Bhagavata Purana · Chapter 09.06

BhP_09.06.001/0 śrīśuka uvāca
virūpaḥ ketumān chambhurambarīṣasutāstrayaḥ /
virūpāt pṛṣadaśvo 'bhūt tatputrastu rathītaraḥ

rathītarasyāprajasya bhāryāyāṃ tantave 'rthitaḥ /
aṅgirā janayāmāsa brahmavarcasvinaḥ sutān

ete kṣetraprasūtā vai punastv āṅgirasāḥ smṛtāḥ /
rathītarāṇāṃ pravarāḥ kṣetropetā dvijātayaḥ

kṣuvatastu manorjajñe ikṣvākurghrāṇataḥ sutaḥ /
tasya putraśatajyeṣṭhā vikukṣinimidaṇḍakāḥ

teṣāṃ purastādabhavannāryāvarte nṛpā nṛpa /
pañcaviṃśatiḥ paścāc ca trayo madhye 'pare 'nyataḥ

sa ekadāṣṭakāśrāddhe ikṣvākuḥ sutamādiśat /
māṃsamānīyatāṃ medhyaṃ vikukṣe gaccha mā ciram

tatheti sa vanaṃ gatvā mṛgān hatvā kriyārhaṇān /
śrānto bubhukṣito vīraḥ śaśaṃ cādadapasmṛtiḥ

śeṣaṃ nivedayāmāsa pitre tena ca tadguruḥ /
coditaḥ prokṣaṇāyāha duṣṭametadakarmakam

jñātvā putrasya tat karma guruṇābhihitaṃ nṛpaḥ /
deśān niḥsārayāmāsa sutaṃ tyaktavidhiṃ ruṣā

sa tu vipreṇa saṃvādaṃ jñāpakena samācaran /
tyaktvā kalevaraṃ yogī sa tenāvāpa yat param

pitaryuparate 'bhyetya vikukṣiḥ pṛthivīmimām /
śāsadīje hariṃ yajñaiḥ śaśāda iti viśrutaḥ

purañjayastasya suta indravāha itīritaḥ /
kakutstha iti cāpyuktaḥ śṛṇu nāmāni karmabhiḥ

kṛtānta āsīt samaro devānāṃ saha dānavaiḥ /
pārṣṇigrāho vṛto vīro devairdaityaparājitaiḥ

vacanāddevadevasya viṣṇorviśvātmanaḥ prabhoḥ /
vāhanatve vṛtastasya babhūvendro mahāvṛṣaḥ

sa sannaddho dhanurdivyamādāya viśikhān chitān /
stūyamānastamāruhya yuyutsuḥ kakudi sthitaḥ

tejasāpyāyito viṣṇoḥ puruṣasya mahātmanaḥ /
pratīcyāṃ diśi daityānāṃ nyaruṇat tridaśaiḥ puram

taistasya cābhūt pradhanaṃ tumulaṃ lomaharṣaṇam /
yamāya bhallairanayaddaityān abhiyayurmṛdhe

tasyeṣupātābhimukhaṃ yugāntāgnimivolbaṇam /
visṛjya dudruvurdaityā hanyamānāḥ svamālayam

jitvā paraṃ dhanaṃ sarvaṃ sastrīkaṃ vajrapāṇaye /
pratyayacchat sa rājarṣiriti nāmabhirāhṛtaḥ

purañjayasya putro 'bhūdanenāstatsutaḥ pṛthuḥ /
viśvagandhistataścandro yuvanāśvastu tatsutaḥ

śrāvastastatsuto yena śrāvastī nirmame purī /
bṛhadaśvastu śrāvastistataḥ kuvalayāśvakaḥ

yaḥ priyārthamutaṅkasya dhundhunāmāsuraṃ balī /
sutānāmekaviṃśatyā sahasrairahanadvṛtaḥ

dhundhumāra iti khyātastatsutāste ca jajvaluḥ /
dhundhormukhāgninā sarve traya evāvaśeṣitāḥ

dṛḍhāśvaḥ kapilāśvaśca bhadrāśva iti bhārata /
dṛḍhāśvaputro haryaśvo nikumbhastatsutaḥ smṛtaḥ

bahulāśvo nikumbhasya kṛśāśvo 'thāsya senajit /
yuvanāśvo 'bhavat tasya so 'napatyo vanaṃ gataḥ

bhāryāśatena nirviṇṇa ṛṣayo 'sya kṛpālavaḥ /
iṣṭiṃ sma vartayāṃ cakruraindrīṃ te susamāhitāḥ

rājā tadyajñasadanaṃ praviṣṭo niśi tarṣitaḥ /
dṛṣṭvā śayānān viprāṃstān papau mantrajalaṃ svayam

utthitāste niśamyātha vyudakaṃ kalaśaṃ prabho /
papracchuḥ kasya karmedaṃ pītaṃ puṃsavanaṃ jalam

rājñā pītaṃ viditvā vai īśvaraprahitena te /
īśvarāya namaścakruraho daivabalaṃ balam

