Bhagavata Purana · Chapter 08.08

tan naicchan daityapatayo mahāpuruṣaceṣṭitam /
na gṛhṇīmo vayaṃ pucchamaheraṅgamamaṅgalam

BhP_08.08.001/0 śrīśuka uvāca
pīte gare vṛṣāṅkeṇa prītāste 'maradānavāḥ /
mamanthustarasā sindhuṃ havirdhānī tato 'bhavat

tāmagnihotrīmṛṣayo jagṛhurbrahmavādinaḥ /
yajñasya devayānasya medhyāya haviṣe nṛpa

tata uccaiḥśravā nāma hayo 'bhūc candrapāṇḍuraḥ /
tasmin baliḥ spṛhāṃ cakre nendra īśvaraśikṣayā

tata airāvato nāma vāraṇendro vinirgataḥ /
dantaiścaturbhiḥ śvetādrerharan bhagavato mahim

airāvaṇādayastvaṣṭau diggajā abhavaṃstataḥ /
abhramuprabhṛtayo 'ṣṭau ca kariṇyastvabhavan nṛpa

kaustubhākhyamabhūdratnaṃ padmarāgo mahodadheḥ /
tasmin maṇau spṛhāṃ cakre vakṣo 'laṅkaraṇe hariḥ

tato 'bhavat pārijātaḥ suralokavibhūṣaṇam /
pūrayaty arthino yo 'rthaiḥ śaśvadbhuvi yathā bhavān

tataścāpsaraso jātā niṣkakaṇṭhyaḥ suvāsasaḥ /
ramaṇyaḥ svargiṇāṃ valgu gatilīlāvalokanaiḥ

tataścāvirabhūt sākṣāc chrī ramā bhagavatparā /
rañjayantī diśaḥ kāntyā vidyut saudāmanī yathā

tasyāṃ cakruḥ spṛhāṃ sarve sasurāsuramānavāḥ /
rūpaudāryavayovarṇa mahimākṣiptacetasaḥ

tasyā āsanamāninye mahendro mahadadbhutam /
mūrtimatyaḥ saricchreṣṭhā hemakumbhairjalaṃ śuci

ābhiṣecanikā bhūmirāharat sakalauṣadhīḥ /
gāvaḥ pañca pavitrāṇi vasanto madhumādhavau

ṛṣayaḥ kalpayāṃ cakrurābhiṣekaṃ yathāvidhi /
jagurbhadrāṇi gandharvā naṭyaśca nanṛturjaguḥ

meghā mṛdaṅgapaṇava murajānakagomukhān /
vyanādayan śaṅkhaveṇu vīṇāstumulaniḥsvanān

tato 'bhiṣiṣicurdevīṃ śriyaṃ padmakarāṃ satīm /
digibhāḥ pūrṇakalaśaiḥ sūktavākyairdvijeritaiḥ

samudraḥ pītakauśeya vāsasī samupāharat /
varuṇaḥ srajaṃ vaijayantīṃ madhunā mattaṣaṭpadām

bhūṣaṇāni vicitrāṇi viśvakarmā prajāpatiḥ /
hāraṃ sarasvatī padmamajo nāgāśca kuṇḍale

tataḥ kṛtasvastyayanotpalasrajaṃ nadaddvirephāṃ parigṛhya pāṇinā /
cacāla vaktraṃ sukapolakuṇḍalaṃ savrīḍahāsaṃ dadhatī suśobhanam

stanadvayaṃ cātikṛśodarī samaṃ nirantaraṃ candanakuṅkumokṣitam /
tatastato nūpuravalgu śiñjitair visarpatī hemalateva sā babhau

vilokayantī niravadyamātmanaḥ padaṃ dhruvaṃ cāvyabhicārisadguṇam /
gandharvasiddhāsurayakṣacāraṇa traipiṣṭapeyādiṣu nānvavindata

nūnaṃ tapo yasya na manyunirjayo jñānaṃ kvacit tac ca na saṅgavarjitam /
kaścin mahāṃstasya na kāmanirjayaḥ sa īśvaraḥ kiṃ parato vyapāśrayaḥ

dharmaḥ kvacit tatra na bhūtasauhṛdaṃ tyāgaḥ kvacit tatra na muktikāraṇam /
vīryaṃ na puṃso 'sty ajaveganiṣkṛtaṃ na hi dvitīyo guṇasaṅgavarjitaḥ

kvacic cirāyurna hi śīlamaṅgalaṃ kvacit tadapy asti na vedyamāyuṣaḥ /
yatrobhayaṃ kutra ca so 'py amaṅgalaḥ sumaṅgalaḥ kaśca na kāṅkṣate hi mām

