Bhāratamañjarī 6-19 · Chapter 14

iti śāntiparvaṇi dānadharmāḥ samāptāḥ
samāptaṃ śāntiparva
Āśvamedhikaṃ parvan
nārāyaṇaṃ namaskṛtya naraṃ caiva narottamam /
devīṃ sarasvatīṃ vyāsaṃ tato jayamudīrayet

yaśaḥ śaśāṅkośeṣe 'staṃ prayāte bhīṣmabhāsvati /
papāta dharmatanayaḥ śokamlānamukhāmbujaḥ

mohamūrcchākule tasminviṣaṇṇe saha bāndhavaiḥ /
śucaṃ saṃstambhya śanakairdhṛtarāṣṭrastamabravīt

uttiṣṭha pṛthivīpāla na dhairyaṃ hātumarhasi /
saṃsārāsāracaritaṃ munibhyaḥ śrutavānasi

śokasyāvasaro nāyaṃ svadharmādacyutasya te /
pāhi sattvasudhāsindho prajāpatiriva prajāḥ

śocitavyo mamaivāyaṃ kālaḥ samucito 'dhunā /
vidurasya giro yena na śrutāḥ sunayojjvalāḥ

ityukte dhṛtarāṣṭreṇa kṛṣṇaḥ kṣmāpālamabhyadhāt /
mā śucaḥ kṣatradharmeṇa labdhāṃ bhuṅkṣva mahīmimām

duḥkhibhyo hi palāyante dhairyāyattā vibhūtayaḥ /
yajasva vijayī rājanpāpaśaṅkāpanuttaye

aśvamedhena vidhinā yātastadyogyatāmasi /
etanmunivacaḥ śrutvā yajñe baddhamanorathaḥ

dhanamūlāṃ kriyaṃ matvā rājyakośamacintayat /
so 'tha sarvānsamāhūya kośādhyakṣānmakhotsukaḥ

tebhyaḥ śuśrāva sarvasvaṃ kṣayitaṃ yudhi kauravaiḥ /
aśvamedhe nirāśaṃ taṃ vijñāya draviṇaṃ vinā

uvāca karuṇāsindhurvyāso nirvāpayanniva /
maruttasya kṣitipateryajñaśeṣaṃ himācale

kāñcanaṃ vidyate bhūri yajñārthaṃ tadavāpsyasi /
śrutvaitatpāṇḍuputreṇa maruttasya mahīpateḥ

mahāyajñakathāṃ pṛṣṭaḥ provāca munipuṃgavaḥ /
mahīyasi manorvaṃśe mahatāṃ yaśasāṃ nidhiḥ

karaṃdhamakule śrīmānmarutto 'bhūnmahīpatiḥ /
tamandraḥ spardhate nityaṃ na sa śaknoti ceṣṭitaiḥ

yadā tadā manyutapto rahaḥ prāha bṛhaspatim /
karaṃdhamo 'bhavadyājyastvatpituḥ pṛthivīpatiḥ

kramāttavāpi tatsūnurmaruttastadguṇādhikaḥ /
kiṃtu taddarpasaṃgharṣādbhavantamahamarthaye

na yājakapadaṃ tasya gantavyaṃ bhavatādhunā /
ityarthito maghavatā tathetyūce bṛhaspatiḥ

adyaprabhṛti martyo me na yājya iti saṃvidā /
atrāntare narapatirmarutto vipulaṃ kratum

āhartuṃ kṛtasaṃkalpo bṛhaspatimupāyayau /
sa tenābhyarthito yatnādyājako 'stu bhavāniti

na cakārābhyupagamaṃ śakrapraṇayayantritaḥ /
pratyākhyātaḥ sa guruṇā rājā lajjānatānanaḥ

vrajanvinaṣṭasaṃkalpo dadarśa pathi nāradam /
nārado 'pi tamālokya pṛṣṭvā śrutvā ca tatkathām

uvāca tyaja saṃtāpaṃ mā rājanvimanā bhava /
saṃvartākhyo nidhirdhāmnāmanujo 'sti bṛhaspateḥ

svacchandacārī yogīndro vārāṇasyāṃ sa vartate /
saṃvartaḥ sa parijñeyo vrajethāḥ śaraṇaṃ tu tam

nivedito 'haṃ keneti pṛṣṭastena tvamānataḥ /
bravīthā nārado mahyaṃ tvāmihasthaṃ nyavedayat

kathayitvā prahṛṣṭaśca jvalitaṃ jātavedasam /
ityuktvā prārthayethāstaṃ yājakaṃ yajvanāṃ varaḥ

