Bhagavata Purana · Chapter 09.24

BhP_09.24.001/0 śrīśuka uvāca
tasyāṃ vidarbho 'janayat putrau nāmnā kuśakrathau /
tṛtīyaṃ romapādaṃ ca vidarbhakulanandanam

romapādasuto babhrurbabhroḥ kṛtirajāyata /
uśikastatsutastasmāc cediścaidyādayo nṛpāḥ

krathasya kuntiḥ putro 'bhūd vṛṣṇistasyātha nirvṛtiḥ /
tato daśārho nāmnābhūt tasya vyomaḥ sutastataḥ

jīmūto vikṛtistasya yasya bhīmarathaḥ sutaḥ /
tato navarathaḥ putro jāto daśarathastataḥ

karambhiḥ śakuneḥ putro devarātastadātmajaḥ /
devakṣatrastatastasya madhuḥ kuruvaśādanuḥ

puruhotrastv anoḥ putrastasyāyuḥ sātvatastataḥ /
bhajamāno bhajirdivyo vṛṣṇirdevāvṛdho 'ndhakaḥ

sātvatasya sutāḥ sapta mahābhojaśca māriṣa /
bhajamānasya nimlociḥ kiṅkaṇo dhṛṣṭireva ca

ekasyāmātmajāḥ patnyāmanyasyāṃ ca trayaḥ sutāḥ /
śatājic ca sahasrājidayutājiditi prabho

babhrurdevāvṛdhasutastayoḥ ślokau paṭhantyamū /
yathaiva śṛṇumo dūrāt sampaśyāmastathāntikāt

babhruḥ śreṣṭho manuṣyāṇāṃ devairdevāvṛdhaḥ samaḥ /
puruṣāḥ pañcaṣaṣṭiśca ṣaṭsahasrāṇi cāṣṭa ca

ye 'mṛtatvamanuprāptā babhrordevāvṛdhādapi /
mahābhojo 'tidharmātmā bhojā āsaṃstadanvaye

vṛṣṇeḥ sumitraḥ putro 'bhūdyudhājic ca parantapa /
śinistasyānamitraśca nighno 'bhūdanamitrataḥ

satrājitaḥ prasenaśca nighnasyāthāsatuḥ sutau /
anamitrasuto yo 'nyaḥ śinistasya ca satyakaḥ

yuyudhānaḥ sātyakirvai jayastasya kuṇistataḥ /
yugandharo 'namitrasya vṛṣṇiḥ putro 'parastataḥ

śvaphalkaścitrarathaśca gāndinyāṃ ca śvaphalkataḥ /
akrūrapramukhā āsan putrā dvādaśa viśrutāḥ

āsaṅgaḥ sārameyaśca mṛduro mṛduvidgiriḥ /
dharmavṛddhaḥ sukarmā ca kṣetropekṣo 'rimardanaḥ

śatrughno gandhamādaśca pratibāhuśca dvādaśa /
teṣāṃ svasā sucārākhyā dvāv akrūrasutāv api

devavān upadevaśca tathā citrarathātmajāḥ /
pṛthurvidūrathādyāśca bahavo vṛṣṇinandanāḥ

kukuro bhajamānaśca śuciḥ kambalabarhiṣaḥ /
kukurasya suto vahnirvilomā tanayastataḥ

kapotaromā tasyānuḥ sakhā yasya ca tumburuḥ /
andhakāddundubhistasmādavidyotaḥ punarvasuḥ

tasyāhukaścāhukī ca kanyā caivāhukātmajau /
devakaścograsenaśca catvāro devakātmajāḥ

devavān upadevaśca sudevo devavardhanaḥ /
teṣāṃ svasāraḥ saptāsan dhṛtadevādayo nṛpa

śāntidevopadevā ca śrīdevā devarakṣitā /
sahadevā devakī ca vasudeva uvāha tāḥ

kaṃsaḥ sunāmā nyagrodhaḥ kaṅkaḥ śaṅkuḥ suhūstathā /
rāṣṭrapālo 'tha dhṛṣṭiśca tuṣṭimān augrasenayaḥ

kaṃsā kaṃsavatī kaṅkā śūrabhū rāṣṭrapālikā /
ugrasenaduhitaro vasudevānujastriyaḥ

śūro vidūrathādāsīdbhajamānastu tatsutaḥ /
śinistasmāt svayaṃ bhojo hṛdikastatsuto mataḥ

devamīḍhaḥ śatadhanuḥ kṛtavarmeti tatsutāḥ /
devamīḍhasya śūrasya māriṣā nāma patnyabhūt

tasyāṃ sa janayāmāsa daśa putrān akalmaṣān /
vasudevaṃ devabhāgaṃ devaśravasamānakam

sṛñjayaṃ śyāmakaṃ kaṅkaṃ śamīkaṃ vatsakaṃ vṛkam /
devadundubhayo nedurānakā yasya janmani

vasudevaṃ hareḥ sthānaṃ vadantyānakadundubhim /
pṛthā ca śrutadevā ca śrutakīrtiḥ śrutaśravāḥ

rājādhidevī caiteṣāṃ bhaginyaḥ pañca kanyakāḥ /
kunteḥ sakhyuḥ pitā śūro hyaputrasya pṛthāmadāt

sāpa durvāsaso vidyāṃ devahūtīṃ pratoṣitāt /
tasyā vīryaparīkṣārthamājuhāva raviṃ śuciḥ

tadaivopāgataṃ devaṃ vīkṣya vismitamānasā /
pratyayārthaṃ prayuktā me yāhi deva kṣamasva me

amoghaṃ devasandarśamādadhe tvayi cātmajam /
yoniryathā na duṣyeta kartāhaṃ te sumadhyame

iti tasyāṃ sa ādhāya garbhaṃ sūryo divaṃ gataḥ /
sadyaḥ kumāraḥ sañjajñe dvitīya iva bhāskaraḥ

taṃ sātyajan nadītoye kṛcchrāl lokasya bibhyatī /
prapitāmahastāmuvāha pāṇḍurvai satyavikramaḥ

