Bhagavata Purana · Chapter 10.22

BhP_10.22.001/0 śrī-śuka uvāca
hemante prathame māsi nanda-vraja-kamārikāḥ /
cerur haviṣyaṃ bhuñjānāḥ kātyāyany-arcana-vratam

āplutyāmbhasi kālindyā jalānte codite 'ruṇe /
kṛtvā pratikṛtiṃ devīm ānarcur nṛpa saikatīm

gandhair mālyaiḥ surabhibhir balibhir dhūpa-dīpakaiḥ /
uccāvacaiś copahāraiḥ pravāla-phala-taṇḍulaiḥ

kātyāyani mahā-māye mahā-yoginy adhīśvari /
nanda-gopa-sutaṃ devi patiṃ me kuru te namaḥ /
iti mantraṃ japantyas tāḥ pūjāṃ cakruḥ kamārikāḥ

evaṃ māsaṃ vrataṃ ceruḥ kumāryaḥ kṛṣṇa-cetasaḥ /
bhadrakālīṃ samānarcur bhūyān nanda-sutaḥ patiḥ

ūṣasy utthāya gotraiḥ svair anyonyābaddha-bāhavaḥ /
kṛṣṇam uccair jagur yāntyaḥ kālindyāṃ snātum anvaham

nadyāḥ kadācid āgatya tīre nikṣipya pūrva-vat /
vāsāṃsi kṛṣṇaṃ gāyantyo vijahruḥ salile mudā

bhagavāṃs tad abhipretya kṛṣno yogeśvareśvaraḥ /
vayasyair āvṛtas tatra gatas tat-karma-siddhaye

tāsāṃ vāsāṃsy upādāya nīpam āruhya satvaraḥ /
hasadbhiḥ prahasan bālaiḥ parihāsam uvāca ha

atrāgatyābalāḥ kāmaṃ svaṃ svaṃ vāsaḥ pragṛhyatām /
satyaṃ bravāṇi no narma yad yūyaṃ vrata-karśitāḥ

na mayodita-pūrvaṃ vā anṛtaṃ tad ime viduḥ /
ekaikaśaḥ pratīcchadhvaṃ sahaiveti su-madhyamāḥ

tasya tat kṣvelitaṃ dṛṣṭvā gopyaḥ prema-pariplutāḥ /
vrīḍitāḥ prekṣya cānyonyaṃ jāta-hāsā na niryayuḥ

evaṃ bruvati govinde narmaṇākṣipta-cetasaḥ /
ā-kaṇṭha-magnāḥ śītode vepamānās tam abruvan

mānayaṃ bhoḥ kṛthās tvāṃ tu nanda-gopa-sutaṃ priyam /
jānīmo 'ṅga vraja-ślāghyaṃ dehi vāsāṃsi vepitāḥ

śyāmasundara te dāsyaḥ karavāma tavoditam /
dehi vāsāṃsi dharma-jña no ced rājñe bruvāma he

BhP_10.22.016/0 śrī-bhagavān uvāca
bhavatyo yadi me dāsyo mayoktaṃ vā kariṣyatha /
atrāgatya sva-vāsāṃsi pratīcchata śuci-smitāḥ /
no cen nāhaṃ pradāsye kiṃ kruddho rājā kariṣyati

tato jalāśayāt sarvā dārikāḥ śīta-vepitāḥ /
pāṇibhyāṃ yonim ācchādya protteruḥ śīta-karśitāḥ

bhagavān āhatā vīkṣya śuddha -bhāva-prasāditaḥ /
skandhe nidhāya vāsāṃsi prītaḥ provāca sa-smitam

yūyaṃ vivastrā yad apo dhṛta-vratā vyagāhataitat tad u deva-helanam /
baddhvāñjaliṃ mūrdhny apanuttaye 'ṃhasaḥ kṛtvā namo 'dho-vasanaṃ pragṛhyatām

ity acyutenābhihitaṃ vrajābalā matvā vivastrāplavanaṃ vrata-cyutim /
tat-pūrti-kāmās tad-aśeṣa-karmaṇāṃ sākṣāt-kṛtaṃ nemur avadya-mṛg yataḥ

tās tathāvanatā dṛṣṭvā bhagavān devakī-sutaḥ /
vāsāṃsi tābhyaḥ prāyacchat karuṇas tena toṣitaḥ

dṛḍhaṃ pralabdhās trapayā ca hāpitāḥ $ prastobhitāḥ krīḍana-vac ca kāritāḥ &
vastrāṇi caivāpahṛtāny athāpy amuṃ % tā nābhyasūyan priya-saṅga-nirvṛtāḥ // BhP_10.22.022* //
paridhāya sva-vāsāṃsi preṣṭha-saṅgama-sajjitāḥ /
gṛhīta-cittā no celus tasmin lajjāyitekṣaṇāḥ

tāsāṃ vijñāya bhagavān sva-pāda-sparśa-kāmyayā /
dhṛta-vratānāṃ saṅkalpam āha dāmodaro 'balāḥ

saṅkalpo viditaḥ sādhvyo bhavatīnāṃ mad-arcanam /
mayānumoditaḥ so 'sau satyo bhavitum arhati

na mayy āveśita-dhiyāṃ kāmaḥ kāmāya kalpate /
bharjitā kvathitā dhānāḥ prāyo bījāya neśate

yātābalā vrajaṃ siddhā mayemā raṃsyathā kṣapāḥ /
yad uddiśya vratam idaṃ cerur āryārcanaṃ satīḥ

BhP_10.22.028/0 śrī-śuka uvāca
ity ādiṣṭā bhagavatā labdha-kāmāḥ kumārikāḥ /
dhyāyantyas tat-padāmbhojam kṛcchrān nirviviśur vrajam

atha gopaiḥ parivṛto bhagavān devakī-sutaḥ /
vṛndāvanād gato dūraṃ cārayan gāḥ sahāgrajaḥ

nidaghārkātape tigme chāyābhiḥ svābhir ātmanaḥ /
ātapatrāyitān vīkṣya drumān āha vrajaukasaḥ

he stoka-kṛṣṇa he aṃśo śrīdāman subalārjuna /
viśāla vṛṣabhaujasvin devaprastha varūthapa

paśyataitān mahā-bhāgān parārthaikānta-jīvitān /
vāta-varṣātapa-himān sahanto vārayanti naḥ

aho eṣāṃ varaṃ janma sarva -prāṇy-upajīvanam /
su-janasyeva yeṣāṃ vai vimukhā yānti nārthinaḥ

patra-puṣpa-phala-cchāyā- mūla-valkala-dārubhiḥ /
gandha-niryāsa-bhasmāsthi- tokmaiḥ kāmān vitanvate

etāvaj janma-sāphalyaṃ dehinām iha dehiṣu /
prāṇair arthair dhiyā vācā śreya-ācaraṇaṃ sadā

iti pravāla-stabaka- phala-puṣpa-dalotkaraiḥ /
tarūṇāṃ namra-śākhānāṃ madhyato yamunāṃ gataḥ

tatra gāḥ pāyayitvāpaḥ su-mṛṣṭāḥ śītalāḥ śivāḥ /
tato nṛpa svayaṃ gopāḥ kāmaṃ svādu papur jalam

tasyā upavane kāmaṃ cārayantaḥ paśūn nṛpa /
kṛṣṇa-rāmāv upāgamya kṣudh-ārtā idam abravan