Bhagavata Purana · Chapter 09.04

BhP_09.04.001/0 śrīśuka uvāca
nābhāgo nabhagāpatyaṃ yaṃ tataṃ bhrātaraḥ kavim /
yaviṣṭhaṃ vyabhajan dāyaṃ brahmacāriṇamāgatam

bhrātaro 'bhāṅkta kiṃ mahyaṃ bhajāma pitaraṃ tava /
tvāṃ mamāryāstatābhāṅkṣurmā putraka tadādṛthāḥ

ime aṅgirasaḥ satramāsate 'dya sumedhasaḥ /
ṣaṣṭhaṃ ṣaṣṭhamupetyāhaḥ kave muhyanti karmaṇi

tāṃstvaṃ śaṃsaya sūkte dve vaiśvadeve mahātmanaḥ /
te svaryanto dhanaṃ satra pariśeṣitamātmanaḥ

dāsyanti te 'tha tān arccha tathā sa kṛtavān yathā /
tasmai dattvā yayuḥ svargaṃ te satrapariśeṣaṇam

taṃ kaścit svīkariṣyantaṃ puruṣaḥ kṛṣṇadarśanaḥ /
uvācottarato 'bhyetya mamedaṃ vāstukaṃ vasu

mamedamṛṣibhirdattamiti tarhi sma mānavaḥ /
syān nau te pitari praśnaḥ pṛṣṭavān pitaraṃ yathā

yajñavāstugataṃ sarvamucchiṣṭamṛṣayaḥ kvacit /
cakrurhi bhāgaṃ rudrāya sa devaḥ sarvamarhati

nābhāgastaṃ praṇamyāha taveśa kila vāstukam /
ityāha me pitā brahmañ chirasā tvāṃ prasādaye

yat te pitāvadaddharmaṃ tvaṃ ca satyaṃ prabhāṣase /
dadāmi te mantradṛśo jñānaṃ brahma sanātanam

gṛhāṇa draviṇaṃ dattaṃ matsatrapariśeṣitam /
ityuktvāntarhito rudro bhagavān dharmavatsalaḥ

ya etat saṃsmaret prātaḥ sāyaṃ ca susamāhitaḥ /
kavirbhavati mantrajño gatiṃ caiva tathātmanaḥ

nābhāgādambarīṣo 'bhūn mahābhāgavataḥ kṛtī /
nāspṛśadbrahmaśāpo 'pi yaṃ na pratihataḥ kvacit

BhP_09.04.014/0 śrīrājovāca
bhagavan chrotumicchāmi rājarṣestasya dhīmataḥ /
na prābhūdyatra nirmukto brahmadaṇḍo duratyayaḥ

BhP_09.04.015/0 śrīśuka uvāca
ambarīṣo mahābhāgaḥ saptadvīpavatīṃ mahīm /
avyayāṃ ca śriyaṃ labdhvā vibhavaṃ cātulaṃ bhuvi

mene 'tidurlabhaṃ puṃsāṃ sarvaṃ tat svapnasaṃstutam /
vidvān vibhavanirvāṇaṃ tamo viśati yat pumān

vāsudeve bhagavati tadbhakteṣu ca sādhuṣu /
prāpto bhāvaṃ paraṃ viśvaṃ yenedaṃ loṣṭravat smṛtam

sa vai manaḥ kṛṣṇapadāravindayor vacāṃsi vaikuṇṭhaguṇānuvarṇane /
karau harermandiramārjanādiṣu śrutiṃ cakārācyutasatkathodaye

mukundaliṅgālayadarśane dṛśau tadbhṛtyagātrasparśe 'ṅgasaṅgamam /
ghrāṇaṃ ca tatpādasarojasaurabhe śrīmattulasyā rasanāṃ tadarpite

pādau hareḥ kṣetrapadānusarpaṇe śiro hṛṣīkeśapadābhivandane /
kāmaṃ ca dāsye na tu kāmakāmyayā yathottamaślokajanāśrayā ratiḥ

evaṃ sadā karmakalāpamātmanaḥ pare 'dhiyajñe bhagavatyadhokṣaje /
sarvātmabhāvaṃ vidadhan mahīmimāṃ tanniṣṭhaviprābhihitaḥ śaśāsa ha