nāradenetyabhihite bhūpālo harṣanirbharaḥ /
taduktaṃ vidadhe sarvaṃ gatvā vāraṇasīṃ svayam

saṃtyaktonmattarūpaṃ sa prāpya taṃ yājakaṃ nṛpaḥ /
cakāra tadanujñātastapo himagirestaṭe

tapasā yajñavittārthī devamārādhya śaṃkaram /
anekameruvipulaṃ lebhe hema sa pārthivaḥ

haimeṣu sarvabhāṇḍeṣu raciteṣvatha śilpibhiḥ /
saṃpūrṇo yajñasaṃbhāraḥ prāvartata mahībhujaḥ

samṛddhimatulāṃ tasya yajñe jñātvā bṛhaspatiḥ /
saṃvartakaṃ yājakaṃ ca saṃtaptastanutāṃ yayau

sa śokakāraṇaṃ pṛṣṭaḥ śakreṇa mlānamānasaḥ /
maruttayajñavibhavaṃ bhrātṛspardhākulo 'vadat

tataḥ śatakratustasya prītye guruvatsalaḥ /
uvāca vahnimāhūya maruttaṃ vraja pārthivam

gatvā madvacasā vācyaḥ sa ca rājā tvayā kratau /
yathā saṃvartakaṃ tyaktvā bhavedyājyo bṛhaspateḥ

ityuktaḥ surarājena gatvā vahnirnarādhipam /
śakrasaṃdeśamavadanna ca rājābhyamanyata

tataḥ pratinivṛtto 'tha punargaccheti vajriṇā /
preritaḥ pāvako 'vādītsaṃvartabhayakampitaḥ

sa tatra brahmacārī māmūce saṃvartakaḥ krudhā /
tejorāśiḥ śapeyaṃ tvāṃ sameṣyasi punaryadi

śrutvaitatkātaro 'sīti taṃ jagāda puraṃdaraḥ /
jvalanaḥ pratyuvācātha taṃ kopahaviṣā jvalan

aho nu brahmakopāgnirahalyāvallabhasya te /
pramādādatha kopādvā mohādvā śakra vismṛtaḥ

sa yadā cyavanaḥ kopānmahādaṃṣṭraṃ mahāsuram /
asṛjattvadvadhāyograṃ tadā dhairyaṃ kva te gatam

duḥsahā brāhmaṇaruṣo nirdahanti jagatkṣaṇāt /
ukte hutāśaneneti na śaktaḥ kiṃcidabravīt

visṛṣṭaḥ punarindreṇa gandharvādhipatirnṛpam /
ūce guruṃ bhajasveti na ca rājā tamagrahīt

tataḥ kruddhaḥ svayaṃ vajrī garjangambhīraniḥsvanaḥ /
yajñāṅganaṃ narapatervyomnā meghairvṛto yayau

prabhāvenātha mahatā saṃvartasyogratejasaḥ /
śatamanyusamutsṛṣṭaṃ vajraṃ meghānsamāviśat

tanmantraśaktyā vivaśaḥ samāhūto 'tha vṛtrahā /
āyayau saha bhāgārhaistridaśaiḥ somapīthibhiḥ

pūjito 'tha maruttena śāntamanyuḥ śatakratuḥ /
yajñakriyāparikare paricaryāparo 'bhavat

tadājñayā surāḥ sarve yajñasaṃbhārakāriṇaḥ /
babhūvurbhūmipālasya nideśavaśagāściram

evaṃ tasyendrajayino rājñaḥ saṃvartatejasā /
nirvighnaḥ pūrṇatāṃ prāpa yajñaḥ kanakavarṣiṇaḥ

taccheṣadviṇena tvaṃ hayamedhamahāmakham /
prayataḥ prāpnuhītyuktāva virarāma munīśvaraḥ

***** saṃvartamaruttīyam || 1 || *****
kṛṣṇenāśvārasyamāno 'tha munibhirbhrātṛbhistathā /
aśvamedhadhṛtodyogo dhṛtiṃ lebhe yudhiṣṭhiraḥ

draṣṭuṃ tataḥ prajākāryaṃ pravṛtte dharmanandane /
antardadhe tamāmantrya sarvaṃ tanmunimaṇḍalam

hemaratnalatākānte vikāsikanakāmbuje /
atha kṛṣṇau sabhodyāne svairaṃ prītyā vijahvatuḥ

kathānte tatra kaṃsāriṃ subhadrāvallabho 'vadat /
yuddhārambhe tvayoktaṃ yatsarvaṃ tanmama vismṛtam

visṛṣṭaṃ paramārthajña jñānaṃ tatpunarucyatām /
ityuktaḥ pāṇḍuputreṇa viṣaṇṇaḥ keśavo 'bravīt

