Bhagavata Purana · Chapter 10.49

BhP_10.49.001/0 śrī-śuka uvāca
sa gatvā hāstinapuraṃ pauravendra-yaśo-'ṅkitam /
dadarśa tatrāmbikeyaṃ sa-bhīṣmaṃ viduraṃ pṛthām

saha-putraṃ ca bāhlīkaṃ bhāradvājaṃ sa-gautamam /
karnaṃ suyodhanaṃ drauṇiṃ pāṇḍavān suhṛdo 'parān

yathāvad upasaṅgamya bandhubhir gāndinī-sutaḥ /
sampṛṣṭas taiḥ suhṛd-vārtāṃ svayaṃ cāpṛcchad avyayam

uvāsa katicin māsān rājño vṛtta-vivitsayā /
duṣprajasyālpa-sārasya khala-cchandānuvartinaḥ

teja ojo balaṃ vīryaṃ praśrayādīṃś ca sad-guṇān /
prajānurāgaṃ pārtheṣu na sahadbhiś cikīṛṣitam

kṛtaṃ ca dhārtarāṣṭrair yad gara-dānādy apeśalam /
ācakhyau sarvam evāsmai pṛthā vidura eva ca

pṛthā tu bhrātaraṃ prāptam akrūram upasṛtya tam /
uvāca janma-nilayaṃ smaranty aśru-kalekṣaṇā

api smaranti naḥ saumya pitarau bhrātaraś ca me /
bhaginyau bhrātṛ-putrāś ca jāmayaḥ sakhya eva ca

bhrātreyo bhagavān kṛṣṇaḥ śaraṇyo bhakta-vatsalaḥ /
paitṛ-ṣvasreyān smarati rāmaś cāmburuhekṣaṇaḥ

sapatna-madhye śocantīṃ vṛkānāṃ hariṇīm iva /
sāntvayiṣyati māṃ vākyaiḥ pitṛ-hīnāṃś ca bālakān

kṛṣṇa kṛṣṇa mahā-yogin viśvātman viśva-bhāvana /
prapannāṃ pāhi govinda śiśubhiś cāvasīdatīm

nānyat tava padāmbhojāt paśyāmi śaraṇaṃ nṛṇām /
bibhyatāṃ mṛtyu-saṃsārād īsvarasyāpavargikāt

namaḥ kṛṣṇāya śuddhāya brahmaṇe paramātmane /
yogeśvarāya yogāya tvām ahaṃ śaraṇaṃ gatā

BhP_10.49.014/0 śrī-śuka uvāca
ity anusmṛtya sva-janaṃ kṛṣṇaṃ ca jagad-īśvaram /
prārudad duḥkhitā rājan bhavatāṃ prapitāmahī

sama-duḥkha-sukho 'krūro viduraś ca mahā-yaśāḥ /
sāntvayām āsatuḥ kuntīṃ tat-putrotpatti-hetubhiḥ

yāsyan rājānam abhyetya viṣamaṃ putra-lālasam /
avadat suhṛdāṃ madhye bandhubhiḥ sauhṛdoditam

BhP_10.49.017/0 akrūra uvāca
bho bho vaicitravīrya tvaṃ kurūṇāṃ kīrti-vardhana /
bhrātary uparate pāṇḍāv adhunāsanam āsthitaḥ

dharmeṇa pālayann urvīṃ prajāḥ śīlena rañjayan /
vartamānaḥ samaḥ sveṣu śreyaḥ kīrtim avāpsyasi

anyathā tv ācaraṃl loke garhito yāsyase tamaḥ /
tasmāt samatve vartasva pāṇḍaveṣv ātmajeṣu ca

neha cātyanta-saṃvāsaḥ kasyacit kenacit saha /
rājan svenāpi dehena kim u jāyātmajādibhiḥ

ekaḥ prasūyate jantur eka eva pralīyate /
eko 'nubhuṅkte sukṛtam eka eva ca duṣkṛtam

adharmopacitaṃ vittaṃ haranty anye 'lpa-medhasaḥ /
sambhojanīyāpadeśair jalānīva jalaukasaḥ

puṣṇāti yān adharmeṇa sva-buddhyā tam apaṇḍitam /
te 'kṛtārthaṃ prahiṇvanti prāṇā rāyaḥ sutādayaḥ

svayaṃ kilbiṣam ādāya tais tyakto nārtha-kovidaḥ /
asiddhārtho viśaty andhaṃ sva-dharma-vimukhas tamaḥ

tasmāl lokam imaṃ rājan svapna-māyā-manoratham /
vīkṣyāyamyātmanātmānaṃ samaḥ śānto bhava prabho

BhP_10.49.026/0 dhṛtarāṣṭra uvāca
yathā vadati kalyāṇīṃ vācaṃ dāna-pate bhavān /
tathānayā na tṛpyāmi martyaḥ prāpya yathāmṛtam

tathāpi sūnṛtā saumya hṛdi na sthīyate cale /
putrānurāga-viṣame vidyut saudāmanī yathā

īśvarasya vidhiṃ ko nu vidhunoty anyathā pumān /
bhūmer bhārāvatārāya yo 'vatīrṇo yadoḥ kule

yo durvimarśa-pathayā nija-māyayedaṃ $ sṛṣṭvā guṇān vibhajate tad-anupraviṣṭaḥ &
tasmai namo duravabodha-vihāra-tantra- % saṃsāra-cakra-gataye parameśvarāya // BhP_10.49.029*
0 śrī-śuka uvāca
ity abhipretya nṛpater abhiprāyaṃ sa yādavaḥ /
suhṛdbhiḥ samanujñātaḥ punar yadu-purīm agāt

śaśaṃsa rāma-kṛṣṇābhyāṃ dhṛtarāṣṭra-viceṣṭitam /
pāṇdavān prati kauravya yad-arthaṃ preṣitaḥ svayam