īje 'śvamedhairadhiyajñamīśvaraṃ mahāvibhūtyopacitāṅgadakṣiṇaiḥ /
tatairvasiṣṭhāsitagautamādibhir dhanvanyabhisrotamasau sarasvatīm

yasya kratuṣu gīrvāṇaiḥ sadasyā ṛtvijo janāḥ /
tulyarūpāścānimiṣā vyadṛśyanta suvāsasaḥ

svargo na prārthito yasya manujairamarapriyaḥ /
śṛṇvadbhirupagāyadbhiruttamaślokaceṣṭitam

saṃvardhayanti yat kāmāḥ svārājyaparibhāvitāḥ /
durlabhā nāpi siddhānāṃ mukundaṃ hṛdi paśyataḥ

sa itthaṃ bhaktiyogena tapoyuktena pārthivaḥ /
svadharmeṇa hariṃ prīṇan sarvān kāmān śanairjahau

gṛheṣu dāreṣu suteṣu bandhuṣu dvipottamasyandanavājivastuṣu /
akṣayyaratnābharaṇāmbarādiṣv anantakośeṣv akarodasanmatim

tasmā adāddhariścakraṃ pratyanīkabhayāvaham /
ekāntabhaktibhāvena prīto bhaktābhirakṣaṇam

ārirādhayiṣuḥ kṛṣṇaṃ mahiṣyā tulyaśīlayā /
yuktaḥ sāṃvatsaraṃ vīro dadhāra dvādaśīvratam

vratānte kārtike māsi trirātraṃ samupoṣitaḥ /
snātaḥ kadācit kālindyāṃ hariṃ madhuvane 'rcayat

mahābhiṣekavidhinā sarvopaskarasampadā /
abhiṣicyāmbarākalpairgandhamālyārhaṇādibhiḥ

tadgatāntarabhāvena pūjayāmāsa keśavam /
brāhmaṇāṃśca mahābhāgān siddhārthān api bhaktitaḥ

gavāṃ rukmaviṣāṇīnāṃ rūpyāṅghrīṇāṃ suvāsasām /
payaḥśīlavayorūpa vatsopaskarasampadām

prāhiṇot sādhuviprebhyo gṛheṣu nyarbudāni ṣaṭ /
bhojayitvā dvijān agre svādv annaṃ guṇavattamam

labdhakāmairanujñātaḥ pāraṇāyopacakrame /
tasya tarhyatithiḥ sākṣāddurvāsā bhagavān abhūt

tamānarcātithiṃ bhūpaḥ pratyutthānāsanārhaṇaiḥ /
yayāce 'bhyavahārāya pādamūlamupāgataḥ

pratinandya sa tāṃ yācñāṃ kartumāvaśyakaṃ gataḥ /
nimamajja bṛhaddhyāyan kālindīsalile śubhe

muhūrtārdhāvaśiṣṭāyāṃ dvādaśyāṃ pāraṇaṃ prati /
cintayāmāsa dharmajño dvijaistaddharmasaṅkaṭe

brāhmaṇātikrame doṣo dvādaśyāṃ yadapāraṇe /
yat kṛtvā sādhu me bhūyādadharmo vā na māṃ spṛśet

ambhasā kevalenātha kariṣye vratapāraṇam /
āhurabbhakṣaṇaṃ viprā hyaśitaṃ nāśitaṃ ca tat

ityapaḥ prāśya rājarṣiścintayan manasācyutam /
pratyacaṣṭa kuruśreṣṭha dvijāgamanameva saḥ

durvāsā yamunākūlāt kṛtāvaśyaka āgataḥ /
rājñābhinanditastasya bubudhe ceṣṭitaṃ dhiyā

manyunā pracaladgātro bhrukuṭīkuṭilānanaḥ /
bubhukṣitaśca sutarāṃ kṛtāñjalimabhāṣata

aho asya nṛśaṃsasya śriyonmattasya paśyata /
dharmavyatikramaṃ viṣṇorabhaktasyeśamāninaḥ

yo māmatithimāyātamātithyena nimantrya ca /
adattvā bhuktavāṃstasya sadyaste darśaye phalam

evaṃ bruvāṇa utkṛtya jaṭāṃ roṣapradīpitaḥ /
tayā sa nirmame tasmai kṛtyāṃ kālānalopamām

tāmāpatantīṃ jvalatīmasihastāṃ padā bhuvam /
vepayantīṃ samudvīkṣya na cacāla padān nṛpaḥ

prāg diṣṭaṃ bhṛtyarakṣāyāṃ puruṣeṇa mahātmanā /
dadāha kṛtyāṃ tāṃ cakraṃ kruddhāhimiva pāvakaḥ

tadabhidravadudvīkṣya svaprayāsaṃ ca niṣphalam /
durvāsā dudruve bhīto dikṣu prāṇaparīpsayā