aho tvayāvadhānena na śrutaṃ tadabuddhinā /
na śakyate punarvaktuṃ tathāpi śrūyatāmidam

brāhmaṇena purā kaścijjīvanmuktadaśāṃ śritaḥ /
siddhaḥ pṛṣṭo 'vadatsarvaṃ vijñāya bhavavibhramam

asminnasatyasaṃghāte bhūtānāṃ pāñcabhautike /
guṇairnibaddhaḥ pakṣīva jīvastiṣṭhati pañjare

ahaṃkāraikasārāṇāṃ dehināṃ vismṛtātmanām /
cakravatparivartante sukhaduḥkhakṣayodayāḥ

dehānte karmasaṃsargājjantavaḥ śubhaduṣkṛtaiḥ /
tārārūpā vimānāni bhajante narakāṇi vā

tato bhogakṣaye garbhaṃ jarāyupariveṣṭitam /
śukrarūpo viśatyātmā yonyāṃ śoṇitasaṃplutaḥ

niḥśvāsāgrairyathā vāri līyate darpaṇodare /
nirdhūtasya yathā vahnerūṣmā vyomni prasarpati

yathā vā kusumāmodaḥ praviśatyantare 'nile /
rāgaḥ saṃkrāntimāyāti sarandhre sphaṭike yathā

tathā durlakṣyasaṃcāro garbhamātmā pradhāvati /
bibhrāṇo vāsanāmantaḥ śītasparśamivānilaḥ

jātasya jāyate tasya vardhamānasya vardhate /
tṛṣṇātanturbhi(rvi)sasyeva śuṣyato na tu śuṣyati

vivekādduḥkhasaṃyogādvairāgyaṃ gāḍhamāśritaḥ /
nāhamasasmīti mantreṇa mucyate brahmadīkṣitaḥ

pūrvaṃ bhāveṣu nirvāṇastataḥ kāraṇavṛttiṣu /
nirālambadaśāmetya yogī brahmaṇi līyate

sarvataḥ pāṇicaraṇaṃ sarvavyāpinamavyayam /
ātmānaṃ sa parijñāya satyāmetāṃ bhavasthitim

ityuktvā brāhmaṇaṃ siddhaḥ sahasāntaradhīyata /
idamanyacca kaunteya śreyase prayataḥ śṛṇu

uvāca brāhmaṇī kācidbhartāraṃ vijane purā /
gamiṣyāmi gatiṃ sādhvī kāmahaṃ tvatparāyaṇā

iti pṛṣṭastayā viprastāmuvāca smitānanaḥ /
agnirvaiśvānaro nāma sthito 'ntaḥ kila dehinām

indriyāṇi manobuddhistasya saptārciṣa smṛtāḥ /
viṣayāścāsya samidho bhoktāraḥ sapta cartvijaḥ /
tasminhate sarvamidaṃ jāyate ca punaḥ punaḥ

indriyāṇīva manaso manasteṣāṃ ca sarvadā /
parasparopakāreṇa prīyate dehasaṃgame

manobuddhiprabhṛtayaḥ saptendriyamṛgāḥ purā /
atarkeṇaiva nihatā rājñā yogamayaiḥ śaraiḥ

jitendriyasya no kiṃcididaṃ tasyaiva cākhilam /
viṣayā viṣayasyeti janako vipramabhyadāt

tasmādasaktamanasā dṛṣṭvā sarvamidaṃ mayā /
tyaktaṃ parāvarajñena bhavāvirbhāvaśāntaye

gatistavāpi kalyāṇi madbhāvasadṛśī sadā /
brahmāraṇīsamudbhūtaṃ jānīhi jñānapāvakam

etatpatyurvacaḥ śrutvā brāhmaṇī tattvadarśinī /
kṣetrakṣetrajñavijñānaṃ paraṃ prāvīṇyamāyayau

