Bhagavata Purana · Chapter 10.62

BhP_10.62.001/0 śrī-rājovāca
bāṇasya tanayām ūṣām upayeme yadūttamaḥ /
tatra yuddham abhūd ghoraṃ hari-śaṅkarayor mahat /
etat sarvaṃ mahā-yogin samākhyātuṃ tvam arhasi

BhP_10.62.002/0 śrī-śuka uvāca
bāṇaḥ putra-śata-jyeṣṭho baler āsīn mahātmanaḥ /
yena vāmana-rūpāya haraye 'dāyi medinī

tasyaurasaḥ suto bānaḥ śiva-bhakti-rataḥ sadā /
mānyo vadānyo dhīmāṃś ca satya-sandho dṛḍha-vrataḥ

śoṇitākhye pure ramye sa rājyam akarot purā /
tasya śambhoḥ prasādena kiṅkarā iva te 'marāḥ /
sahasra-bāhur vādyena tāṇdave 'toṣayan mṛḍam

bhagavān sarva-bhūteśaḥ śaraṇyo bhakta-vatsalaḥ /
vareṇa chandayām āsa sa taṃ vavre purādhipam

sa ekadāha giriśaṃ pārśva-sthaṃ vīrya-durmadaḥ /
kirīṭenārka-varṇena saṃspṛśaṃs tat-padāmbujam

namasye tvāṃ mahā-deva lokānāṃ gurum īśvaram /
puṃsām apūrṇa-kāmānāṃ kāma-pūrāmarāṅghripam

doḥ-sahasraṃ tvayā dattaṃ paraṃ bhārāya me 'bhavat /
tri-lokyāṃ pratiyoddhāraṃ na labhe tvad ṛte samam

kaṇḍūtyā nibhṛtair dorbhir yuyutsur dig-gajān aham /
ādyāyāṃ cūrṇayann adrīn bhītās te 'pi pradudruvuḥ

tac chrutvā bhagavān kruddhaḥ ketus te bhajyate yadā /
tvad-darpa-ghnaṃ bhaven mūḍha saṃyugaṃ mat-samena te

ity uktaḥ kumatir hṛṣṭaḥ sva-gṛhaṃ prāviśan nṛpa /
pratīkṣan giriśādeśaṃ sva-vīrya-naśanam kudhīḥ

tasyoṣā nāma duhitā svapne prādyumninā ratim /
kanyālabhata kāntena prāg adṛṣṭa-śrutena sā

sā tatra tam apaśyantī kvāsi kānteti vādinī /
sakhīnāṃ madhya uttasthau vihvalā vrīḍitā bhṛśam

bāṇasya mantrī kumbhāṇḍaś citralekhā ca tat-sutā /
sakhy apṛcchat sakhīm ūṣāṃ kautūhala-samanvitā

kaṃ tvaṃ mṛgayase su-bhru kīdṛśas te manorathaḥ /
hasta-grāhaṃ na te 'dyāpi rāja-putry upalakṣaye

dṛṣṭaḥ kaścin naraḥ svapne śyāmaḥ kamala-locanaḥ /
pīta-vāsā bṛhad-bāhur yoṣitāṃ hṛdayaṃ-gamaḥ

tam ahaṃ mṛgaye kāntaṃ pāyayitvādharaṃ madhu /
kvāpi yātaḥ spṛhayatīṃ kṣiptvā māṃ vṛjinārṇave

BhP_10.62.016/0 citralekhovāca
vyasanaṃ te 'pakarṣāmi tri-lokyāṃ yadi bhāvyate /
tam āneṣye varaṃ yas te mano-hartā tam ādiśa

ity uktvā deva-gandharva siddha-cāraṇa-pannagān /
daitya-vidyādharān yakṣān manujāṃś ca yathālikhat

manujeṣu ca sā vṛṣnīn śūram ānakadundubhim /
vyalikhad rāma-kṛṣṇau ca pradyumnaṃ vīkṣya lajjitā

aniruddhaṃ vilikhitaṃ vīkṣyoṣāvāṅ-mukhī hriyā /
so 'sāv asāv iti prāha smayamānā mahī-pate

citralekhā tam ājñāya pautraṃ kṛṣṇasya yoginī /
yayau vihāyasā rājan dvārakāṃ kṛṣṇa-pālitām

tatra suptaṃ su-paryaṅke prādyumniṃ yogam āsthitā /
gṛhītvā śoṇita-puraṃ sakhyai priyam adarśayat

sā ca taṃ sundara-varaṃ vilokya muditānanā /
duṣprekṣye sva-gṛhe pumbhī reme prādyumninā samam

parārdhya-vāsaḥ-srag-gandha- dhūpa-dīpāsanādibhiḥ /
pāna-bhojana-bhakṣyaiś ca vākyaiḥ śuśrūṣaṇārcitaḥ

gūḍhaḥ kanyā-pure śaśvat- pravṛddha-snehayā tayā /
nāhar-gaṇān sa bubudhe ūṣayāpahṛtendriyaḥ

tāṃ tathā yadu-vīreṇa bhujyamānāṃ hata-vratām /
hetubhir lakṣayāṃ cakrur āpṛītāṃ duravacchadaiḥ

bhaṭā āvedayāṃ cakrū rājaṃs te duhitur vayam /
viceṣṭitaṃ lakṣayāma kanyāyāḥ kula-dūṣaṇam

anapāyibhir asmābhir guptāyāś ca gṛhe prabho /
kanyāyā dūṣaṇaṃ pumbhir duṣprekṣyāyā na vidmahe

tataḥ pravyathito bāṇo duhituḥ śruta-dūṣaṇaḥ /
tvaritaḥ kanyakāgāraṃ prāpto 'drākṣīd yadūdvaham

kāmātmajaṃ taṃ bhuvanaika-sundaraṃ śyāmaṃ piśaṅgāmbaram ambujekṣaṇam /
bṛhad-bhujaṃ kuṇḍala-kuntala-tviṣā smitāvalokena ca maṇḍitānanam

dīvyantam akṣaiḥ priyayābhinṛmṇayā tad-aṅga-saṅga-stana-kuṅkuma-srajam /
bāhvor dadhānaṃ madhu-mallikāśritāṃ tasyāgra āsīnam avekṣya vismitaḥ

sa taṃ praviṣṭaṃ vṛtam ātatāyibhir bhaṭair anīkair avalokya mādhavaḥ /
udyamya maurvaṃ parighaṃ vyavasthito yathāntako daṇḍa-dharo jighāṃsayā

jighṛkṣayā tān paritaḥ prasarpataḥ śuno yathā śūkara-yūthapo 'hanat /
te hanyamānā bhavanād vinirgatā nirbhinna-mūrdhoru-bhujāḥ pradudruvuḥ

taṃ nāga-pāśair bali-nandano balī ghnantaṃ sva-sainyaṃ kupito babandha ha /
ūṣā bhṛśaṃ śoka-viṣāda-vihvalā baddhaṃ niśamyāśru-kalākṣy arautsīt