Bhagavata Purana · Chapter 10.81

BhP_10.81.001/0 śrī-śuka uvāca
sa itthaṃ dvija-mukhyena saha saṅkathayan hariḥ /
sarva-bhūta-mano-'bhijñaḥ smayamāna uvāca tam

brahmaṇyo brāhmaṇaṃ kṛṣṇo bhagavān prahasan priyam /
premṇā nirīkṣaṇenaiva prekṣan khalu satāṃ gatiḥ

BhP_10.81.003/0 śrī-bhagavān uvāca
kim upāyanam ānītaṃ brahman me bhavatā gṛhāt /
aṇv apy upāhṛtaṃ bhaktaiḥ premṇā bhury eva me bhavet /
bhūry apy abhaktopahṛtaṃ na me toṣāya kalpate

patraṃ puṣpaṃ phalaṃ toyaṃ yo me bhaktyā prayacchati /
tad ahaṃ bhakty-upahṛtam aśnāmi prayatātmanaḥ

ity ukto 'pi dviyas tasmai vrīḍitaḥ pataye śriyaḥ /
pṛthuka-prasṛtiṃ rājan na prāyacchad avāṅ-mukhaḥ

sarva-bhūtātma-dṛk sākṣāt tasyāgamana-kāraṇam /
vijṅāyācintayan nāyaṃ śrī-kāmo mābhajat purā

patnyāḥ pati-vratāyās tu sakhā priya-cikīrṣayā /
prāpto mām asya dāsyāmi sampado 'martya-durlabhāḥ

itthaṃ vicintya vasanāc cīra-baddhān dvi-janmanaḥ /
svayaṃ jahāra kim idam iti pṛthuka-taṇḍulān

nanv etad upanītaṃ me parama-prīṇanaṃ sakhe /
tarpayanty aṅga māṃ viśvam ete pṛthuka-taṇḍulāḥ

iti muṣṭiṃ sakṛj jagdhvā dvitīyāṃ jagdhum ādade /
tāvac chrīr jagṛhe hastaṃ tat-parā parameṣṭhinaḥ

etāvatālaṃ viśvātman sarva-sampat-samṛddhaye /
asmin loke 'tha vāmuṣmin puṃsas tvat-toṣa-kāraṇam

brāhmaṇas tāṃ tu rajanīm uṣitvācyuta-mandire /
bhuktvā pītvā sukhaṃ mene ātmānaṃ svar-gataṃ yathā

śvo-bhūte viśva-bhāvena sva-sukhenābhivanditaḥ /
jagāma svālayaṃ tāta pathy anavrajya nanditaḥ

sa cālabdhvā dhanaṃ kṛṣṇān na tu yācitavān svayam /
sva-gṛhān vrīḍito 'gacchan mahad-darśana-nirvṛtaḥ

aho brahmaṇya-devasya dṛṣṭā brahmaṇyatā mayā /
yad daridratamo lakṣmīm āśliṣṭo bibhratorasi

kvāhaṃ daridraḥ pāpīyān kva kṛṣṇaḥ śrī-niketanaḥ /
brahma-bandhur iti smāhaṃ bāhubhyāṃ parirambhitaḥ

nivāsitaḥ priyā-juṣṭe paryaṅke bhrātaro yathā /
mahiṣyā vījitaḥ śrānto bāla-vyajana-hastayā

śuśrūṣayā paramayā pāda-saṃvāhanādibhiḥ /
pūjito deva-devena vipra-devena deva-vat

svargāpavargayoḥ puṃsāṃ rasāyāṃ bhuvi sampadām /
sarvāsām api siddhīnāṃ mūlaṃ tac-caraṇārcanam

adhano 'yaṃ dhanaṃ prāpya mādyann uccair na māṃ smaret /
iti kāruṇiko nūnaṃ dhanaṃ me 'bhūri nādadāt

iti tac cintayann antaḥ prāpto niya-gṛhāntikam /
sūryānalendu-saṅkāśair vimānaiḥ sarvato vṛtam