śrutvaitadarjunaḥ kṛṣṇaṃ babhāṣe vismayākulaḥ /
yogīndro brāhmaṇaḥ ko 'sau kvāste vā sā ca tadvadhūḥ

ityuktaḥ kaiṭabhārātiḥ punarūce dhanaṃjayam /
śiṣyeṇa pṛṣṭaḥ sarvajñaḥ purā gururabhāṣata

bṛhaspatiprabhṛtibhirmunīndraiḥ sarvadarśibhiḥ /
śruteyaṃ bhavavicchedakathā proktā svayaṃbhuvā

guṇatrayanibaddhānāṃ karmabhedavikāriṇām /
bhāvo 'yaṃ prāṇināṃ śaśvadalpo 'pyāyātyanalpatām

vicitraḥ kila sargo 'yamahaṃkārādvinirgataḥ /
tasminneva layaṃ yāti śvabhre puṣpacayo yathā

janmāntaraśatābhyāsādantaraṅgatvamāgataḥ /
ahaṃkāraḥ sa manaso līlayā kena bhedyate

avidyā tānavenaiva śanaiḥ saṃnyastakarmaṇaḥ /
vikalpadvaṃdvaviratau jñānālokaḥ prajāyate

jñānāgninā pravṛddhena dagdhvā bhavaviṣadrumam /
sarvagranthivinirmuktaḥ paramāmṛtamaśnute

iti brahmoditaṃ jñānaṃ śiṣyāya guruṇā purā /
nānānidarśanopetaṃ kathitaṃ bhavaśāntaye

ahameva guruḥ pārtha śiṣyaśca tvaṃ samo mama /
ityuktvā jñānasarvasvaṃ virarāma janārdanaḥ

***** anugītāḥ || 2 || *****
tato vihṛtya suciraṃ prītyā kṛṣṇaḥ kirīṭinā /
dvārakāgamane cakre matiṃ bandhujanotsukaḥ

sa gatvā nṛpamāmantrya dhṛtarāṣṭraṃ ca sānugam /
āśvāsya kṛṣṇāṃ kuntīṃ ca praṇamyādāya cānujām

aśvamedhe sameṣyāmi punaḥ kṛtveti saṃvidam /
dārukapreritarathaḥ pratasthe garuḍadhvajaḥ

sa vrajansātyakisakhastejorañjitadiṅmukhaḥ /
uttaṅkaṃ tapasāṃ rāśimāluloke muniḥ pathi

taṃ dṛṣṭvā sādaraṃ śauriḥ praṇamya racitāñjaliḥ /
kuśalaṃ vītavairāṇāṃ papracchāśramavāsinām

uttaṅko 'pi hariṃ dṛṣṭvā prītipūrvamanāmayam /
ūce kaccittvayā sāmnā rakṣitaṃ bhārataṃ kulam

kaccidduryodhano rājā dharmaputraśca sānugau /
sthitau vigatasaṃgharṣau tvadbuddhyā paitrike pade

ityuttaṅkena govindaḥ pṛṣṭastaṃ pratyabhāṣata /
bhāratānāṃ mune yatnaḥ paraḥ saṃdhau kṛto mayā

hitamukto 'pi bahuśaḥ kauravo vidurādibhiḥ /
na jagrāha kṛtāntena daivena ca vimohitaḥ

nirbandhātkururājasya rādheyamunivartinaḥ /
nihatāḥ pārthivāḥ sarve śeṣāḥ pañcaiva pāṇḍavāḥ

etcchrutvā muniḥ kopājjvalitānalasaṃnibhaḥ /
tamūce vakramanasā te tvayaiva nipātitāḥ

śaktenāpi tvayā kṛṣṇa yasmātpārthahitaiṣiṇā /
upekṣitaḥ kṣayo ghorastasmācchāpaṃ dadāni te

uttaṅkenetyabhihite babhāṣe kaiṭabhāntakaḥ /
jānāmi tejasāṃ rāśiṃ tvāmuttaṅka taponidhim

kiṃtu nārhasi kopena tīvraṃ kartuṃ tapovyayam /
tamo hi duḥsahaṃ ghoraṃ krodho mṛtyuḥ śarīriṇām

nādyāpi naṣṭamoho 'si nanu nādyāpi paśyasi /
kiṃ na jānāsi māṃ sarvaṃ sarvavyāpinamavyayam

sarvadevamayaḥ kartā viśvātmā jagatāmaham /
ityukte puṣkarākṣeṇa śāntakopo 'bravīnmuniḥ

jāne tvāṃ kiṃ tu taddivyaṃ draṣṭumicchāmi te vapuḥ /
ityarthito munīndreṇa viśvāviṣkāralīlayā

