Bhagavata Purana · Chapter 09.15

BhP_09.15.001/0 śrībādarāyaṇiruvāca
ailasya corvaśīgarbhāt ṣaḍ āsannātmajā nṛpa /
āyuḥ śrutāyuḥ satyāyū rayo 'tha vijayo jayaḥ

śrutāyorvasumān putraḥ satyāyośca śrutañjayaḥ /
rayasya suta ekaśca jayasya tanayo 'mitaḥ

bhīmastu vijayasyātha kāñcano hotrakastataḥ /
tasya jahnuḥ suto gaṅgāṃ gaṇḍūṣīkṛtya yo 'pibat /
jahnostu purustasyātha balākaścātmajo 'jakaḥ

tataḥ kuśaḥ kuśasyāpi kuśāmbustanayo vasuḥ /
kuśanābhaśca catvāro gādhirāsīt kuśāmbujaḥ

tasya satyavatīṃ kanyāmṛcīko 'yācata dvijaḥ /
varaṃ visadṛśaṃ matvā gādhirbhārgavamabravīt

ekataḥ śyāmakarṇānāṃ hayānāṃ candravarcasām /
sahasraṃ dīyatāṃ śulkaṃ kanyāyāḥ kuśikā vayam

ityuktastanmataṃ jñātvā gataḥ sa varuṇāntikam /
ānīya dattvā tān aśvān upayeme varānanām

sa ṛṣiḥ prārthitaḥ patnyā śvaśrvā cāpatyakāmyayā /
śrapayitvobhayairmantraiścaruṃ snātuṃ gato muniḥ

tāvat satyavatī mātrā svacaruṃ yācitā satī /
śreṣṭhaṃ matvā tayāyacchan mātre māturadat svayam

tadviditvā muniḥ prāha patnīṃ kaṣṭamakāraṣīḥ /
ghoro daṇḍadharaḥ putro bhrātā te brahmavittamaḥ

prasāditaḥ satyavatyā maivaṃ bhūriti bhārgavaḥ /
atha tarhi bhavet pautrojamadagnistato 'bhavat

sā cābhūt sumahatpuṇyā kauśikī lokapāvanī /
reṇoḥ sutāṃ reṇukāṃ vai jamadagniruvāha yām

tasyāṃ vai bhārgavaṛṣeḥ sutā vasumadādayaḥ /
yavīyān jajña eteṣāṃ rāma ityabhiviśrutaḥ

yamāhurvāsudevāṃśaṃ haihayānāṃ kulāntakam /
triḥsaptakṛtvo ya imāṃ cakre niḥkṣatriyāṃ mahīm

dṛptaṃ kṣatraṃ bhuvo bhāramabrahmaṇyamanīnaśat /
rajastamovṛtamahan phalgunyapi kṛte 'ṃhasi

BhP_09.15.016/0 śrīrājovāca
kiṃ tadaṃho bhagavato rājanyairajitātmabhiḥ /
kṛtaṃ yena kulaṃ naṣṭaṃ kṣatriyāṇāmabhīkṣṇaśaḥ

BhP_09.15.017/0 śrībādarāyaṇiruvāca
haihayānāmadhipatirarjunaḥ kṣatriyarṣabhaḥ /
dattaṃ nārāyaṇāṃśāṃśamārādhya parikarmabhiḥ

bāhūn daśaśataṃ lebhe durdharṣatvamarātiṣu /
avyāhatendriyaujaḥ śrī tejovīryayaśobalam

yogeśvaratvamaiśvaryaṃ guṇā yatrāṇimādayaḥ /
cacārāvyāhatagatirlokeṣu pavano yathā

strīratnairāvṛtaḥ krīḍan revāmbhasi madotkaṭaḥ /
vaijayantīṃ srajaṃ bibhradrurodha saritaṃ bhujaiḥ

viplāvitaṃ svaśibiraṃ pratisrotaḥsarijjalaiḥ /
nāmṛṣyat tasya tadvīryaṃ vīramānī daśānanaḥ

gṛhīto līlayā strīṇāṃ samakṣaṃ kṛtakilbiṣaḥ /
māhiṣmatyāṃ sanniruddho mukto yena kapiryathā

sa ekadā tu mṛgayāṃ vicaran vijane vane /
yadṛcchayāśramapadaṃ jamadagnerupāviśat

tasmai sa naradevāya munirarhaṇamāharat /
sasainyāmātyavāhāya haviṣmatyā tapodhanaḥ

sa vai ratnaṃ tu taddṛṣṭvā ātmaiśvaryātiśāyanam /
tan nādriyatāgnihotryāṃ sābhilāṣaḥ sahaihayaḥ

havirdhānīmṛṣerdarpān narān hartumacodayat /
te ca māhiṣmatīṃ ninyuḥ savatsāṃ krandatīṃ balāt

atha rājani niryāte rāma āśrama āgataḥ /
śrutvā tat tasya daurātmyaṃ cukrodhāhirivāhataḥ

ghoramādāya paraśuṃ satūṇaṃ varma kārmukam /
anvadhāvata durmarṣo mṛgendra iva yūthapam

tamāpatantaṃ bhṛguvaryamojasā dhanurdharaṃ bāṇaparaśvadhāyudham /
aiṇeyacarmāmbaramarkadhāmabhir yutaṃ jaṭābhirdadṛśe purīṃ viśan

acodayaddhastirathāśvapattibhir gadāsibāṇarṣṭiśataghniśaktibhiḥ /
akṣauhiṇīḥ saptadaśātibhīṣaṇās tā rāma eko bhagavān asūdayat

yato yato 'sau praharatparaśvadho mano 'nilaujāḥ paracakrasūdanaḥ /
tataś tatas chinnabhujorukandharā nipetururvyāṃ hatasūtavāhanāḥ

dṛṣṭvā svasainyaṃ rudhiraughakardame raṇājire rāmakuṭhārasāyakaiḥ /
vivṛkṇavarmadhvajacāpavigrahaṃ nipātitaṃ haihaya āpatadruṣā

athārjunaḥ pañcaśateṣu bāhubhir dhanuḥṣu bāṇān yugapat sa sandadhe /
rāmāya rāmo 'strabhṛtāṃ samagraṇīs tānyekadhanveṣubhirācchinat samam

punaḥ svahastairacalān mṛdhe 'ṅghripān utkṣipya vegādabhidhāvato yudhi /
bhujān kuṭhāreṇa kaṭhoraneminā ciccheda rāmaḥ prasabhaṃ tv aheriva

kṛttabāhoḥ śirastasya gireḥ śṛṅgamivāharat /
hate pitari tatputrā ayutaṃ dudruvurbhayāt

agnihotrīmupāvartya savatsāṃ paravīrahā /
samupetyāśramaṃ pitre parikliṣṭāṃ samarpayat

svakarma tat kṛtaṃ rāmaḥ pitre bhrātṛbhya eva ca /
varṇayāmāsa tac chrutvājamadagnirabhāṣata

rāma rāma mahābāho bhavān pāpamakāraṣīt /
avadhīn naradevaṃ yat sarvadevamayaṃ vṛthā

vayaṃ hi brāhmaṇāstāta kṣamayārhaṇatāṃ gatāḥ /
yayā lokagururdevaḥ pārameṣṭhyamagāt padam

kṣamayā rocate lakṣmīrbrāhmī saurī yathā prabhā /
kṣamiṇāmāśu bhagavāṃstuṣyate harirīśvaraḥ

rājño mūrdhābhiṣiktasya vadho brahmavadhādguruḥ /
tīrthasaṃsevayā cāṃho jahyaṅgācyutacetanaḥ