaṇḍalaḥ /
śikhaṇḍī khaṇḍaparaśuprabhāvaṃ phalguṇeritaḥ

svayaṃ duryodhanenātha preritāṃ vīkṣya vāhinīm /
tasminsvabhaṭasaṃhāre vartamāne pitāmahaḥ

udīrya ghoraṃ divyāstramabhyadhāvaddhanaṃjayam /
athārjunasyāgrametya śikhaṇḍini puraḥsthite

vimānā iva gāṅgeyo mahāstraṃ saṃjahāra tat /
brahmalokābikāmeṣu yudhyamāneṣu rājasu

vīrāṇāṃ bhīṣmaviśikhairayuteṣu patatsu ca /
dārayantaṃ parānīkaṃ tametya vasavo 'bruvan

bhīṣma saṃnyāsakālo 'yaṃ tavāsmadabhikāṅkṣitaḥ /
tataḥ ślathodyame tasminprasanne bhuvanatraye

arjunapramukhāḥ sarve sāyakaistamapūrayan /
chidyamāneṣu bāleṣu tasya tūrṇaṃ kirīṭinā

śikhaṇḍī prāhiṇottasmai hemapuṅkhaśarāvalīm /
śaikhaṇḍīṃ śaramālāṃ tāṃ śairoṣīmiva peśalām

jagrāha prahasanbhīṣmaḥ kṣaṇaṃ sthagitakārmukaḥ /
duryodhanasamādiṣṭānbhīṣmasya ratharakṣiṇaḥ

mohayanbāṇajālena phalguṇastamavākirat /
vidāryamāṇo nīrandhrairgāṇḍīvānniḥsṛtaiḥ śaraiḥ

duḥśāsanaṃ pārśvagataṃ bhīṣmaḥ sasmitamabravīt /
naite śikhaṇḍino bāṇāḥ śilāsaṃghātabhedinaḥ

viśanti mama marmāṇi bilaṃ viṣadharā iva /
ete te vajrasaṃsparśā nivātakavacacchidaḥ

śarīrahāriṇo ghorāḥ kirātaraṇasākṣiṇaḥ /
ityuktvā pāṇḍuputrāya śaktiṃ cikṣepa śaktimān

tāṃ ca śakrasutastūrṇaṃ cakāra viśikhaistridhā /
sarvāyudheṣu cchinneṣu tato gāṇḍīvadhanvanā

kṣaṇādbabhūva durlakṣyo bhīṣmo nirvivaraiḥ śaraiḥ /
yudhyamāneṣu vīreṣu bhūtāviṣṭeṣvivākulam

dārume tumule tasminnirvibhāge baladvaye /
aparāhṇe rathādbhīṣmaḥ sahasrāṃśurivāparaḥ

aspṛṣṭabhūmirviśikhaiḥ papāta mahasāṃ nidhiḥ /
tasminnipatite vīre ketau sarvadhanuṣmatām

mahatāmapi vīrāṇāṃ hṛdayāni cakampire /
tato nivṛtte saṃgrāme hāhākāre nabhaḥspṛśiḥ

divyaṃ bheje nijaṃ bhāvamaluptātmā pitāmahaḥ /
ākampamāne bhuvane vāguvācāśarīriṇī

bhīṣma kālaṃ pratīkṣasva yogavānuttarāyaṇam /
sarvajña dhāraya prāṇānsvacchandanidhano hṛdi

śrutvaitatparamaṃ yogamāsasāda suravrataḥ /
tatastridaśavāhinyā visṛṣṭa haṃsarūpiṇaḥ

tamevārthaṃ samabhyetya munayo bhīṣmamabruvan /
sthito 'smīti ca gāṅgeyo nigadya yaśasāṃ nidhiḥ

iratalpe gataḥ sarvānkurūnbhītānasāntvayat /
praṇatānatha saṃprāptānpunaḥ kauravapāṇḍavān

aśrupūrṇekṣaṇānūce saṃbhāvya kurupuṃgavaḥ /
dhāraṇaṃ lambamānasya śiraso me vidhīyatām

śrutvaitadupadhāneṣu samānīteṣu rājabhiḥ /
jagrāha śāsanāttasya tribhiḥ pārthaḥ śaraiḥ śiraḥ

bhīṣmastatkarmatuṣṭo 'tha praśaśaṃsa dhanaṃjayam /
pāṇḍavaiḥ kriyatāṃ saṃdhirityuvāca ca kauravam

***** daśamo yuddhadivasaḥ || 31 || *****
tato rajanyāṃ yātāyāmupāviṣṭeṣu rājasu /
sevyamāno munijanairbhīṣmo jalamayācata

maṇikāñcanacitreṣu kalaśeṣvamalāmbhasaḥ /
samānīteṣu bhūpālairvyadhānmeghāstramarjunaḥ

tadudbhūtena payasā gāṅgeyastena tarpitaḥ /
narāvatāraṃ prītātmā sādaraṃ tamapūjayat

mahāratheṣu yāteṣu samāmantryāpagāsutam /
karṇaḥ prasādayāmāsa tadabhyarcya kṛtāñjaliḥ

tamuvāca prasannātmā vītamanyuḥ pitāmahaḥ /
bhajasva pārtheṣu śamaṃ vīrāste bhrātarastava

vaikartanastadākarṇya jagāda vinatānanaḥ /
jāne sarvamavaśyaṃ tu bhavitavyamidaṃ prabho

kiṃtu duryodhanasyārthe suhṛdo mānakāriṇaḥ /
anujānīhi māṃ tāta samarāya samudyatam

iti bruvāṇo bhīṣmeṇa so 'nujñāto varūthinīm /
prayayau kuruputrāṇāṃ rathena ghananādinā

atha kuruvṛṣabāṇāmaṅgarājotsukānāṃ paraparibhavadīkṣābhagnamānādarāṇām /
patihitamanīkaṃ sāmyamāpa drutānāṃ sarayapavanapānīkampitānāṃ vanānām