śaktiprakāśaparipūritasaṃvidagre rekhāsphuraddruhiṇarudramahendracandram /
dhāmatrayottaramanaśvaramaiśvaraṃ ta ddṛṣṭvā vapurmunivaro 'bhavadastamohaḥ

tataḥ stotrairuttaṅkena viṣṇurbhaktyā namaskṛtaḥ /
tadgirā svavapuḥ saumyaṃ tadeva punarādade

saṃnidhi te vidhāsyāmi sarvataḥ smaraṇānmune /
ityuktvā taṃ samāmantrya prāyādgaruḍaketanaḥ

tataḥ kadācitsa munirjalārthī marudhanvasu /
carandadarśa caṇḍālaṃ dhanuṣpāṇiṃ jalapradam

gṛhāṇetyasakṛttena prārthito 'pi muniryadā /
na jagrāhāśuci jalamuttaṅko 'ntardadhe tadā

tataḥ sametya bhagavānsvayaṃ viṣṇustamabravīt /
mune madvacasā śakraḥ sudhāṃ tvāṃ dātumāyayau

jalado na sa cāṇḍālo mithyā śaṅkā tavābhavat /
pratyākhyātaḥ sa yanmohānna tadyuktaṃ tvayā kṛtam

adhunā madvarātte 'stu sāmṛtairjalanirjharaiḥ /
pūriteyaṃ marumahī nigadyeti yayau hariḥ

evaṃ mahāprabhāvo 'sāvuttaṅko yaśasāṃ nidhiḥ /
durlabhaṃ darśanaṃ viṣṇoḥ sānugrahamavāptavān

āsādya paramaṃ jñānaṃ yaḥ purā gurusevayā /
taddakṣiṇārthī prayayau rājñaḥ pauṣasya mandiram

kuṇḍale prāpya rucire vitīrṇe pauṣabhāryayā /
hṛte ca dṛṣṭvā nāśena jīviteśarasātalam

jitvā nāgānsamāsādya te purā ratnakuṇḍale /
yo dadau gurubhāryāyai kṛtakṛtyo babhūva ca

***** uttaṅkaviśvarūpadarśanam || 3 || *****
yāte dvāravatīṃ kṛṣṇe yādavānandadāyini /
yudhiṣṭhiraḥ sahāmātyo yajñakāryamacintayat

sa gatvā sānujaḥ śailaṃ śrīkaṇṭhadayitaṃ śanaiḥ /
ārādhya tapasā rudraṃ devadevaṃ pinākinam

upahāreṇa vidhinā muhūrte śubhaśaṃsini /
abhyarcya guhyakādhīśaṃ maṇibhadraṃ ca sānugam

munibhistarpite vahnau dhaumyena ca purodhasā /
lebhe pāṇaḍusutaḥ śrīmānmaruttanihitaṃ nidhim

pṛthupramāṇarūpāṇi bhāsvanti vividhāni ca /
hemabhāṇḍasahasrāṇi ratnabhāraśatāni ca

uṣṭrāṇāṃ śakaṭānāṃ ca hayānāṃ kariṇāṃ tathā /
daśalakṣāṇi tadvittamanayaddhastināpuram

mahiṣāṇāṃ svarāṇāṃ ca puruṣāṇāṃ gavāṃ tathā /
na babhūva tadā saṃkhyā vahatāṃ bhūri kāñcanam

akṣayyaṃ kośamādāya prāpte 'tha svapuraṃ nṛpe /
sahito vṛṣṇibhiḥ sarvairāyayau madhusūdanaḥ

etasminneva samaye saubhadramahiṣī sutam /
droṇaputrāstranirdagdhamasūta gatajīvitam

uttarāyāḥ suto jātaḥ strīṇāmityutsavasvanaḥ /
vyasurvyasuścetyabhavatsa eva rodanadhvaniḥ

bālapravālakalikākomalāvayave śiśau /
jāte nirjīvite śokānmumoha jananījanaḥ

tataḥ kuntī subhadrā ca sametya karuṇānidhim /
bāṣpasaṃdigdhayā vācā rukmiṇīpatimūcatuḥ

svasreyasya yaśomūrterabhimanyoḥ priyasya te /
bālasya bālastanayo jāto 'dya gatajīvanaḥ

karuṇārdre niśamyaitadbhagavānbhūtabhāvanaḥ /
viveśa sūtikāveśma śauriḥ kalaśabhūṣitam

ratnadīptāṃśukapiśaṃ dīptauṣadhiśatācitam /
mantrairbhiṣagbhiḥ śikhinā śastrairastraiśca rakṣitam

athottarā prāpya saṃjñāṃ śītavāribhirukṣitā /
tamaṅke śiśumādāya vilalāpa hareḥ puraḥ

tato jaladagambhīraghoṣaḥ śaurirabhāṣata /
dṛśā pīyūṣavarṣiṇyā vilokya śanakaiḥ śiśum

satyāddvijebhyo dharmācca yathā nānyatpriyaṃ mama /
tena satyena bālo 'yamastramukto 'dya jīvatu

mādhavenetyabhihite labdhajīvaḥ sa bālakaḥ /
sūryāṃśubhiriva spṛṣṭo babhūvāmbujakorakaḥ

tataḥ pravṛtte vipule sahasā nagarotsave /
nabhaścarāṇāmapyāsītyasādhu sādhviti niḥsvanaḥ

parikṣīṇe kurulaye yasmājjāto 'yamarbhakaḥ /
tasmātparīkṣinnāmnāstu jagādetyatha keśavaḥ