śrutadevāṃ tu kārūṣo vṛddhaśarmā samagrahīt /
yasyāmabhūddantavakra ṛṣiśapto diteḥ sutaḥ

kaikeyo dhṛṣṭaketuśca śrutakīrtimavindata /
santardanādayastasyāṃ pañcāsan kaikayāḥ sutāḥ

rājādhidevyāmāvantyau jayaseno 'janiṣṭa ha /
damaghoṣaścedirājaḥ śrutaśravasamagrahīt

śiśupālaḥ sutastasyāḥ kathitastasya sambhavaḥ /
devabhāgasya kaṃsāyāṃ citraketubṛhadbalau

kaṃsavatyāṃ devaśravasaḥ suvīra iṣumāṃstathā /
bakaḥ kaṅkāt tu kaṅkāyāṃ satyajit purujit tathā

sṛñjayo rāṣṭrapālyāṃ ca vṛṣadurmarṣaṇādikān /
harikeśahiraṇyākṣau śūrabhūmyāṃ ca śyāmakaḥ

miśrakeśyāmapsarasi vṛkādīn vatsakastathā /
takṣapuṣkaraśālādīn durvākṣyāṃ vṛka ādadhe

sumitrārjunapālādīn samīkāt tu sudāmanī /
ānakaḥ karṇikāyāṃ vai ṛtadhāmājayāv api

pauravī rohiṇī bhadrā madirā rocanā ilā /
devakīpramukhāścāsan patnya ānakadundubheḥ

balaṃ gadaṃ sāraṇaṃ ca durmadaṃ vipulaṃ dhruvam /
vasudevastu rohiṇyāṃ kṛtādīn udapādayat

subhadro bhadrabāhuśca durmado bhadra eva ca /
pauravyāstanayā hyete bhūtādyā dvādaśābhavan

nandopanandakṛtaka śūrādyā madirātmajāḥ /
kauśalyā keśinaṃ tv ekamasūta kulanandanam

rocanāyāmato jātā hastahemāṅgadādayaḥ /
ilāyāmuruvalkādīn yadumukhyān ajījanat

vipṛṣṭho dhṛtadevāyāmeka ānakadundubheḥ /
śāntidevātmajā rājan praśamaprasitādayaḥ

rājanyakalpavarṣādyā upadevāsutā daśa /
vasuhaṃsasuvaṃśādyāḥ śrīdevāyāstu ṣaṭ sutāḥ

devarakṣitayā labdhā nava cātra gadādayaḥ /
vasudevaḥ sutān aṣṭāv ādadhe sahadevayā

pravaraśrutamukhyāṃśca sākṣāddharmo vasūn iva /
vasudevastu devakyāmaṣṭa putrān ajījanat

kīrtimantaṃ suṣeṇaṃ ca bhadrasenamudāradhīḥ /
ṛjuṃ sammardanaṃ bhadraṃ saṅkarṣaṇamahīśvaram

aṣṭamastu tayorāsīt svayameva hariḥ kila /
subhadrā ca mahābhāgā tava rājan pitāmahī

yadā yadā hi dharmasya kṣayo vṛddhiśca pāpmanaḥ /
tadā tu bhagavān īśa ātmānaṃ sṛjate hariḥ

na hyasya janmano hetuḥ karmaṇo vā mahīpate /
ātmamāyāṃ vineśasya parasya draṣṭurātmanaḥ

yan māyāceṣṭitaṃ puṃsaḥ sthityutpattyapyayāya hi /
anugrahastannivṛtterātmalābhāya ceṣyate

akṣauhiṇīnāṃ patibhirasurairnṛpalāñchanaiḥ /
bhuva ākramyamāṇāyā abhārāya kṛtodyamaḥ

karmāṇyaparimeyāṇi manasāpi sureśvaraiḥ /
sahasaṅkarṣaṇaścakre bhagavān madhusūdanaḥ

kalau janiṣyamāṇānāṃ duḥkhaśokatamonudam /
anugrahāya bhaktānāṃ supuṇyaṃ vyatanodyaśaḥ

yasmin satkarṇapīyuṣe yaśastīrthavare sakṛt /
śrotrāñjalirupaspṛśya dhunute karmavāsanām

bhojavṛṣṇyandhakamadhu śūrasenadaśārhakaiḥ /
ślāghanīyehitaḥ śaśvat kurusṛñjayapāṇḍubhiḥ

snigdhasmitekṣitodārairvākyairvikramalīlayā /
nṛlokaṃ ramayāmāsa mūrtyā sarvāṅgaramyayā

yasyānanaṃ makarakuṇḍalacārukarṇa bhrājatkapolasubhagaṃ savilāsahāsam /
nityotsavaṃ na tatṛpurdṛśibhiḥ pibantyo nāryo narāśca muditāḥ kupitā nimeśca

jāto gataḥ pitṛgṛhādvrajamedhitārtho hatvā ripūn sutaśatāni kṛtorudāraḥ /
utpādya teṣu puruṣaḥ kratubhiḥ samīje ātmānamātmanigamaṃ prathayan janeṣu

pṛthvyāḥ sa vai gurubharaṃ kṣapayan kurūṇāmantaḥsamutthakalinā yudhi bhūpacamvaḥ /
dṛṣṭyā vidhūya vijaye jayamudvighoṣya procyoddhavāya ca paraṃ samagāt svadhāma