ભાગવત પુરાણ · અધ્યાય 09.23

ભ્પ્_09.23.001।0 શ્રીશુક ઉવાચ
અનોઃ સભાનરશ્ચક્ષુઃ પરેષ્ણુશ્ચ ત્રયઃ સુતાઃ ।
સભાનરાત્ કાલનરઃ સૃઞ્જયસ્તત્સુતસ્તતઃ

જનમેજયસ્તસ્ય પુત્રો મહાશાલો મહામનાઃ ।
ઉશીનરસ્તિતિક્ષુશ્ચ મહામનસ આત્મજૌ

શિબિર્વરઃ કૃમિર્દક્ષશ્ચત્વારોશીનરાત્મજાઃ ।
વૃષાદર્ભઃ સુધીરશ્ચ મદ્રઃ કેકય આત્મવાન્

શિબેશ્ચત્વાર એવાસંસ્તિતિક્ષોશ્ચ રુષદ્રથઃ ।
તતો હોમો ઽથ સુતપા બલિઃ સુતપસો ઽભવત્

અઙ્ગવઙ્ગકલિઙ્ગાદ્યાઃ સુહ્મપુણ્ડ્રૌડ્રસંજ્ઞિતાઃ ।
જજ્ઞિરે દીર્ઘતમસો બલેઃ ક્ષેત્રે મહીક્ષિતઃ

ચક્રુઃ સ્વનામ્ના વિષયાન્ ષડ્ ઇમાન્ પ્રાચ્યકાંશ્ચ તે ।
ખલપાનો ઽઙ્ગતો જજ્ઞે તસ્માદ્દિવિરથસ્તતઃ

સુતો ધર્મરથો યસ્ય જજ્ઞે ચિત્રરથો ઽપ્રજાઃ ।
રોમપાદ ઇતિ ખ્યાતસ્તસ્મૈ દશરથઃ સખા

શાન્તાં સ્વકન્યાં પ્રાયચ્છદૃષ્યશૃઙ્ગ ઉવાહ યામ્ ।
દેવે ઽવર્ષતિ યં રામા આનિન્યુર્હરિણીસુતમ્

નાટ્યસઙ્ગીતવાદિત્રૈર્વિભ્રમાલિઙ્ગનાર્હણૈઃ ।
સ તુ રાજ્ઞો ઽનપત્યસ્ય નિરૂપ્યેષ્ટિં મરુત્વતે

પ્રજામદાદ્દશરથો યેન લેભે ઽપ્રજાઃ પ્રજાઃ ।
ચતુરઙ્ગો રોમપાદાત્ પૃથુલાક્ષસ્તુ તત્સુતઃ

બૃહદ્રથો બૃહત્કર્મા બૃહદ્ભાનુશ્ચ તત્સુતાઃ ।
આદ્યાદ્બૃહન્મનાસ્તસ્માજ્ જયદ્રથ ઉદાહૃતઃ

વિજયસ્તસ્ય સમ્ભૂત્યાં તતો ધૃતિરજાયત ।
તતો ધૃતવ્રતસ્તસ્ય સત્કર્માધિરથસ્તતઃ

યો ઽસૌ ગઙ્ગાતટે ક્રીડન્ મઞ્જૂષાન્તર્ગતં શિશુમ્ ।
કુન્ત્યાપવિદ્ધં કાનીનમનપત્યો ઽકરોત્ સુતમ્

વૃષસેનઃ સુતસ્તસ્ય કર્ણસ્ય જગતીપતે ।
દ્રુહ્યોશ્ચ તનયો બભ્રુઃ સેતુસ્તસ્યાત્મજસ્તતઃ

આરબ્ધસ્તસ્ય ગાન્ધારસ્તસ્ય ધર્મસ્તતો ધૃતઃ ।
ધૃતસ્ય દુર્મદસ્તસ્માત્ પ્રચેતાઃ પ્રાચેતસઃ શતમ્

મ્લેચ્છાધિપતયો ઽભૂવન્નુદીચીં દિશમાશ્રિતાઃ ।
તુર્વસોશ્ચ સુતો વહ્નિર્વહ્નેર્ભર્ગો ઽથ ભાનુમાન્

ત્રિભાનુસ્તત્સુતો ઽસ્યાપિ કરન્ધમ ઉદારધીઃ ।
મરુતસ્તત્સુતો ઽપુત્રઃ પુત્રં પૌરવમન્વભૂત્

દુષ્મન્તઃ સ પુનર્ભેજે સ્વવંશં રાજ્યકામુકઃ ।
યયાતેર્જ્યેષ્ઠપુત્રસ્ય યદોર્વંશં નરર્ષભ

વર્ણયામિ મહાપુણ્યં સર્વપાપહરં નૃણામ્ ।
યદોર્વંશં નરઃ શ્રુત્વા સર્વપાપૈઃ પ્રમુચ્યતે