***** pirakṣijjanma || 4 || *****
vyāsājñayā tato rājño yajñayogyo mahādhanaḥ /
prāvartatoruratnāḍhyaḥ saṃbhāro bahukautukaḥ

athotsṛjya vidhānena kṛṣṇaśāraṃ turaṅgamam /
rakṣitaṃ pāṇḍuputreṇa svayaṃ gāṇḍīvadhanvanā

babhūva caitraśuklānte dīkṣito dharmanandanaḥ /
hemamālādharo daṇḍī muṇḍaḥ kṛṣṇājināvṛtaḥ

tatastrigartaviṣayaṃ prāpte yajñaturaṅgame /
rājaputrairabhūdyuddhaṃ tumulaṃ savyasācinaḥ

yudhiṣṭhirājñā tasyābhūnna hantavyā nṛpā iti /
tāṃ smarannāvadhīdbhūpānsa vijigye tu kevalam

prāgjyotiṣeśvaraṃ vīraṃ bhagadattātmajaṃ yudhi /
tribhirdinairvajradattaṃ jitvā kuñjarayodhinm

saindhavairakarodyuddhaṃ suciraṃ krūrayodhibhiḥ /
pādacārī raṇe pārtho rathakuñjaravartibhiḥ

pautraṃ jayadrathasyātha śiśumādāya duḥśalā /
savyasācinamāsādya babhāṣe sāśrulocanā

bhrātastvayi samāyāte tvannāmaiva niśamya me /
putro jāyadrathiryātaḥ pañcatāṃ sphaṭitāśayaḥ

tatsuto mama pautro 'yaṃ svasrayatanayastava /
rakṣyaḥ sarvātmanetyuktvā ruroda dhṛtarāṣṭrajā

viṣaṇṇāstāṃ samāśvāsya pārtho bāṣpārdralocanaḥ /
nindannijāṃ kṣattrajātiṃ jagāma turagānugaḥ

śvetāśvamaśvagoptāraṃ maṇipūrapuraṃ tataḥ /
prāptaṃ pratyudyayau rājā tatputro babhruvāhanaḥ

pūjāmādāya tanayaṃ namraṃ dṛṣṭvā puraḥ sthitam /
yuddhārthī śakratanayo nābhyanandatkṛtāñjalim

dṛṣṭvā māṃ sāyudhaṃ prāptaṃ sāmnā pratyudyato 'si kim /
dhiktvāmakṣattriyaṃ bhīrumityūce taṃ dhanaṃjayaḥ

atrāntare mahīṃ bhittvā samutthāyoragāṅganā /
bhartuḥ pāṇḍusutasyāgre babhāṣe babhruvāhanam

yuddhena tuṣyati pitā tavāyaṃ subhaṭapriyaḥ /
vīrasaṃtānasaphalā śauryaśrīrabhimāninām

ityuktaḥ sa tayā dhanvī rathaṃ hemaharidhvajam /
āruhyāmuktakavacaḥ pitaraṃ yoddhumāyayau

tataḥ śaraśatairviddhastena śrānto dhanaṃjayaḥ /
ānandanirbharastasya praśaśaṃsa parākramam

gāṇḍīvadhanvanā muktānnārācānvajragauravān /
aprāptāneva ciccheda śaraiścitrāṅgadāsutaḥ

athonmamātha putrasya syandanaṃ śakranandanaḥ /
hemapattralatācitramudyānamiva mārutaḥ

vilokya virathaṃ putraṃ yudhyamānamasaṃbhramam /
mandaprayatnaśithilānprāhiṇodvijayaḥ śarān

atha tīkṣṇena hṛdaye pattriṇā babhruvāhanaḥ /
vajreṇevācalabhidā jaghāna śvetavāhanam

avadhye sarvabhūtānāṃ putreṇa nihater'june /
nādo babhūva gagane hā heti tridivaukasām

pitaraṃ patitaṃ dṛṣṭvā śakraketumiva kṣitau /
mumoha nindannātmānaṃ tyaktacāpor'junātmajaḥ

atha citrāṅgadābhyetya putreṇa nihataṃ patim /
vilokya śokasaṃpannā vilalāpa sumadhyamā

aho bata cirādetya jāyāyā mama mandiram /
āryaputra tvayātithyaṃ prāptaṃ putrādbalīyasaḥ