vicitropavanodyānaiḥ kūjad-dvija-kulākulaiḥ /
protphulla-kamudāmbhoja- kahlārotpala-vāribhiḥ

juṣṭaṃ sv-alaṅkṛtaiḥ pumbhiḥ strībhiś ca hariṇākṣibhiḥ /
kim idaṃ kasya vā sthānaṃ kathaṃ tad idam ity abhūt

evaṃ mīmāṃsamānaṃ taṃ narā nāryo 'mara-prabhāḥ /
pratyagṛhṇan mahā-bhāgaṃ gīta-vādyena bhūyasā

patim āgatam ākarṇya patny uddharṣāti-sambhramā /
niścakrāma gṛhāt tūrṇaṃ rūpiṇī śrīr ivālayāt

pati-vratā patiṃ dṛṣṭvā premotkaṇṭhāśru-locanā /
mīlitākṣy anamad buddhyā manasā pariṣasvaje

patnīṃ vīkṣya visphurantīṃ devīṃ vaimānikīm iva /
dāsīnāṃ niṣka-kaṇṭhīnāṃ madhye bhāntīṃ sa vismitaḥ

prītaḥ svayaṃ tayā yuktaḥ praviṣṭo nija-mandiram /
maṇi-stambha-śatopetaṃ mahendra-bhavanaṃ yathā

payaḥ-phena-nibhāḥ śayyā dāntā rukma-paricchadāḥ /
paryaṅkā hema-daṇḍāni cāmara-vyajanāni ca

āsanāni ca haimāni mṛdūpastaraṇāni ca /
muktādāma-vilambīni vitānāni dyumanti ca

svaccha-sphaṭika-kuḍyeṣu mahā-mārakateṣu ca /
ratna-dīpān bhrājamānān lalanā ratna-saṃyutāḥ

vilokya brāhmaṇas tatra samṛddhīḥ sarva-sampadām /
tarkayām āsa nirvyagraḥ sva-samṛddhim ahaitukīm

nūnaṃ bataitan mama durbhagasya śaśvad daridrasya samṛddhi-hetuḥ /
mahā-vibhūter avalokato 'nyo naivopapadyeta yadūttamasya

nanv abruvāṇo diśate samakṣaṃ yāciṣṇave bhūry api bhūri-bhojaḥ /
parjanya-vat tat svayam īkṣamāṇo dāśārhakāṇām ṛṣabhaḥ sakhā me

kiñcit karoty urv api yat sva-dattaṃ $ suhṛt-kṛtaṃ phalgv api bhūri-kārī &
mayopaṇītaṃ pṛthukaika-muṣṭiṃ % pratyagrahīt prīti-yuto mahātmā // BhP_10.81.035* //
tasyaiva me sauhṛda-sakhya-maitrī- dāsyaṃ punar janmani janmani syāt /
mahānubhāvena guṇālayena viṣajjatas tat-puruṣa-prasaṅgaḥ

bhaktāya citrā bhagavān hi sampado rājyaṃ vibhūtīr na samarthayaty ajaḥ /
adīrgha-bodhāya vicakṣaṇaḥ svayaṃ paśyan nipātaṃ dhanināṃ madodbhavam

itthaṃ vyavasito buddhyā bhakto 'tīva janārdane /
viṣayān jāyayā tyakṣyan bubhuje nāti-lampaṭaḥ

tasya vai deva-devasya harer yajña-pateḥ prabhoḥ /
brāhmaṇāḥ prabhavo daivaṃ na tebhyo vidyate param

evaṃ sa vipro bhagavat-suhṛt tadā dṛṣṭvā sva-bhṛtyair ajitaṃ parājitam /
tad-dhyāna-vegodgrathitātma-bandhanas tad-dhāma lebhe 'cirataḥ satāṃ gatim

etad brahmaṇya-devasya śrutvā brahmaṇyatāṃ naraḥ /
labdha-bhāvo bhagavati karma-bandhād vimucyate