યત્રાવતીર્ણો ભગવાન્ પરમાત્મા નરાકૃતિઃ ।
યદોઃ સહસ્રજિત્ ક્રોષ્ટા નલો રિપુરિતિ શ્રુતાઃ

ચત્વારઃ સૂનવસ્તત્ર શતજિત્ પ્રથમાત્મજઃ ।
મહાહયો રેણુહયો હૈહયશ્ચેતિ તત્સુતાઃ

ધર્મસ્તુ હૈહયસુતો નેત્રઃ કુન્તેઃ પિતા તતઃ ।
સોહઞ્જિરભવત્ કુન્તેર્મહિષ્માન્ ભદ્રસેનકઃ

દુર્મદો ભદ્રસેનસ્ય ધનકઃ કૃતવીર્યસૂઃ ।
કૃતાગ્નિઃ કૃતવર્મા ચ કૃતૌજા ધનકાત્મજાઃ

અર્જુનઃ કૃતવીર્યસ્ય સપ્તદ્વીપેશ્વરો ઽભવત્ ।
દત્તાત્રેયાદ્ધરેરંશાત્ પ્રાપ્તયોગમહાગુણઃ

ન નૂનં કાર્તવીર્યસ્ય ગતિં યાસ્યન્તિ પાર્થિવાઃ ।
યજ્ઞદાનતપોયોગૈઃ શ્રુતવીર્યદયાદિભિઃ

પઞ્ચાશીતિ સહસ્રાણિ હ્યવ્યાહતબલઃ સમાઃ ।
અનષ્ટવિત્તસ્મરણો બુભુજે ઽક્ષય્યષડ્વસુ

તસ્ય પુત્રસહસ્રેષુ પઞ્ચૈવોર્વરિતા મૃધે ।
જયધ્વજઃ શૂરસેનો વૃષભો મધુરૂર્જિતઃ

જયધ્વજાત્ તાલજઙ્ઘસ્તસ્ય પુત્રશતં ત્વ્ અભૂત્ ।
ક્ષત્રં યત્ તાલજઙ્ઘાખ્યમૌર્વતેજોપસંહૃતમ્

તેષાં જ્યેષ્ઠો વીતિહોત્રો વૃષ્ણિઃ પુત્રો મધોઃ સ્મૃતઃ ।
તસ્ય પુત્રશતં ત્વ્ આસીદ્વૃષ્ણિજ્યેષ્ઠં યતઃ કુલમ્

માધવા વૃષ્ણયો રાજન્ યાદવાશ્ચેતિ સંજ્ઞિતાઃ ।
યદુપુત્રસ્ય ચ ક્રોષ્ટોઃ પુત્રો વૃજિનવાંસ્તતઃ

સ્વાહિતો ઽતો વિષદ્ગુર્વૈ તસ્ય ચિત્રરથસ્તતઃ ।
શશબિન્દુર્મહાયોગી મહાભાગો મહાન્ અભૂત્

ચતુર્દશમહારત્નશ્ચક્રવર્ત્યપરાજિતઃ ।
તસ્ય પત્નીસહસ્રાણાં દશાનાં સુમહાયશાઃ

દશલક્ષસહસ્રાણિ પુત્રાણાં તાસ્વ્ અજીજનત્ ।
તેષાં તુ ષટ્ પ્રધાનાનાં પૃથુશ્રવસ આત્મજઃ

ધર્મો નામોશના તસ્ય હયમેધશતસ્ય યાટ્ ।
તત્સુતો રુચકસ્તસ્ય પઞ્ચાસન્નાત્મજાઃ શૃણુ

પુરુજિદ્રુક્મરુક્મેષુ પૃથુજ્યામઘસંજ્ઞિતાઃ ।
જ્યામઘસ્ત્વ્ અપ્રજો ઽપ્યન્યાં ભાર્યાં શૈબ્યાપતિર્ભયાત્

નાવિન્દચ્ છત્રુભવનાદ્ભોજ્યાં કન્યામહારષીત્ ।
રથસ્થાં તાં નિરીક્ષ્યાહ શૈબ્યા પતિમમર્ષિતા

કેયં કુહક મત્સ્થાનં રથમારોપિતેતિ વૈ ।
સ્નુષા તવેત્યભિહિતે સ્મયન્તી પતિમબ્રવીત્

અહં બન્ધ્યાસપત્ની ચ સ્નુષા મે યુજ્યતે કથમ્ ।
જનયિષ્યસિ યં રાજ્ઞિ તસ્યેયમુપયુજ્યતે

અન્વમોદન્ત તદ્વિશ્વે દેવાઃ પિતર એવ ચ ।
શૈબ્યા ગર્ભમધાત્ કાલે કુમારં સુષુવે શુભમ્ ।
સ વિદર્ભ ઇતિ પ્રોક્ત ઉપયેમે સ્નુષાં સતીમ્