tataḥ kāla upāvṛtte kukṣiṃ nirbhidya dakṣiṇam /
yuvanāśvasya tanayaścakravartī jajāna ha

kaṃ dhāsyati kumāro 'yaṃ stanye rorūyate bhṛśam /
māṃ dhātā vatsa mā rodīritīndro deśinīmadāt

na mamāra pitā tasya vipradevaprasādataḥ /
yuvanāśvo 'tha tatraiva tapasā siddhimanvagāt

trasaddasyuritīndro 'ṅga vidadhe nāma yasya vai /
yasmāt trasanti hyudvignā dasyavo rāvaṇādayaḥ

yauvanāśvo 'tha māndhātā cakravartyavanīṃ prabhuḥ /
saptadvīpavatīmekaḥ śaśāsācyutatejasā

īje ca yajñaṃ kratubhirātmavidbhūridakṣiṇaiḥ /
sarvadevamayaṃ devaṃ sarvātmakamatīndriyam

dravyaṃ mantro vidhiryajño yajamānastathartvijaḥ /
dharmo deśaśca kālaśca sarvametadyadātmakam

yāvat sūrya udeti sma yāvac ca pratitiṣṭhati /
tat sarvaṃ yauvanāśvasya māndhātuḥ kṣetramucyate

śaśabindorduhitari bindumatyāmadhān nṛpaḥ /
purukutsamambarīṣaṃ mucukundaṃ ca yoginam /
teṣāṃ svasāraḥ pañcāśat saubhariṃ vavrire patim

yamunāntarjale magnastapyamānaḥ paraṃ tapaḥ /
nirvṛtiṃ mīnarājasya dṛṣṭvā maithunadharmiṇaḥ

jātaspṛho nṛpaṃ vipraḥ kanyāmekāmayācata /
so 'pyāha gṛhyatāṃ brahman kāmaṃ kanyā svayaṃvare

sa vicintyāpriyaṃ strīṇāṃ jaraṭho 'hamasanmataḥ /
valīpalita ejatka ityahaṃ pratyudāhṛtaḥ

sādhayiṣye tathātmānaṃ surastrīṇāmabhīpsitam /
kiṃ punarmanujendrāṇāmiti vyavasitaḥ prabhuḥ

muniḥ praveśitaḥ kṣatrā kanyāntaḥpuramṛddhimat /
vṛtaḥ sa rājakanyābhirekaṃ pañcāśatā varaḥ

tāsāṃ kalirabhūdbhūyāṃstadarthe 'pohya sauhṛdam /
mamānurūpo nāyaṃ va iti tadgatacetasām

sa bahvṛcastābhirapāraṇīya tapaḥśriyānarghyaparicchadeṣu /
gṛheṣu nānopavanāmalāmbhaḥ saraḥsu saugandhikakānaneṣu

mahārhaśayyāsanavastrabhūṣaṇa snānānulepābhyavahāramālyakaiḥ /
svalaṅkṛtastrīpuruṣeṣu nityadā reme 'nugāyaddvijabhṛṅgavandiṣu

yadgārhasthyaṃ tu saṃvīkṣya saptadvīpavatīpatiḥ /
vismitaḥ stambhamajahāt sārvabhaumaśriyānvitam

evaṃ gṛheṣv abhirato viṣayān vividhaiḥ sukhaiḥ /
sevamāno na cātuṣyadājyastokairivānalaḥ

sa kadācidupāsīna ātmāpahnavamātmanaḥ /
dadarśa bahvṛcācāryo mīnasaṅgasamutthitam

aho imaṃ paśyata me vināśaṃ tapasvinaḥ saccaritavratasya /
antarjale vāricaraprasaṅgāt pracyāvitaṃ brahma ciraṃ dhṛtaṃ yat

saṅgaṃ tyajeta mithunavratīnāṃ mumukṣuḥ $ sarvātmanā na visṛjedbahirindriyāṇi &
ekaścaran rahasi cittamananta īśe % yuñjīta tadvratiṣu sādhuṣu cet prasaṅgaḥ // BhP_09.06.051* //
ekastapasvyahamathāmbhasi matsyasaṅgāt $ pañcāśadāsamuta pañcasahasrasargaḥ &
ekastapasvyahamathāmbhasi matsyasaṅgāt $ pañcāśadāsamuta pañcasahasrasargaḥ &
nāntaṃ vrajāmyubhayakṛtyamanorathānāṃ % māyāguṇairhṛtamatirviṣaye 'rthabhāvaḥ // BhP_09.06.052* //
evaṃ vasan gṛhe kālaṃ virakto nyāsamāsthitaḥ /
vanaṃ jagāmānuyayustatpatnyaḥ patidevatāḥ

tatra taptvā tapastīkṣṇamātmadarśanamātmavān /
sahaivāgnibhirātmānaṃ yuyoja paramātmani

tāḥ svapatyurmahārāja nirīkṣyādhyātmikīṃ gatim /
anvīyustatprabhāveṇa agniṃ śāntamivārciṣaḥ