evaṃ vimṛśyāvyabhicārisadguṇair varaṃ nijaikāśrayatayāguṇāśrayam /
vavre varaṃ sarvaguṇairapekṣitaṃ ramā mukundaṃ nirapekṣamīpsitam

tasyāṃsadeśa uśatīṃ navakañjamālāṃ $ mādyanmadhuvratavarūthagiropaghuṣṭām &
tasthau nidhāya nikaṭe taduraḥ svadhāma % savrīḍahāsavikasannayanena yātā // BhP_08.08.025* //
tasyāḥ śriyastrijagato janako jananyā $ vakṣo nivāsamakarot paramaṃ vibhūteḥ &
tasyāḥ śriyastrijagato janako jananyā $ vakṣo nivāsamakarot paramaṃ vibhūteḥ &
śrīḥ svāḥ prajāḥ sakaruṇena nirīkṣaṇena % yatra sthitaidhayata sādhipatīṃstrilokān // BhP_08.08.026* //
śaṅkhatūryamṛdaṅgānāṃ vāditrāṇāṃ pṛthuḥ svanaḥ /
devānugānāṃ sastrīṇāṃ nṛtyatāṃ gāyatāmabhūt

brahmarudrāṅgiromukhyāḥ sarve viśvasṛjo vibhum /
īḍire 'vitathairmantraistalliṅgaiḥ puṣpavarṣiṇaḥ

śriyāvalokitā devāḥ saprajāpatayaḥ prajāḥ /
śīlādiguṇasampannā lebhire nirvṛtiṃ parām

niḥsattvā lolupā rājan nirudyogā gatatrapāḥ /
yadā copekṣitā lakṣmyā babhūvurdaityadānavāḥ

athāsīdvāruṇī devī kanyā kamalalocanā /
asurā jagṛhustāṃ vai hareranumatena te

athodadhermathyamānāt kāśyapairamṛtārthibhiḥ /
udatiṣṭhan mahārāja puruṣaḥ paramādbhutaḥ

dīrghapīvaradordaṇḍaḥ kambugrīvo 'ruṇekṣaṇaḥ /
śyāmalastaruṇaḥ sragvī sarvābharaṇabhūṣitaḥ

pītavāsā mahoraskaḥ sumṛṣṭamaṇikuṇḍalaḥ /
snigdhakuñcitakeśānta subhagaḥ siṃhavikramaḥ

amṛtāpūrṇakalasaṃ bibhradvalayabhūṣitaḥ /
sa vai bhagavataḥ sākṣādviṣṇoraṃśāṃśasambhavaḥ

dhanvantaririti khyāta āyurvedadṛg ijyabhāk /
tamālokyāsurāḥ sarve kalasaṃ cāmṛtābhṛtam

lipsantaḥ sarvavastūni kalasaṃ tarasāharan /
nīyamāne 'suraistasmin kalase 'mṛtabhājane

viṣaṇṇamanaso devā hariṃ śaraṇamāyayuḥ /
iti taddainyamālokya bhagavān bhṛtyakāmakṛt /
mā khidyata mitho 'rthaṃ vaḥ sādhayiṣye svamāyayā

mithaḥ kalirabhūt teṣāṃ tadarthe tarṣacetasām /
ahaṃ pūrvamahaṃ pūrvaṃ na tvaṃ na tvamiti prabho

devāḥ svaṃ bhāgamarhanti ye tulyāyāsahetavaḥ /
satrayāga ivaitasminneṣa dharmaḥ sanātanaḥ

iti svān pratyaṣedhan vai daiteyā jātamatsarāḥ /
durbalāḥ prabalān rājan gṛhītakalasān muhuḥ

etasminnantare viṣṇuḥ sarvopāyavidīśvaraḥ /
yoṣidrūpamanirdeśyaṃ dadhāraparamādbhutam

prekṣaṇīyotpalaśyāmaṃ sarvāvayavasundaram /
samānakarṇābharaṇaṃ sukapolonnasānanam

navayauvananirvṛtta stanabhārakṛśodaram /
mukhāmodānuraktāli jhaṅkārodvignalocanam

bibhrat sukeśabhāreṇa mālāmutphullamallikām /
sugrīvakaṇṭhābharaṇaṃ subhujāṅgadabhūṣitam

virajāmbarasaṃvīta nitambadvīpaśobhayā /
kāñcyā pravilasadvalgu calaccaraṇanūpuram

savrīḍasmitavikṣipta bhrūvilāsāvalokanaiḥ /
daityayūthapacetaḥsu kāmamuddīpayan muhuḥ