Bhagavata Purana · Chapter 09.11

BhP_09.11.001/0 śrīśuka uvāca
bhagavān ātmanātmānaṃ rāma uttamakalpakaiḥ /
sarvadevamayaṃ devamīje 'thācāryavān makhaiḥ

hotre 'dadāddiśaṃ prācīṃ brahmaṇe dakṣiṇāṃ prabhuḥ /
adhvaryave pratīcīṃ vā uttarāṃ sāmagāya saḥ

ācāryāya dadau śeṣāṃ yāvatī bhūstadantarā /
anyamāna idaṃ kṛtsnaṃ brāhmaṇo 'rhati niḥspṛhaḥ

ityayaṃ tadalaṅkāra vāsobhyāmavaśeṣitaḥ /
tathā rājñyapi vaidehī saumaṅgalyāvaśeṣitā

te tu brāhmaṇadevasya vātsalyaṃ vīkṣya saṃstutam /
prītāḥ klinnadhiyastasmai pratyarpyedaṃ babhāṣire

aprattaṃ nastvayā kiṃ nu bhagavan bhuvaneśvara /
yan no 'ntarhṛdayaṃ viśya tamo haṃsi svarociṣā

namo brahmaṇyadevāya rāmāyākuṇṭhamedhase /
uttamaślokadhuryāya nyastadaṇḍārpitāṅghraye

kadācil lokajijñāsurgūḍho rātryāmalakṣitaḥ /
caran vāco 'śṛṇodrāmo bhāryāmuddiśya kasyacit

nāhaṃ bibharmi tvāṃ duṣṭāmasatīṃ paraveśmagām /
straiṇo hi bibhṛyāt sītāṃ rāmo nāhaṃ bhaje punaḥ

iti lokādbahumukhāddurārādhyādasaṃvidaḥ /
patyā bhītena sā tyaktā prāptā prācetasāśramam

antarvatnyāgate kāle yamau sā suṣuve sutau /
kuśo lava iti khyātau tayoścakre kriyā muniḥ

aṅgadaścitraketuśca lakṣmaṇasyātmajau smṛtau /
takṣaḥ puṣkala ityāstāṃ bharatasya mahīpate

subāhuḥ śrutasenaśca śatrughnasya babhūvatuḥ /
gandharvān koṭiśo jaghne bharato vijaye diśām

tadīyaṃ dhanamānīya sarvaṃ rājñe nyavedayat /
śatrughnaśca madhoḥ putraṃ lavaṇaṃ nāma rākṣasam /
hatvā madhuvane cakre mathurāṃ nāma vai purīm

munau nikṣipya tanayau sītā bhartrā vivāsitā /
dhyāyantī rāmacaraṇau vivaraṃ praviveśa ha

tac chrutvā bhagavān rāmo rundhannapi dhiyā śucaḥ /
smaraṃstasyā guṇāṃstāṃstān nāśaknodroddhumīśvaraḥ

strīpuṃprasaṅga etādṛk sarvatra trāsamāvahaḥ /
apīśvarāṇāṃ kimuta grāmyasya gṛhacetasaḥ

tata ūrdhvaṃ brahmacaryaṃ dhāryannajuhot prabhuḥ /
trayodaśābdasāhasramagnihotramakhaṇḍitam

smaratāṃ hṛdi vinyasya viddhaṃ daṇḍakakaṇṭakaiḥ /
svapādapallavaṃ rāma ātmajyotiragāt tataḥ

nedaṃ yaśo raghupateḥ surayācñayātta $ līlātanoradhikasāmyavimuktadhāmnaḥ &
rakṣovadho jaladhibandhanamastrapūgaiḥ % kiṃ tasya śatruhanane kapayaḥ sahāyāḥ // BhP_09.10.020* //
yasyāmalaṃ nṛpasadaḥsu yaśo 'dhunāpi $ gāyantyaghaghnamṛṣayo digibhendrapaṭṭam &
yasyāmalaṃ nṛpasadaḥsu yaśo 'dhunāpi $ gāyantyaghaghnamṛṣayo digibhendrapaṭṭam &
taṃ nākapālavasupālakirīṭajuṣṭa % pādāmbujaṃ raghupatiṃ śaraṇaṃ prapadye // BhP_09.11.021* //
sa yaiḥ spṛṣṭo 'bhidṛṣṭo vā saṃviṣṭo 'nugato 'pi vā /
kosalāste yayuḥ sthānaṃ yatra gacchanti yoginaḥ

puruṣo rāmacaritaṃ śravaṇairupadhārayan /
ānṛśaṃsyaparo rājan karmabandhairvimucyate

BhP_09.11.024/0 śrīrājovāca
kathaṃ sa bhagavān rāmo bhrāt-n vā svayamātmanaḥ /
tasmin vā te 'nvavartanta prajāḥ paurāśca īśvare

BhP_09.11.025/0 śrībādarāyaṇiruvāca
athādiśaddigvijaye bhrāt-ṃstribhuvaneśvaraḥ /
ātmānaṃ darśayan svānāṃ purīmaikṣata sānugaḥ

āsiktamārgāṃ gandhodaiḥ kariṇāṃ madaśīkaraiḥ /
svāminaṃ prāptamālokya mattāṃ vā sutarāmiva

prāsādagopurasabhā caityadevagṛhādiṣu /
vinyastahemakalaśaiḥ patākābhiśca maṇḍitām

pūgaiḥ savṛntai rambhābhiḥ paṭṭikābhiḥ suvāsasām /
ādarśairaṃśukaiḥ sragbhiḥ kṛtakautukatoraṇām

tamupeyustatra tatra paurā arhaṇapāṇayaḥ /
āśiṣo yuyujurdeva pāhīmāṃ prāk tvayoddhṛtām

tataḥ prajā vīkṣya patiṃ cirāgataṃ didṛkṣayotsṛṣṭagṛhāḥ striyo narāḥ /
āruhya harmyāṇyaravindalocanam atṛptanetrāḥ kusumairavākiran

atha praviṣṭaḥ svagṛhaṃ juṣṭaṃ svaiḥ pūrvarājabhiḥ /
anantākhilakoṣāḍhyamanarghyoruparicchadam

vidrumodumbaradvārairvaidūryastambhapaṅktibhiḥ /
sthalairmārakataiḥ svacchairbhrājatsphaṭikabhittibhiḥ

citrasragbhiḥ paṭṭikābhirvāsomaṇigaṇāṃśukaiḥ /
muktāphalaiścidullāsaiḥ kāntakāmopapattibhiḥ

dhūpadīpaiḥ surabhibhirmaṇḍitaṃ puṣpamaṇḍanaiḥ /
strīpumbhiḥ surasaṅkāśairjuṣṭaṃ bhūṣaṇabhūṣaṇaiḥ

tasmin sa bhagavān rāmaḥ snigdhayā priyayeṣṭayā /
reme svārāmadhīrāṇāmṛṣabhaḥ sītayā kila

bubhuje ca yathākālaṃ kāmān dharmamapīḍayan /
varṣapūgān bahūn nṝṇāmabhidhyātāṅghripallavaḥ