aho nu hatabhāgyāhaṃ ciraviproṣitaṃ patim /
tvāṃ prāptaṃ nayanānandaṃ paśyāmi nihataṃ kṣitau

ityuktvā gāḍhamāliṅgya sā patiṃ bāṣpagadgadā /
ulūpī nāgatanayā bhuvi citrāṅgadāpatat

labdhasaṃjño 'tha śokārtaḥ pralapanbabhruvāhanaḥ /
śarīratyāganiyamaṃ cakre kilbiṣakūṇitaḥ

tataḥ pradadhyau manasā nāgī saṃjīvanaṃ maṇim /
sa ca dhyātastayā satyā nāgalokātsamāyayau

spṛṣṭo 'tha hṛdaye tena jīvitaṃ prāpya phalguṇaḥ /
citrāṅgadā ca sahasā śokaṃ tyaktvā hriyaṃ yayau

tato nivedya vṛttāntaṃ jagāda bhujagātmajā /
ulūpī dhairyaladhiṃ suptotthicamivārjunam

śāpo bhīṣmavadhādeṣa dattaste vasubhiḥ purā /
ko 'nyathā tvāṃ raṇe śakto jetuṃ nirjitadhūrjaṭim

matpitā mayi vātsalyācchāpitā vasavaśca te /
ūcustvacchāpanirvāṇaṃ ratnametanmahāprabham

śrutvaitadvismitaḥ pārtho nāgīṃ citrāṅgadāṃ tathā /
parisāntvya śanaiḥ pūjāṃ jagrāha tanayārpitām

tatastaṃ dayitaṃ vīraḥ putramāmantrya pāṇḍavaḥ /
hayānusārī babhrāma vasudhāmabdhimekhalām

sa jitvā magadhādhīśaṃ jarāsaṃdhātmajātmajam /
vaṅgānpuṇḍrānkirātāṃśca dākṣiṇātyānsamāgadhān

gāndhārānsaubalasutānrājaputrānprahāriṇaḥ /
āgantavyaṃ makhe rājñaḥ sarvairityādideśa tān

tataḥ pratinivṛttena turagena sahārjunaḥ /
viveśa pūjitaḥ pauraurvijayī hastināpuram

***** hayotsargaḥ || 5 || *****
tataḥ pravṛtte vidhivadyajñe kanakavarṣiṇaḥ /
rājño munijanākīrṇe prāpteṣvakhilarājasu

jananyā saha bhūpāle saṃprāpte babhruvāhane /
sādaraṃ phalguṇaprītyā pūjite pāṇḍunandanaiḥ

niḥśeṣakalmaṣaploṣadivyadīkṣākṛtakṣaṇaḥ /
kriyāmahīnāṃ vidadhe svayaṃ satyavatīsutaḥ

haimaṃ tatrābhavatsarvamiṣṭakācayanādikam /
yūpabhāṇḍaghanasthālīparyaṅkagṛhatoraṇam

devarṣisiddhagandharvakiṃnarā maṅgalaṃ jaguḥ /
karmāntareṣu yajñasya nanṛtuścāpsarogaṇāḥ

śamite paśusaṅghe ca turagaṃ brāhmaṇottamāḥ /
ālabhanta yathāśāstramupasaṃrodhya pārṣatīm

tataste yājakāstatra vapāmuddhṛtya vājinaḥ /
śrapayitvā śubhaṃ dhūmaṃ pāṇḍavebhyo nyavedayan

tataḥ pūrṇe na vidhinā vyāsāya pṛthivīpatiḥ /
catuḥsamudrarasanāṃ pṛthivīṃ dakṣiṇāṃ dadhau

dattvātha hemakoṭīnāṃ koṭiṃ tadvacasā nṛpaḥ /
brāhmaṇebhyaḥ punaḥ kṣoṇīṃ jagrāha muninārpitām

pūjayitvā narendreṇa mānārheṣvatha rājasu /
visṛṣṭeṣvabhavatko 'pi brahmasaṅghamahotsavaḥ

babhūvustatra vāhinyo madhunaḥ kṣīrasarpiṣām /
babhuśca kulaśailābhā bhakṣyā modakarāśayaḥ

dvijebhyo dīyamāneṣu hemaratneṣu bhūbhujā /
śakrāyudhairiva vyāptā diśo daśa cakāśire

dhṛtarāṣṭraḥ saviduraḥ sañjayaḥ subalātmajāḥ /
tasthurdaivatavattatra pūjyamānā mahībhujā

