Bhagavata Purana · Chapter 09.23

BhP_09.23.001/0 śrīśuka uvāca
anoḥ sabhānaraścakṣuḥ pareṣṇuśca trayaḥ sutāḥ /
sabhānarāt kālanaraḥ sṛñjayastatsutastataḥ

janamejayastasya putro mahāśālo mahāmanāḥ /
uśīnarastitikṣuśca mahāmanasa ātmajau

śibirvaraḥ kṛmirdakṣaścatvārośīnarātmajāḥ /
vṛṣādarbhaḥ sudhīraśca madraḥ kekaya ātmavān

śibeścatvāra evāsaṃstitikṣośca ruṣadrathaḥ /
tato homo 'tha sutapā baliḥ sutapaso 'bhavat

aṅgavaṅgakaliṅgādyāḥ suhmapuṇḍrauḍrasaṃjñitāḥ /
jajñire dīrghatamaso baleḥ kṣetre mahīkṣitaḥ

cakruḥ svanāmnā viṣayān ṣaḍ imān prācyakāṃśca te /
khalapāno 'ṅgato jajñe tasmāddivirathastataḥ

suto dharmaratho yasya jajñe citraratho 'prajāḥ /
romapāda iti khyātastasmai daśarathaḥ sakhā

śāntāṃ svakanyāṃ prāyacchadṛṣyaśṛṅga uvāha yām /
deve 'varṣati yaṃ rāmā āninyurhariṇīsutam

nāṭyasaṅgītavāditrairvibhramāliṅganārhaṇaiḥ /
sa tu rājño 'napatyasya nirūpyeṣṭiṃ marutvate

prajāmadāddaśaratho yena lebhe 'prajāḥ prajāḥ /
caturaṅgo romapādāt pṛthulākṣastu tatsutaḥ

bṛhadratho bṛhatkarmā bṛhadbhānuśca tatsutāḥ /
ādyādbṛhanmanāstasmāj jayadratha udāhṛtaḥ

vijayastasya sambhūtyāṃ tato dhṛtirajāyata /
tato dhṛtavratastasya satkarmādhirathastataḥ

yo 'sau gaṅgātaṭe krīḍan mañjūṣāntargataṃ śiśum /
kuntyāpaviddhaṃ kānīnamanapatyo 'karot sutam

vṛṣasenaḥ sutastasya karṇasya jagatīpate /
druhyośca tanayo babhruḥ setustasyātmajastataḥ

ārabdhastasya gāndhārastasya dharmastato dhṛtaḥ /
dhṛtasya durmadastasmāt pracetāḥ prācetasaḥ śatam

mlecchādhipatayo 'bhūvannudīcīṃ diśamāśritāḥ /
turvasośca suto vahnirvahnerbhargo 'tha bhānumān

tribhānustatsuto 'syāpi karandhama udāradhīḥ /
marutastatsuto 'putraḥ putraṃ pauravamanvabhūt

duṣmantaḥ sa punarbheje svavaṃśaṃ rājyakāmukaḥ /
yayāterjyeṣṭhaputrasya yadorvaṃśaṃ nararṣabha

varṇayāmi mahāpuṇyaṃ sarvapāpaharaṃ nṛṇām /
yadorvaṃśaṃ naraḥ śrutvā sarvapāpaiḥ pramucyate

yatrāvatīrṇo bhagavān paramātmā narākṛtiḥ /
yadoḥ sahasrajit kroṣṭā nalo ripuriti śrutāḥ

catvāraḥ sūnavastatra śatajit prathamātmajaḥ /
mahāhayo reṇuhayo haihayaśceti tatsutāḥ

dharmastu haihayasuto netraḥ kunteḥ pitā tataḥ /
sohañjirabhavat kuntermahiṣmān bhadrasenakaḥ

durmado bhadrasenasya dhanakaḥ kṛtavīryasūḥ /
kṛtāgniḥ kṛtavarmā ca kṛtaujā dhanakātmajāḥ

arjunaḥ kṛtavīryasya saptadvīpeśvaro 'bhavat /
dattātreyāddhareraṃśāt prāptayogamahāguṇaḥ

na nūnaṃ kārtavīryasya gatiṃ yāsyanti pārthivāḥ /
yajñadānatapoyogaiḥ śrutavīryadayādibhiḥ

pañcāśīti sahasrāṇi hyavyāhatabalaḥ samāḥ /
anaṣṭavittasmaraṇo bubhuje 'kṣayyaṣaḍvasu

tasya putrasahasreṣu pañcaivorvaritā mṛdhe /
jayadhvajaḥ śūraseno vṛṣabho madhurūrjitaḥ

jayadhvajāt tālajaṅghastasya putraśataṃ tv abhūt /
kṣatraṃ yat tālajaṅghākhyamaurvatejopasaṃhṛtam

teṣāṃ jyeṣṭho vītihotro vṛṣṇiḥ putro madhoḥ smṛtaḥ /
tasya putraśataṃ tv āsīdvṛṣṇijyeṣṭhaṃ yataḥ kulam

mādhavā vṛṣṇayo rājan yādavāśceti saṃjñitāḥ /
yaduputrasya ca kroṣṭoḥ putro vṛjinavāṃstataḥ

svāhito 'to viṣadgurvai tasya citrarathastataḥ /
śaśabindurmahāyogī mahābhāgo mahān abhūt

caturdaśamahāratnaścakravartyaparājitaḥ /
tasya patnīsahasrāṇāṃ daśānāṃ sumahāyaśāḥ

daśalakṣasahasrāṇi putrāṇāṃ tāsv ajījanat /
teṣāṃ tu ṣaṭ pradhānānāṃ pṛthuśravasa ātmajaḥ

dharmo nāmośanā tasya hayamedhaśatasya yāṭ /
tatsuto rucakastasya pañcāsannātmajāḥ śṛṇu

purujidrukmarukmeṣu pṛthujyāmaghasaṃjñitāḥ /
jyāmaghastv aprajo 'pyanyāṃ bhāryāṃ śaibyāpatirbhayāt

nāvindac chatrubhavanādbhojyāṃ kanyāmahāraṣīt /
rathasthāṃ tāṃ nirīkṣyāha śaibyā patimamarṣitā

keyaṃ kuhaka matsthānaṃ rathamāropiteti vai /
snuṣā tavetyabhihite smayantī patimabravīt

ahaṃ bandhyāsapatnī ca snuṣā me yujyate katham /
janayiṣyasi yaṃ rājñi tasyeyamupayujyate

anvamodanta tadviśve devāḥ pitara eva ca /
śaibyā garbhamadhāt kāle kumāraṃ suṣuve śubham /
sa vidarbha iti prokta upayeme snuṣāṃ satīm