Bhagavata Purana · Chapter 09.05

BhP_09.05.001/0 śrīśuka uvāca
evaṃ bhagavatādiṣṭo durvāsāścakratāpitaḥ /
ambarīṣamupāvṛtya tatpādau duḥkhito 'grahīt

tasya sodyamamāvīkṣya pādasparśavilajjitaḥ /
astāvīt taddharerastraṃ kṛpayā pīḍito bhṛśam

BhP_09.05.003/0 ambarīṣa uvāca
tvamagnirbhagavān sūryastvaṃ somo jyotiṣāṃ patiḥ /
tvamāpastvaṃ kṣitirvyoma vāyurmātrendriyāṇi ca

sudarśana namastubhyaṃ sahasrārācyutapriya /
sarvāstraghātin viprāya svasti bhūyā iḍaspate

tvaṃ dharmastvamṛtaṃ satyaṃ tvaṃ yajño 'khilayajñabhuk /
tvaṃ lokapālaḥ sarvātmā tvaṃ tejaḥ pauruṣaṃ param

namaḥ sunābhākhiladharmasetave hyadharmaśīlāsuradhūmaketave /
trailokyagopāya viśuddhavarcase manojavāyādbhutakarmaṇe gṛṇe

tvattejasā dharmamayena saṃhṛtaṃ tamaḥ prakāśaśca dṛśo mahātmanām /
duratyayaste mahimā girāṃ pate tvadrūpametat sadasat parāvaram

yadā visṛṣṭastvamanañjanena vai balaṃ praviṣṭo 'jita daityadānavam /
bāhūdarorvaṅghriśirodharāṇi vṛścannajasraṃ pradhane virājase

sa tvaṃ jagattrāṇa khalaprahāṇaye nirūpitaḥ sarvasaho gadābhṛtā /
viprasya cāsmatkuladaivahetave vidhehi bhadraṃ tadanugraho hi naḥ

yadyasti dattamiṣṭaṃ vā svadharmo vā svanuṣṭhitaḥ /
kulaṃ no vipradaivaṃ ceddvijo bhavatu vijvaraḥ

yadi no bhagavān prīta ekaḥ sarvaguṇāśrayaḥ /
sarvabhūtātmabhāvena dvijo bhavatu vijvaraḥ

BhP_09.05.012/0 śrīśuka uvāca
iti saṃstuvato rājño viṣṇucakraṃ sudarśanam /
aśāmyat sarvato vipraṃ pradahadrājayācñayā

sa mukto 'strāgnitāpena durvāsāḥ svastimāṃstataḥ /
praśaśaṃsa tamurvīśaṃ yuñjānaḥ paramāśiṣaḥ

BhP_09.05.014/0 durvāsā uvāca
aho anantadāsānāṃ mahattvaṃ dṛṣṭamadya me /
kṛtāgaso 'pi yadrājan maṅgalāni samīhase

duṣkaraḥ ko nu sādhūnāṃ dustyajo vā mahātmanām /
yaiḥ saṅgṛhīto bhagavān sātvatāmṛṣabho hariḥ

yannāmaśrutimātreṇa pumān bhavati nirmalaḥ /
tasya tīrthapadaḥ kiṃ vā dāsānāmavaśiṣyate

rājannanugṛhīto 'haṃ tvayātikaruṇātmanā /
madaghaṃ pṛṣṭhataḥ kṛtvā prāṇā yan me 'bhirakṣitāḥ

rājā tamakṛtāhāraḥ pratyāgamanakāṅkṣayā /
caraṇāv upasaṅgṛhya prasādya samabhojayat

so 'śitvādṛtamānītamātithyaṃ sārvakāmikam /
tṛptātmā nṛpatiṃ prāha bhujyatāmiti sādaram

prīto 'smyanugṛhīto 'smi tava bhāgavatasya vai /
darśanasparśanālāpairātithyenātmamedhasā

karmāvadātametat te gāyanti svaḥstriyo muhuḥ /
kīrtiṃ paramapuṇyāṃ ca kīrtayiṣyati bhūriyam

BhP_09.05.022/0 śrīśuka uvāca
evaṃ saṅkīrtya rājānaṃ durvāsāḥ paritoṣitaḥ /
yayau vihāyasāmantrya brahmalokamahaitukam

saṃvatsaro 'tyagāt tāvadyāvatā nāgato gataḥ /
munistaddarśanākāṅkṣo rājābbhakṣo babhūva ha

gate 'tha durvāsasi so 'mbarīṣo dvijopayogātipavitramāharat /
ṛṣervimokṣaṃ vyasanaṃ ca vīkṣya mene svavīryaṃ ca parānubhāvam

evaṃ vidhānekaguṇaḥ sa rājā parātmani brahmaṇi vāsudeve /
kriyākalāpaiḥ samuvāha bhaktiṃ yayāviriñcyān nirayāṃścakāra

BhP_09.05.026/0 śrīśuka uvāca
athāmbarīṣastanayeṣu rājyaṃ samānaśīleṣu visṛjya dhīraḥ /
vanaṃ viveśātmani vāsudeve mano dadhaddhvastaguṇapravāhaḥ

ityetat puṇyamākhyānamambarīṣasya bhūpate /
saṅkīrtayannanudhyāyan bhakto bhagavato bhavet

ambarīṣasya caritaṃ ye śṛṇvanti mahātmanaḥ /
muktiṃ prayānti te sarve bhaktyā viṣṇoḥ prasādataḥ