Bhagavata Purana · Chapter 09.08

BhP_09.08.001/0 śrīśuka uvāca
harito rohitasutaścampastasmādvinirmitā /
campāpurī sudevo 'to vijayo yasya cātmajaḥ

bharukastatsutastasmādvṛkastasyāpi bāhukaḥ /
so 'ribhirhṛtabhū rājā sabhāryo vanamāviśat

vṛddhaṃ taṃ pañcatāṃ prāptaṃ mahiṣyanumariṣyatī /
aurveṇa jānatātmānaṃ prajāvantaṃ nivāritā

ājñāyāsyai sapatnībhirgaro datto 'ndhasā saha /
saha tenaiva sañjātaḥ sagarākhyo mahāyaśāḥ

sagaraścakravartyāsīt sāgaro yatsutaiḥ kṛtaḥ /
yastālajaṅghān yavanāñ chakān haihayabarbarān

nāvadhīdguruvākyena cakre vikṛtaveṣiṇaḥ /
muṇḍān chmaśrudharān kāṃścin muktakeśārdhamuṇḍitān

anantarvāsasaḥ kāṃścidabahirvāsaso 'parān /
so 'śvamedhairayajata sarvavedasurātmakam

aurvopadiṣṭayogena harimātmānamīśvaram /
tasyotsṛṣṭaṃ paśuṃ yajñe jahārāśvaṃ purandaraḥ

sumatyāstanayā dṛptāḥ piturādeśakāriṇaḥ /
hayamanveṣamāṇāste samantān nyakhanan mahīm

prāgudīcyāṃ diśi hayaṃ dadṛśuḥ kapilāntike /
eṣa vājiharaścaura āste mīlitalocanaḥ

hanyatāṃ hanyatāṃ pāpa iti ṣaṣṭisahasriṇaḥ /
udāyudhā abhiyayurunmimeṣa tadā muniḥ

svaśarīrāgninā tāvan mahendrahṛtacetasaḥ /
mahadvyatikramahatā bhasmasādabhavan kṣaṇāt

na sādhuvādo munikopabharjitā nṛpendraputrā iti sattvadhāmani /
kathaṃ tamo roṣamayaṃ vibhāvyate jagatpavitrātmani khe rajo bhuvaḥ

yasyeritā sāṅkhyamayī dṛḍheha naur yayā mumukṣustarate duratyayam /
bhavārṇavaṃ mṛtyupathaṃ vipaścitaḥ parātmabhūtasya kathaṃ pṛthaṅmatiḥ

yo 'samañjasa ityuktaḥ sa keśinyā nṛpātmajaḥ /
tasya putro 'ṃśumān nāma pitāmahahite rataḥ

asamañjasa ātmānaṃ darśayannasamañjasam /
jātismaraḥ purā saṅgādyogī yogādvicālitaḥ

ācaran garhitaṃ loke jñātīnāṃ karma vipriyam /
sarayvāṃ krīḍato bālān prāsyadudvejayan janam

evaṃ vṛttaḥ parityaktaḥ pitrā snehamapohya vai /
yogaiśvaryeṇa bālāṃstān darśayitvā tato yayau

ayodhyāvāsinaḥ sarve bālakān punarāgatān /
dṛṣṭvā visismire rājan rājā cāpyanvatapyata

aṃśumāṃścodito rājñā turagānveṣaṇe yayau /
pitṛvyakhātānupathaṃ bhasmānti dadṛśe hayam

tatrāsīnaṃ muniṃ vīkṣya kapilākhyamadhokṣajam /
astaut samāhitamanāḥ prāñjaliḥ praṇato mahān

BhP_09.08.022/0 aṃśumān uvāca
na paśyati tvāṃ paramātmano 'jano na budhyate 'dyāpi samādhiyuktibhiḥ /
kuto 'pare tasya manaḥśarīradhī visargasṛṣṭā vayamaprakāśāḥ

ye dehabhājastriguṇapradhānā guṇān vipaśyantyuta vā tamaśca /
yanmāyayā mohitacetasastvāṃ viduḥ svasaṃsthaṃ na bahiḥprakāśāḥ

taṃ tvāṃ ahaṃ jñānaghanaṃ svabhāva pradhvastamāyāguṇabhedamohaiḥ /
sanandanādyairmunibhirvibhāvyaṃ kathaṃ vimūḍhaḥ paribhāvayāmi

praśānta māyāguṇakarmaliṅgam anāmarūpaṃ sadasadvimuktam /
jñānopadeśāya gṛhītadehaṃ namāmahe tvāṃ puruṣaṃ purāṇam

tvanmāyāracite loke vastubuddhyā gṛhādiṣu /
bhramanti kāmalobherṣyā mohavibhrāntacetasaḥ

adya naḥ sarvabhūtātman kāmakarmendriyāśayaḥ /
mohapāśo dṛḍhaśchinno bhagavaṃstava darśanāt

BhP_09.08.028/0 śrīśuka uvāca
itthaṃ gītānubhāvastaṃ bhagavān kapilo muniḥ /
aṃśumantamuvācedamanugrāhya dhiyā nṛpa

BhP_09.08.029/0 śrībhagavān uvāca
aśvo 'yaṃ nīyatāṃ vatsa pitāmahapaśustava /
ime ca pitaro dagdhā gaṅgāmbho 'rhanti netarat

taṃ parikramya śirasā prasādya hayamānayat /
sagarastena paśunā yajñaśeṣaṃ samāpayat

rājyamaṃśumate nyasya niḥspṛho muktabandhanaḥ /
aurvopadiṣṭamārgeṇa lebhe gatimanuttamām