tamanvadhāvadbhagavadrathāṅgaṃ dāvāgniruddhūtaśikho yathāhim /
tathānuṣaktaṃ munirīkṣamāṇo guhāṃ vivikṣuḥ prasasāra meroḥ

diśo nabhaḥ kṣmāṃ vivarān samudrān lokān sapālāṃstridivaṃ gataḥ saḥ /
yato yato dhāvati tatra tatra sudarśanaṃ duṣprasahaṃ dadarśa

alabdhanāthaḥ sa sadā kutaścit santrastacitto 'raṇameṣamāṇaḥ /
devaṃ viriñcaṃ samagādvidhātas trāhyātmayone 'jitatejaso mām

BhP_09.04.053/0 śrībrahmovāca
sthānaṃ madīyaṃ sahaviśvametat krīḍāvasāne dviparārdhasaṃjñe /
bhrūbhaṅgamātreṇa hi sandidhakṣoḥ kālātmano yasya tirobhaviṣyati

ahaṃ bhavo dakṣabhṛgupradhānāḥ prajeśabhūteśasureśamukhyāḥ /
sarve vayaṃ yanniyamaṃ prapannā mūrdhnyārpitaṃ lokahitaṃ vahāmaḥ

pratyākhyāto viriñcena viṣṇucakropatāpitaḥ /
durvāsāḥ śaraṇaṃ yātaḥ śarvaṃ kailāsavāsinam

BhP_09.04.056/0 śrīśaṅkara uvāca
vayaṃ na tāta prabhavāma bhūmni yasmin pare 'nye 'pyajajīvakośāḥ /
bhavanti kāle na bhavanti hīdṛśāḥ sahasraśo yatra vayaṃ bhramāmaḥ

ahaṃ sanatkumāraśca nārado bhagavān ajaḥ /
kapilo 'pāntaratamo devalo dharma āsuriḥ

marīcipramukhāścānye siddheśāḥ pāradarśanāḥ /
vidāma na vayaṃ sarve yanmāyāṃ māyayāvṛtāḥ

tasya viśveśvarasyedaṃ śastraṃ durviṣahaṃ hi naḥ /
tamevaṃ śaraṇaṃ yāhi hariste śaṃ vidhāsyati

tato nirāśo durvāsāḥ padaṃ bhagavato yayau /
vaikuṇṭhākhyaṃ yadadhyāste śrīnivāsaḥ śriyā saha

sandahyamāno 'jitaśastravahninā tatpādamūle patitaḥ savepathuḥ /
āhācyutānanta sadīpsita prabho kṛtāgasaṃ māvahi viśvabhāvana

ajānatā te paramānubhāvaṃ kṛtaṃ mayāghaṃ bhavataḥ priyāṇām /
vidhehi tasyāpacitiṃ vidhātar mucyeta yannāmnyudite nārako 'pi

BhP_09.04.063/0 śrībhagavān uvāca
ahaṃ bhaktaparādhīno hyasvatantra iva dvija /
sādhubhirgrastahṛdayo bhaktairbhaktajanapriyaḥ

nāhamātmānamāśāse madbhaktaiḥ sādhubhirvinā /
śriyaṃ cātyantikīṃ brahman yeṣāṃ gatirahaṃ parā

ye dārāgāraputrāpta prāṇān vittamimaṃ param /
hitvā māṃ śaraṇaṃ yātāḥ kathaṃ tāṃstyaktumutsahe

mayi nirbaddhahṛdayāḥ sādhavaḥ samadarśanāḥ /
vaśe kurvanti māṃ bhaktyā satstriyaḥ satpatiṃ yathā

matsevayā pratītaṃ te sālokyādicatuṣṭayam /
necchanti sevayā pūrṇāḥ kuto 'nyat kālaviplutam

sādhavo hṛdayaṃ mahyaṃ sādhūnāṃ hṛdayaṃ tv aham /
madanyat te na jānanti nāhaṃ tebhyo manāg api

upāyaṃ kathayiṣyāmi tava vipra śṛṇuṣva tat /
ayaṃ hyātmābhicāraste yatastaṃ yāhi mā ciram /
sādhuṣu prahitaṃ tejaḥ prahartuḥ kurute 'śivam

tapo vidyā ca viprāṇāṃ niḥśreyasakare ubhe /
te eva durvinītasya kalpete karturanyathā

brahmaṃstadgaccha bhadraṃ te nābhāgatanayaṃ nṛpam /
kṣamāpaya mahābhāgaṃ tataḥ śāntirbhaviṣyati