***** yajñaḥ || 6 || *****
atrāntare hemacitrapārśvo bilamukhodgataḥ /
nakulo laghusaṃcāro yajñabhūmimupāyayau

sa manuṣyagirā prāha janayañjanakautukam /
aho nu saktṛprasthena na tulyo 'yaṃ mahāmakhaḥ

nūnaṃ dānakaṇaḥ śuddhaḥ kṛśo 'pi prathate nṛṇām /
nūnaṃ bahudraviṇatā mithyaivotsavaḍambaraḥ

iti bruvāṇaḥ pṛṣṭo 'sau viprairvismayanirbharaiḥ /
uvāca sraktuprasthasya māhātmyaṃ śrūyatāṃ dvijāḥ

śilocchavṛttirabhavatkurukṣetre purā dvijaḥ /
viśuddhasattvadraviṇaḥ kṛśo bahukuṭumbakaḥ

ghore kadāciddurbhikṣe kṣīṇavṛttiścireṇa saḥ /
kṛcchrātkṣetraśataṃ bhrāntvā saktuprasthamavāptavān

baiśvadevena vidhinā sa kṛtvāvaśyakaṃ gṛhe /
kalatrasahito bhoktuṃ prasthito 'paśyadarthinam

kṣutparītaḥ kṣudhākrāntaṃ sa taṃ dṛṣṭvātithiṃ dvijaḥ /
dadau svamaśanaṃ tasmai saṃtoṣaviṣadāśayaḥ

tadbhuktvā nābhavattasya kṣunnavṛttiryadārthinaḥ /
tadbhāryā tatsutaścāsmai tatsnuṣā ca dadau tadā

sarveṣāṃ bhojanenātha tṛptaḥ so 'tithirabravīt /
dharmastuṣṭo 'smi sattvena mahatī siddhirastu vaḥ

ityuktvāntarhite tasminvimānaistaraṇiprabhaiḥ /
saśarīrā divaṃ prāpuḥ sarve te ślāghyavṛttayaḥ

athāhaṃ saktugandhena samāhūto bilāśrayaḥ /
tāmucchiṣṭabhuvaṃ prāpto bhuktavānyatra so 'tithiḥ

tatpātrasalilaspṛṣṭamekaṃ pārśvamidaṃ mama /
luṭhitaṃ hemaruciraṃ jātaṃ puṇyairivāplutam

dvitīyapārśvacintā me kathaṃ haimaṃ bhavediti /
babhūva suciraṃ tasmātprāpto 'haṃ vasudhādhipam

dvijalakṣasahasrāṇāmiha bhojanabhūmiṣu /
bhrāntasyāpi na saṃjātaḥ ko 'pi kānto lavastanau

tasmānna saktuprasthasya samatāmarhati kratuḥ /
ityuktvā nakulaḥ prāyāccitrakāntiradarśanam

evaṃ yajñasahasrebhyaḥ śreyasī bhāvaśuddhatā /
manasaḥ kila vaimalyaṃ paraṃ brahma pracakṣate

agastyasya purā satre viprā dvādaśavārṣike /
śaśaṃsurbhāvinīṃ ghorāmanāvṛṣṭiṃ parasparam

tato 'gastyaḥ parityajya dravyayajñaṃ mahāmatiḥ /
cakāra stabdhamanasā dhyānayajñaṃ taponidhiḥ

sa eva vasusaṃpannaḥ sarvavitkṛtasaṃnidhiḥ /
kraturbabhūva yenendro vavarṣānandanirbharaḥ

śreyānsattvaviśuddhasya pāṇḍavasyābhavatkratuḥ /
kiṃ tu svakāryānnakulastatra cakre vimānanām

jijñāsurjamadagniṃ prāksvayaṃ krodhaḥ śvavigrahaḥ /
pasparśa jihvayā śrāddhe dhṛtaṃ hi piṭhire payaḥ

krodho 'yamiti vijñāya munistaṃ jñānalocanaḥ /
na śaśāpa tato bhītaḥ krodhaḥ kampākulo 'bhavat

tataste pitaraḥ kruddhā yeṣāṃ śrāddhe dhṛtaṃ payaḥ /
aśapansuciraṃ yena krodho nakulatāṃ yayau

avamānakathāṃ kṛtvā svayaṃ yaudhiṣṭhire kratau /
śāpakṣayaṃ prāpsyasīti tairevāsya kṛto 'vadhiḥ

***** nakulopākhyānam || 7 || *****
iti sakalanarendrairvandyamānasya rājño dvijajanaparipuṣṭaḥ sattvapuṣpaprakāraḥ /
śubhaphalanicayādyo yajñasaṃbhāramūlaścaritatarurudāraḥ satyaśākho rarāja